TIRANA :

Tekniku i kampionëve jep opinionin përpara përballjes me shkodranët

Mema: Ndaj Vllaznisë, tripikëshi i konsolidimit

Për trajnerin e Tiranës, Sulejman Mema, fitorja me Vllazninë është më shumë se dosdomoshmëri. Në prag të kësaj sfide të rëndësishme për javën e pestë të kampionatit, tekniku bardheblu kërkon të motivojë djemtë e tij se duhet të zhvillojnë një lojë dinjitoze, nga e cila të marrin dhe rezultatin. Në një opinion për "Sportin shqiptar", Mema shprehet: "Tripikëshi me shkodranët sot, na konsolidon pozitat në krye të klasifikimit. Duhet medoemos të fitojmë në të gjithë takimet në fushën tonë, nëse kërkojmë të shpallemi sërish kampion. Nuk do të bëjmë përjashtim nga objektivat tona edhe me Vllazninë, ndonëse e dimë që shkalla e vështirësisë është më e madhe se në katër ndeshjet e para,"- thotë ai. Për njëshin e stolit bardheblu, skuadra shkodrane ka qenë dhe do të mbetet nga rivalet kryesore në luftën për titull. Sipas Memës, ndonëse Vllaznia ka pasur problemet e saj financiare në fillim të kampionatit, duket se e ka rimarrë veten pas fitores me Elbasanin. "Të gjithë jemi të ndërgjegjshëm për forcën e shkodranëve. Gjithmonë ndër vite na kanë rivalizuar me dinjitet, sidomos këtu në kryeqytet. Të dyja skuadrat janë të denja për njëra-tjetrën dhe diferencat do të bëhen në aspektin se cili ekip do të gabojë më pak. Për mua, Vllaznia e ka gjetur vetveten pas fitores së fundit me elbasanasit, ndaj po e përsëris që ky 90-minutësh do të jetë i zjarrtë,"- komenton Sulejman Mema. Kuqeblutë mendohet të jenë pengesa e parë për kampionët në këtë sezon, prandaj duhet medoemos fitorja. Trajneri bardheblu është i ndërgjegjshëm që për Tiranën tani nis një cikël i ri, duke parë edhe kalendarin. Pas Vllaznisë, Tiranën e pret Partizani, Teuta dhe Dinamo. "Duke filluar nga ndeshja e sotme, kalendari na rezervon takime me skuadrat direkte në luftën për titull. Duhet të bëjmë të pamundurën për të marrë pikët e plota, si dhe për t'i dhënë publikut kënaqësinë e lojës së denjë për një ekip kampionësh." Në fund, në lidhje me formacionin, ai shprehet se janë të gjitha gjasat të jetë pothuajse po ai si me ndeshjen me Shkumbinin, me përjashtim të Licit në vend të Pinarit të skualifikuar.
Aurel CELIBASHI 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

TIRANA :

Golashënuesi bardheblu kërkon maksimumin nga vetja dhe shokët në ballafaqimin me kuqeblutë

Halili: Sot dua golin e fitores

I gatshëm për superndeshjen e sotme me Vllazninë, golashënuesi më i mirë i kampionatit të fundit, Mahir Halili, kërkon golin e fitores në këtë 90-minutësh. Dibrani i kampionëve po kalon periudhën më të suksesshme të karrierës së tij në kampionatin shqiptar dhe kërkon të japë më të mirën e tij për Tiranën. Ndonëse nuk ka shënuar gol në dy takimet e fundit, Halili shpreson që një gjë të tillë ta bëjë sot me kuqeblutë në stadiumin kombëtar "Qemal Stafa". "Sot do ta kërkoj me çdo kusht golin e fitores ndaj Vllaznisë. Vjet, ndaj tyre e kam gjetur rrugën e rrjetës dy herë dhe jam i bindur se një gjë të tillë do ta përsëris edhe sot. Ndihem shumë mirë fizikisht dhe jam i gatshëm që këtë formë ta vendos në shërbim të Tiranës,"- shprehet numri 14 i kampionëve. Mahiri është i ndërgjegjshëm për rëndësinë e takimit me shkodranët, megjithatë beson se me një lojë dinjitoze, skuadra e tij do të dijë ta kalojë edhe këtë pengesë të radhës. "Jemi të vetëdijshëm të gjithë, se ballafaqimi me shkodranët është mjaft i rëndësishëm për ecurinë tonë në këtë kampionat. Na duhet që të zhvillojmë një lojë të bukur, ashtu siç na shkon për shtat, pasi edhe Vllaznia luan hapur dhe nuk mbyllet në mbrojtje. Nëse sot marrim tri pikë tjera, do të na jepnin një moral të madhe për vazhdimësinë tonë,"- citon Mahiri. Gjatë gjithë javës, kampionët janë stërvitur maksimalisht dhe e kanë ndryshuar disi strategjinë e tyre. Gabimet që u shfaqën në Peqin një javë më parë, drejtuesit bardheblu janë të bindur se janë minimizuar. I vetmi ndryshim në 11-shin e parë, që pritet të zbresë sot në orën 16:00 në "Qemal Stafa", do të jetë Lici në vend të Pinarit në rolin e stoperit. Ndërkohë, në krahun e majtë, do të luajë i riu Agolli dhe në qendër Sokol Bulku. Pjesa tjetër e skuadrës do të jetë e pandryshuar. Partneri i Halilit në sulm do të jetë, si zakonisht, goleadori Indrit Fortuzi. Duket se kjo dyshe tashmë i ka konsoliduar pozitat e saj në formacionin bazë dhe së bashku me Mukën në mesfushë pritet t'i japë gjallëri sulmit. "Të luash përkrah Fortuzit në sulm, është më shumë se kënaqësi. Kemi katër sezone që jemi krah për krah dhe e njohim "symbyllur" lojën e njëri-tjetrit. Këtu nuk duhen harruar edhe dy sulmuesit e tjerë, Xhafa dhe Merkoçi, vlerat e të cilëve janë të njohura nga të gjithë. Ndërkohë, fjalët më të mira dua të them edhe për Devi Mukën, i cili nuk resht me pasimet e tij të sakta në zonë,"- përfundon deklarimin "Këpuca e artë", Mahir Halili.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

VLLAZNIA :

Mbrojtësi i Vllaznisë nuk i konsideron të pathyeshëm bardheblutë e Tiranës

Zmijani: Parashikoj një ndeshje të hapur

Vllaznia e ka përcaktuar tashmë mënyrën sesi do të luajë ndaj Tiranës: lojë të kujdesshme në mbrojtje, repart ky që do të jetë i përforcuar me lojtarë, dhe një kundërsulm të shpejtë, i cili duhet ta gjejë të papërgatitur kundërshtarin. Siç shihet, në radhë të parë, duke rregulluar prapavijën, trajneri Haxhiosmanoviç kërkon të mos pësojë gola, sepse e njeh mjaft mirë rrezikshmërinë e sulmit bardheblu. Për këtë qëllim, njëri prej protogonistëve të formacionit të Vllaznisë, mbrojtësi i njohur Luan Zmijani, në deklarimin e tij për "Sportin shqiptar", qartëson disi edhe mënyrën sesi do të veprohet për neutralizimin e sulmuesve të njohur të Tiranës. "Ne e dimë se Tirana ka sulmin më të mirë të kampionatit. Ky është fakt që kërkon vëmendje nga çdo skuadër. Ne do të përpiqemi që emrave të njohur të sulmit të kësaj skuadre t'u përgjigjemi me lojë të fortë dhe të kujdesshme në mbrojtje. E them me bindje se ndeshja e sotme me Tiranën do të jetë krejtësisht e hapur," ka thënë Zmijani. Në fakt, gjatë gjithë javës stërvitore, trajneri Haxhiosmanoviç ka punuar në veçanti me lojtarët që do të përbëjnë prapavijën e Vllaznisë në sfidën me Tiranën. Madje, u ka kërkuar atyre përqendrim maksimal, sepse çdo hezitim apo gabim i momentit mund të shoqërohet me pasoja, nisur nga aftësitë individuale që zotërojnë sulmuesit bardheblu. Vetë Zmijani i pranon vështirësitë e këtij takimi, por, nga ana tjetër, nuk është dakord që emrat e formacionit tiranas të mbivlerësohen. "Jam dakord që Tirana ka në gjirin e saj lojtarë mjaft cilësorë, por kjo nuk duhet të na trembë. Lojtarë të tillë kemi edhe ne në skuadër, mjafton të jemi të qetë, të përqendruar dhe të dalim në lojën tonë. Gjatë këtyre ditëve, në stërvitje jemi munduar të tregojmë kujdes në variantet e lojës që po përdor trajneri ynë," ka shtuar më tej numri 2 i formacionit shkodran. Vlerësimi për këtë ndeshje është maksimal. Kjo, pasi i gjithë opinioni sportiv shqiptar pret me kërshëri të madhe të shohë nëse Tirana është vërtet në gjendje t'i dërrmojë ekipet e tjera, apo me Vllazninë do ta ketë të vështirë. Deri tani, kundërshtarët me të cilët janë ndeshur bardheblutë e El Sajedit kanë qenë jo në nivelin e duhur, prandaj jo më kot përballë tyre Tirana ka shënuar "festivale golash". Luan Zmijani, 26-vjeçari i njohur shkodran, i garanton të gjithë se në këtë takim të sotëm nuk bëhet fjalë për të tilla goleada të Tiranës. "Të tilla rezultate as nuk duhen çuar ndër mend në ndeshjen ndaj nesh. Përkundrazi, siç e kemi deklaruar herë pas here, ne do të shkojmë në "Qemal Stafa" për të marrë rezultat pozitiv," ka thënë në fund të deklarimit të tij mbrojtësi i qendrës së Vllaznisë, njëkohësisht një nga pikat më të forta të saj, Luan Zmijani. Detyra e tij dhe e shokëve të skuadrës sot do të jetë shumë e vështirë përballë emrave të tillë, si Fortuzi, Halili, Xhafa, Muka etj. Megjithatë, ai është optimist se do t'ia arrijnë qëllimit, për të dalë me sukses nga ky 90-minutësh.
Gjergj KOLA 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

VLLAZNIA :

Kuqeblutë, gati për surprizë

Kuqeblutë duken tepër të vendosur për të bërë diçka të mirë në takimin e sotëm ndaj Tiranës. Mbi të gjitha, shkodranët e Vllaznisë janë të tendosur për të kërkuar edhe rezultatin pozitiv, çka do të përbënte frenimin e parë të bardhebluve në këtë fillimkampionati. Te të gjithë pjesëtarët e Vllaznisë duket qartë dëshira për t'u paraqitur mirë në këtë takim. Edhe drejtuesit e klubit janë të bindur se futbollistët shkodranë, në takimin e sotëm, do të tregojnë vlerat e vërteta të tyre. Presidenti Çela dhe stafi i tij, gjatë këtyre ditëve, u kanë qëndruar pranë lojtarëve, për t'u dhënë zemër e moralin e duhur në prag të kësaj sfide tepër të rëndësishme. Për sa i takon formacionit me të cilin do të luajë Vllaznia sot, tashmë është e qartë se Edi Martini, sulmuesi i njohur i saj, nuk do të jetë i gatshëm. Trajneri Haxhiosmanoviç ka vendosur edhe për njeriun që do ta zëvendësojë. Në fushë do të jetë sulmuesi i ri, Franc Ahu, që do të rreshtohet kësisoj përkrah kapitenit Sinani në vijën e parë të sulmit. Ndeshjet mes këtyre ekipeve gjithnjë kanë dhuruar emocione dhe i kanë kënaqur të gjithë dashamirësit e kësaj loje të bukur. E përgjithshmja në kampin shkodran, në prag të sfidës së sotme me Tiranën, mund të përmblidhet në deklaratën e trajnerit të Vllaznisë, Dervish Haxhiosmanoviç, i cili ka thënë: "Unë, për vete, nuk jam mësuar të humbas, prandaj këtë ide kam kërkuar ta përcjell gjithmonë te futbollistët. Sa për ndeshjen me Tiranën, dua ta përsëris edhe njëherë tjetër, se nuk do të luajmë për të humbur. Kam shumë besim se do të bëjmë diçka të mirë në këtë ndeshje."
Gjergj KOLA 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

PARTIZANI :

Mesfushori i kombëtares premton se Partizani nuk do të luajë vetëm për titull, por edhe për spektakël

Duro: Nder të luaj kundër Elbasanit

Klodian Duro, një ndër lojtarët më të mirë të kombëtares sonë, ka pak ditë që është bashkuar me Partizanin. Kontrata e tij 120.000-dollarëshe ka tronditur merkaton e këtij sezoni, e cila e pati bumin e vet pikërisht në momentin ku as vetë tifozët e Partizanit nuk mund ta besonin ardhjen e futbollistit të vetëm të kombëtares sonë në kampin e kuq. Sidoqoftë, mesfushori elbasanas, pasi ka veshur uniformën e kuqe dhe ka nisur stërvitjen nën urdhrat e trajnerit Spahiu, pret të bëjë sot debutimin në kampionatin shqiptar. Në një intervistë për "Sportin shqiptar", mesfushori Klodian Duro thekson se me Partizanin ndihet tepër i kënaqur nga kontrata dhe kushtet që i ka afruar klubi i kuq, ndërkohë që mezi pret debutimin me fanellën e re. "Kam luajtur me disa skuadra në kampionatin shqiptar, por Partizani, për vetë tifozerinë e zjarrtë që ka anembanë Shqipërisë, është një ekip që e meriton titullin," - thekson Duro. Dje, pas seancës së paradites, Klodian Duro iu përgjigj disa pyetjeve tona në prag të sfidës së sotme:
- Klodi, pasi u menduat gjatë, zgjodhët më në fund Partizanin. Pse?
- Sepse presidenti Xhani më bëri një ofertë më të mirë se të tjerët, të cilën e pranova me kënaqësi. Nga ana tjetër, Partizani është një skuadër me traditë në futbollin shqiptar, ndaj ia vlen të djersish në fushë për këtë ekip.
- Keni firmosur një kontratë 1-vjeçare me Partizanin, por a është e vërtetë që mund të largoheni po të doni?
- Po. Kontratën e kam firmosur me kusht që, nëse më kërkojnë ekipe jashtë Shqipërisë, të cilat afrojnë më shumë se Partizani, edhe mund të shkëputem nga kryeqyteti.
- Nëse qëndroni deri në fund, flitet se do të përfitoni 120.000 $. Sa keni përfituar nga firma?
- Kam firmosur që për tërë sezonin në vijim të fitoj 120.000 dollarë. Natyrisht, jam i kënaqur me këtë ofertë, ndaj edhe e firmosa. Nuk mund të jap më shumë hollësi rreth mënyrës sesi do ta përfitoj këtë shumë.
- Para se të firmosni kontratën me ekipin e Partizanit, nga cilat ekipe të tjera patët oferta?
- Pata nga Tirana, por nuk firmosa.
- Pse?
- Janë disa gjëra që s'mund të bëhen publike. Gjithsesi, e falënderoj Tiranën për ofertën që më bëri para pak kohësh. Unë isha i detyruar të largohesha që andej për të kërkuar një ekip tjetër.
- Tani jeni futbollist i Partizanit, por jeni stërvitur për ca kohë dhe te Tirana. Duke qenë se e njihni mirë rivalen e sivjetme të Partizanit, si e parashikoni sezonin në vijim?
- Besoj se do të jetë një luftë e fortë midis Partizanit dhe Tiranës. Duke qenë se jam stërvitur me të dyja skuadarat, që pa dyshim janë më të fortat e kampionatit, nisur nga fakti që kanë elementë cilësorë në përbërje, shpresoj që të bëhet një garë e ndershme sportive. Unë bashkë me shokët e tjerë të skuadrës do të bëjmë të pamundërën që Partizanit t'i kthejmë përfundimisht buzëqeshjen e munguar prej shumë sezonesh.
- Partizani e ka nisur mirë sezonin, ndërkohë që kampionati është shumë i gjatë. A jeni ambientuar deri tani ndopak me lojën dhe me lojtarët e Partizanit?
- Si fillim, jam tepër i kënaqur. Nuk kam pasur asnjë problem në këtë aspekt, pasi shumicën e futbollistëve të formacionit bazë i kam shokë. Me Bejzaden kam luajtur në Shkodër, ndërkohë që edhe Nallbanin, Beharin, Beqirin etj., i njoh mjaft mirë. Kam besim se do të merrem vesh mirë me të gjithë lojtarët e tjerë, si dhe me brazilianët që luajnë këtu.
- Sot Partizani do të luajë në Elbasan, ndaj ekipit tuaj të vendlindjes. Si ndiheni me këtë uniformë para publikut që ju ka përkrahur më parë?
- Ah, për koincidencë, i bie që në ndeshjen e parë me Partizanin të luaj në vendlindjen time, para publikut tim. Nuk është e lehtë të dalësh më uniformë tjetër në atë fushë, ku kam nisur disa sezone më parë karrierën futbollistike. Gjithashtu, nga ana tjetër, do të jetë kënaqësi dhe nder që sot do të luaj me Partizanin kundër Elbasanit, sepse profesionalizmi e përfshin edhe këtë rregull.
- Cili do të jetë roli që do të mbani te Partizani?
- Akoma nuk e di, pasi trajneri, deri tani, nuk më ka thënë gjë për rolin. Besoj se sot do të jem në mesfushë, në rolin tim të zakonshëm.
- E mendoni të lehtë fitoren përballë Elbasanit?
- Jo, përkundrazi. Mendoj se është e vështirë, sepse Elbasani ka skuadër të fortë, që luan mirë në fushën e vet. Ndërsa ne, nga ana jonë, jemi përgatitur për të arritur synimet tona, që dihen se cilat janë në ndeshjet e kampionatit, si brenda ashtu edhe jashtë.
Aranit MURAÇI 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

ELBASANI :

Portieri shkodran i portokallinjve hedh poshtë çdo lloj rezultati në favor të kundërshtarit

Mustafa: Partizani ta harrojë fitoren

Shkodrani i ekipit të Elbasanit, portieri i shquar Arion Mustafa, premton se do të japë maksimumin në ndeshjen ndaj Partizanit. Sot, ai luan takimin e tij të tretë për ngjyrat portokalli dhe shpreson të mos i zhgënjejë sportdashësit elbasanas, të cilët pritet të jenë të shumtë në ndjekje të kësaj sfide mjaft të rëndësishme. Mustafa ndihet mjaft optimist për rezultatin e kësaj ndeshjeje, i cili, sipas tij, do t'u buzëqeshë portokallinjve.
- Në dy ndeshjet e fundit që jeni aktivizuar me Elbasanin jeni vlerësuar shkëlqyeshëm nga specialistët. Cila është gjendja juaj aktuale, në prag të sfidës me Partizanin?
- Jam në formë mjaft të mirë. Pavarësisht se kam vetëm dy javë që luaj për ngjyrat portokalli, jam familjarizuar plotësisht me skuadrën. Përvoja e fituar te Vllaznia më shërben për të qenë i sigurt edhe në mbrojtjen e portës së Elbasanit. Në dy ndeshjet e radhës, që kam luajtur në përbërje të kësaj skuadre, kemi pasur mjaft punë me sulmin kundërshtar. Ndaj Partizanit, mendoj se do të kemi më tepër punë se në ndeshjet e mëparshme.
- Si e vlerësoni kundërshtarin, në raport me ekipin tuaj?
- Partizani është një ndër ekipet pretendente për titull në këtë kampionat. Këtë bindje e kam krijuar edhe nga niveli cilësor që ky ekip ka prezantuar në këtë kampionat. Pastaj, Partizani po forcohet me futbollistë mjaft cilësorë, disa nga të cilët janë edhe anëtarë të përfaqësueses së Shqipërisë. Të gjitha këto tregojnë se kundërshtari i radhës është i fortë dhe ambicioz për rezultatin përfundimtar të takimit të sotëm. Ndeshja, në dukje, është e vështirë për Elbasanin, por dua të theksoj se me punën e bërë nga skuadra jonë Partizani as që duhet ta çojë ndër mend se mund të fitojë në "Ruzhdi Bizhuta".
- Ku e mbështetni këtë besimin për fitore të Elbasanit ndaj të kuqve?
- Pa dyshim, në gjendjen mjaft të mirë të futbollistëve. Edhe ne, si skuadër, kemi kualitete, që garantojnë për një sukses edhe ndaj të kuqve. Elbasani është kompletuar me futbollistë cilësorë në çdo repart dhe të gjithë janë të predispozuar për të luajtur për fitore. Jemi të përgatitur për të shmangur gabimet gjatë lojës dhe për t'u treguar vigjilentë ndaj kundërshtarit, për të përfituar në çdo moment që është e mundur. Gjendja e mirë psikologjike dhe fizike e skuadrës, shto këtu edhe përgatitjen e kënaqshme tekniko-taktike, besoj se do të na shpërblehen me një rezultat pozitiv ndaj Partizanit.
Fatmir Popja 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

ELBASANI :

Arben Laze, drejtor ekzekutiv i sh.a "Elbasani"

Pasditen e së premtes është zhvilluar mbledhja e parë e sh.a "Elbasani", ku është proceduar për zgjedhjen e forumeve drejtuese të saj. Me të gjitha votat "pro", njëri nga aksionerët e sh.a "Elbasani", Arben Laze, është zgjedhur drejtor ekzekutiv i saj. Ky funksion është i barazvlefshëm me atë të shefit aktual të klubit. Në ditët e ardhshme pritet të zgjidhen edhe drejtuesit e tjerë të sh.a-së, ndërkohë që presidenti është zgjedhur qysh në ditën që morën fund procedurat e vlerësimit të kapitaleve të saj.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

SHKUMBINI :

Elbasanasi është gati të sakrifikojë, që të japë kontributin e tij për Shkumbinin

Kotorri: Dua të rikthehem sa më shpejt

Portieri i Shkumbinit, Elvis Kotorri, këto ditë i është rikthyer stërvitjes. Duket se dora e dëmtuar po i shkon drejt përmirësimit të plotë, gjë të cilën e tregon qartë edhe angazhimi i tij në seancat stërvitore. Elbasanasi Kotorri, që këtë vit pranoi të veshë fanellën bardhekaltër, u dëmtua përpara 3 javësh gjatë stërvitjes në bërryl, duke pësuar një frakturë. Ky dëmtim i hoqi të drejtën të aktivizohej në dy ndeshjet e radhës, kundër ish-ekipit të tij, Elbasanit, dhe Tiranës, javën e kaluar. "Gjatë stërvitjes pësova një dëmtim jo të lehtë në bërryl, që as vetë nuk e kuptova sesi më erdhi," - pohon portieri i Shkumbinit, Kotorri, rreth dëmtimit që e la jashtë katërkëndorit të portës në këtë periudhë. Mirëpo, falë dëshirës dhe vullnetit që ka ky futbollist, u bë e mundur përmirësimi i tij në një kohë rekord. Këtë riaftësim të shpejtë, portieri ia detyron stafit mjekësor të Shkumbinit, që u kujdes aq shumë për të. Në mënyrë të veçantë, ai falënderon ish-trajnerin e vet, Altin Kovaçin (ka qenë edhe trajner i Shkumbinit), që e ka ndihmuar shumë për rehabilitimin e tij.
Kotorri thotë se shpreson të kthehet sa më shpejt në portë dhe të mbrojë ngjyrat e skuadrës së Shkumbinit. "Unë dëshiroj të futem sa më parë në fushën e lojës, për të dhënë ndihmesën time në ekip. Në këto momente, Shkumbini ka nevojë për të gjithë, edhe për mua, prandaj nuk kam ndër mend të kursehem. Dua të rikthehem në fushë për sportdashësit, por edhe për skuadrën, sepse të gjithë kanë qenë të shqetësuar për dëmtimin tim, të gjithë më kanë qëndruar vazhdimisht pranë e m'i kanë lehtësuar dhimbjet," - e mbyll deklarimin e tij Elvis Kotorri, "gardiani" i portës së Shkumbinit.
Ali Hallulli 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Grupi 'A2'

Duli: Veleçiku do të fillojë ngjitjen

Dy humbjet në dy ndeshjet e para të kampionatit, shoqëruar edhe me atë të kupës, kanë krijuar një atmoferë aspak të këndshme në skuadrën e Veleçikut. Të mbetur pa sponsor dhe pa mbështetje, pjesëtarët e kësaj skuadre shpeshherë kanë lëshuar sinjalin "SOS", por askush nuk është kujtuar për ta. Edhe ato përpjekje të para pak kohëve për të sjellë pranë skuadrës disa biznesmenë, me kalimin e kohës dështuan. Por së fundi në skenë duket se ka dalë një njeri që ka dëshirë të bëjë diçka të mirë për të vetmen kënaqësi që ka Kopliku dhe e gjithë Malësia e Madhe. Burime pranë skuadrës kanë bërë të ditur se shumë shpejt biznesmeni i njohur i kësaj zone, Vesel Muça, pritet të afrohet pranë Veleçikut. Një lajm i tillë nuk ka sesi të mos pritet mirë, për faktin se sponsorë të tillë seriozë janë të domosdoshëm për një ekip futbolli. Ndërkohë, skuadra, nga ana e saj, ka vijuar përgatitjet për ndeshjen e radhës. Sot, në "Loro Boriçi", koplikasit do të presin ekipin e njohur të Apolonisë së Fierit. Megjithatë, skuadra po bën përgatitjet e duhura që më në fund edhe ajo të prekë fitoren në këtë kampionat. Trajneri Besnik Duli është entuziast se një gjë e tillë do të arrihet, ngaqë vetë lojtarët e tij janë të mobilizuar në maksimum për të fituar ndaj fierakëve. "Vërtet kemi humbur në dy takimet e para, por këto humbje ndaj ekipeve të njohura na kanë ndihmuar për të gjetur gabimet dhe mangësitë tona. Jam i bindur se tani ka ardhur momenti për të fituar dhe këtë do ta arrijmë ndaj Apolonisë," ka thënë drejtuesi i stolit koplikas. Në këtë ndeshje pritet që të ketë të reja si në emrat e formacionit, ashtu edhe në vendosjen e ekipit të Veleçikut në fushë. Kështu, për herë të parë me këtë skuadër, në këtë takim do të luajë mesfushori Belisha, i rikthyer nga dëmtimi. Njëkohësisht, në repartin e mbrojtjes do të ketë një zëvendësim për postin e mbrojtësit të lirë. Ish futbollisti i Vllaznisë, Elvis Plori, nuk do të luajë nga minuta e parë në formacion, sepse nuk ka përgatitjen e duhur fizike. Në vend të tij, rolin e mbrojtësit të fundit do ta zërë Isufi.
Gjergj KOLA 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Grupi 'A2'

Tomori me staf të plotë

Tomori, ditën e shtunë, do të udhëtojë drejt Rrogozinës me staf të plotë. Presidenti Toto ka plotësuar vendin bosh të numrit dy të stolit pas largimit të Përparim Kovaçit. Emri i ndihmësit të teknikut beratas është Arben Paja, ish-futbollist dhe trajner i të rinjve. Paja ka përfunduar studimet e larta në Akademinë e Kulturës Fizike "Vojo Kushi" në Tiranë dhe ka kontribuar në ecurinë e futbollit në Berat. Tashmë stafi i skuadrës beratase është kompletuar me Arbrin, Pajën dhe Muzhain. Pas largimit të Pajës, ekipi i të rinjve të Tomorit do të drejtohet nga ish-futbollisti dhe golashënuesi i shquar beratas Arben Arbri.
Rushan Dosti 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Grupi 'A2'

Skuadra e Kuçovës e ka vlerësuar si duhet takimin e fortë me Luftëtarin

Naftëtari, mbërrin prova e vështirë

Java e tretë për Grupin A2 rezervon një përplasje të veçantë dhe tejet interesante, atë ndërmjet Naftëtarit dhe Luftëtarit. Luajnë dy ekipe me stile loje gati të njëjta. Naftëtarët aplikojnë futbollin teknik dhe të shtruar, ndërsa gjirokastritët të shpejtë dhe me një kundërsulm tipik. Formacioni kuçovar thuajse e ka harruar atë barazim të papritur përpara një jave me Apoloninë dhe tashmë e ka përqendruar vëmendjen në përballjen me formacionin jugor, me të cilin, pas javëve të para, janë së bashku me pikë të barabarta. Me pak meremetime, formacioni fillestar i kësaj jave mund të jetë i njëjtë si në takimet e mëparshme. Ndërkohë, atmosfera në kampin kuçovar, në prag të kësaj ndeshjeje, duket optimiste dhe pothuajse të gjithë futbollistët kuçovarë shprehen të sigurt për një rezultat pozitiv. "Do të kërkojmë patjetër fitoren,- deklaron maqedonasi Stoiçevski,- i cili luan qendërmbrojtës te skuadra bardhezi.- Besoj se këtë herë do të jemi më të saktë në finalizim, ku kemi lëshuar pak në këtë aspekt." Më tej, qendërmbrojtësi maqedonas shprehet i kënaqur për skuadrën e Naftëtarit, për të cilën po kontribuon që nga fillimi i sezonit. "Ndihem mirë te Naftëtari. Futbollistët e kësaj skuadre më mbështesin vazhdimisht, po kështu edhe sportdashësit e këtij qyteti, që janë me të vërtetë të mrekullueshëm. Personalisht, nuk di gjë për Luftëtarin. Nga bisedat me shokët kam mësuar se kjo skuadër është e rrezikshme në kundërsulm. Sidoqoftë, ne i kemi marrë të gjitha masat dhe kam besim se do të fitojmë,"- përfundon maqedonasi Stoiçevski.
Erion Vrusho 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Java 5 e kampionatit 'A1'

Rezultatet :

Tirana 3-2 Vllaznia
Elbasani 0-0 Partizani
Flamurtari 3-0 Shkumbini
Lushnja 0-1 Besa
Dinamo Tirana 1-1 Teuta

Renditja :

1 Tirana 5 N 5 F 0 B 0 H 22-4 G 15 Pike
2 Dinamo Tirana 5 3 2 0 11 3 11
3 Teuta 5 3 2 0 7 2 11
4 Partizani 5 2 3 0 7 3 9
5 Elbasani 5 2 2 1 8 3 8
6 Besa 5 1 2 2 3 10 5
7 Flamurtari 5 1 1 3 4 6 4
8 Vllaznia 5 1 0 4 4 12 3
9 Lushnja 5 1 0 4 1 10 3
10 Shkumbini 5 0 0 5 2 16 0

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.