TIRANA :

Qendërmbrojtësi i kampionëve ka shënuar një eurogol të shtunën ndaj Vllaznisë në fitoren e vështirë 3-2

Hajdari: Kjo, "bingoja" ime bardheblu

Gentian Hajdari, mbrojtësi luftarak i Tiranës, duhet të priste shumë gjatë për të shënuar të parin gol me fanellën bardheblu. Dhe jo një gol dosido, por një eurogol të shënuar nga 25 metra. Ky është sezoni i tij i katërt në radhët e kampionëve, por ai asnjëherë nuk kishte mundur ta gjente rrugën e rrjetës. Kjo edhe për shkak të pozicionit të tij si qendërmbrojtës, siç e pohon vetë Gentiani. Gjithsesi, ndoshta ia vlen të presësh kaq gjatë.
Në një deklarim për "Sportin shqiptar", Hajdari shprehet mjaft i kënaqur pas suksesit të arritur me shkodranët për javën e pestë të kampionatit. "Jam shumë i lumtur për atë gol të bukur që shënova ndaj shkodranëve. Kjo ishte, si të thuash, "bingoja" ime e parë bardheblu që kur ndodhem në skuadrën e Tiranës. Në atë moment, kur pashë që topi po më afrohej, nuk u mendova dy herë dhe godita menjëherë në drejtim të portës. Sfera mori një trajektore vërtet të çuditshme dhe nuk i dha mundësi portierit kundërshtar ta shmangte,"- thotë numri 16 i kampionëve. Përpara shënimit të atij eurogoli, rezultati i ndeshjes ishte i fiksuar në shifrat e barabarta 1-1. Tirana u hodh e gjitha në sulm në fundin e pjesës së parë dhe në këto momente erdhi dhe goditja "vdekjeprurëse" e Hajdarit, çka solli një gëzim në kampin bardheblu. Ish-dinamoviti ka marrë plotësisht karakteristikat e lojës plot grintë të Tiranës dhe është një ndër "kartat" e vlefshme të Memës në të gjitha sektorët mbrojtës të fushës. Një gjë të tillë ai e shpreh edhe vetë: "Ndihem i motivuar në këtë skuadër, pasi kam afro katër vjet që jap kontributin këtu. Gjithmonë mundohem të jap maksimumin në lojë, pavarësisht nëse luaj në mbrojtje apo në mesfushë. Për mua ka rëndësi që Tirana të fitojë në çdo ndeshje."
Duke lënë mënjanë aspektin personal, Gentiani flet edhe për atë 90-minutësh me vuajtje ndaj kuqebluve. "Takimin e kemi nisur mirë, kur shënuam që në minutat e para të lojës. Kjo solli njëfarë euforie në lojën tonë dhe shkodranët na barazuan. Gjithsesi, ne nuk e ulëm ritmin dhe gjithmonë ishim në nivel më të lartë se shkodranët. Edhe pse ata na barazuan dy herë, të gjithë në grup ishim të bindur se do ta fitonim ndeshjen. Fati e deshi që golin e fitores ta shënonte Merkoçi, një nga sulmuesit e talentuar që kemi në skuadër. Jemi të kënaqur me këtë fitore të merituar dhe tashmë shohim përpara,"- bën të ditur mbrojtësi energjik.
Po penalltia? "Gjatë lojës ishin dy raste të dyshimta, një për ne dhe një për shkodranët. Në rastin kur sulmuesi i Vllaznisë u pengua në zonë, gjyqtari akordoi menjëherë penallti kundër nesh, ndërkohë që kur topi u prek në zonë me dorë, Sazan Velçani hezitoi ta jepte. Gjithsesi, unë nuk dua të polemizoj, pasi tani çdo gjë ka përfunduar dhe ne e shohim veten të shkëputur 4 pikë nga rivali i drejtpërdrejtë, Partizani,"- përfundon mbrojtësi-gol i kampionëve, Gentian Hajdari.
Aurel CELIBASHI 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

TIRANA :

Kampionët, sot përgatitjet për Cërrikun

Pas suksesit 3-2 të shtunën në kampionat ndaj Vllaznisë, bardheblutë sot do t'i rikthehen stërvitjes së tyre të zakonshme. Ajo do të jetë e ndarë në dy seanca, si zakonisht, paradite dhe pasdite. Ndërkohë, përpara derbit me Partizanin të shtunën, kampionët do të luajnë ndeshjen e kthimit për turin e dytë të kupës me Cërrikun. Ndeshja e parë, siç dihet, ka përfunduar me fitoren e pastër 3-0 të Tiranës, ndërkohë që në takimin e kthimit pritet që tekniku Mema të aktivizojë një pjesë lojtarësh të rinj dhe atyre "veteranë", që nuk u është dhënë mundësia për të luajtur. Në këtë ballafaqim me cërrikasit do të jetë i gatshëm edhe Pinari, i skualifikuar me karton të kuq në ndeshjen me Shkumbinin.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

BESA :

Sulmuesi i dalluar kavajas shprehet se skuadra e tij e ka merituar fitoren me Lushnjën

Kuli: Fitorja, kurorëzim i lojës në rritje

Krahas Shetës, Romanishinit e Abdullait, 21-vjeçari Bekim Kuli po jep një kontribut të madh në përmirësimin e lojës së Besës. Kavajasi Kuli, me lojën e tij, është kthyer në këto javë të para të kampionatit në promotor të mesfushës. Njëkohësisht, ai mbetet ngacmuesi kryesor i portave kundërshtare, duke qenë shqetësimi kryesor për çdo mbrojtje. Egoja, shpirti i garës, teknika e lartë individuale dhe sedra, që e përçon edhe te të tjerët, janë disa tipare të lojës së tij, që vjen gjithmonë në rritje. Duke qenë ndër ideatorët kryesorë të fitores ndaj Lushnjës në trasfertë, Kuli, në intervistën për "Sportin shqiptar" shpreh gëzimin për fitoren. Gjithashtu, ai nuk ngurron të analizojë edhe rrugën sesi erdhi ekipi i tij deri te fitorja e fundit.
- Kuli, keni marrë një fitore në trasfertë ndaj Lushnjës. A e prisnit atë?
- Që të jem i sinqertë, mbi të gjitha dëshironim të mos dilnim pa pikë nga kjo ndeshje. Gjatë gjithë javës, trajneri Sejdini na kishte kritikuar. Kishte të drejtë, sepse nuk po tregonim realisht ato vlera që i zotëron secili prej nesh. Bindja e tij, që ekipi ka shumë rezerva brenda vetes dhe ato duhet t'i demonstrojë në fushë, dalëngadalë po përcillet edhe te ne, futbollistët. Këtë e treguam edhe ndaj Lushnjës. Fundi i kësaj ndeshjeje i dha të drejtë trajnerit Sejdini. Natyrisht, kjo fitore ishte e merituar. Ajo është meritë e shokëve të mi, veçanërisht e profesor Sejdinit.
- Në ç'drejtim mendoni se u shpreh më mirë Besa në këtë ndeshje?
- Së pari, do të veçoja faktorin psikologjik. Ju e patë vetë që e nisëm lojën në sulm dhe arritëm të shënojmë të parët. Përveç kësaj, krijuam edhe shumë raste të tjera shënimi, duke dëshmuar se besimi në vetvete është rritur. Duke filluar nga portieri, që ishte siguria jonë, e deri te sulmi, të gjithë u angazhuan me gjithë shpirt. Dua të veçoj sidomos lojën e nigerianit Abdulla, i kudondodhur, dhe debutimin, nëse mund ta quaj kështu, të Qerollit. Përmenda këta, por besoj se të gjithë kanë meritë në këtë fitore që erdhi në kohën e duhur për ne.
- Thatë që kjo fitore do t'ju shërbejë për ngritjen morale në javët në vazhdim. Po vetë Kuli a ka ende për të dhënë?
- Patjetër. Fitorja me Lushnjën na jep të drejtë të guxojmë e të fitojmë edhe në ndeshjet e tjera. Pas këtij suksesi, morali ynë është më i lartë, çka na jep mundësi të shprehemi më lirisht në fushën e lojës në takimet e ardhshme. Sa për veten, dua ta justifikoj më shumë besimin dhe përkrahjen që më japin çdo ditë bashkëqytetarët e mi. Do të punoj më shumë, jo vetëm si lojtar, por mbi të gjitha si kavajas, për t'u treguar të gjithëve se Besa i ka mundësitë të kthehet atje ku e ka vendin, midis skuadrave më të mira. Mezi po pres të kthehemi në stadiumin tonë, për të zhvilluar lojëra të bukura dhe rezultative, duke i kënaqur e argëtuar tifozët tanë të zjarrtë.
Feriz Ferizaj 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

DINAMO :

Portieri dinamovit pohon se barazimi me Teutën erdhi si rezultat i gjendjes jo të mirë psikologjike

Lika: Na mungon mentaliteti i fituesit

Pas barazimit 1-1 që Dinamoja arriti në ndeshjen e së premtes me Teutën, duket se në skuadër ka diçka që nuk shkon. Blutë, përveç rezultatit, nuk kanë bindur as në lojën që kanë zhvilluar në "Selman Stërmasi", ku mbi të gjitha ekipit i mungoi grinta dhe përqendrimi në fushë. Kanë kaluar pesë javë dhe Dinamoja e sheh veten në vendin e katërt, në kuotën e 10 pikëve. Blutë e filluan mjaft mirë kampionatin e ri, me tre fitore radhazi, ndërsa në dy ndeshjet e fundit me kundërshtarë direktë si Partizani e Teuta, humbën pesë pikë mjaft të vlefshme.
Portieri i Dinamos, Ilion Lika, mendon se aktualisht skuadra vuan nga "ngërçi" psikologjik, i cili nuk e lejoi të tregonte asgjë në ndeshjen me Teutën. Në lidhje me këtë ndeshje Lika shprehet se Dinamoja mund të kishte fituar, sepse pas pjesës së parë udhëhiqte 1-0, por goli aksidental i barazimit vështirësoi gjithçka. Portieri dinamovit pohon se ndoshta ekipit i mungon edhe mentaliteti i fituesit, gjë që duhet eliminuar sa më parë. Sipas tij, ende futbollistët nuk kanë arritur të dalin në lojën e tyre. Megjithatë, portieri i bluve parashikon ndryshimin e madh në javët e ardhshme të kampionatit. Në intervistën e tij për "Sportin shqiptar", portieri Ilion Lika është shprehur:
- Një barazim 1-1 me Teutën në fushën tuaj. Si do ta komentonit ju këtë ndeshje?
- E dinim që do të ishte një ndeshje shumë e vështirë. Edhe në kampionatet e kaluara Dinamoja ka fituar me Teutën vetëm me një gol diferencë. Teuta po kalon një moment të mirë dhe këtë gjë e tregoi mjaft mirë edhe ndaj nesh. Shënuam një gol në fundin e pjesës së parë, dhe mendoj se do të kishte qenë më e thjeshtë nëse do të ruanim rezultatin. Pas golit të barazimit nga Khumalo gjithçka u ndërlikua për ne, sepse Teuta u kthye në mbrojtje dhe nuk mundëm ta çanim dot. Mund të them se barazimi ishte plotësisht i merituar për atë çka të dyja skuadrat dhanë në fushë.
- Ndërkohë është vënë re edhe një lojë e dobët nga ana e Dinamos në takimin e së premtes...
- Po, është e vërtetë. Mendoj se Dinamoja nuk e kishte kapërcyer ende goditjen psikologjike që mori pas humbjes në derbin me Partizanin. Skuadra nuk arriti të dilte asnjëherë në lojën e saj, ndërsa sulmet tona thyheshin lehtë nga mbrojtja kundërshtare. Munguan rastet për shënim, por më shumë skuadrës i mungoi shpirti i garës.
- Në dy ndeshjet e fundit Dinamoja ka arritur të fitojë vetëm një pikë. Sipas jush, çfarë ka që nuk shkon?
- Nuk di çfarë të them. Bëmë një nisje mjaft të mirë të kampionatit me tre fitore, por në dy takimet e fundit kemi humbur pikë tepër të vlefshme, të cilat mund të na kushtojnë shtrenjtë në fund. Ndaj Partizanit luajtëm mirë dhe nuk patëm fat, por të premten me Teutën bëmë një paraqitje me të vërtetë të dobët. E thashë edhe më lart se ndaj Teutës ekipi vuajti "ngërçin" psikologjik që e kapi pas humbjes në derbi. Megjithatë, duke pasur parasysh të gjitha ndeshjet e luajtura, unë do të thosha se ende ende nuk e kemi gjetur fizionominë e duhur të lojës. Ndoshta edhe futbollistët nuk kanë dalë plotësisht në lojën e tyre. Kam përshtypjen se Dinamos i mungon mentaliteti i fituesit, që është i domosdoshëm për një ekip pretendent për titull.
- A mendoni se në javët e ardhshme Dinamoja do të arrijë të ndryshojë gjithçka?
- Sigurisht që po. Në fillim duhet të mendojmë për ndeshjen e radhës në kampionat, e cila duhet fituar me çdo kusht. Gjithashtu, duhet të sigurojmë kualifikimin për në turin tjetër të Kupës së Shqipërisë në ndeshjen e kthimit me Pogradecin. Mendoj se në në takimet e ardhshme do të gjejmë lojën e bukur dhe rezultatin. Dinamoja mbetet në synimet e saj që janë titulli kampion dhe Kupa e Shqipërisë.
- Tirana fiton sërish dhe shkëputet me pikë. Si e parashikoni luftën për titull?
- Momentalisht jemi pesë pikë prapa nga vendi i parë, që mbahet nga Tirana. Dihet që Tirana është një nga skuadrat më të forta për momentin, e cila synon mbrojtjen e titullit kampion. Kanë kaluar vetëm pesë javë dhe mendoj se është ende herët për të bërë parashikime, por di që neve na duhet një punë shumë e madhe për rekuperimin e pikëve të humbura. Edhe ndeshjet direkte, që nuk janë pak, por katër, do të kenë ndikim të drejpërdrejtë për sa i përket fitimit të titullit.
Fatjon RUPI 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

DINAMO :

Blutë në stërvitje që të dielën
Dinamoja i është rikthyer stërvitjes pas një dite pushimi. Seanca e djeshme ka filluar në orën 17.00, ndërsa gjatë saj futbollistët kanë kryer kryesisht ushtrime të karakterit aerobik. Si zakonisht, trajneri Marko ka folur për disa minuta me të tijtë duke bërë një analizë të ndeshjes së kaluar. Kjo javë do të ketë një program të ngjeshur për dinamovitët, të cilët do të luajnë të martën ndaj Pogradecit dhe të premten ndaj Lushnjës. Nesër blutë do të luajnë ndeshjen e kthimit të turit të dytë të Kupës së Shqipërisë. Takimi i parë i luajtur në Pogradec ka përfunduar në barazim 1-1.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

FLAMURTARI :

Kuqezinjtë vlonjatë triumfojnë ndaj Shkumbinit të Peqinit me një fitore 3-golëshe

Flamurtari, fitorja që doli mbi problemet

Flamurtari është e vetmja skuadër që në javën e 5-të të këtij kampionati ka fituar pastër, me një rezultat të thellë. Fitorja 3-0 ndaj Shkumbinit ka shërbyer njëherësh edhe për ta ngritur në këmbë skuadrën bregdetare, pas atij fillimi të vështirë e të mundimshëm të sezonit të ri. Tani vlonjatët kanë "kërcyer" tri shkallë më lart, duke u pozicionuar të vendin e 7-të në klasifikim. Trajneri 32-vjeçar Bozhani, i pamësuar me "sfida" dhe ngarkesa të tilla në jetën e tij sportive, shprehet për fitoren që arriti skuadra e tij të shtunën: "E ndiej veten të çliruar. Tani po marr frymë lirisht, pasi prej disa javësh diçka më mundonte, pavarësisht se grupi i lojtarëve, ashtu kokulur, ishte i tendosur në stërvitje."
Në fakt, gjatë gjithë javës që shkoi, skuadra e kishte "stakuar" mendjen nga mungesa e financimit dhe po i kushtohej përgatitjes psikologjike për ta fituar këtë ndeshje. Deklarimet e kapitenit Resuli dhe të mesfushorit Sejfullai, 24 orë para takimit me Shkumbinin, se nuk do ta braktisin skuadrën, por do të luanin për ta fituar ndeshjen, si borxhlinj ndaj sportdashësve vlonjatë, janë materializuar tashmë. Angazhimi i lojtarëve të Flamurtarit është shfaqur dukshëm gjatë 90 minutave të lojës, aq sa trajneri Bozhani ka mbetur plotësisht i kënaqur: "Jam befasuar nga loja e "veteranit" Anesti Vito. Ai ka luajtur si të ishte 20 vjeç. E gjithë skuadra ka shfaqur angazhim e shpirt të lartë gare. Këtu nuk mund të lë pa përmendur Sejfullain, në një formë mjaft të mirë sportive, që me 2 golat e tij shtroi rrugën e fitores ndaj Shkumbinit. Pastaj vijnë me radhë të tjerët, si Dine, Resuli, Daiu, Xhafa, Çerçizi, Idrizi etj. Të gjithë u shfaqën të mrekullueshëm."
Ndryshe nga ndeshjet e tjera, skuadra e kuqezinjve ka qenë më e organizuar në mesfushë, çka solli ingranimin dhe harmonizimin e veprimeve të sulmuesve Xhafa, Vito, Serjani. "Ashtu siç kisha premtuar, u mundova të bëj disa ndryshime në mënyrën e organizimit të lojës, brenda grupit ekzistues. U veprua mirë në lojën nga krahët, ku spikatën Idrizi dhe Çerçizi. Me kroset që dhanë në drejtim të portës, por edhe me pasin e shkurtër, ata u bënë promotorë të suksesit," - ka shtuar trajneri Bozhani. Ndërkohë, në përfundim të ndeshjes, presidenti Selami, të gjithë lojtarët që u aktivizuan në ndeshjen ndaj Shkumbinit, i ka shpërblyer me nga 300 dollarë secilin. Kështu, "të urtët" e Flamurtarit kanë përfituar nga filozofia "qengji i urtë pi dy nëna".
Kastriot Brahimi 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

PARTIZANI :

Trajneri i të kuqve shprehet i mërzitur për disa nga titullarët që bëjnë lojë individuale

Spahiu: Na ndëshkoi egoizmi

Partizani, pas javës së pestë të kampionatit, nuk ka bërë asgjë më shumë nga ç'pritej, apo flitej nga kampi i kuq, pasi është shkëputur edhe dy pikë të tjera nga kreu i renditjes. Të kuqtë kanë barazuar në "Ruzhdi Bizhuta" të Elbasanit me vendësit, duke humbur kështu një mundësi për t'i qëndruar sa më pranë Tiranës, që, nga ana e saj, nuk ka gabuar këtë javë as ndaj Vllaznisë së Shkodrës. Në Elbasan, Partizani, edhe pse në formacionin e parë kishte një ndër lojtarët më të mirë të përfaqësueses, Klodian Duron, "u dënua" që në minutat e para të pjesës së parë, ku Ndreka, pas dy ndërhyrjeve të ashpra, e la ekipin e tij me 10 lojtarë. "Ishim të detyruar ta ndryshonim lojën, pasi edhe mund të ndëshkoheshim," - sqaron në një intervistë për "Sportin shqiptar," - trajneri i të kuqve, Spahiu. Sipas trajnerit të Partizanit, ekipi, ndonëse mbeti me 10 lojtarë që në minutat e para, mund ta kishte fituar ndeshjen në pjesën e dytë, nëse disa nga titullarët nuk do të tregoheshin shumë egoistë para portës:
- Barazimi i dytë në Elbasan, çka do të thotë katër pikë larg Tiranës kryesuese...
- Po, këtë javë barazimi na ka kushtuar shumë, sepse kryesuesja, nga ana e saj, nuk ka gabuar. Kësisoj, na mbetet ta tregojmë veten në javën tjetër, kundër Tiranës kryesuese, në takimin direkt me të.
- Partizani ka luajtur me 10 lojtarë, pasi Ndreka doli me karton të kuq. A ishte i drejtë gjykimi në këtë rast?
- E kam theksuar edhe më parë se gjyqtari është kompetent në gjykimin e tij, aq më tepër kundërshtimi nuk vlen asgjë, ndaj nuk më pëlqen të ndërhyj në këtë çështje. Pasi Ndreka doli shpejt nga fusha me të kuqe, m'u desh detyrë të ndryshoja modulin e lojës së ekipit. Ne duhet të ndryshonim në pjesën tjetër të lojës, sepse jo vetëm që fitorja u bë më e vështirë, por nuk ishte çudi që edhe mund të pësonim gol. Kështu, largova një sulmues, Kariokën, duke futur Hallaçin në mesfushë. Në pjesën e dytë, efektet ishin pozitive, ku në dy raste të pastra mund të kishin shënuar, por lojtarët tanë gabuan.
- Cilët ishin gabimet që u bënë gjatë pjesës së dytë?
- Ishin më tepër për shkak të egoizmit të futbollistëve, që shpërdoruan raste të pastra para portës. Nuk mund të tolerohen veprimet e pahijshme të disa prej lojtarëve, që luajnë në formacionin e parë. Lojtarët duhet ta kenë të qartë që loja individuale nuk ka vlerë para synimeve të ekipit. Ekipi kërkonte tripikëshin dhe mund ta kishte arritur, nëse Muzaka, në pjesën e dytë, do të kishte pasuar te shokët e tjerë të skuadrës. Ishte një aksion i qartë, ku katër nga lojtarët tanë dolën përballë dy mbrojtësve të Elbasanit. Po kështu, edhe Abilio nuk pasoi te Duro në një rast të ngjashëm, duke u treguar egoist, dhe si pasojë shpërdoroi një tjetër aksion goli. E kam në përgjithësi edhe për disa lojtarë të tjerë, që shpesh nuk luajnë për skuadrën, duke e dënuar pa dashje.
- Cilat mbeten detyrat për javën në vijim?
- Së pari, duhet të korrigjojmë shumë nga gabimet e Elbasanit. Do të luftojmë egoizmin e disa lojtarëve, që të mos na dëmtojë në takimet e tjera. Kampionati është shumë i gjatë, ndaj për të përballuar dhe arritur objektivat me sukses duhet të punojmë dhe të bëjmë ndryshime të tjera.
Aranit MURAÇI 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

VLLAZNIA :

Pjesëtarët e kampit kuqeblu janë të mendimit se barazimi me Tiranën do të ishte rezultati më i drejtë

Haxhiosmanoviç: Vllaznia po rilind

Ajo çfarë ka paraqitur të shtunën në "Qemal Stafa" ka qenë më e mira e mundshme e Vllaznisë, së drejtuar nga malazezi Dervish Haxhiosmanoviç. Njeriut që prej javësh ka kërkuar t'u japë moral sportistëve të tij, duke i vënë paksa edhe në sedër, ka tentuar të "dirigjojë" një ansambël ndryshe në sfidën me Tiranën. Nga ajo që është parë në "Qemal Stafa" të shtunën që shkoi, mund të thuhet pa frikë se "Deda" duket se po ia arrin më së miri ta harmonizojë lojën e "veteranëve" kuqeblu me atë të të rinjve. Këta të fundit, të preferuarit e malazezit, ndaj bardhebluve nuk kanë qenë pak në fushë. Salihi, Ahu, Luka, Doçi, Belisha e Hoti kanë përbërë gati gjysmën e skuadrës kuqeblu, e cila ia ka vështirësuar së tepërmi fitoren Tiranës së pandalshme në këtë kampionat. Ata kanë dhënë më të mirën e tyre në këtë ndeshje, natyrisht të shoqëruar edhe nga emrat e njohur të ekipit, mes të cilëve duhet veçuar njëri, Safet Osja. Lojtari i kritikuar herë pas here për formën e tij, me ardhjen e malazezit duket se e ka rigjetur veten. Madje jo vetëm me lojë, por edhe në konkludim, sepse është bërë autor golash. Osja i kishte "harruar" portat kundërshtare, ndërkohë që në tri ndeshjet e fundit ka shënuar dy herë, ndaj Adës dhe së fundi ndaj Tiranës. Në ndeshjen e së shtunës, ndaj bardhebluve, të gjithë shkodranët janë kënaqur duke parë në fushë atë 11-sh kuqeblu, plot grintë e entuziazëm. Vllaznia, për herë të parë në këtë sezon futbollistik, ka treguar karakterin e saj të vërtetë. Madje këtë e ka bërë ndaj një Tirane që shumëkush e konsideronte të pandalshme. Ato 90 minutat e përballjes me bardheblutë kanë qenë vërtet sinjali i rikthimit të asaj Vllaznie që e presin të gjithë. Meritë për këtë ka pa diskutim edhe trajneri Haxhiosmanoviç, që gjatë gjithë javës besonte te rezultati pozitiv. Për këtë qëllim, kishte hartuar edhe mënyrën e lojës, e cila ka habitur shumëkënd.
Ndeshja e së shtunës në Tiranë ka pasur kësisoj shumë vlera për ekipin kuqeblu, që gradualisht po ngjit vende në renditje. Pozicioni aktual nuk i shkon për shtat Vllaznisë së sotme. Të gjithë janë të bindur se shumë shpejt shkallët do të ngjiten një e nga një. Kjo duket qartë në optimizmin që ka shfaqur trajneri Haxhiosmanoviç pas ndeshjes me Tiranën: "Jam i bindur se pas kësaj ndeshjeje keni për të parë një Vllazni shumë më të fortë, e cila do t'i ngjitë gradualisht shkallët e renditjes. Kjo është e sigurt. Lojtarët kanë fituar besim të madh në vetvete dhe ky është suksesi i parë për këtë skuadër që po rilind."
Gjergj Kola 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Fakaj, shumë zhurmë për asgjë

Ndonëse në kampin e kuq po bëhet shumë zhurmë në lidhje me ish-futbollistin e kombëtares sonë, Ervin Fakaj, deri tani nuk ka asgjë konkrete për të ardhmen e mbrojtësit vlonjtat. Dje, drejtori Thaka u shpreh për mbrojtësin Fakaj se po vazhdojnë ende bisedimet me presidentin, por nuk dihet me saktësi se kur do të kthehet në Shqipëri. Ndërkohë, për lojtarin në fjalë, i cili ka mbetur pa ekip, është dërguar në zyrat e FSHF-së një kërkesë për federimin e tij me Partizanin. Pas blerjes së Duros, presidenti Xhani u shpreh se është gati ta sjellë edhe mbrojtësin Fakaj te Partizani, madje para derbit me Tiranën, por deri tani duket se më shumë po bëhet zhurmë sesa gjë konkrete.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Fushë-Mbreti lan "gjynahet" e Ndrekës

Edhe pse ka dalë me karton të kuq të shtunën në "Ruzhdi Bizhuta" të Elbasanit, mbrojtësi i të kuqve Ndreka do të jetë në dispozicion të trajnerit Spahiu në takimin e radhës kundër Tiranës. Duke qenë se të mërkurën Partizani do të luajë ndaj Fushë-Mbretit ndeshjen e kthimit për Kupën e Shqipërisë, mbrojtësi shtatlartë do të përfitojë për të qenë i gatshëm në derbin e madh ndaj Tiranës. Përveç Ndrekës, këtë të shtunë pritet edhe kthimi i Brashinit në fushën e lojës, që edhe ky, për koincidencë, do të luajë ndeshjen e parë kundër Tiranës, ekipi që ka luajtur takimin e fundit sezonin e kaluar, ku u dënua edhe 10 javë. Ndërkohë, Ndreka është lojtari i parë që ndëshkohet me karton të kuq nga të kuqtë në pesë javët e para të kampionatit.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

TEUTA :

Kapiteni i Teutës, i kënaqur nga pika e marrë në trasfertë ndaj bluve kryeqytetas

Begeja: Morëm maksimumin ndaj Dinamos

Teuta ka barazuar në javën e pestë të këtij kampionati, në ballafaqimin e zhvilluar të premten që shkoi në "Selman Stërmasi", ndaj Dinamos. Kësisoj, skuadra durrsake ka treguar edhe një herë tjetër se është një nga pretendentet kryesore për titullin kampion. E veçanta e kësaj ndeshjeje ishte fakti se Teuta jo vetëm arriti të barazonte në fushë kundërshtare, por zhvilloi një nga ndeshjet më të mira të saj në këtë fillimkampionati. Në një deklarim rreth kësaj ndeshjeje dhe emocionet që fali ajo, do të komentonte për "Sportin shqiptar" kapiteni i "djemve të detit",
Gentian Begeja.
- Begeja, si e vlerësoni barazimin e arritur në Tiranë me Dinamon?
- Natyrisht, e vlerësoj me nota pozitive. Të premten zhvilluam një ndeshje të mirë, në të cilën treguam se jemi rivalë të denjë për titull. Morëm një barazim, që do të thotë 1 pikë, por mund të kishim marrë edhe më shumë. Sidoqoftë, morëm një pikë të vlefshme ndaj një rivaleje si Dinamo, që ka një skuadër të konsoliduar.
- Sipas jush, cili qe reparti më i konsoliduar i Teutës në këtë ndeshje?
- Nuk mund të veçoj asnjërin, sepse të tri repartet funksionuan mirë. Gjithsesi, mendoj se mesfusha ishte më e lëvizshme.
- A ju vjen keq që përsëri shënuan mesfushorët dhe jo ju, sulmuesit?
- Aspak. Përkundrazi, më vjen mirë që shënuan sërish mesfushorët. E rëndësishme është që barazuam rezultatin dhe arritëm të mos dalim pa pikë nga kjo ndeshje mjaft e vështirë.
- Keni marrë dy barazime ndaj dy rivalëve për titull, Dinamos dhe Partizanit. Ç'do të thotë kjo për ju?
- Ky fakt flet për forcën e skuadrës sonë. Madje, barazimi me dy skuadrat kryeqytetase që përmendët, do të thotë që ky kampionat është më i fortë se kurrë. Më konkretisht, ka disa ekipe që janë të denja për të luftuar për titullin.
- Pra, Teuta e ka vënë kandidaturën për titullin?
- Sigurisht. Skuadra jonë i ka të gjitha mundësitë që, me një punë serioze në stërvitje dhe me përkushtim maksimal në çdo ndeshje, pa nënvlerësuar askënd, të rivalizojë denjësisht për titullin kampion. - Gjithsesi, në opinionin sportiv shqiptar po qarkullon ideja se në këtë kampionat do të luftohet vetëm për vendin e dytë, sepse i
pari është "gllabëruar" nga Tirana...
- Të tjerët le të thonë ç'të duan. Mua më duket ide e gabuar. Askush nuk duhet të nxitohet për të dalë në përfundime të tilla. Kampionati është i gjatë dhe mund të shoqërohet me mjaft surpriza, krejtësisht të pranishme këto në futboll.
- A keni filluar të mendoni për sfidën me Tiranën?
- Jo, sepse në skuadrën tonë punohet në mënyrë të programuar. Ne përqendrohemi vetëm në ndeshjen e radhës, për të dhënë maksimumin e mundshëm. Megjithatë, do t'i vijë radha edhe Tiranës. Ne kemi treguar tradicionalisht që me ekipe të forta dimë të luajmë mirë
dhe të korrim sukses.
- A ju vjen keq që nuk shënuat në ndeshjen me Dinamon?
- Jo dhe aq. Kohën e duhur dhe ndeshjet për ta bërë një gjë të tillë i kam përpara. Shpresoj të shënoj në ndeshjet e tjera.
- Trajneri Lika, ndryshe nga ndeshja me Lushnjën, e ka vlerësuar lojën e ekipit tuaj. Ju ç'mendim keni për këtë ndeshje?
- Personalisht, them se kemi zhvilluar një nga ndeshjet më të mira në këtë kampionat, por jo më
të mirën. Në ndeshjen me Lushnjën fituam, por nuk
bindëm me lojë, ndërsa në ndeshjen me blutë kryeqytetas barazuam dhe bindëm me lojë. Ndaj Dinamos kemi marrë maksimumin e mundshëm.
LLambi Kallço 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

ELBASANI :

Mesfushori veteran i portokallinjve thotë se skuadra e tij e ka dominuar ndeshjen me Partizanin

Shahini: Elbasanit i mungoi vetëm fati