Filmi hap i pari konkurrimin në seksionin e filmit artistik. “Kam ende për të folur për luftën e Kosovës”. Sunaj Raçaj vjen në Tiranë me: “Etjet e Kosovës”.

Realitet dhe dhimbje kosovare. Këto ishin imazhet e para që filmi artistik ofroi nëpërmjet ekranit të madh të kinema “Millenium 2”, në ditën e parë të edicionit të 12-të të Festivalit të Filmit Shqiptar.”Etjet e Kosovës”, prodhim kinematografik i vitit 2005, është një nga tre filmat kosovarë që konkurrojnë në seksionin e filmit artistik. Regjisori dhe njëkohësisht skenaristi Sunaj Raçaj, i pranishëm në Tiranë, shprehet se është mjaft i kënaqur që filmi i tij është pjesë e konkurrimit. Më tepër se sa fakti që “Etjet e Kosovës” është i pari në paradën një javore të filmave shqiptarë, Raçaj shprehet se është shumë i rëndësishëm organizimi i këtij aktiviteti pas 6 vjet mungesë. “Jam shumë i kënaqur që jemi pjesë e festivalit. E rëndësishme është që pas 6 vjetësh mungesë dhe një udhe të gjatë konsolidimi, ky festival vazhdon traditën e vet”, - thekson regjisori.

Pas jehonës që pati në media realizimi i këtij filmi kosovar, ai është shfaqur dje në mbrëmje për jurinë e festivalit dhe do të rishfaqet sërish sot paradite, për një masë më të gjerë publiku. Vetëm pak kohë më parë, “Etjet e Kosovës” kaloi sprovën në Festivalin Ndërkombëtar “Palm Beach” në Florida. Ishte filmi i vetëm që foli shqip në këtë festë të madhe të kinemasë botërore. Por pavarësisht kësaj, regjisori shprehet se për të është shumë e rëndësishme që filmi i tij të marrë gjykimin e publikut shqiptar. Raçaj tregon se “Me këtë film konkurruam në Florida dhe tashmë ka marrë konfirmimin nga “Black Box” në Berlin e më pas në Kalkuta, një festival ndërkombëtar në Indi. Megjithatë, për mua ka një vlerë të veçantë prezantimi para publikut shqiptar. Artistikisht mes nesh nuk ka kufij”. Ndonëse ka zbritur në Tiranë në listën e emrave në konkurrim, ai shprehet se prania në këtë festival është një vlerësim i mjaftueshëm.

Etjet e Kosovës
Imazhet filmike të ofrojnë Kosovën në katastrofën e vitit 1999. Personazhet janë viktima të luftës që mbi supe mbajnë edhe pasojat e saj. Ata përpiqen të gjejnë atë çka u ka mbetur mes rrënojave për të shuar etjen e rindërtimit të jetës. Ajo që i mban gjallë është shpresa. Ndërthurja e jetës së katër personazheve krijojnë panoramën e dhimbjes që bashkëjeton njëkohësisht me dëshirën për të rilindur. Me këtë motiv mundohen të ecin përpara dhe kërkojnë të gjejnë të dashurit e tyre që kanë humbur.

Një temë kjo që ka gjetur reflektime të ndryshme artistike nga krijuesit kosovarë. Regjisori Sunaj Raçaj shprehet se ky film që është realizuar vetëm dy vjet më parë, nuk do të thotë se ai e ka mbyllur këtë temë. “Përderisa kam për të shprehur për luftën e Kosovës dhe pasluftën, do ta shpreh në mënyrën time nëpërmjet filmit. Mjafton që të kem ndonjë inspirim ose shqetësim të brendshëm”, shprehet ai. Edhe pse ka qenë një realitet i prekshëm për të gjithë, në mediat kosovare ka pasur edhe nota kritike. E lidhur kjo me mënyrën e trajtimit të temës dhe detaje të tjera teknike e regjisoriale. Ngjarjet dhe personazhet vijnë nëpërmjet gërshetimit të një kasti aktorësh kosovarë, shqiptarë dhe maqedonas.

Drama e një Kosove të pasluftës mbartet nëpërmjet interpretimit të Sheqerie Buçajt, Blerim Destanit, Rajmonda Bulkut, Faruk Begollit, Ermela Telit, Tinka Kurtit, Bislim Muçajt dhe Meto Jovanovskit. Producentë të filmit janë Sali Limani, Blerim Destani dhe Sunaj Raçaj. Për këtë përzgjedhje aktorësh regjisori shprehet se “Jam munduar të thyej klishenë që në filmat shqiptarë luajnë vetëm aktorë të Shqipërisë dhe në prodhimet kosovare aktorë nga Kosova. Në kast ka edhe aktorë të mirënjohur tashmë si zonja Tinka Kurti, por edhe aktorë të rinj”. Raçaj shprehet se në pranverë do të nisë punën me një skenar tjetër interesant. Për detajet është herët të flitet.

Filmi në Kosovë
Në edicionin e 12-të të festivalit të Filmit Shqiptar, “Etjet e Kosovës”, “Kukumi” dhe “Anaema”, janë 3 filmat që përfaqësojnë prodhimet kinematografike kosovare në këto vjet. Regjisori Raçaj shprehet se ngjarjet në Kosovë kanë lënë një boshllëk të madh në kinematografi. “Filmi shqiptar ka krijuar një traditë të tijën, ndërsa filmi në Kosovë ka ngecur mjaft për rrethana të caktuara. Kemi 17 vjet që nuk kemi pasur film. Tre vitet e fundit janë krijuar tre filma dhe shpresojmë që do të vazhdojmë të plotësojmë vakumin 17- vjeçar”, shprehet ai. Ndërsa me idetë e tij shkon edhe më tej. Raçaj thekson se duhet të ekzistojë vetëm një Qendër Kinematografike Kombëtare për të dyja vendet. “Kjo qendër duhet të përfshijë edhe Qendrën e Kosovës dhe të Shqipërisë. Kjo do të ishte mundësi e mirë për krijuesit”, - shprehet Raçaj.

__________________
The heaven's sound is composed inside your heart, listen to its beat to syncronize your life onto the angel's steps.

flm shum shum