Quhet Andon Dafa dhe është historia e një djali 29 vjeçar që nuk dëgjon më si pasojë e një temperature të lartë në moshën katër vjeç, duke humbur fatkeqësisht dhe përgjithmonë dëgjimin. Më befasoi. Më goditi kjo histori. Mezi kam pritur të enjten që të më vinte në studio, në emision tim të 141 Zonë e Lirë. Një talent i vërtetë që zbukuron makinat me aerograf. Ose me sprite, siç jemi mësuar t'i themi ndryshe. Andon Dafa është një piktor i vërtetë dhe i pazakontë që prej vitesh ka mahnitur grekët, me të cilët ka bashkëjetuar për tetë vjet në vendin e tyre.

Shkollën e ka mbaruar në shtetin helen, flet shumë mirë greqisht dhe ka vetëm një vit që është rikthyer në Tiranë. E gjeni fare thjesht. Ka nje servis te Restorant "Durrësi", mu pranë markatës, një servis ku me dhjetra makina shkojnë çdo ditë për t'u zbukuruar. Bën gjëra të papara Andoni…Po pse u kthye nga Greqia? Mezi po prisja t'ju a rrëfeja historinë e këtij personazhi të pazakontë, i cili nuk dëgjon më, por që kur flet, ju nuk do ta kuptoni kurrë që ai është pa vesh…

Drama e jetës së Andonit ndodhi kur ai ishte vetëm katër vjeç. Një temperaturë e lartë ia humbi dëgjimin. Fillon të ndjehet i fyer nga fëmijët e tjerë që e tallin dhe rri në shtëpi me orë të tëra pa dalë në rrugë si moshatarët e tij. Deri në moshën 5 vjeçare bënte gjithçka me dorën e majtë dhe normalisht të gjithë kujtonin se ishte sallaks. Por një gjë krejt e papritur ndodh në jetën e tij. Ndjen që dora e tij e djathtë nis të forcohet dhe fillon ta përdorë atë fuqimisht…Qe nga ai moment nis të pikturojë dhe lodrat e tij më të dashura bëhen lapsi dhe letra. Kur Andoni ishte vetëm 1 vjeç e gjysem, e vendosin në një tepsi te madhe me vegla (një zakon krahinor) nga ku ai zgjidhte lapsin, por qante me të madhe kur ia merrnin. Buzëqeshte sërish kur ia rikthenin Sipas këtij zakoni, mamasë së tij i thonë që Andoni i vogël do të bëhej piktor. Dhurata më e bukur e fëmijërisë ka qenë një kuti me lapsa e dhuruar nga nëna e tij, të cilën ai e ruan edhe sot me shumë fanatizëm…

Vetëm në moshën 21 vjeçare bie ne kontakt me aerografin…Ose me sprite-in…
I bën përshtypje një makinë në Greqi, e cila ishte pikturuar, afrohet të kuptojë se në çfarë mënyre ishte bërë. Pasi e kuptoi se si ishte transformuar ashtu ajo makinë, punon pa reshtur deri sa bën lekët për ta blerë aerografin që kushtonte 1200 euro. E blen nëpërmjet internetit në Gjermani. Fillimisht e provon mbi një bluzë për të kuptuar si funksionon. Kamioni i parë që pikturon ka qenë i një firme greke kamionash. Mbi atë kamion shënon emrin dhe firmën e tij si dhe numrin e telefonit.

Që atëherë vazhdon të ketë një sukses të paparë. Me mijëra makina dhe motorra kalojnë në duart e tij. Andon Dafa ka qenë i pari që ka futur këtë metodë pikturimi makinash në Greqi. Madje ai ka zbukuruar makina të cilat kanë ardhur enkas për të nga Gjermania dhe Italia. Andoni ka fituar 2 çmime në Greqi: Track festival 2003 dhe Track Europian festival 2005. I fitoi këto çmime me një Honda Civic. Por fama nuk do të zgjaste shumë dhe Andoni detyrohet të largohet nga Greqia. Sepse filluan t'i vjedhin punët duke i fshehur emrin dhe firmën mbi kamionat që zbukuronte. I kërkojnë të bëhet grek, por refuzon dhe vazhdon të paguajë taksat e qëndrimit në Greqi. Deri sa kthehet në vendin e tij në vitin 2006 pas 8 vjetësh qëndrimi në vendin fqinj. Më tha se u rikthye me mallin e fëmijërisë.

__________________
The heaven's sound is composed inside your heart, listen to its beat to syncronize your life onto the angel's steps.