Gjashtë filma të njohur shqiptarë, ndërmjet tyre "Përrallë nga e kaluara", "Parullat" dhe "Letra ere", janë shfaqur gjatë kësaj jave në Itali.

Bota kinematografike, kultura tradicionale shqiptare në muzikë dhe artistët më të njohur shqiptarë, kanë zbarkuar përgjatë një muaji në qytetin e gondolave, Venecian. Filmat e regjisorëve më të njohur shqiptarë, të nderuar dhe me çmime ndërkombëtare, janë shfaqur në sallat e kinemave italiane në kuadër të "Takimit me artin dhe kulturën shqiptare". Një ekspozitë arti, një koncert dhe një përmbledhje e filmave më të njohur të kinematografisë shqiptare të viteve të fundit, do të mjaftonin të mbyllnin dje muajin e madh të të jetuarit në botën shqiptare.

Një hyrje në kinematografi
Që nga data 11 nëntor në kinematë veneciane janë shfaqur filmat "Dimri i fundit" me regjisor Ibrahim Muçën e Kristaq Mitron nën interpretimin e aktoreve të njohura shqiptare, Liza Laska në rolin e Marës, Margarita Xhepa në rolin e Shanos, Rajmonda Bulku në rolin e Pranverës, Dhimitra Planari (Lulja), Agim Qirjaqi (oficeri gjerman), Guliem Radoja në rolin e nënoficerit gjerman. Për 47 minuta, publiku italian, ka asistuar në një pjesë të rëndësishme të historisë shqiptare, luftën nacional çlirimtare. Nga regjisori i njohur Dhimitër Anagnosti është prezantuar filmi "Përrallë nga e kaluara", me interpretimin e aktorëve Elvira Diamantin (Marigoja), Admir Sorra (Gjino), Robert Ndrenika (Vangjeli) etj. Po kështu dhe filmat "Udha e shkronjave" me regji të Vladimir Priftit, nën interpretimin e Sandër Prosit në rolin e Dhaskal Todrit, filmit "Butrinti" me po të njëjtin regjisor nën interpretimin e aktorëve Ndriçim Xhepa, Artur Gorishti, Rajmonda Bulku, Guljem Radoja dhe Fatos Sela. Për të kaluar te filmat e realizuar vitet të fundit si "Parullat" me regji të Gjergj Xhuvanit, nën interpretimin e Artur Gorishtit, Luiza Xhuvanit, Agim Qirjaqi, Birçe Hasko, Niko Kanxheri e Robert Ndrenika, si dhe "Letra ere" të regjisorit Edmond Budina, nën interpretimin e aktorëve Edmond Budina, Yllka Mujo, Bujar Asqeriu.

Java e muzikës
Muzika ballkanike me grupin "Talea Balcan" do të paraqiteshin pas javës së filmit shqiptar, në javën e muzikës shqiptare në Itali. "Talea" është emri i një formacioni që luan mbi dy kuptime, njëri mbi botanikën dhe tjetri mbi muzikologjinë.

"Talea" është një projekt muzikor, ku që prej vitit 1999 prek tingujt ballkanikë nga Shqipëria, Bosnja dhe Romania.

Një grup i formuar nga disa muzikantë të huaj dhe shqiptarë ndërmjet tyre, Adnan Hozic (zë, kitarë akustike), Admir Shkurtaj (fizarmonikë), Alessandro Nocco (saksofon), Gaetano Partipilo (saksofon), Mario Grassi (bateri dhe perkusion) si dhe Meli Hajderai (zë).