“Uroj që në përvjetorin tim të ardhshëm, të festojmë edhe 1-vjetorin e Pavarësisë së Kosovës”. Në mjediset e ngushta të ambasadës së Shqipërisë, Malcolm është në qendër të vëmendjes së të gjithëve. Me ftesë të ambasadorit Kastriot Robo, dhjetëra intelektualë nga komuniteti shqiptar dhe vendas kanë ardhur t`i urojnë studiuesit anglez 50-vjetorin e lindjes. Ambasadori i dorëzoi zotit Malcolm një dhuratë simbolike në emër të komunitetit shqiptar; një pjatë e pikturuar me urimin për 50-vjetorin e lindjes. “Është një koincidencë shumë e mirë që ditëlindja juaj korrespondon me finalizimin e çështjes së Kosovës”, tha ambasadori Robo tek i dorëzonte zotit Malcolm dhuratën.

Me një veshje modeste, modest edhe në komunikim me të tjerët, Noel Malcolm preferon gjithnjë të flas për të tjerët dhe veçanërisht për Kosovën sesa për veten e tij. “Kjo ishte një surprizë shumë e bukur dhe nuk isha përgatitur për një gjë të tillë. Nuk besoj se kam bërë ndonjë mrekulli në punën time intelektuale, por jam shumë i lumtur që puna ime shkencore mbi çështjen e Kosovës më lidhi me njerëz kaq të mrekullueshëm siç janë shqiptarët”, tha Malcolm në fjalën e rastit. Më pas, ai uroi që përvjetori i tij i radhës të përkojë me 1-vjetorin e Pavarësisë së Kosovës.

Kush është Noel Malcolm?
Për shqiptarët, ai njihet si autori i librit “Një histori e shkurtër e Kosovës”, botuar në vitin 1998. Përmbajtja dhe momenti i daljes së atij libri e bënë Malcolm të famshëm në mbarë botën perëndimore. Ai libër ishte dritarja e vërtetë e një vendi dhe një populli të përvuajtur për të cilin shumë pak veta dinin për të. Malcolm është shkrimtar, historian dhe gazetar britanik. Ai ka studiuar në Kembrixh dhe është një nga analistët më të mirë britanikë në çështjet e Ballkanit. Ka qenë drejtor i revistës politike “The Spectator” dhe komentues i gazetës “Daily Telegraph”. Ai ka punuar për një periudhë të gjatë për “British Helsinki Human Rights Group”. Është autor i disa botimeve me karakter historik ose përshkrues si: "Një histori e shkurtër e Bosnjës" (1994), “Origjinat e Idiotizmit Anglez” (1997), “Bota mendore e një matematikani të hershëm modern” (2005), “George Enescu, jeta e tij dhe muzika" (1990), etj. Të dy librat e tij për Bosnjën dhe Kosovën patën shumë sukses në Perëndim, pasi ishin ndër botimet e rralla bindëse dhe që binin në kundërshtim me çfarë gatuhej në akademitë e Beogradit.

Të dy librat shumë shpejt u bënë të referueshëm për të gjithë studiuesit e çështjeve ballkanike. Noel Malcolm është dekoruar edhe nga ish - Presidenti Ibrahim Rugova, me medaljen e artë të “Lidhjes së Prizrenit". Malcolm flet mirë gjuhën shqipe, serbo-kroatishten, bullgarishten, greqishten dhe hungarishten.

Pavarësia e Kosovës - Realitet
Çështja e Pavarësisë së Kosovës nuk është më thjeshtë një gjë për të cilën duhet të shpresojmë, por një realitet. Për mua, Pavarësia është vetëm çështje kohe. Ndonëse termi “Pavarësi” ende nuk është përmendur në planin e Ahtisarit, jam i sigurt se Beogradi nuk do të ketë më asnjë kontroll mbi Kosovën. E nëse Beogradi humb kontrollin mbi Kosovën edhe zyrtarisht, atëherë kjo është “Pavarësia”. Besoj se më pas, shtetet e ndryshme do ta njohin Kosovën si të pavarur. Le të mos merremi me termin dhe fjalën që preferojnë të përdorin politikanët e OKB-së, sepse realiteti është se shtetet njohin njëri-tjetrin. Kjo formë ka funksionuar gjithnjë.

Çfarë e lidh Noel Malcolm me shqiptarët?
“Në do të dish nëse gjyshja ime ka origjinë shqiptare, përgjigja është “jo”. Nuk kam ndonjë arsye specifike pse jam interesuar në çështjen shqiptare. Në fakt, unë jam interesuar mbi historinë e vendeve të Ballkanit në përgjithësi. Kam udhëtuar shumë nëpër atë rajon sa isha student. Më pas, unë mësova edhe gjuhët ballkanase dhe u tërhoqa shumë nga historia e Ballkanit. Kur shpërtheu lufta në Bosnje, atëherë unë u përqendrova për të studiuar dhe shpjeguar arsyet e asaj lufte. E kuptova se vetëm informacioni që vinte nga Beogradi ushqente diplomacinë perëndimore.

Për mua filloi të bëhej e qartë se dikush duhej të përpiqej për të thënë të vërtetën. E njëjta situatë ishte edhe në rastin e Kosovës, disa vite më pas. Me të mbaruar librin tim mbi Bosnjën, u përqendrova në çështjen e Kosovës. Jam i lumtur që munda ta botojë “Histori e shkurtër e Kosovës” përpara se të shpërthente Lufta. Kur unë i thash botuesit tim se kisha ndërmend të botoja një libër mbi historinë e Kosovës, ai nuk ishte fare optimist. Ai nuk e dinte se ku ishte Kosova dhe më këshilloi të bëja një histori të përgjithshme të Ballkanit sepse mund të ishte diçka më e rëndësishme. Jam i lumtur që mbeta kokëfortë dhe provova se botuesi im e kishte gabim”.

"Shtetet e ndryshme do ta njohin Kosovën si të pavarur. Le të mos merremi me termin dhe fjalën që preferojnë të përdorin politikanët e OKB-së, sepse realiteti është se shtetet njohin njëri-tjetrin. Kjo formë ka funksionuar gjithnjë".
Shpresoj që këto fjal të zotit Noel Malcolm ti ken dëgjuar dhe kuptuar Parlamentarët tanë Kosovar dhe kështu edhe të veprojn se po pritën të nai servojnë të tjerët do presim me vite të tëra t'na vij kjo "dhurat" që askujt nuk i dhurohet, por për te vendoset, votohet dhe arrihet ashtu edhe dërgohet në pranim.

shyqyr Zotit qe ka njerez te tille si Noel Malcolm e flasin realitetin