Në Aventino, një zonë fare pranë qendrës së Romës, ku ende flet qytetërimi i vjetër me gjuhën e arkitekturës epokale të ndërtimit, gjendet një shesh ku historitë takohen duke shërbyer edhe si bazë e një qytetërimi të sotëm modern. Pikërisht aty gjendet edhe shtatorja e heroit tonë kombëtar Gjergj Kastrioti – Skënderbeu. I ndërtuar dhe vendosur pranë këtij sheshi në vitin 1940, ky monument ka shërbyer si pikë e përbashkët takimi për njerëz të shquar të historisë e artit, kulturës e politikës, albanologë e studiues të ndryshëm, bashkatdhetarë dhe miq të popullit shqiptar.

Ky monument ka qenë gjithmonë edhe nje simbol krenarie dhe identiteti jo vetëm për Shqipërinë por edhe për arbëreshet, te cilët si pasardhës se kohës se Skënderbeut, janë imazhi i një epopeje te hershme dhe te lavdishme. Pikërisht më 20 janar, në sheshin “Albania” pranë shtatores se Heroit, Ambasada Shqiptare në Romë, organizoi një ditë përkujtimore të titulluar: “Gjergj Kastrioti - Skënderbeu (17 janar 1468 - 17 janar 2007), ishte dhe ngelet simboli i shqiptarizmit, dhe Hero i te gjitha kohërave”. Ambasadori i Shqipërisë ne Romë Shkëlqesia e tij zoti Llesh Kola, theksoi se Skënderbeu nuk njihet vetëm si udhëheqës dhe luftëtar që i bëri ballë vërshimit Otoman për 25-vjetë, por edhe si diplomati dhe njeriu i paqes, që krijoi aleanca dhe ndërtoi një politikë me merita jo vetëm për Arbërinë por edhe për Evropën e asaj kohe.

Një përshkrim historik të figurës së Skënderbeut që nga origjina e tij si Princ në Krujën e viteve 1400 e deri tek vlerat e sotme historike, e bëri prof. Italo Fortino, Docent pranë Universitetit të Napolit. Me origjinën e vet arbëreshe prof. Fortino tha se ndjen krenarinë dhe detyrimin për të vlerësuar këtë figurë të qëndresës, trimërisë e patriotizmit. Ai theksoi se Skënderbeu për këto merita ka qenë në qendër të vëmendjes së shumë artisteve duke filluar qe nga Rembrand etj. (Sipas trashëgimtarëve të familjes Kastrioti, piktura dedikuar Skënderbeut nga Rembrand është vjedhur në vitin 1992). Po ashtu historiane e shkrimtarë të asaj epoke e cilësojnë Skënderbeun si njeriun ku gërshetohet qartë trimërisë, besa, dashuria ndaj familjes dhe atdheut. Profesor Italo Fortino përfundoi me thënien se shqiptarët kudo ne botë duhet te ndihen krenarë, pasi prej gjirit të tyre historia ka nxjerre dy emra të shquar‚ Skënderbeun dhe Nënë Terezën. Një ligjëratë të tillë paraqiti edhe juristi-shkrimtar, mik i afërt i Shqipërisë zoti Gennaro Francione.

Ne librin e tij te fundit “Skënderbeu nje hero modern”, autori e vlerësoi këtë Princ si një strateg që mbrojti dhe konsolidoi për 25-vjet jo vetëm shtetin Arberor, por tërthorazi edhe Romën e popullin italian, pasi nuk i lejoi hordhitë Otomane që të kapërcenin Adriatikun e të derdheshin drejt Italisë e Evropës. Vetë Papa i asaj kohe e kishte pagëzuar Skënderbeun si “Atlet të Krishterimit”. Zoti Gennaro si studiues i apasionuar theksoi rolin që ka kjo figure historike në afrimin e dy popujve tanë fqinj.

Zoti Giorgio Castriota (Gjergj Kastrioti) pasardhës i familjes së Skënderbeut nga Napoli ishte edhe i nderuari i veçante i kësaj dite. Në fjalën e tij, ai tha se ndihej krenar që ishte gjak i gjakut Arbëror. Ai tha se së shpejti do te vizitojë Shqipërinë jo në mënyrë zyrtare apo si turist, por para së gjithash si një shqiptar i vërtetë.