Pas përfundimit të edicionit të dhjetë të “RinFest 2007”, pas suksesit të komedisë “Venecia”, si dhe aktiviteteve të shumta, Qendra Ndërkombëtare e Kulturës ka fituar një tjetër status: atë të një qendre multidimensionale. Aty gjen një sallë kinemaje, një sallë për ekspozita pikturash, ambient për spektakle, ka vend edhe për koncerte muzikore... Së fundi, edhe për teatrin ka një skenë, të cilën e ‘inauguroi’ me këmbë të mbarë komedia “Venecia”. Më tej akoma, drejtori i QNK Mujë Buçpapaj na tregon se projektet e reja nuk mbyllen këtu dhe ato ofrojnë surpriza...
Si kanë ecur deri tani idetë tuaja, për ta shndërruar QNK në një qendër të mirëfilltë ndërkombëtare të artit këtu, në Tiranë?

Ne po vazhdojmë të sendërtojmë atë lloj përzierje që kemi bërë ne, si staf i Qendrës Ndërkombëtare të Kulturës, për ta kthyer atë në një qendër të frekuentimit të përditshëm të artdashësve e t’i shtohet qendrave kulturore që realisht ka Tirana, si Teatri Kombëtar, Biblioteka Kombëtare, Galeria e Arteve etj. Në këtë drejtim, ne jemi duke investuar edhe nga financat tona, por edhe duke iu imponuar donatorëve të pavarur, edhe atyre shtetërorë. Ne themeluam së fundi edhe teatrin eksperimental, që është një zhanër që pëlqehet dhe artdashësit e dramës e pëlqejnë shumë, për shkak se ajo del nga klishetë e dramës klasike. Shijet ndryshojnë ndërsa brezat kalojnë dhe ajo që u mbetet menaxherëve dhe drejtuesve të artit është tu përshtaten këtyre shijeve me përdorimin e teknikave dhe sfondeve të kohës.

Si producent dhe mbështetës i komedisë “Venecia”, si erdhi ideja për një skenë të re për teatrin këtu në QNK?
Është ideja për të përshtatur një ambient të vogël për teatrin eksperimental, të dhomës dhe për një festival monodrama, pse jo, apo siç quhet ndryshe “One man show”. “Venecia” e arriti suksesin e saj, madje të papritur për ne, pasi nuk e prisnim këtë dashamirësi të vërtetë të publikut kryeqytetas. Sidomos nga media dhe njerëz të artit dhe skenës. Shpresoj që kemi nisur një traditë të mirë dhe tani njerëzit do të kenë një teatër të vërtetë në QNK. Unë u bëj thirrje dramaturgëve, regjisorëve, menaxherëve të artit skenik që të sjellin shfaqjet e tyre këtu dhe të hartojmë së bashku një kalendar aktivitetesh, duke shkuar drejt një festivali të teatrit eksperimental nga fundi i këtij viti, sikurse është menduar.

A i ofron skena e teatrit në QNK kushtet e nevojshme: akustikën, hapësirën?
Akustika është jashtëzakonisht e mirë. Është një sallë mjaft komode, edhe pse ka pak më shumë se 200 vende. Edhe ndriçimi është realizuar me pak investim nga ne dhe duke shfrytëzuar atë që ka qenë më parë. Për teatrin e dhomës, pra të vogël, është mjaft e mirë. Të paktën regjisorët dhe aktorët kanë dalë mjaft të kënaqur.

Ku po synon të angazhohet më tepër qendra që ju drejtoni, në publikun që ajo afron më shumë?
Ne synojmë të angazhojmë të gjitha moshat, qoftë si spektatorë, qoftë si pjesëmarrës në aktivitetet tona. Së shpejti, kemi një Panair të Fëmijëve, që do të ekspozojë nga të gjitha pavijonet: atë të veshjeve, të elektronikës, të lodrave e gjithçka që realizon industria e prodhimeve për fëmijë. Do të ketë edhe një teatër të kopshteve , me 25 shfaqje kukullash. Nëse teatri i kukullave realizon vetëm tre premiera në vit, unë vetëm gjatë këtij panairi vë 25 shfaqje teatrale për fëmijë. Pa përmendur të gjitha periudhat e vitit, kur ne bashkëpunojmë shumë mirë me teatrin e kopshteve, të të rinjve gjimnazistë, që kanë marrë pjesë edhe në një Festival Ballkanik, me një pjesë të Spiro Flloqit, që ne e vumë në skenë edhe në Kosovë e Maqedoni. Pra, jemi drejt krijimit të një qendre që stimulon kudo artin. Tashmë, po organizojmë fëmijët e shkollave 8-vjeçare për aktivitete të tilla, pasi ata të shkollave të mesme sapo përfunduan “RinFest”-in. ishte një festival jashtëzakonisht i mirë, që u përgatit për më shumë se tre muaj nga QNK, me koreografët dhe regjisorët e saj.

Cilat janë projektet më të afërta, në këtë kuadër?
Nga 28 maj deri në 3 qershor është Festivali i Fëmijëve të shkollave 8-vjeçare, Panairi i Fëmijëve, me të gjitha ekspozitat dhe pavijone. Nga 10- 14 panairi i grave, ku do të marrin pjesë bota e biznesit të gruas. Kjo bëhet për të stimuluar gratë që të merren me biznes, duke u treguar atyre shembuj konkretë të grave biznesmene, që drejtojnë ndërmarrje, kompani të rëndësishme biznesi. Do jetë një panair shumë i gjerë, që përfshin gra biznesmene nga Kosova, Maqedonia, Mali i Zi dhe nga Italia. Ka një numër shumë të madhe grash që merren me biznes, sidomos këto dy vitet e fundit. Është një politikë e qeverisë demokratike, pasi ne jemi zbatues të këtyre nismave të saj, të cilat QNK i implementon. Ka edhe disa projekte të Bashkimit Evropian, të të qeverisë Italiane, me të cilën kemi organizuar edhe një seminar të përbashkët, për përfshirjen e grave në biznes. Më pas, nga mesi i muajit maj është Festivali i Muzikës së Dhomës, panairi i Edukimit, që do të jetë nga 15- 19 maj, i cili do të jetë gjithashtu i rëndësishëm. Këto vetëm për majin, pasi në qershor kemi të tjera aktivitete.

Sa shfaqje në ditë bëhen në QNK, me këtë intensitet që ka aktualisht?
Ndodh që bëhen edhe 5 shfaqje në ditë. Në këtë moment po zhvillohen disa aktivitete, një veprimtari të Javës Kulturore Evropiane, ka një ekspozitë të studentëve, një koncert të të rinjve, është shfaqur premiera e komedisë “Venecia” dhe është mbyllur nata finale e Festivalit të të rinjve rajonalë. Është një denduri veprimtarish, saqë edhe pse kemi dëshirë për të bërë projekte, menaxhimi i tyre bëhet gjithnjë e më i vështirë. Ne përpiqemi që të paktën këto veprimtari të jenë të një niveli mbi mesatar dhe jo drejt një produktiviteti masiv, por një cilësie në rritje. Këtë ne po e synojmë. Të gjitha prurjet, jo vetëm ato që ne organizojmë, të jenë të një niveli të lartë. Po përmbushim synimin e qeverisë, që prej fundit të gushtit e këtej QNK do të jetë një të arteve moderne, multidimensionale, me veprimtari të muzikës, filmit, teatrit, të arteve vizuale dhe spektaklit. Kemi organizuar prej disa muajsh panairin e arteve vizuale, ku morën pjesë 500 piktorë dhe tani do ta rimarrim përsëri. Po ashtu, edhe Panairin “Libri për të Gjithë”. Gjithashtu, po synojmë ngritjen e një fondi të veprave të arteve vizuale, në mënyrë që të fusim edhe tregun e shitjes së këtyre veprave. Ai u themelua me panairin e arteve pamore, EkspoArt 2006 dhe tani do të realizohet sërish, në mënyrë që veprat e krijuara nga artistët të shiten në këtë panair. Siç bëhet në praktikat ndërkombëtare. Pas rikonstruksionit, që do të jetë shumë shpejtë, pasi fondi prej 6 milionë eurosh është dhënë dhe ministri Pango është i interesuar që procedurat të mbarojnë shpejt. Përveç sallës së teatrit, dacit, ekspozitave, ligjëratave e leksioneve, ai ka ndërhyrë që të ngrihet një Bibliotekë me të gjithë aksesorët e nevojshëm, me sallë leximi dhe shumë tituj veprash. Në mënyrë që nxënësit dhe studentët, që nuk kanë mundësi të blejnë shumë libra, të vijnë dhe të shfrytëzojnë literaturën që ne do të ofrojmë. Është një projekt, që do të bëhet brenda një viti. Do të ofrojë internet, jo me skedarë të vjetër, por me shërbim të dixhitalizuar të librave në fond. Kemi kontaktuar me shuam institucione ndërkombëtare, të cilat janë ofruar për të dhuruar mijëra tituj librash për këtë bibliotekë.

__________________
Be aware of what u do in the past, because of the future consequences!