Regjizori i njohur Gëzim Kame ndërton për herë të parë një amfiteatër privat në periferi të Tiranës. Ai tregon për ambicien e tij disa vjeçare për të patur një sallë të vetën e cila do të mund të ishte një teatër i dytë kombëtar. Natyra e qetë dhe gjelbërimi rrethojnë Teatre Park Kame. Artëdashësit shqiptarë tashmë do të kenë mundësinë që të shijojnë një shfaqje artistike në bukuritë e natyrës së virgjër dhe të paeksploruar. Projekte të mëdha dhe shfaqje botërore do të ngjiten në këtë skenë verore të këtij teatri. Gëzim Kame pohon se suksesi i amfiteatrit është një bast me veten që ka vendosur ai.

-Si ju lindi ideja për të ndërtuar këtë amfiteatër?
Realizimi i këtij amfiteatri ka qenë ambicja ime prej kohësh. Këto 15 vitet e fundit kam menduar që të kem diçka timen, një teatër timin apo një skenë timën. Së pari dua të jem ideator i një Teatri të ri Kombëtarë, gjë që u la përgjysmë në vitet 1998. Kam kërkuar nga instancat qeveritare dhe vendore të më ndihmojnë të privatizoj salla të cilat sot e kësaj dite janë të mbyllura, për tu bërë shoqëri aksionere e artistëve.

Një nga këto salla ishte edhe Pallati i Pionerëve i cili pa pritur e pakujtuar u kthye në Millenium 2. Ne ishim një grup artistësh si, Robert Ndrenika, Kadri Roshi, Drita Pelingu, Ndriçim Xhepa, Yllka Mujo, Agim Qiriaqi, dhe donim që të krijonim një shoqëri aksionere duke u privatizuar kjo sallë e të bëhej një teatër i dytë i Tiranës. Në këtë rast ne ngelëm përsëri pa sallë. Kjo ambicje e imja u projektua më pas pasi gjeta këtë vend të mrekullueshëm, 20 km larg Tiranës. Kjo është një kodrinë e bukur dhe sapo e pashë më lindi ideja që të ndërtoja këtu këtë amfiteatër veror. Kështu u realizua projekti im dhe ambicja ime për të patur një teatër timin.
-Realizimi i këtij amfiteatri ishte një nismë e juaja vetjake apo me bashkëpunëtorë të tjerë? Ky amfiteatër ka qenë një nismë totalisht e imja. Nisan ë fillim bashkëpunime me shumë njerëz por përfundova vetëm.

-Cila ka qenë shfaqja e parë që është dhënë në këtë amfiteatër?
Ky amfitëatër ka vetëm 20 ditë që është inagurur. Shfaqja e parë ka qenë një shfaqje e orkestrës sinfonike të Leçes. Ishte një program shumë i vogël prej gati dy orësh. Është organizuar edhe një parti rinor, disa ditë më përpara. Kemi biseduar me ministrin eMinistrisë së Turizmit, Kulturës, Rinisë dhe Sporteve, Bujar Leskaj, i cili ka ardhur disa herë dhe është shumë dashamirës për këtë lloj teatri, për të aktivizuar edhe për të bërë projekte të veçanta qoftë me rininë, qoftë me mosha të ndryshme. Këto projekte nuk realizohen shume shpejt por mendoj se në vitin tjetër ky teatër do të ketë mjaft projekte për të vënë në skenë.

-Cilat do të jenë shfaqjet dher projektet për të ardhmen?
Janë dy komedi, njëra franceze, me aktorët Robert ndrenika, Roland Trebicka, Mehdi Malkaj, Elvira Diamanti, Naum Shundi, Ahmet Pasha, etj, më pas është komedia “Jashtë bie bore”, edhe kjo me aktorët Roland Trebicka, Robert Ndrenika, Ervin Çulin dhe Mehdi Malka. Këto janë dy projektet teatrore. Një projekt i tretë është “ Gjashtë persona rreth një tavoline”, një vepër e një autori anglez bashkëkohor. Kjo shfaqje është një alternim i aktorëve me shumë eksperiencë. Ndërsa si koncerte është projektuar që të bëhet një koncert me familjen Qerimi, me Et’hem Qerimin violinistin e shkëlqyer, Fatos Qerimin kompozitor dhe klarinetist, djalin e tij dhe mbesën. Mendohet që të bëhen koncerte të Muzikës Dhomës, më pas janë edhe disa koncerte rinore të muzikës Bluzz, etj. Përveç kësaj kemi edhe një projekt me fondacionin zvicerian. Projekte të tjera që bëhen janë disa takime ndërkombëtare në këtë mjedis, si mund të jetë takimi i Teatrit Rinor Ballkanik, Festivali i Tangos Ballkanike, Festivali i Klarinetës Ballkanike, etj.

-Cilët janë autorët shqiptarë që kanë zgjedhur apo kanë shprehur dëshirën të sjellin veprat e tyre në këtë teatër?
Teatri nuk ka mbaruar ende punimet dhe është shumë shpejt të flasësh për këtë, por do ketë edhe projekte të tilla. Mendoj se me miqtë dhe me kolegët që kam unë do të ketë shumë shfaqje që do të vihen në këtë amfiteatër.
-Pse zgjodhët pikërisht këtë vend për të ndërtuar Teatre Park Kame?
Në Tiranë nuk ka vend për ndërtime artistike, ka vend vetëm për banesa, për magazine, për dyqane, dhe është e pamundur që të gjesh një mjedis kaq madh prej 8000 metër katror për të ndërtuar një teatër.

Kam edhe një arsye të dytë, mua më pëlqen shumë natyra, dhe qetësia. Këtu ky teatër është larg sa më larg zhurmës e rrëmetit. Këtu mund të vish në një vend të qetë dhe të bësh vepra artistike shumë të bukura.

-Sa mendohet se do të jetë i frekuentuar ky teatër?
Duke patur parasysh se ky teatër ka vetëm 20 ditë që është inaguruar, ka një fillesë shumë të mirë sepse dashamirësit e artit në përgjithësi janë të shumtë në Tiranë dhe këtë e kanë provuar duke shkuar nga Tirana në Butrint për të parë një vepër artistike të bukur dhe të arrirë. Ky teatër është vetëm 20 km larg dhe jam i bindur se kjo sallë do të frekuentohet shumë, nga njerëz që e duan artin, e duan poezinë, e duan muzikën dhe nga kjo pikëpamje mendoj se ky teatër do të jetë një pikë shlodhëse për kryeqytetasit. E gjitha kjo arrihet duke vënë në skenë vepra tipike me vlera filozofike brenda, kjo do të dyfishonte kënaqësinë tek spektatori.
-Gëzim Kame regjizor, cilat janë angazhimet e tij lidhur me këtë fushë?
Unë nuk do të fiksohem vetëm në këtë amfiteatër. Ai tani shndërrohet në një vepër publike, në të do të sjellin veprat e tyre regjizor të rinj, regjizor të tjerë por natyrisht që edhe unë kam projektet e mia. Kam gjithashtu projekte në Teatrin Kombëtarë, në dy teatro të Kosovës, kam edhe një vepër tjetër të cilën mendoj që ta sjell këtu një projekt me aktoren Yllka Mujo, me artistë, kërcimtarë, këngëtarë, mendoj se do të jetë një mbrëmje e bukur.

-Cilat janë marrëdhëniet tuaja me Teatrin Kombëtar?
Unë kam 6 vite që i kam ndërprerë marrëdhëniet me Teatrin Kombëtar me dëshirën time. Ndërtova një kompani private “Publimedia” e cila nuk eci sepse nuk gjeti përkrahjen e duhur nga institucionet përkatëse, ose më mirë të themi nga shteti vetë sepse nuk ka një ligj për teatrot private.
-Do të ketë një strukturë për vlerësimin e veprave?
Një strukturë jo por projekte. Akoma nuk ekziston një status privat, ligji akoma nuk është hedhur në treg.
-Do të ketë një selektim të veprave që do të vihen në këtë skenë apo kushdo që shpreh dëshirën do të ketë mundësinë të sjelli veprën e tij? Eksperienca ime do të jetë ajo që do t’i selektojë veprat. Do të përpiqem që të ketë një nivel në këtë drejtim sepse edhe publiku do të jetë i një niveli kulturor dhe për teatrin elitar.

__________________
The heaven's sound is composed inside your heart, listen to its beat to syncronize your life onto the angel's steps.