Shqipëria nxiton të zhvillojë teknologjinë e internetit. Kryeministri premton ta rigjallërojë vendin me ndihmën e Microsoft-it.

Kryeministri i Shqipërisë Sali Berisha fluturoi nga Tirana drejt Edinburgut për të takuar bosin e Microsoft-it, Bill Gates. Sipas zëdhënësit të Kryeministrit, të dyja palët kanë nënshkruar një marrëveshje që lejon Shqipërinë të përdorë programet e Microsoft kundrejt një çmimi më të lirë se çmimet në treg. Berisha ishte ftuar në një forum të nivelit të lartë ku merrnin pjesë përfaqësues të rreth 40 shteteve.

Forumi i Kryeministrave që organizohej nga vetë Microsoft, u zhvillua në ndërtesën e Parlamentit skocez. Udhëheqësit e pranishëm në këtë forum dëgjuan fjalët e ekspertëve të Microsoft-it të cilët ligjëruan mbi rolin e teknologjisë dhe rolin e saj në transformimin e vendeve në zhvillim. Berisha tha se Shqipëria kishte bërë progres në demokraci falë teknologjisë së internetit. “Shqipëria është përballur me shumë sfida, ndryshe nga vendet e tjera evropiane. Gjysma e popullsisë shqiptare është nën 25 vjec dhe ne na duhet ta afrojmë Shqipërinë pranë moshë së tyre, ta gjallërojmë dhe ta rinojmë atë”, tha Berisha në fjalën e tij.

Sipas Berishës, zhvillimi i informatikës është themelore në rrugën e suksesit dhe reformës. “Zhvillimi i teknologjisë së internetit është një armë e fortë për të ndaluar korrupsionin. Ne synojmë të fusim teknologjinë e internetit në çdo shtëpi, në çdo shkollë dhe në çdo institucion”, tha Kryeministri i Shqipërisë.

Pjesë e marrëveshjes është që Microsoft të sigurojë kompjutera me çmime të lira për nxënësit e shkollave shqiptare dhe institucionet. Por, ndërsa qeveria shqiptare e trumbetoi si sukses marrëveshjen me bosin e Microsoft, disa kritikë e kanë quajtur këtë si një flluskë sapuni që do t’i kushtojë shumë ekonomisë shqiptare dhe taksapaguesve.

Disa vende evropiane kanë hequr dorë nga blerja e programeve kompjuterike te Microsoft dhe përdorin programet “Linux” që janë falas dhe shpeshherë më efikase.