Këngëtarja e njohur Mira Bregu tregon për karrierën e saj artistike. Këngëtarja e njohur është njëkohësisht edhe një aktore e teatrit, gjini të cilën e ka shumë përzemër. E pyetur se kë do të zgjidhte midis këngës dhe aktrimit, Mira Bregu shprehet se, “Kënga dhe aktrimi janë të pandashme për mua. Kam punuar paralelisht me to dhe nuk jam larguar asnjëherë as nga kënga as nga aktrimi”.

-Mira Bregu, studente në Akademinë e Arteve. Çfarë kujtoni nga ajo periudhë?
Gjëja që kujtoj dhe që më vjen keq që nuk është më tani është puna që bëhej, ka qenë një punë intensive, ka qenë një staf pedagogësh shumë i madh, me një nivel shumë të lartë, dhe për këtë më vjen keq se nuk është më ai nivel, unë e kam vënë re që edhe studentët e rinj që vijnë në akademi, kanë një kulturë të cekët në drejtimin e këtij zhanri, të kantos. Kujtimet më të bukura kanë qenë sepse kanë qenë pedagog shumë të mirë, puna bëhej shumë intensive, dhe ajo lodhja kishte gjithmonë frytin e saj. Ka qenë një brez që punonte shumë dhe ka luftuar me sakrifica për të arritur aty ku donte. Na duhej të punonim shumë që të vlerësoheshim maksimalisht, ndërsa tani është një shkollë “me duar në xhepa”.

-Më pas ju vendosët të ndaheshit nga kanto dhe të vazhdonit për dramë. Ishte dëshira juaj kjo? Ecuria e aktrimit ka qenë paralel me kanton, ndërkohë që unë këndoja merrja pjesë me Estradën e qytetit tim të Fierit, ndërkohë që babai im ka qenë aktor aty. Ka qenë një punë paralele e imja, si në aktrim dhe në kanto.

Dëshira për të aktruar ka nisur që në moshë të vogël, dhe më pëlqente shumë puna kolektive, ishte një gjë fantastike për mua. Nuk është se unë u shkëputa menjëherë nga kënga dhe kapa aktrimin, por ishte një punë e bashkëngjitur e tërë kohës që unë i mbajta të dyja, nuk i ndaja dot.

-Vitet e aktrimit kanë qenë të bukura?
Shumë të bukura, sepse ne kishim fatin të ishim një kurs me një grup studentësh të cilët tani janë artistë të njohur dhe të lidheshim me një shkollë angleze të cilët bënin “masterin” me ne. Patëm fatin që të studionim me pedagog shumë të njohur anglez të cilët janë edhe aktor të mëdhenj.
-Si njihet më shumë Mira Bregu në publik si këngëtare apo si aktore?
Si këngëtare, sepse fatkeqësia e publikut është që njeh më shumë anën e medias elektronike dhe jo të skenës dhe karrigeve. Në skenën e teatrit vjen gjithmonë vetëm një elitë, është bërë një lloj tradite.

-Mira Bregu është prezantuar në disa festivale dhe koncerte por keni vite që nuk merrni më pjesë. Mos jeni zhgënjyer nga festivalet dhe do të jeni këtë vit në festival?
Nuk jam zhgënjyer nga festivalet sepse kam dalë mirë dhe jam prezantuar në mënyrë dinjitoze. Shkëputja ka qenë nga teatri veçanërisht në Akademinë e Arteve, kam marrë projekte aty, pastaj sikur u mësova me këtë shkëputjen. Një arsye tjetër ka qenë edhe dyndja e këngëtarëve jo shumë këngëtar dhe kjo stepja më ka larguar nga festivalet. Gjithsesi këtë vit po tentoj me një material, i cili trajton një temë interesante. Është pak filozofike si temë dhe do të jetë pothuajse një baladë.

-Mira Bregu kujtohet nga publiku me prezantimin e saj të parë në festival “Ditë karnavalesh”...
Po, kjo këngë u prit mjaft mirë në publik. Një nga faktorët që e bëri këtë këngë të njohur ishte kapelja dhe interpretimi që i bëra asaj kënge.
-Aktualisht Mira Bregu është e angazhuar më shumë me këngën apo me aktrimin?
Unë nuk jam ndarë asnjëherë nga kënga, veçanërisht me punën që bëj unë. Tek Qendra Kulturore të Forcave të Armatosura të Ushtrisë ne këndojmë çdo javë “live”, dhe kështu që përpiqemi të ndryshojnë repertorin shpesh herë. Në këto aktivitete unë jam prezantuese edhe bëj edhe aktrim. Aktrimi nuk mungon asnjëherë sepse unë çdo vit përpiqem të vendos diçka në skenë dhe veçanërisht tek “show poetik” në të cilin nuk mungoj asnjëherë sepse më pëlqen shumë poezia.

-Shkruan poezi Mira Bregu?
Shkruaj sepse më pëlqen shumë poezia. Kam disa qëllime lidhur me poezinë por le të ngelen surprizë. Poezia është një zhanër që e adhuroj shumë.
-Cila nga këto gjini të artit ju jep më shumë kënaqësi?
Të gjitha. Nuk mund t’i ndaj dot sepse janë të gjitha brenda gjinisë dhe nuk mund t’i ndaj dot. Të gjitha janë brenda artit, si muzika, poezia, aktrimi, janë brenda gjinisë që unë lëvroj.
-Ju keni bërë një bashkëpunim me këngëtarin e njohur Aleksandër Gjoka. Si lindi ideja e këtij bashkëpunimi?
“Sonte” është një këngë e Dritan Lumshit, dhe ai kishte një ide që të në këtë këngë të paraqitej brishtësia e vajzës dhe ashpërsia e djalit. U përpoqëm që të bënim një tekst që t’i përmbahej idesë së Dritanit. Më pas erdhi Agim Diçi nga Zvicra dhe ai ka realizuar këtë tekst.

-Në këngët tuaja orkestrimet janë bërë nga Edmond Zhulali dhe Genti Lako...
Baza kryesore ka qenë orkestrimi i Edmond Zhulalit dhe më pas i Genti Lakos dhe i Genti Rushit. Një këngë e kam bërë në studion e Edison Misos. Këta emra janë elita e muzikës shqiptare dhe për këtë kam këmbëngulur që çdo gjë që të bëj të jetë e mirë realizuar.
-Mira Bregu është prezantuar në publik me një album. Sa këngë përmban albumi dhe janë krijimtari e re apo edhe këngë të kënduara më parë nga ju?
Albumi ka dhjetë këngë dhe janë pothuajse të gjitha krijimtari e re. Këngë e përpunuar është vetëm “Dasma e malësorit”, të cilës i kemi bërë një riorkestrim të punuar nga Dritan Lumshi dhe Edmond Zhulali. Këngët e tjera kanë qenë motive të cilat Dritan Lushmi i ka përdorur dhe jo këngë të përpunuara.

-Kënga “Dasma e malësorit është një këngë popullore. Ju pëlqen kjo lloj gjinie e këngës? Natyrisht që më pëlqen, sepse malësia është një zonë që ka temperament shumë të fortë dhe në muzikë ndihej, veçanërisht lahuta.

Gjithashtu dhe vajtja ime dhe e gjithë grupit tonë në Vermosh që rrallë mund të shkoj ndonjë artistë shqiptar ishte një gjë e mirë.

__________________
The heaven's sound is composed inside your heart, listen to its beat to syncronize your life onto the angel's steps.