Një shtet me Flamur, Kushtetutë dhe Himn, por fjala "pavarësi" ende nuk është shqiptuar. Sipas propozimeve të dërguarit të OKB-së për t'i dhënë fund statusit të papërcaktuar, Kosova do të lejohet të ndahet nga Serbia dhe të përdorë simbolet e veta kombëtare, do të ketë Flamurin dhe Kushtetutën e vet. Plani i Martti Ahtisaarit nuk e përmend fjalën "pavarësi", por kjo është praktikisht ajo çfarë ofrohet. Sipas burimeve diplomatike Ahtissari ia ka paraqitur planet Beogradit, duke ia dorëzuar planin presidentit Boris Tadiq. Kryeministri serb, Vojisllav Koshtunica nuk pranoi ta takonte Ahtissarin, duke sinjalizuar kundërshtimin ndaj planit, i cili shihet si hap i parë drejt pavarësisë së Kosovës.

"Qëllimi i planit është të vendosë themelet për të ardhmen e një Kosove të qëndrueshme, një Kosove të së ardhmes ku pjesëtarët e të gjitha komuniteteve, shqiptarët, serbët dhe komuniteteve të tjera, të mund të jetojnë një jetë të sigurt, dinjitoze dhe ekonomikisht të qëndrueshme. Dhe një Kosove të së ardhmes që të kontribuojë për paqen dhe stabilitetin në rajon", u shpreh Ahtisaari në konferencën e tij për shtyp, pas propozimit të planit. Ai shtoi se qëllimi i paketës së tij, ishte krijimi i një Kosove, ku pjesëtarët e të gjitha komuniteteve të jetonin të sigurt. "Zgjidhja parashtron masa specifike për mbrojtjen e komuniteteve jo-shqiptare, duke përfshirë garanci për përfaqësimin e tyre në Kuvend, në qeveri dhe në sistemin e drejtësisë", tha ai.

Për herë të parë në historinë e saj, Kosova do të ketë së shpejti një ushtri të ligjshme, Ministrinë e Jashtme dhe të gjitha simbolet kombëtare, elementë të padiskutueshëm të një shteti sovran. Të gjitha janë të parashikuara në planin e kryenegociatorit ndërkombëtar Martti Ahtisaari, që e shkëput Kosovën nga Serbia dhe hedh bazat e shtetit më të ri në Ballkan. Paketa e propozimeve është paraqitur në Prishtinë dhe Beograd, ku pavarësisht nga qëndrimet e kundërta, palët kanë arritur në një përfundim; plani i hap rrugën pavarësisë së Kosovës, në një kohë të caktuar. “Ky plan do të ndihmojë në krijimin e shtetit sovran dhe të pavarur të Kosovës”, - deklaroi Presidenti kosovar, Fatmir Sejdiu, duke konfirmuar se negociatorët kosovarë e pranojnë planin e do të paraqesin shumë shpejt komentet dhe sugjerimet për të.

Propozimi
Plani ndërkombëtar i mundëson Kosovës shpalljen e simboleve kombëtare, himnit, flamurit dhe miratimin e një Kushtetute që do të përcaktojë bazat e shtetit të ri. Kryenegociatori Ahtisaari është treguar shumë i kujdesshëm për të mos e përmendur fjalën “pavarësi”, gjë që do ta ndryshonte rrjedhën e ngjarjeve pas publikimit të planit. Por, ai ka propozuar krijimin e një force ushtarake kosovare, me 2500 ushtarë dhe 800 rezervistë, gjë që i lejon asaj të mbrohet vetë, ndërsa përgatitet për pavarësi. Kosova do të krijoje Ministrinë e Jashtme, që i mungonte deri tani qeverisë, ndërsa do të marrë edhe borxhin e trashëguar nga ish-federata jugosllave, pjesë e së cilës ka qenë. Prishtinës do t’i duhet të pranojë një autonomi shumë të gjerë për 100 000 serbët e saj dhe të garantojë mbrojtjen e tyre. Serbët do të kenë mundësi të marrin financime nga Beogradi, këto duhet të kalojnë nëpërmjet Prishtinës. Kosova do të mbetet për një kohë të pacaktuar nën mbikëqyrjen e BE-së, ndërsa ndërkombëtarët do të vendosin sërish më pas nëse “marrëveshja” e propozuar nga Ahtisaari është zbatuar mirë nga vendorët.

Simbolet
Tani Kosovës i duhet të vendosë tashmë për emrin e saj, flamurin dhe himnin kombëtar. A do të quhet ky vend “Kosovo”, emri në anglisht dhe serbisht apo Kosova, ashtu siç shqiptarët e quajnë atë? “Vendi duhet të quhet Republika e Kosovës dhe shtetasit e saj do të jenë krenarë të quhen ‘kosovarë’, sepse ky emër është në zemrën e shpirtin e tyre”, tha profesori i së drejtës, Hajredin Kuçi për agjencinë e lajmeve Reuters. Por zgjedhja e flamurit, ama, mund të jetë më problematike. Provinca ka mbajtur me krenari flamurin shqiptar që prej vitit 1999, kur bombat e NATO-s dëbuan forcat serbe. Por, plani i OKB-së kërkon që flamuri të reflektojë karakterin shumë etnik të Kosovës. “Njerëzit duhet ta kuptojnë se pse nevojitet një flamur i ri dhe simbole të reja, që një identitet kombëtar të mos shkatërrojë identitetin etnik”, tha ai.

Ndërkohë, Muhamet Hamiti, këshilltar i presidentit Fatmir Sejdiu, thotë se simbolet nuk janë zgjedhur ende. Por, flamuri i Ibrahim Rugovës, presidentit të ndjerë të Kosovës, është varianti i parë. Flamuri i Dardanisë është një flamur blu dhe ka në qendër një shqiponjë të zezë me një yll me gjashtë cepa dhe një kreshtë që mban sipër emrin Dardania. Rugova, i cili vdiq një vit më parë, kishte për zemër edhe himnin “Kur ka ra kushtrimi n’Kosovë”, për të zëvendësuar himnin “Të bashkuar rreth flamurit”, të përdorur deri tani. Por, sugjerimi i tij, që reflekton qëndresën e heshtur në një “tokë plot me martirë”, ka pak shanse të miratohet.

E ardhmja
Edhe pse paraqiti një propozim gati të qartë për të ardhmen e Kosovës, kryenegociatori i OKB-së refuzoi të fliste për statusin final të saj. “Do të jem shumë i qartë kur ta propozoj atë në Këshillin e Sigurimit. Aty do të ketë një propozim të qartë për këtë”, - tha Ahtisaari, duke deklaruar se “duhej të ishte i rezervuar deri në atë moment”. Konsultimet e reja për statusin e Kosovës mes Prishtinës e Beogradit duhet të zhvillohen nga 12 deri më 23 shkurt në Vjenë, ndërsa gjatë muajit mars Ahtisaari pritet të paraqesë propozimin edhe në Këshillin e Sigurimit të OKB-së, që duhet të votojë një rezolutë të re për Kosovën.