Personazhe!

Administratori · #1 25-01-2006, 20:25

Fiori Dardha, gazetarja që sfidon Vip-at

Fiori, pas Bla bla bla -së, vjen me dy projekte “Paparaci” dhe “Nata e çakejve”. Një nisje e mbarë për 2006?
Paparacin patët mundësi ta ndiqni që në 3 Janar, kurse për të dytin do të duhet të prisni dhe një muaj para se të fillojë. Te i pari do të keni mundësinë që thashethemet- të gjitha e kanë një bazë- t'i ndiqni të ilustruar me xhirime apo foto që do serviren nga agjencia ALNA.

Dukesh mjaft e sigurt në suksesin që mendon se do të kesh në A1 televizion...
Kam qenë e vetme në marrjen e audiencës në TV Koha. Shikuesit i kam tërhequr unë, pa asnjë bashkëpunëtor- përveç një operatori dhe montazheri. Te A1 do të sjell audiencën time.

Edhe pse A1 është fare i ri në treg...
Në momentin që kam kaluar tek Koha, ajo kishte vetëm tre muaj që ishte hapur (rinovuar). Mua nuk me njihte asnjeri deri para një viti e gjysmë, ndërkohë që tani po të bëjmë një xhiro bashkë në Tiranë, në dhjetë veta, tetë do të më flasin Bla bla bla .

Nuk të vjen pak keq që tashmë atë emër e ke dorëzuar?
Bla bla bla -ja është e gjitha e imja, aty jam e gjitha unë, përderisa ata nuk kanë ndryshuar as siglat e emisionit. Ai emision më përket vetëm mua dhe këtë e them me plotë gojën. Tani qe kam ikur unë, emisioni Bla bla bla ka një rënie drastike, dhe më vjen keq që prodhimi im është degraduar në atë mënyrë.

E ke ndjekur së fundmi?
Ma kanë thënë shumë njerëz të tjerë prandaj, nuk kam të drejtë të flas për një gjë timen; jo gjithmonë gjërat që bën të pëlqejnë, po që ai emision mund të bëhet vetëm nga Fiori kjo është e sigurt. Sepse është një ide e imja, është një prodhim i imi, një format i imi, askush tjetër nuk e bën dot Fiorin.

Nuk u përpoqe ta regjistroje si tëndin?
Ishte një Copyright i TV Koha, sepse unë atë emision aty e nisa dhe nuk mund ta merrja.

I dëmton ikja jote?
Kishin siguruar audiencën e se shtunës, me largimin tim do t'u iki dhe audienca e asaj mbrëmjeje.

Nuk të bënë një ofertë më të mirë (të Kohës) ?
Patjetër që më bënë ofertë tjetër, por nuk e pranova. Nuk doja që pronarët e Kohës të mendonin që unë po bëja presion që të më rritet rroga dhe pastaj të vazhdoja të rrija aty sepse nuk kisha ku të ikja më. Unë kisha dhe oferta të tjera.

Më e mira erdhi nga A1?
Ishin disa, por zgjodha A1 dhe jo televizionet e tjera sepse ishte Koço Kokëdhima ai që arriti të më bindte se unë mund të bëj atë që dua .

Çfarë është ajo që do?
Zoti Kokëdhima ishte i vetmi që më ofroi staf. Ndaj aty unë do të bëj dy projekte- Bla bla blan e vjetër që do të quhet Paparaci dhe spektaklin e ri Nata e çakejve .

Nata e Çakejve? Tingëllon paksa i frikshëm edhe pse kam dëgjuar që do përngjasojë me “Le ienne” (Hijenat) e transmetuar të Italia 1 dhe i drejtuar nga Alesia Markuci...
Ai do të jetë një spektakël me natyrë investigative. Këtë gjë kam dashur të bëj dhe kur fillova Bla bla blan , por nuk m'u ofrua staf. Tani i kam të gjitha mundësitë teknike dhe organizative. A1 ka krijuar Departamentin e spektaklit “Nata e çakejve”, për të cilin do të punojnë plot 30 veta. Ndër ta dhe shumë emra të njohur të televizionit.

Që janë...
Bujar Kapexhiu do të jetë skenaristi, Kledi Kapexhiu regjisori dhe unë do të jem drejtoresha e prodhimit.

Nisur nga përvoja në televizionin tjetër nuk të tundon ideja ta kesh të gjithin tëndin (me të drejta)?
I përket A1 televizion sepse unë këtë ide e gjeta të gatshme. Në momentin që mua më thanë do bësh këtë, kemi këtë ide, pranova me kënaqësinë më të madhe, sepse ishte ajo që unë realisht doja të bëja. Në dhjetor firmosa një kontratë pesë vjeçare më A1 televizion dhe kam besim te të dy palët.

Pas Bla-bla-blasë , vjen Paparaci e më pas në çdo lëvizje të mundshme çfarë do të zgjidhje?
Po iki do t'i vë një emër tjetër emisionit, do ia vë Fiori, dhe kështu do të mbetet vërtet i imi.

“Paparaci”, si ai i Enriko Papit nga Kanale5, mos duket pak si tepër i huazuar?
Paparaci nuk do te jetë vjedhje, sepse njerëzit janë mësuar me emisionet që bëj unë. Ajo vajza që bën Bla bla blan tani ne TV Koha mendoj se ma ka vjedhur emisionin. Atë vajzën që del ne ekran nuk e njoh, sinqerisht që nuk e njoh, por di që njeriu që e bën vërtet, pra që jep idetë dhe shkruan komentet është një ish shoqja ime. (Kot nuk thonë që i yti ta fut) Ha ha ha! Kam bërë një sakrificë, kam lënë kafen e darkës për të ndjekur atë Bla bla bla -në e re qe po bën TV Koha, dhe konstatova se ai emision me të vërtetë është degraduar.

Megjithatë duket sikur edhe të vjen pak mirë që nuk ka qenë në lartësinë tënde, apo jo?
Kjo ka dy anët e medaljes. E para që njerëzit e kanë kuptuar se si e bëj unë nuk e bën asnjeri tjetër Bla bla blan . Nuk e di se sa profesionale jam treguar me ato që kam bërë por e di që është një stil i imi, të jap një shembull: sikur Zonë e Lirë të bëhej nga Andi Bejtja, nuk do të ishte më “Zonë e lirë” se atë emision mund ta bëjë vetëm Çani.

Dy emisione në të njëjtën kohë. Nuk po të rëndojnë pak Fiori?
Nuk më është kërkuar që të bëhet Paparaci , por kam dashur vetë unë që t'i bëj një dhuratë A1 televizion, sepse “Nata e çakejve” fillon në shkurt, dhe i binte që dy muaj unë të rrija pa dalë ne ekran.

Ç'do të thotë dhuratë në këtë rast?
Paparaci n e mora përsipër në mënyrë vullnetare. Do vazhdoj ta bëj që njerëzit të vazhdojnë të kënaqen me mënyrën time të të ngacmuarit. Do vazhdoj ta bëj se nuk mund të rri dot pa thashetheme. Do vazhdoj ta bëj për t'u treguar te tjerëve se unë di ta mbroj punën time dhe nuk mund ta harroj lehtë formatin e emisionit që më bëri të njohur.

Si i ke raportet me paranë?
Unë jam një njeri që e dua shumë lekun, nuk rri dot pa të pavarësisht se rrogën e shpenzoj për tre ditë dhe pjesën tjetër te muajit e kaloj duke iu lutur prindërve që të më japin para. Më duhen lekë për të paguar një faturë prej 500 mijë lekësh (të vjetra) për celularin. Gjithmonë kam pasur një rrogë shumë të mirë, përjashto kohën kur punoja në Vizion Plus si amatore në fushën e televizionit me një rrogë minimale- por prapë isha e kënaqur. Tek TV Koha kam marre një rrogë shumë të mirë, por këtu ku jam tani jam akoma me mire.

Po më bën kureshtare për shumën...
Preferoj mos ta them. Tani që futa këmbët në televizion, tani që bëra një emër kam të drejtë dhe të pretendoj-gjithmonë duke e justifikuar pagesën me punën time. Koço Kokëdhima më ka thënë një batutë “paraja është gjëja e fundit në një biznes”. Nuk e kam kuptuar asnjëherë këtë shprehje dhe gjithmonë kam reaguar me humor. Megjithatë më ka thënë edhe diçka tjetër “Paraja është gjëja më me tepricë në treg” dhe kjo është shumë e vërtetë.

Në pozicionin e paparacit , të njohin, ma shuan dot kuriozitetin se çfarë do të bësh mes çakejve?
Do merrem me organizimin dhe drejtimin këtij spektakli, ku do ndërthuret studioja me terrenin. Gjithçka do të serviret me humor dhe satirë pa përjashtuar dhe elementet argëtues. Nuk do te kem balerinë, kur të jetë e nevojshme do të kërcej dhe vetë.

Je futur në kurs vallëzimi?
Jo, kam ca miq balerinë që do të më japin instruksione të vogla baleti, por që gjithçka do ta bëj vetë. Unë kam bërë 12 vjet violinë, besoj se kam një vesh absolut, kam një zë… zë nuk kam fare (ha ha ha). Nuk ka ngelur njeri pa u bërë këngëtar. Ne shyqyr zotit kemi dhe Radio+2. Me ndihmën e DJ dhe aparaturave zëri im do të tingëllojë bukur në veshët e teleshikuesve. Këto do të jenë thjesht garnitura e gjithë spektaklit sepse 70 % e këtij projekti do të jetë në terren.

Çfarë do të kapni nga terreni?
Do mundohemi të sjellim të gjalla ne emisionin tonë ato absurditete që ndodhin në realitetin shqiptar. Do ironizojmë dhe diskriminojmë fenomenet negative.

Pak a shumë si e nisi Fiks Fare?
Fiks Fare nuk mund te jete shembulli më i mirë për të krahasuar spektaklin “Nata e Cekenjve”. Unë mendoj që Fiks Fare ka një defekt shumë të madh, viktimën e bën aktor, nuk e di sesa më kupton apo jo. D.m th nëse unë jam viktima e shkoj dalë para ekranit për te pasqyruar hallin tim, për autoret e emisionit konsiderohem thjesht si një aktor që shfrytëzohet vetëm për te fituar audiencën. Ndërsa në spektaklin tim çdo personazh, rrethanë, apo detaj që do të vijë, nuk do të ketë për qëllim të përdorë viktimën për të bërë skup televiziv.

Asnjë person konkret?
Protagonist do të ketë, por asnjë nuk do të dalë me figurë në ekran. Do të jetë çdo gjë e inskenuar. Ne do të dalim për të xhiruar në terren, madje dhe me kamera të fshehta, por asnjë nga ata që duan të servirin hallin e tyre në ekran nuk do të dalë fytyrë zbuluar. Neve nuk na intereson që të godasim individë të veçantë, por duhet të godasim fenomenet, dhe nuk do ta bëjmë këtë vetëm për të rritur audiencën. Do jemi ne që do e zbulojmë një çështje, që do e çojmë në prokurori, që do e ndjekim prokurorinë gjatë gjithë hapave. Një çështje do të quhet e përfunduar nga ne vetëm kur gjykata të japë vendimin. Në cilësinë e shefes së këtij produksioni, mua nuk më intereson që të shfaq një zyrtar që ngacmon seksualisht sekretaren dhe ta diskreditoj në ekran, nuk është ky qëllimi. Përderisa nuk arrin dot ta zhdukësh këtë fenomen nuk ia vlen që të merresh. Ne nuk duam të bëjmë viktima, ne duam që të zgjidhim probleme. Ne do të jemi Avokati i Popullit, duke përligjur thënien “Media është pushteti i katërt”.

Pak më parë më the se kishe një listë personash që nuk duhet të përmendeshin aspak në Bla-bla-bla. Je e sigurt që as këtu nuk do të kesh një të tillë?
Mua nuk më intereson të merrem me jetën private të njerëzve, aq më tepër që projekti ynë nuk do të jetë kamxhik gjobash. Ne asnjëherë nuk do prekim anën familjare. Nëse tek emisioni Paparaci unë do të merrem me thashetheme, të spektakli “Nata e çakejve”' do të ketë vetëm fakte. Çdo njeri është i lirë të vijë në studion televizive për të përligjur apo përgënjeshtruar atë qe ne kemi thënë me fakte. Të jeni të sigurt qe nga ana e shefit tim nuk do të vijë asnjë porosi për individë të caktuar dhe nuk do të ketë asnjë lloj censure. Suksesi i gazetës Shekulli, revistës Spekter dhe i radios +2 ka treguar se Kokëdhima është një menaxher shume i mire dhe di vërtet të bëjë media. Jam e bindur se shumë shpejt dhe televizioni A1 do të jetë në majat e medias elektronike.

Sa të mbrojtur do të jenë gazetarë që do të “investigojnë”?
Gazetarët aty ku shkojnë do të paraqiten me logon e emisionit. Ne nuk mund të japim siguri absolute. Nuk ka këtu jemi të mbrojtur, apo s'jemi të mbrojtur. Në qoftë se njerëzve nuk do t'u biem kot në qafë, atëherë nuk ka rrezik. Besojmë në ekzistencën e shtetit.

Të ka ngacmuar ndonjë që ka mbetur i pakënaqur nga komentet në Bla bla bla ?
Kam pasur plotë duke filluar që nga fyerjet e thonjtë në fyt. Nuk kanë lënë njeri të familjes pa më sharë. Kam menduar ta lë emisionin kur kam pasur kërcënime se nuk dija nga t'ia mbaja. Këto kërcënime me kanë ardhur nga njerëz që kanë pasur shumë pushtet në atë kohë. Them se njerëzit nuk duhet t'i prekësh tek nderi dhe tek lekët- tek nderi e kam anashkaluar duke zgjedhur një mënyrë servirjeje me humor, ndërsa tek lekët nuk e kam bërë ndonjëherë ndonjë gjë të tillë. Për fjalë goje nuk të vret njeri.

Ke bërë thashetheme me “porosi”?
Asnjëherë nuk kam pasur rekomandime për VIP-at që unë kam nxjerrë në ekran. Rekomandimet kanë qenë për njerëzit që s'kam nxjerrë asnjëherë në ekran.

Të ka ndodhur që të janë lutur për të dalë në intervistë, qoftë edhe me pagesë? Si i përzgjidhje politikanët që intervistoje në qershor?
Gjatë fushatës elektorale emisioni im ka pasur minutazhin e monitorimit (nga KKRT) brenda, i vetmi nga gjithë emisionet argëtuese. Dhe kam qenë e detyruar që njëherë të nxirrja të PD, të PS apo LSI. Nuk po them që nuk më janë ofruar para, por nuk kam abuzuar kurrë. Në punë nuk bëj kompromise.

Kë do të veçoje nga personazhet e intervistuar?
Nga gjithë personazhet e mi do doja të veçoja Rudina Xhungën se asnjëherë nuk kanë pasur mundësi ta shohin më njerëzore sesa tek emisioni im. Ka qenë një intervistë shumë miqësore, edhe pse ishte hera e parë që takoheshim. Dua të veçoj Sinan Hoxhën për njerzillëkun që ka treguar në emisionin tim; i paarritshëm në ****zmën e tij ka qenë Spartak Ngjela, i cili ka dhuruar vërtet show në Bla bla bla ; Edi Paloka për batutat e tij; Blendi Klosi ka qenë shumë i veçantë dhe i natyrshëm.

Personazhi që ke përmendur më shpesh?
Lul Basha ka qenë personazhi që më ka ofruar më tepër material; ka qenë i pranishëm herë me intervistë dhe herë me komente ironike.

Është bërë i gjallë pas komenteve?
Ka reaguar. Më ka marrë në telefon e më ka përgëzuar. Do të ishte shumë mirë sikur të gjithë të reagonin si ai. Mua më duhet që personazhet që vijnë në emisionin tim t'i përshtaten natyrës së tij. Më vjen pak keq sepse tani nuk më marrin dhe aq seriozisht. Dikur shqetësoheshin shumë shpejt për thashethemet që unë u servirja.

I sajoje vetë?
Kur i kisha në biseda mund të them se shumica e provokimeve që u bëja ishin të sajuara.

Cila është pyetja që nuk do të doje të ta bënin asnjëherë?
Si arriti Fiori deri këtu ku është? Ose ke te dashur?

Më duket se e kam dëgjuar dhe nga ty këtë...
Unë e kam bërë po varet shumë nga mënyra si e them, sepse nuk i intereson njeriu nëse ke apo jo të dashur, por si e ke dhe kush është.

Kush është i dashuri yt?
Tashme është i fejuari im. E quajnë Donard, është regjisor dhe pedagog në akademinë e arteve. Është një nga të paktët persona që di gjithçka për mua dhe më njeh shumë mirë. Më ka kritikuar vazhdimisht për atë që unë bëj. Ka qenë i vetmi person që nuk ka pëlqyer asnjëherë asnjë emision timin- përveç grimcave. Ai përqendrohet shumë te detajet dhe më ka mësuar që t'u kushtoj rëndësi atyre. P.sh në një intervistë mbahet mend vetëm një pyetje ose vetëm një përgjigje.

Njihesh për një paraqitje ekstravagante në intervista...Më kujtohet vjet kur ishe e ftuar te Zonë e Lirë dhe drejtuesi të bëri të pështyje në studio.
Varet si e merr. P.sh derisa ai më lejoi të pështyja emisionin e tij, për mua ishte Ok. Unë për vete kështu e pashë. Këtu nuk ia vlen të gjykohem unë. Pështyma është një efekt aspak i këndshëm televiziv dhe aq më tepër spektakolar. Unë në emisionin tim nuk do e bëja kurrë. Ai që ma ka kërkuar, ka menduar se po bën spektakël kurse unë mendova se i pështyva emisionin dikujt.

Kush nga drejtuesit televizivë të pëlqen më shumë dhe kush më pak?
Mua Arian Çani më pëlqen. Kam dëgjuar shumë të tjerë që thonë: “Unë nuk e bëj atë që bën Çani, ai është i pacipë.”. Për mua sa më i pacipë të jetë një njeri që del në ekran aq më mirë bën. Këtë epitet ma kanë vënë dhe mua, por që nuk më shqetëson aspak. Kurse prezantuesja që më acaron është Zhaku. Dua të shoh se çfarë ka ai emisioni i saj për tu njohur me tematikën dhe personazhet, por nuk arrij dot ta çoj deri në fund. Më acaron sepse më duket shumë e stisur, nuk ka asgjë të vetën. Zhaku ka marrë gjërat më të këqija të Mimoza Ahmetit, e cila është një femër me shumë botë.

Je më shumë e njohur, apo e suksesshme?
Do të doja që njerëzit të më përkufizonin më shumë me epitetin e suksesshme. Gjëja që e them pa diskutim është se jam më e njohur. Është fakt nuk e mohoj dot. Emisioni im bëri bum që dy muajt e parë të transmetimit. Ndonjëherë them se është çështje fati sepse kjo ishte diçka që nuk ishte bërë ndonjëherë në Shqipëri dhe për këtë më ka ndihmuar shumë tipi im. Unë jam shumë strikte në punë, jam shumë e egër, bëhem ndonjëherë shumë e bezdisshme sa them me vete: “O Zot si durojnë këta që punojnë me mua!”.

Ke marrë më shumë vlerësime pozitive, apo negative për emisionin tënd?
Mund të them që kam marrë shumë vlerësime pozitive. Më vjen keq në Shqipëri nuk ka një matës audience dhe këtë gjë jam munduar ta bëj vetë me telefonata. Pas emisionit telefonoja me dhjetëra dhe qindra vetë e i pyesja: “Çfarë emisioni keni ndjekur sot?” Edhe kur janë përgjigjur Bla bla bla , nuk e kam mbyllur me aq por jam përpjekur të kuptoj nëse është ndjekur realisht, apo jo. Këtë gjë e kam bërë sistematikisht për një vit e tetë muaj, ndaj e quaj publikun gjykatësin më të mirë të punës sime.

Administratori · #2 25-01-2006, 20:29

Cilët janë engjëjt e Hygertës

Më e bukura e Shqipërisë së '95s dhe vajza e spektakleve shqiptare tani ka filluar të mendojë më shumë për veten. Si? Duke u veshur në të bardha. Për të stampuar çastin magjik nën inicialet HS “Hygerta's Angels”.

Nga Estela Ziu
Foto: Eliano Kalemi

Fati ishte me bukuroshen durrsake kur Pierre Cardin vendosi kurorën mbi kokën e Hygertës. Ashtu si atëherë kur prindërit vendosën ta thërrisnin me atë emër, i cili sërish për shansin e saj ishte i veçantë. Plot dhjetë vjet ne botën e lëkundur të spektaklit e reklamave do t'i mësonin Hygertës që tashmë ky nuk do të ishte vetëm emri me të cilin të gjithë e njohin. Nuk ngurroi dhe e shkroi me të madhe në një fasadë pallati, pikërisht pranë një prej atyre zemrave më të reja të kryeqytetit; aty ku kryqëzohen rrugët që të çojnë në zonën më trendi të Tiranës së Re. Nuk priti të bëhej nuse për të treguar sesi rri fustani që shënjon fundin e beqarisë (se kur as ajo vetë nuk mund ta thotë, edhe pse tërheqja e përkohshme nga televizioni kishte të bënte pikërisht me një vendim të saj për jetën private), por për të përdorur imazhin e saj si karremin e bardhë të ditës më të bukur të një femre. E ka vendosur botën nën këmbë. Të paktën kështu duket teksa rri një kat sipër tokës dhe vështron nga vitrinat e mbushura me nuse e dhëndurë një tiranë që ecën. Ashtu si dhe ajo vetë- me hapin e kohës.

Gjithçka arriti të kursente nga vajtje-ardhjet e përjavshme në Prishtinë, prishi sa hap e mbyll sytë në veshje- këtë herë jo për veten, por për të tjerë. As kur këndoi Barbin në skenën e festivalit, apo koketën e “Moulin Rouge” te Netët e Klipit dhe as kur preku Majën e Olimpit në sallën e Teatrit Kombëtar nuk është ndjerë më mirë se tani. “E kisha ëndërr diçka timen, në fillim mendova për një dyqan veshjesh, por ideja nuk më joshte dhe aq. Fustanet e nuseve janë diçka më sublime dhe romantike. Kap shkëlqimin e syve të vajzave që i provojnë ato. Është dhe kënaqësi, dhe biznes.”.

Kur stilisti francez vendosi kurorën mbi kokën e Hygertës, ndoshta me mënyrën e vet e bekoi atë. Që prej asaj dite bl**** vizatimi mund t'i gjesh sa nëpër shtëpi ashtu edhe në folenë e saj të engjëjve. “Edhe në spektakle kam vënë idetë e mia për veshjen. E kam pas qejf stilimin, ndoshta më vonë do të krijoj edhe vetë. Në shumicën e bl****ve ka fustane të vizatuara duke dashur të bëj edhe një linjë timen, sigurisht pa pasur nevojën të bëjë një punishte, pasi ato mund të realizohen edhe jashtë vendit.”. Në përzgjedhjen e fustaneve është përpjekur të tregohet e kujdesshme, si për të parashikuar të gjitha llojet e shijeve; që nga fustanet tipike të Hirushes e deri te ato më ekstravagantet në portokalli. “Mund të zgjedhësh atë model që do, shumica janë të punuara me dorë. Janë të atilla që të plotësojnë shijet e shumicës së femrave shqiptare të cilat zakonisht nuk duan gjënë e thjeshtë që luan vetëm me format”.

Vetë ka sakrifikuar orët e ditës- për të qenë aty poshtë ku jeta vazhdon- që të jetë vetë ajo udhërrëfyesja e shijeve. Madje pohon se këto foto i ka bërë pikërisht të tërheq vajzat që besojnë në imazhin e saj.

Sigurisht që do të rikthehet në televizion. Është zhdukur përkohësisht për të besuar tek diçka më e madhe sesa karriera televizive. Pasi për dy vjet e gjysmë u bë fytyra e Gërvisht e Fito , tani është rehatuar me Eminflex . Me këtë të fundit ka një kontratë që përfundon me fundin e 2006-s. Falw saj merr një pagë e cila i lejon që këto kohë të mendojë e qetë për engjëjt e saj. Vetëm se mos prisni që aty të shihni krijesa me flatra. Është një emër që i shërben supersticiozitetit të Hygertës. Angel quhet mbesa e saj e vogël, emrin e së cilës tezja e ka përdorur si ogur të mirë.

Prania e Hygertës
Ka ditur të jetë jo vetëm e bukur; ka kënduar, aktruar dhe prezantuar. Pas shpalljes Miss Albania është njëra nga drejtueset e tri festivaleve të dimrit radhazi: më 1997, më 1998 dhe më 1999. Dy vitet e para drejton edhe dy festivalet e pranverës. Prezanton në “Miss Shqipëria 2000” dhe në “Miss Shqipëria 2002”, në “Mbretëresha e Detit 2001”. CV-ja e saj si prezantuese vazhdon me “Netët e Klipit Shqiptar 2001”, prapë më 2004, në “Miss dhe Mister Kosova 2002”, në emisionet “Sport and Shou”, “Kolazh”, “Zoom”, mandej në Kosovë, ku ka drejtuar spektaklet “Shou i së shtunës”, “Ndryshe nga të tjerët”. Një vit më parë ishte duke përzgjedhur fituesit e Bingos kosovare. Pjesa e dytë e 2005-s ishte një relaks për t'u rikthyer tashmë me një biznes.

Administratori · #3 25-01-2006, 20:44

Mashkulli Perfekt - George Clooney

Aktor, regjisor, producent... një dashnor i pavëmendshëm dhe shumë kërkues... një “gjah” që askush nuk e ka kapur akoma...Narcizizën i tij? Legjendari: E thërrasin Gorgeus George apo thënë ndryshe “i madhërishmi”. Arma vdekjeprurëse: një buzëqeshje ndihmëse që të bën për vete...për më tepër, ai është një ujk i vetmuar që shfaqet, të josh dhe largohet...Për një të tillë gjithçka mund të tolerohet ose thuajse gjithçka, sepse ... nuk të shqetëson asnjë e metë e tij...gjithçka e tij është e adhurueshme ... Ai të bën të ndihesh si mbretëreshë...

Në foto na paraqitet një burrë i pafalshëm. Një orë e Milano-da-bere. Pallto deveje nga të Gordon Gekko në Wall Street. Portreti në këto foto...na prezanton me një burrë të mrekullueshëm, me një orë të mrekullueshme, një pallto të mrekullueshme dhe gjithçka tjetër të tillë. Rezultati nuk është vetëm shuma e të gjithave. Ekziston edhe një konstante, të cilën dinë ta llogarisin edhe më injorantët në fushën e algjebrës: burri në këto foto është ai, George Clooney. Ai është si e bardha dhe e zeza, si Martini, i lehtë dhe gazmor. Nuk ka asgjë për t'u shpjeguar, asgjë për t'u diskutuar, është perfekt. Duket se nuk ka asgjë njerëzore. Të ishte njeri, do të kishte të meta. Do t'u ngjante miqve të tij, kolegëve, aktorëve të tjerë.

Do të ishte si Brad Pitt apo Matt Demon. Në mesin e tyre dhe në setin e filmit perfekt Ocean's Eleven , ai arrin të jetë si Andy Garcia, një njeri që me pallto deveje dhe me një orë të madhe dore, të jep direkt pamjen e atij që duhet të kishte: pronar i një kazinoje (mesa duket George dhe Brad po hapin me të vërtetë një të tillë në Las Vegas. Me vulën e George, ajo do të përbëjë një revolucion estetik dhe kulturor). Ndoshta njeriu i vetëm në të njëjtën lartësi me George, është Johnny Depp. Edhe ai është i fiksuar në filmat impenjativë, intelektualë dhe “me mesazhe”. Megjithatë, superioriteti i George ndaj Johnny-it është tepër i dallueshëm: ndërkohë që Depp është martuar, ka bërë fëmijë, George ka zgjedhur të jetë sentimentalisht i paqëndrueshëm. Është sikur na ushqen me iluzionin se ka ndenjur beqar për ne...i kapshëm, i disponueshëm, i lirë...Kuptohet, fansat e kanë të papërtypshme ta imagjinojnë në pantofla, me fëmijët që e mërzisin sepse i ndihmon në pjesëtimet me tri shifra dhe me një grua që i bërtet se pse nuk i ka hedhur plehrat.

Është e vërtetë që George është njeriu që në filmin “Një ditë të rastësishme” , ia doli ta bënte sexy një robdëshambër leshi me ngjyrë kafe. Është e vërtetë që i ka mbijetuar deri edhe kostumit me thumba që vishte tek filmi Batman. Është e vërtetë gjithashtu që superioriteti gjenetik i George është i brendshëm dhe i konsoliduar dhe nuk ka nevojë për demonstrime të mëtejshme, por ne e preferojmë beqar të regjur, asnjëherë të veshur, qoftë edhe gabimisht, me pantofla. Neve na pëlqen ta imagjinojmë perfekt, ashtu siç ishte në Ocean's Eleven , një film nga i cili askush nuk kujton intrigat dhe goditjet e skenës, por cilësinë rrënjësore që e bënte filmin perfekt: George ishte gjithmonë në skenë, në çdo spot. Ai paraqitet thuajse gjithmonë në smoking.
1 orë e 56 minuta të no-Martini-no-party ...pikërisht këtu e kemi kuptuar që ai ishte njeriu i vetëm, i cili do të mbetej po perfekt, edhe me një kravatë të gjerë...edhe me një pallto kashmiri të një punonjësi burse, edhe me një orë të madhe avokati... Është i vetmi njeri, për rrobat e të cilit do të linim me kënaqësi një vend në sirtarët tona...

Ai dhe të tjerët...
Pas George, në horizont nuk shfaqet askush tjetër, ndërsa para tij qëndrojnë Cary Grant, Yves Montand dhe Marcello Mastroianni. Padyshim, ndër ta radhitet edhe miti i përjetshëm Sean Connery...një tipologji burrash me një sharm ekstrem, me një dhunti të spikatur dhe të rrallë: i bëjnë gratë të qeshin pa qenë nevoja të krekosen me smoking...

Identiteti
Emri : George Clooney, ndryshe Gorgeous George (“I madhërishmi”)
Mosha: 44 vjeç (shenja e horoskopit, Demi)
Profesioni: aktor, producent dhe regjizor. I njohur si “qen i punës”
Tipologjia: i bukur dhe i pathyeshëm.
Arsyeja se pse u pëlqen femrave : sepse është absolutisht perfekt.

“Nuk më pëlqen ta ndaj me të tjerët jetën time private. Përndryshe, çfarë do të mbetej private në të?!”
“Pasi luajta rolin e pediatrit në E.R, kam vendosur të mos kem fëmijë. Mendoj shpesh për vazektominë...”

Filmat, gratë dhe zakonet e një ylli të vetmuar...

Në vitin 1994, ai hyn në grupin e xhirimit të filmit E.R. Dhe...roli i doktorit Douglas Ross e çon në mënyrë të drejtpërdrejtë në Olimpin e yjeve hollivudiane. Ai është aktori i gjashtë në historinë e kinemasë që interpretoi Batman-in (1997). Me personazhin e Danny Ocean në Ocean's Eleven , në vitin 2001, roli i tij arriti në 20 milionë$. Gjatë vitit në vijim, ai drejton dhe interpreton “ Rrëfimet e një mendjeje të rrezikshme ”. Në xhirimet e këtij filmi njihet me Krista Allen, e cila hyn në grupin e të dashurave të tij të shumta. George nuk i pëlqen lidhjet e forta dhe të gjata. Ai ka mbi shpatulla vetëm një martesë 3 vjeçare dhe ka vendosur të mos martohet kurrë më. Qershorin e kaluar, pas përfundimit të lidhjes me modelen Lisa Snowdon, ai ka deklaruar: “Jam tepër i zënë për t'iu kushtuar një gruaje, për të rritur fëmijë dhe për të qenë një baba i mirë”. Që nga xhirimet e Solaris dhe Good night and Good Luck (2005), jeta e tij është një kredhje e plotë në punë. Por është dikush, për të cilin George gjen gjithmonë kohë: derrkuci i tij me emrin Max.

Administratori · #4 25-01-2006, 20:52

Sokol Zhugani dhe Isida Mollaymeri
Një çift jo vetëm në skenë

Sokol Zhugani dhe Isida Mollaymeri janë dy solistët e Teatrit Kombëtar të Operas dhe Baletit, që po shënojnë sukses në evenimentet më të rëndësishme të organizuara në Shqipëri. Isida është e vetmja gjimnaziste që interpreton në TKOB, qysh prej katër vjetësh. Ndërsa Sokoli pasi përfundoi shkëlqyeshëm studimet e larta në Rusi dhe pas suksesit në skenat Ruse prej një viti e gjysmë interpreton si solist në TKOB.

Fillimet
Sokoli Unë kam qenë Shkollën e Baletit, por në klasën e shtatë profesori im Shpëtim Dajçi i tha babait tim që unë nuk mund të arrij të bëhem ndonjëherë balerin. Kështu im atë me paratë e veta u detyrua të më dërgojë në një shkollë jashtë shtetit. Pasi përfundova shkollën e mesme dhe studimet e larta në Moskë (Rusi) fillimisht dhe më pas në Buku (Azerbajxhan), konkurova në vitin 2000 pranë Teatrit Kombëtar të Stambollit, ku fitova si solist i parë. Për disa arsye personale nuk punova dot atje dhe sot arrita të bëhem solist në TKOB.

Isida Me mësuesen time Blerina Arbana kam marrë pjesë në shumë aktivitete të fëmijëve, ku kam qenë soliste në “Ëndrra për muzikën”, një emision për fëmijë por edhe në shumë aktivitete që ka organizuar Televizioni shqiptar. Gjithashtu koncertet e dhëna jashtë shtetit me Shkollën e Baletit ku kam interpretuar si balet klasik dhe valle popullore për shqiptarët që ishin atje si: në Poloni, Danimarkë, Suedi, Gjermani, Austri, Itali, ku mund të veçoj shfaqjen në Austri, ku ka qenë një mbrëmje madhështore.

Hera e parë në skenë
Sokoli Si solist për herë të parë kam interpretuar në vitin 1997 në teatrin e Bakus. Ndërsa në Shqipëri për herë të parë kam interpretuar si solist në vitin 2001 në Teatrin e Operas dhe Baletit me baletin “Don Kishoti”.
Ndërkohë që nga aktivitetet e mia në skenën e TKOB-së mund të përmend: interpretimet në: “Katedralja e Parisit”, “Bajadera”, “Vagner” me koreografin italian Toni Candeloro, “Plaga e dhjetë e Gjergj Elez Alisë“, apo dhe aktivitetet e tjera si: festivalin “Marie Kraja”, interpretimin në festivalin “Vera e Ohrit” në Maqedoni me “Halili dhe Hajria”, në evenimente si “Miss Globe”, “Peshkatarët”,etj. Nga këto mund të veçoj interpretimin tek baleti botëror “Bajadera” që ka qenë një rikthimi i imi total në skenën e operës mbas një viti e gjysmë që isha larguar.

Isida Ndërsa për herë të parë në skenën e TKOB-së jam ngjitur në baletin “Liqeni i mjelmave”, kur kam qenë në klasë të 8-të dhe ka qenë debutimi im i parë. Fillimisht ka qenë mësuesja Blerina Arban me të cilën kam punuar, ndërsa tani bashkëpunoj vetëm me koreografin Agron Aliaj. Veç kësaj bashkëpunimi prej katër vjetësh me Kolin dhe mbështeja e tij më ka ndihmuar, pasi ai është si të thuash një krah i djathtë për mua, pasi baleti ka mjaft ambicie dhe për mua të kërceja në TKOB ishte e vështirë.
Unë kam interpretuar ne TKOB tek: “Arrëthyesi” “Bajadera”, tek “Halili dhe Hajria”.

Projektet
Aktiviteti më i afërt është koncerti që do të zhvillohet në Prishtinë (Kosovë) natën e Vitit të Ri. Unë do të interpretojë me partneren time Isida, ku do të kemi tre-katër kërcime me koreografi të Agron Aliajt. Ndërkohë po përgatitemi edhe për një shfaqje të veçantë një “musical”. Në këtë eveniment, që do të shfaqet më datë 8 janar 2006 në skenën e Teatrit Kombëtar të Operas dhe Baletit, Enada Hhoxha paraqet veten si koreografe. Përveç meje do të interpretojnë dhe Gerti Vaso, Evis Nallbani, Gentian Agalliu.

Mendimi për partnerin
Isida Për mua është shumë i mirë, ndërsa ne po ecim të dy bashkë e vërteton këtë, por edhe fakti se ka mbaruar shkollën në Rusi, që unë e kam ëndërr. Shpesh më kritikon, pasi unë jam pak kokëfortë dhe e pakënaqur gjithmonë, por edhe më inkurajon. Në të vërtetë i vlerësoj shumë kritikat e tij dhe i marr parasysh.

Sokoli Isida më ka shtyrë të rikthehem sërish në skenën e TKOB-së. Dhe mendoj se unë vetë si solist nuk do të kisha këtë rezultat që kam nëse do të punoja me një partnere tjetër.

Koreografi më i vlerësuar
Sokoli Ajo që na inkurajon më tepër në punën tonë është bashkëpunimi me koreografin Afron Aliaj, pasi ne punojmë vetëm me atë. Me të vërtetë ai është më i miri. Ndërsa nga koreografët e huaj sigurisht do të veçoja ata me të cilët kam punuar në Rusi, ku nuk mund të përmend emër tjetër veç pedagogut tim Ramazan Hasanoviç, i cili është mes dhjetë artistëve më të mirë në Rusi.

Isida Unë kam idhull Natasha Makarova një nga balerinat më të famshme në botë.

Niveli i TKOB
Të dy Mendoj se është në një nivel mjaft të mirë, por duhet shumë punë si dhe financim.

Ambiciet
Sokoli Mund të them se jam pak ambicioz por ajo që dua është që me partneren time Isida Mollaymeri të arrijmë të kapim skenat e botës.

Isida Edhe për mua vlen kjo, madje jam pak më shumë se duhet ambicioze, por mendoj se kjo ambicie më ka bërë të jem sot këtu ku jam. Megjithatë për gjithçka vlerësoj profesor Agron Aliajn, i cili ka punuar me shumë dashuri me mua, qysh kur kam vajtur për herë të parë në TKOB, ku isha më e vogla ndërkohë që koleget e mia kishin mbaruar shkollën e lartë. Ka qenë ai që më ka zbuluar në TKOB.

Administratori · #5 25-01-2006, 21:00

Zhaku: Mbaj mend mirë shijen që lë dashuria e fundit

Janë persona të famshëm. Edhe kur suksesi i tyre është i diskutueshëm, mjafton një shfaqje në ekran dhe në media nuk reshtin fjalët dhe komentet. Nuk dimë ta themi me siguri nëse Shqipëria i ka kushtet për të ofruar statusin e personazhit VIP, por duhet pranuar se edhe lajmet më banale mbi këta persona, nuk kalojnë pa u përfolur. Mes shumë mediave të shkruara dhe elektronike, lajmet “rozë” ka filluar të gjejnë vendin duke krijuar armatën e kureshtarëve për të rejat më të fundit nga jeta intime dhe profesionale e VIP-ave. Mes shumë personazheve që kanë ndalur me rrëfimet e tyre në emisionin “Klithma e lepurit” në +2 Radio, po sjellim për ju dy intervista, të cilat me ndihmën dhe lirshmërinë që radio ta dhuron, i kemi konsideruar mjaft të vërteta.

“E para është Inida Gjata, apo si e njeh publiku me emrin Zhaku. Ajo ka disa kohë që ka nisur një aventurë të re televizive në spektaklin Metropolitan. Mes bisedës për emsionin e ri, Zhaku i është përgjigjur pyetjes mbi ngjashmërinë e sjelljes të saj televizive, që lehtësisht të kujton prezantuesen italiane Simona Ventura.”

Si ndjehesh në Metropolitan? A është ky emisioni që ke ëndërruar dhe që të shkon për shtat? Të them të drejtën gjithmonë gjërat do të ecin dhe do të përsosen. Natyrisht kam gjetur vendin e duhur, gjënë e duhur për t'u marrë dhe njerëzit e duhur për të bashkëpunuar. Për këtë jam shumë e kënaqur.

Po më parë nuk i kishe njerëzit e duhur? Jo, unë gjithnjë kam patur pranë njerëzit e duhur, por dashuria e fundit mbahet mend më mirë.

Kjo do të thotë që i ke harruar dashuritë e shkuara?
Jo unë nuk harroj, por unë mbaj mend më mirë shijen që lë dashuria e fundit. Ku mendon se ndryshon “Metropolitan” nga talk-show të tjerë që transmetohen në kanale të tjera? Metropolitan është një spektakël që flet për gjithëpërfshirjen dhe për një mori problemesh që ne ndeshemi në Tiranë, në jetën metropolitaneske që bëjmë ne, por edhe ata që synojnë të metropolitanizohen. “Metropolitan” është autentik dhe i përbërë nga shumë elementë që spektaklit i nevojiten, si trupa e baletit drejtuar nga Gerti Vaso dhe Enada Hoxha dhe banda muzikore nën drejtimin e Florjan Luarit. Por një pjesë e këtij realiteti që ne e shohim por mbyllim sytë çdo ditë është edhe Nikoleta (travestiti që reciton poezi).

Kjo është një zgjedhje që e kemi hasur më parë ne televizionet italiane, por me ndryshimin se atje personazhet meshkuj të veshur si femra ( Drag-queen), në jetën reale nuk janë travestitë... Nikoletën nuk e kam marrë për të përfaqësuar kategorinë e travestitëve të sofistikuar me kulturë dhe në një farë mënyre të shtirur. Ajo është thjesht vetvetja me gjithë problemet e saj.

Në spektaklet më të njohur, zakonisht edhe gjërat që në pamje të parë duken si të improvizuara, janë të parapërgatitura. Po në “Metropolitan” ndodh kjo? Pjesa më e madhe e gjërave që ndodhin aty, janë në vartësi të spontanitetit tim, të të ftuarve dhe Florit apo të tjerëve që ndodhen aty? Unë nuk përllogaris spontanitetin, por kohën dhe miradministrimin e saj duke patur shumë të qartë se për çfarë do të flitet në spektakël. Ky është edhe motivi që emisioni nuk bëhet me regjistrim, në mënyrë që të mos humbasë spontaniteti që është aty brenda.

A është e vërtetë që ti i referohesh si figurë televizive prezantueses italiane Simona Ventura? Tani që po ma thoni ju po e mendoj dhe kjo gjë nuk më bën të ndihem keq. Këtë ngjashmëri e kemi parë edhe gjatë prezantimit tuaj në “Metropolitan”, sidomos kur duartroket me duart mbi kokë. Një veprim i përhershëm i prezantueses italiane.

A është rastësore apo duhet të mendojmë për ndonjë lidhje gjaku mes teje dhe Simona Venturës? Për sa i përket duartrokitjes me duart mbi kokë, dua të them që është thjesht çështje teknike.Nuk dua që të dëmtoj mikrofonin dhe të ketë probleme kërcitje, ndaj zgjodha të duartrokas me duart lart. Nuk kam dashur t'i ngjaj Simonës, por mikrofoni të hap telashe kur i duartroket përsipër. Shumë mirë, sepse kritikët televizivë e kanë kritikuar prezantuesen italiane për këtë lloj duartrokitje, sepse duke ngritur duart lart asaj i varen llërët dhe aty shikohen shenjat e moshës.

Kjo nuk më shqetëson sepse unë kam edhe shumë vite për të arritur në moshën e Simona Venturës. Në kopertinën e fundit që jeni shfaqur, foto ishte e disa kohëve më parë. Pse nuk zgjodhët një foto aktuale, pamja juaj e fundi meriton komplimente? Të falënderoj. Por dua të them se fotot kanë mbetur po ato, sepse nuk kam bërë të reja. Unë jam një nga ato që kujdesem shumë pak për të ruajtur imazhin tim aktual dhe për ta mbajtur atë në vite si kujtim. Por nuk mund të them që ato foto nuk janë të bukura. Më habit ky fakt sepse personazhe të njohur që shfaqen në kopertina kujdesen deri në sfilitje për pamjen dhe fotot...

Unë jam nga ato që synoj përmbajtjen më shumë sesa formën.

A ndërhyni tek regjia me idetë tuaja? Ky spektakël është një ide e imja, kështu unë vetëm që nuk kam mundësi të komandoj pultin nga ku jam. Natyrisht ky është një bashkëpunim, por tek regjia nuk ndërhyn njeri, sepse gjithsecili ka detyrën e tij.

Në një nga netët e “Metropolitan”, kamera nga siper fokusonte mbi sipërfaqet e bollshme të dekoltesë së Çiljetës dhe pse kjo nuk ndodhte me nje tjetër te ftuar? Vetë sondazhi i asaj mbrëmjeje tregoi, se Çiljeta është një ndër ato që të bën të përqendrohesh më shumë se kushdo tjetër. Ky rast ka qenë një preferencë e kameramanit, që ishte në një mendim me shumicën e publikut që votoi.

I rikthehemi “Kafazit të artë”, çfarë do të mbani mend prej tij? Gjithçka sepse është një nga eksperiencat e mia më të mira. Ështe një hap shumë i rëndësishëm i karrierës time, ndaj dua të falenderoj të gjithë ata që kanë punuar me mua dhe ma krijuan atë mundësi. Do të mbaj mend banorët, tutorët, do mbaj mend gjithçka.

A është vendosur paqja midis teje dhe Mimoza Ahmetit?
Po unë dhe Moza gjithmonë në paqe kemi qenë. Vetëm se atëherë kishte disa probleme spektakolare, të cilat na shihnin në disa situata jo shumë të këndshme. Megjithatë Moza ka qenë dhe do të vazhdojë të jetë një nga personat të cilët unë e vlerësoj më shumë.

Me cilët nga banorët keni mbajtur lidhje edhe jashtë Kafazit ? Me Benin që doli nga shtëpia jeni takuar? Jo nuk kam kontakte me të. Ndërsa me Aulonën, Seadin të cilët ndodhen në Tiranë takohem . Po ashtu me Aurelin kontaktoj me anë të telefonit. Ndonjëherë takoj edhe Beni “katunarin”.

Mos e ofendojmë duke e quajtur kështu, ai ka bërë edhe një emision.
Unë nuk e di se çfarë bën Beni tani. Por prapë ai është vërtet i këndshëm dhe kështu e njohin të gjithë? Folëm gjatë dhe asgjë nuk na thatë për veten tuaj, të dashurin, si shkojnë punët e zemrës mirë? Po s'e di çfarë të them. Aktualisht nuk kam të dashur? Jam e dashuruar me veten.

Administratori · #6 30-01-2006, 21:11

Alketa Vejsiu
Ditet e mia te veshtira

Nje vajze, qe ishte mesuar shume e vogel te mos qante me, kur prinderit, s'kishin mundesi t'i jepnin, sa here ajo lutej: "o mami duaaa...", vendosi nje dite te mos kerkonte me. Nuk e dinte se si por, duhej te bente dicka qe te mund t'i fitonte vete parate qe do t'i duheshin per gjithe endrrat e saj. Per kete mund, t'i jepte dore, vetem talenti dhe shkathtesia e saj. Ndaj nje dite prej diteve, kapur dore per dore me nje nga shoqet e pallatit, ngjiti shkallet e nje televizioni dhe me ciltersine e nje femije kerkoi ta benin pjese te ndonje emisioni a spektakli, sepse kishte shume talent...edhe per te recituar, edhe per te kenduar. Dhe nuk kishte genjyer aspak. Te rriturit e kuptuan menjehere se ajo ishte nje femije jo vetem me talent, por dhe me shume ambicje. Nje vajze e cuditshme, qe dinte te argumentonte mire ate cfare kerkonte. Ndaj nuk e lane t'u ikte me nga duart. I leshuan mikrofonin, qe ajo te mund te zbraste para tij, gjithe aftesite e saja.

Kjo, nuk eshte historia e ndonjeres prej protagonisteve te vogla te spektaklit "Gjeniu i vogel" , i cili prej kohesh ka nisur te zbuloje femije shume te telentuar, qe vijne nga vende te ndryshme te Shqiperise. Por nje histori, qe i perket vajzes me te madhe te atij spektakli, gjeniut qe eshte zbuluar shume e shume kohe me pare se "Klani" te niste kerkimet. Qe ka mundur te hyje fuqishem ne ekranin e televizionit, kur ende ishte nje gjimnaziste. Qe ka hedhur hapin direkt drejt spektakleve te medha [e nisi me "12 endrrat e nje nate vere"]. Qe ka botuar madje dhe nje liber me poezite e saj, titulluar "Bardh e zi". Qe ka mesuar te menaxhoje shume mire veten dhe te tjeret, pas dites kur nisi studimet per Ekonomik, e kur nenshkroi kontraten e punes ne nje zyre sherbimi marketingu. Zyre e cila vec te tjerave po e ndihmon ne krijimin e nje vizioni per nje biznes personal. Pse jo, per t'u bere dhe nje biznes-women po aq e sukseshme. Edhe pse nuk eshte me shume se 20 vjec.

Megjithese tani eshte ne kohet e saj me te mira, Alketa Vejsiu nuk kishte se si t'i shmangej kete here te kaluares se larget, femijerise, sa te bukur aq edhe te trishtueshme. Ndersa i duhej te ulej kembekryq gjate provave te spektaklit, me femijet e shtresave te thjeshta [pra qe nuk ishin vetem femije artistesh], te cilet i shikonte me vemendje teksa vinin ne studion e madhe te "Gjeniut", pothuajse neper te njejten rruge qe ajo kishte ecur dikur. Me te vetmin ndryshim, qe ata ishin me prinderit perdore, ndersa ajo kishte qene gjitheheret e vetme.

Ka qene e veshtire rruga per te mberritur deri ketu ku je sot?
Shume e veshtire, sidomos po t'i referohem femijerise, aty ku dhe nisi gjithcka. Me eshte dashur te ndeshem me shume pengesa c'ka ma cenonin shume kete periudhe, e cila per shume te tjere mund te kete qene shume e bukur.

Pse per ty si ka qene?
Nuk ka qene shume komode. Ishte me shume melankolike sesa e gezueshme. Kam kaluar nje femijeri pothuajse te varfer, ne nje kohe e cila ne pergjithesi ishte e tille. Une lendohesha shume kur shikoja prinderit se sa shume mundoheshin per te me plotesuar ndonje deshire.

Si ka ndikuar tek ty kjo gje?
Kjo varferi, per fat te mire, nuk arriti te ma ngushtonte frymezimin per te menduar e realizuar gjera te bukura. Cuditerisht ka ndikuar per mire. Me beri me te forte e energjike, me krijoi sensin e materializmit, marre kjo ne kuptimin e mire te fjales.

Po ne mardhenie me prinderit?
Edhe aty ka ndikuar per mire. Historia e familjes me beri qe une te jem e lidhur fort me te dy prinderit.

Per c'histori behet fjale?
Eshte nje histori qe e ndaj vetem me veten time e jo me te tjeret. Nje histori qe me motivon te punoj fort, qe cdo kenaqesi qe prinderit nuk arriten ta kishin me pare, ta marrin tani prej meje.

Kur fillove t'i krijoje vetes mundesite per te pasur ato qe prinderit nuk i kishin dhe nuk mundeshin te t'i jipnin?
Qe kur isha ne klase te shtate. Ne keto kohe une fillova te marr honoraret e para ne Televizionin Shqiptar, kur dhe ndjeva se po i sfidoja pak e nga pak pengesat. Isha shume e kenaqur qe po fitoja ca para e qe puna ime po vleresohej ne kete menyre, qe do te kisha mundesine t'i beja dhurata prinderve, vellait tim me te vogel dhe vetes gjithashtu. Pastaj kenaqesine me te madhe e arrita pak kohe me pas kur firmosa rrogen time te pare tek Top Albania.

Sa ka qene rroga juaj e pare, e kujtoni?
Sigurisht. Ishte 250 mije leke [te vjetra]. Ky ka qene dhe momenti kur une e kam vleresuar me shume se kurre ndonjehere femijerine time, rrjedhen qe ajo pati. Une mund te kisha pasur nje femjeri shume me komode se sa e kisha ne te vertete. Por po te kishte qene keshtu jam e bindur se nuk do te kisha pasur kete ambicje. Do t'u kisha kerkuar dhe une para prinderve pa e vrare shume mendjen. Por une kam qene e detyruar ta perjashtoj veten nga nje raport i tille dhe tani me vjen shume mire qe ka ndodhur keshtu. Pra qe nisa ta ndertoj vete te ardhmen time.

Ne Top Albania si fillim, apo jo?
Po dhe ishte fare e rastesishme. Se kisha mbaruar ende klasen e tete kur nje fqinja ime qe punonte si sanitare atje me tha nje dite "hajde provoje se atje merren shume para". Nxitova dhe une dhe per fatin tim te mire me pranuan. Me dukej nje fillim i mire per te mberritur me pas ne televizion.

E mendonit qe atehere televizionin?
E kisha enderruar qe ne 8-vjecare kur ngulesha para ekranit per te pare Ambren tek "Non e la RAI", e cila ishte idhulli qe doja te ndiqja e te prekja.

Dhe radioja ju dukej nje fillim i mbare?
Ne kater vitet qe punova atje, bera shkollen radifonike qe i duhet cdo spikeri televiziv. Top Albania ka qene nje suport shume efektiv per mua. I kam dhene e me ka dhene shume. Atje mesova se duhet te jesh edhe individualiste. E mbi te gjitha, prej asaj radioje do te fitoja dashurine e Vera Grabockes, dashuri e cila i kishte munguar nje femije te pambrojtur.

Si ndodhi qe u lidhet me Grabocken?
Ishte dikush brenda radios, qe mesa duket donte te me hiqte qafe nga radioja qe me lidhi me te. Nje tjeter enderr e imja ishte te prekja Vera Grabocken dhe diten qe shkela ne zyren e saj u mahnita e tera. Aq me shume kur ajo me tha "Do te te bej si Rafaela
Carra e Shqiperise".

Kjo mardhenie besoj eshte krijuar mbi bazen e disa rregullave qe Grabocka mund te kete vendosur mbi ju, apo s'eshte keshtu?
Qe ne fillim mes nesh u krijua nje mardhenie e ngrohte. Rregulla u vendosesn, sigurisht, por qe kishin te benin me korrektesine ne pune, me organizimin e dites. Une kam mesuar shume nga kjo mardhenie jo vetem ne anen profesionale por edhe per jeten.

Cfare pershembull?
Mesova te jem nje vajze me e mire, me e mbare.

Pse nuk ishe e tille me pare?
Me pare nuk isha shume me kembet ne toke, e hidhja hapin me te madh sec duhej. Puna me stafin e Grabockes me mesoi qe te jem me e qete. Te degjoj me shume se te flas. Te di te jem ne qender te vemendjes duke thithur dashurine e te gjitheve qe me rrethojne. Mbi te gjitha Vera me ka mesuar si te ruhem nga ekzaltimi. Te tjeret mund te me kishin orientuar gabim ne kete moshe qe une jam.

Besoj keni qene dhe vazhdoni te jeni e bindur para saj, ndaj dhe ajo ju beson?
Pse jo.

Po kenga si iu shtua prezantimit tuaj ne skene?
Vera kerkonte nje femer ne spektaklet e saj qe edhe te kendonte. Nderkohe une e kisha provuar tek Top-i, madje kisha te regjistruara me shume se 7 kenge ne nje cd. Por duke qene se keto kenge m'u bllokuan nga radioja, une realizova kenge te reja, per spektaklin e pare "12 endrrat e nje nate vere".

Ishte kjo nje tjeter enderr qe realizove ne ato nete?
Po, por une kam dhe shume te tjera, me shume se 12 endrrat e nje nate vere. E ardhmja u perket atyre qe besojne ne bukurine e endrrave te tyre. Une kenges i hyra seriozisht pas "12 endrrave...". Doja te beja pushim pas kulmit qe arrita me kete spektakel. Kisha nevoje per nje reflektim. E dija qe dalja tjeter duhej te ishte ne ate nivel ose edhe me mire. Dhe ne kete pauze te shkurter mendova te beja dicka te re. Megjithate ne prezantim ndihem me mire sepse aty nuk kam shume rivale, si ne kenge.
Mungesa e rivalitetit ju jep siguri? Nuk ju duket se kjo dobeson ambicjen?
Por une e kam nje rivale te fuqishme dhe ajo eshte Alketa e nje viti me pare. Une nuk dal ne skene per t'u krahasuar me te tjeret. Vetem ne fillimet e mia iu referova Ambres, por kur isha fare femije.

T'i kthehemi serish kenges. Keni kenduar nje te tille qe flet per nje mardhenie ne tre.

Ka lidhje kjo kenge me jeten e Alketes?
"S'mund te jemi tre" eshte drama e pergjithshme e shoqerise sot. Ne keto kohe eshte gjithnje nje i trete qe kercenon cuditshem nje raport te shendoshe.
Ty te ka hyre nje i trete ne mardhenien tende?
Kjo s'do te mund te ndodhte se do te isha bere shume shpejt nje, para se te ishim bere tre. Une nuk kam frike nga ajo qe mund te ndodhe. Nje femer qe eshte e realizuar, qe nuk ka deficensa s'ka pse te mendoje gjate per rivalet.

Kjo do te thote qe Alketa di ta ruaje mire mardhenien e saj?
Kjo do te thote qe Alketa beson tek dashurite e verteta.

Ju e keni gjetur kete dashuri?
E kujt i intereson kjo!?

Jam bere une kaq e rendesishme sa te duan te dijne edhe per jeten time private!?

Mendoje se ka dhe te tille te interesuar. C'pergjigje do u jepje atyre?
Do ua them ne nje interviste tjeter kete pergjigje. Po i jap mundesi vetes dhe revistes tuaj qe t'i themi gjerat kur te jene me te sakta.
Si arrin te shkeputesh nga kjo bote te rriturish, per te zbritur ne moshen e femijeve?
Une zbres tek femijet si nje vajze e vogel ne nje bote te madhe. Tek "Gjeniu", me duket se une dhe femijet kemi nderruar rolet. Une dua te zvogelohem, ndersa ata duan te rriten para kohe. Sic kam dashur te bej edhe une dikur.

Sa pjese te femijerise tende gjen nder keta femije?
Shume. Shumica e tyre jane shume prane femijerise sime. Vijne nga familje te thjeshta, kane lindur yje ne shtepi qe s'jane aspak te kamura. Po t'i pyesesh se me cfare ushqehen, cuditesh. Kjo me trishton. Por pastaj, impresioni qe te lene kur kendojne ne skene me emocionon jashte mase. Ja pra kjo eshte mrekullia qe ndodh tek "Gjeniu i vogel". Nje mrekulli qe kushton 250 mije euro i teri si produksion.
"Gjeniu" eshte i pari spektakel, ku nuk ke nga pas hijen e Grabockes.

Si je ndjere pa te?
S'me pelqen te bej krahasime, sidomos kur gjej veten shume mire ne te dy rastet. Eshte me stafin e TV Klanit jam ndjere e sigurte. Me ka pelqyer shume puna e regjisorit Blendi Laco qe me sjell afer imazhin e "Mediaset". Ndersa skenaristi Pandi Laco eshte i vetmi qe e ve fjalen ashtu si duhet ne gojen time. Fale tyre dhe Adi Hiles kam superuar dhe mardhenien me femijet. Ne kete spektakel une kam gjetur veten me mire se kudo tjeter. Shpresoj te bashkepunoje serish me kete treshe fantastike.

Je shfaqur me nje look ndryshe ne kete spektakel. Shume zera thone se keni bere disa nderhyrje kirurgjikale. Eshte e vertete?
Une e dua te bukuren dhe me pelqen t'i bej vetes dhurate cdo fenomen e cdo gje qe do te ma bente veten dhe jeten te bukur.

C'pjese te trupit pelqeni me shume?
Tani me shume se gjithcka tjeter me pelqen hunda ime.