VLLAZNIA :

Nga kampi kuqeblu

Dështon miqësorja me Veleçikun

Nuk është zhvilluar dje miqësorja me Veleçikun, e planifikuar nga drejtuesit e të dyja skuadrave. Parimisht, ishte rënë dakord që kjo miqësore të luhej pasdreken e djeshme, në orën 16.00, në stadiumin "Loro Boriçi". Por pikërisht për vendin e zhvillimit të saj, ka lindur edhe kontradikta, që ka çuar në anulimin e saj. Drejtuesit e Vllaznisë ishin bërë gati të hënën pasdite të lajmëronin sportistët për këtë miqësore, por pikërisht në ato momente ka ndërhyrë stafi presidencial i saj. Ky i fundit ka qenë dakord që miqësorja të luhet, por jo në "Loro Boriçi". Kjo pasi kohët e fundit aty janë luajtur shumë takime, çka mund ta dëmtojë tapetin e gjelbër të këtij stadiumi. Më pas është hedhur ideja që miqësorja në fjalë të luhej ose në fushën e stërvitjes së Vllaznisë, ose në Koplik. Por, përballë këtyre alternativave, ka qenë trajneri i kuqebluve, Haxhiosmanoviç, ai që ka prishur gjithçka. Sipas tij, në ato fusha të papërshtatshme, rreziku i dëmtimeve është i madh, gjë që mund ta dëmtonte më shumë Vllazninë, në prag të një ndeshjeje shumë të rëndësishme, siç është ajo me Tiranën.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

VLLAZNIA :

Kuqeblutë, shfaqet "hija" e Bokatolës

Riçard Bokatola, ish-futbollisti i Vllanzisë, që aktualisht është i ndodhur pas vendimit të gjykatës me masën e paraburgimit, mund ta rifitojë lirinë, për t'u kthyer sërish në stërvitje me kuqeblutë. Një shpresë të tillë e ka dhënë menaxheri nigerian Milton, i cili prej një jave ndodhet në Shkodër. Sipas tij, pas kontakteve që ka pasur me kongolezin Bokatola dhe njerëzit që e rrethojnë atë, futbollisti nga Afrika, për një periudhë trijavore do të jetë në stërvitje. Interesimi që ka pasur para pak kohësh vetë prefekti i Shkodrës, Gjergj Leqejza, e tashmë presidenti i Vllaznisë, Agron Çela, për çështjen e tij, duket se do të ketë ndikimin e vet në lirimin me kusht të Bokatolës nga paraburgimi. Sikurse dihet, ish-mesfushori i Vllaznisë, Bokatola, në ditët e para të korrikut, pati bërë një aksident me makinën e tij, duke u shkaktuar vdekjen dy pjesëtarëve të një familjeje.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

TEUTA :

Presidenti i durrsakëve shprehet optimist për skuadrën e tij

Hasanbelliu: Teuta, më e fortë me Likën

Presidenti i Teutës, Edmond Hasanbelliu, në një deklarim për "Sportin shqiptar" ka folur për ecurinë e skuadrës së tij në këtë fillimkampionati dhe për objektivat e saj në të ardhmen. Sipas presidentit të Teutës, ekipi, ndonëse ndodhet në shkallët e sipërme të tabelës së klasifikimit, ka mundësi të rritet më shumë në lojën e tij. "Jam ende i pakënaqur nga niveli i deritanishëm i lojës që ka paraqitur ekipi im, - shprehet Hasanbelliu. - Sidoqoftë, duke parë përbërjen e futbollistëve që ka aktualisht ekipi, shto këtu drejtimin e saj nga një trajner profesionist, si Hasan Lika, them se Teuta do t'i arrijë objektivat që i ka vënë vetes, për t'u futur në zonën e UEFA-s." Në lidhje me ndeshjen e fundit, ndaj Lushnjës, Hasanbelliu shton: "Niveli jo i lartë i lojës i ekipit tonë, veçanërisht në pjesën e parë, mund të shpjegohet edhe me faktin e ndërrimit të trajnerëve. Ndoshta nuk u përputhën si duhet skemat taktike. Gjithsesi, jam i bindur se loja e ekipit, në drejtimin e Likës, do të shkojë në rritje. Për sa i përket sfidës së radhës në kampionat, me Dinamon, objektivi i Teutës do të jetë fitorja."
Më tej, duke komentuar disa opinione të dhëna nga specialistë të ndryshëm futbolli, në lidhje me largimin e disa titullarëve nga Teuta, si Ahmataj, Memelli etj., Hasanbelliu gjykon: "Te Teuta është ruajtur baza e ekipit, madje është forcuar shumë reparti i mbrojtjes, falë afrimit të Drizës. Një minus i madh për ne në këtë fillimkampionati është mungesa e dy mesfushorëve të formacionit bazë, Babamusta dhe Toshkollari, të cilët kanë qenë të dëmtuar. Me rikthimin e shpejtë në formacion të këtyre dy futbollistëve, do të fuqizohet më tepër reparti ynë i mesfushës, çka e bën akoma më të fortë këtë skuadër."
Së fundi, presidenti i Teutës, Hasanbelliu, shpreh besimin e tij të plotë te grupi i futbollistëve dhe te trajneri Hasan Lika, në një kohë që kërkon prej futbollistëve që të japin më shumë në fushën e lojës dhe t'i derdhin të gjitha energjitë në dobi të ekipit, pasi vetëm kështu mund të arrihet në zonën evropiane.
LLambi Kallço 'SPORTI SHQIPTAR'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

LUSHNJA :

"Lagunarët" i kanë bërë një analizë të hollësishme humbjes së fundit në kampionat

Lushnja, mësime nga humbja e fundit

Skuadra lushnjare është kthyer përsëri te humbjet, duke regjistruar të tretën e këtij lloji në këtë kampionat. Ashtu si në trasfertën ndaj Partizanit, edhe ndaj "djemve të detit", megjithëse e ka dominuar këtë takim, Lushnja nuk arriti të marrë dot rezultatin pozitiv. Edhe në këtë ndeshje, myzeqarët e drejtuar nga rumuni Cikleanu shfaqën mungesë të theksuar profesionalizmi, sidomos në shfrytëzimin e rasteve të krijuara dhe në aspektin psikologjik. Stërvitja e kësaj jave ka nisur me një analizë të hollësishme të defekteve që u vunë re në humbjen me Teutën. Në këtë analizë, përveç stafit teknik dhe futbollistëve, ka marrë pjesë edhe stafi presidencial, që përbën shoqërinë aksionere të klubit verdhejeshil. Gjithashtu, i pranishëm ka qenë edhe kryetari i bashkisë së qytetit, Ylli Myftiu, i cili premtoi se do ta sillte sa më shpejt tapetin e "Roza Haxhiut" dhe do ta ndihmonte më shumë ekipin financiarisht. Ashtu siç pritej, me tone mjaft të ashpra ka folur në këtë analizë trajneri Aurel Cikleanu, i cili nuk i ka kursyer kritikat për futbollistë të veçantë. Ai kritikoi mosfunksionimin e lojës në krahë, ku barra kryesore binte mbi dy titullarët, Gazheli e Hasalla. Gjithashtu, Cikleanu nuk i kurseu kritikat edhe ndaj patriotit të tij, Sorin Kornea, i cili, me rastet e pastra të humbura, ka ndikuar jo pak në daljen pa pikë nga stadiumi "Niko Dovana". Mjaft i pakënaqur është shprehur "timonieri" rumun i Lushnjës edhe për lojën e repartit të mbrojtjes. Duke folur për ndeshjen e ardhshme, Cikleanu nënvizoi faktin se duhet rikthyer patjetër te fitorja, të cilën, sipas tij, skuadra duhet ta kërkojë me të gjitha mënyrat ndaj Besës, këtë të shtunë. Çdo rezultat tjetër ndaj kavajasve, për teknikun lushnjar do të thotë "vetëvrasje".
Pëllumb Peci 'SPORTI SHQIPTAR'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

TIRANA :

Stoperi bardheblu mendon se Tirana ka prapavijën më të fortë dhe se gjithmonë i vjen në ndihmë sulmit

Dabulla: Ne, mbrojtësit "e dashuruar" pas golit

Në 19 gola të shënuar deri tani nga Tirana, 3 prej tyre mbajnë firmën e mbrojtësve. Janë pikërisht Rezart Dabulla, Suad Lici dhe Elvis Sina, të cilët kanë qenë pjesë e goleadës që kampionët kanë sigluar në katër javët e para të kampionatit. Me sa duket, edhe futbollistët mbrojtës të bardhebluve janë "të dashuruar" pas golit dhe këtë fakt nuk e mohon edhe njëri prej protagonistëve, siç është Dabulla. Në një deklarim për "Sportin shqiptar", numri 3 shprehet se Tirana nuk ka probleme në mbrojtje, ndonëse ka pësuar dy gola së fundmi që në minutat e para. "Edhe pse kemi pësuar dy gola në dy ndeshje, kurrsesi nuk mund të them që kemi probleme. Ajo që dua të theksoj është fakti se në përgjithësi ne, mbrojtësit e Tiranës, jemi "të dashuruar" pas golit dhe e kërkojmë atë në çdo moment. Sidomos në këtë sezon të ri, po e tregojmë më së miri forcën tonë, që nuk janë vetëm sulmuesit ata që dinë të shënojnë, por edhe mbrojtësit,"- thotë Rezarti. Duke lënë mënjanë argumentin-mbrojtje, stoperi energjik bën një rezyme të ecurisë së ekipit në katër javët e para. Sipas tij, Tirana po e tregon më së miri karakterin dhe forcën e saj, duke e mbrojtur me dinjitet titullin kampion të fituar edicionin e kaluar. "Deri tani, çdo gjë ka shkuar sipas parashikimeve, duke i fituar të katër ndeshjet e para të kampionatit. Ndryshe nga vjet, kemi bërë një hap përpara për sa i takon cilësisë së lojës dhe rezultateve të thella që kemi marrë. Arsyeja është se në skuadër janë po të njëjtët lojtarë dhe të gjithë ia njohim mirë lojën njëri-tjetrit. Nga ana e stafit drejtues, kërkesa e llogarisë është gjithmonë e lartë dhe ne në çdo takim hyjmë për ta fituar,"- komenton Dabulla. Ndeshja e së shtunës, fituar në Peqin 3-1, ka qenë për të më e vështira e arritur deri tani. "Mund të them se ballafaqimin me Shkumbinin e kemi fituar me mish e me shpirt. Vendësit zhvilluan një lojë të fortë dhe na ndëshkuan që në fillim. Megjithatë, edhe pse humbëm një penallti dhe një futbollist na doli me karton të kuq, nuk e humbëm toruan dhe ditëm të përmbysnim gjithçka,"- vijon më tej mbrojtësi i kombëtares.
Java që ka nisur do të jetë e nxehtë për Tiranën, pasi të shtunën që vjen do të presë në "Qemal Stafa" Vllazninë e Shkodrës. Synimi për Dabullën dhe skuadrën ku ai bën pjesë është fitorja, kur deklaron: "E ndiejmë edhe vetë që kjo javë që ka nisur është e nxehtë për ne nga çdo pikëpamje. Kundërshtarja e radhës do të jetë Vllaznia, një ekip që gjithmonë ka qenë rivali ynë për titullin kampion. Gjithsesi, ne nuk i druhemi dhe po përgatitemi maksimalisht që të zhvillojmë një lojë të bukur ndaj tyre dhe në fund të marrim tri pikët më se të nevojshme. Të tjerat më pas le t'ia lëmë fushës së lojës,"- i ka dhënë fund idesë së tij stoperi luftarak i Tiranës dhe i kombëtares kuqezi, Rezart Dabulla.
Aurel CELIBASHI 'SPORTI SHQIPTAR'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

TIRANA :

Tirana: Për ne, tani fillon "malorja"

Në katër javët e para të kampionatit, Tirana nuk është ndeshur me asnjë prej rivalëve të saj të drejtpërdrejtë për titullin kampion. Duke filluar nga kjo e shtunë, për të fillon edhe "malorja" e madhe, pasi do të luajë një sfidë me Vllazninë. Ndërkohë, tri javët e mëpasme, i rezervojnë ballafaqime me kundërshtarë si Partizani, Teuta dhe Dinamo. Nëse kampionët i mbyllin të katër këto takime me fitore, atëhere çdo gjë do të jetë më e lehtë për ta drejt titullit të 21-të kampion. Një gjë është e sigurt, se i gjithë stafi bardheblu e ka kuptuar më së miri që për ta tani fillon "malorja" e kampionatit.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Mbrojtësi i Tiranës dhe kombëtares gati për t'u riaftësuar në Austri
Nevil Dede rimbursohet nga FSHF-ja për dëmtimin

Dje paradite, në zyrat e FSHF-së ka qenë i pranishëm mbrojtësi i kombëtares dhe i Tiranës, Nevil Dede. Arsyeja ka qenë se presidenti i Federatës, Armand Duka, i ka premtuar Dedes të gjitha shpenzimet për riaftësimin e tij, pas dëmtimit të pësuar në Tbilisi, gjatë ndeshjes Gjeorgji-Shqipëri. Madje dje, mbrojtësi i ka marrë të gjitha lekët e nevojshme, me të cilat do të bëjë të mundur udhëtimin në Austri, ku do të kryejë riaftësimin. Një fakt të tillë Nevili e ka pohuar vetë për "Sportin shqiptar", kur tha: "Nga ana e presidentit Duka më është dhënë e gjithë mbështetja e nevojshme financiare që të riaftësohem pas dëmtimit të pësuar në ligament. Madje sot (dje) kam marrë të gjitha lekët e nevojshme për riaftësimin e gjurit që do të bëj në Insbruk të Austrisë, te po i njëjti mjek ku jam operuar disa muaj më parë. Besoj se brenda kësaj jave, ose fillimjava që vjen, do të nisem urgjentisht te klinika e tij dhe për të bërë të mundur rikthimin sa më të shpejtë në fushë,"- shprehet Nevil Dede. Nëse çdo gjë shkon sipas parashikimeve, është e sigurt që brenda nëntorit kapiteni bardheblu do të jetë pjesë e Tiranës në sfidat e saj për titullin kampion.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

BESA :

Mesfushori kavajas beson se skuadra nuk ka dalë ende në lojën e saj

Bratja: Nuk është kjo Besa e vërtetë

Besa, pas javës së katërt të Kampionatit të 65-të Kombëtar të Futbollit, ka zbritur edhe dy shkallë të tjera në renditje, si shkak i atij barazimi zhgënjyes ndaj Flamurtarit. Gentian Bratja, njëri ndër veteranët e formacionit kavajas, mendon se Besa e këtyre 4 javëve nuk ka mundur ta tregojë dot forcën e saj reale. Sipas tij, ndaj Elbasanit dhe ndaj Flamurtarit, Besa ka marrë minimumin e pikëve, ndërkohë që meritonte më shumë. Në intervistën e mëposhtme, mesfushori Bratja rendit shkaqet dhe dobësitë e shfaqura nga ekipi i tij në këtë fillimkampionati, sidomos ndaj Flamurtarit, si dhe tregon mënyrat e punës sesi mund të korrigjohen ato.
- Bratja, pas barazimit me Flamurtarin, keni zbritur edhe dy shkallë të tjera në renditje. A e prisnit një fillim të tillë?
- Të them të drejtën, jo. Gjithsesi, u bënë disa vite rresht që Besa nuk e fillon mirë kampionatin. Kujtoj këtu se edhe vjet, në 5 javë kampionat, grumbulluam vetëm 5 pikë. Kështu po ndodh edhe sivjet, por me një ndryshim, se jemi ndeshur me dy kundërshtarë të fortë, si Tirana e Dinamo, me të cilët të tjerët s'janë ndeshur akoma. Kemi gabuar jo pak në këtë fillimkampionati dhe e kemi të vështirë të justifikohemi. Nuk ditëm të merrnim pikët maksimale në fushën tonë, si ndaj Elbasanit, ashtu edhe Flamurtarit. Sidomos ndeshjen me vlonjatët, duhet ta fitonim patjetër, sepse rastet e pastra për shënim nuk na munguan.
- Atëherë, sipas jush, cilat janë defektet e lojës së Besës, që nuk po arrin dot te fitorja?
- S'di ç't'ju them. Do të ishte më mirë që kësaj pyetjeje t'i përgjigjeshin trajnerët. Unë, si futbollist, gjykoj se përgjegjësia është jona. Me këtë dua të them se defekt unë quaj edhe angazhimin e dobët të skuadrës, sidomos repartin e mesfushës. Ne presim derisa kundërshtari të organizohet, duke mos luajtur fort për topin e parë. Po ashtu, mendoj se sulmuesit tanë kanë shpërdoruar shumë raste të pastra për shënim. Kjo gjë është e pafalshme. Në futboll mund ta fitosh ndeshjen edhe me një rast, nëse e përcjell topin në rrjetë. Neve nuk na kanë munguar rastet për shënim, por vazhdojmë të "agjërojmë" në drejtim të shënimit të golit.
- Meqë dolët te sulmi, a mendoni se ky repart ju ndëshkoi, sidomos në ndeshjen me Flamurtarin?
- Jo, s'mund ta them një gjë të tillë. Zakonisht, në futboll, si për humbjen, ashtu edhe për fitoren, vlerësohet dhe gjykohet i gjithë ekipi. Nëse ndaj Flamurtarit nuk fituam, përgjegjësia është e të gjithëve, sepse u kujtuam të luanim vetëm në fund. Natyrisht, pajtohem me konstatimin tuaj, se sulmi ka qenë jo në lartësinë e duhur. Nisur nga rastet për shënim që na u krijuan, sidomos ato me Kapllanin, them se duhet ta kishim shënuar të paktën një gol. Edhe ne nuk kërkonim më tepër, pasi na interesonte 3-pikëshi. Po ta kishim marrë, sot do të kishim 4 pikë.
- Megjithatë, javët po kalojnë dhe pikët s'kthehen më. A mendoni se skuadra juaj duhet të reagojë shpejt?
- Patjetër. Vërtet jemi në fillim të kampionatit, nga i cili ka edhe shumë javë për t'u luajtur, por jemi shumë të prapambetur në rezultate. Kjo situatë nuk përputhet me mundësitë e Besës. Skuadra jonë nuk ka edhe aq nevojë për lojtarë të tjerë, sesa të shtrëngojë "rripat" dhe të besojë te fitorja. Me këtë dua të them se "Xhaxhi" nuk ka mundur akoma të vërë "veton" mbi lojtarët dhe të ndërtojë lojën që di të bëjë. Në dy takimet që ka drejtuar Besën, më shumë ka qenë në rolin e njohësit dhe të korrigjuesit, sesa të trajnerit. Gjithsesi, besoj se do të reagojmë shumë shpejt dhe do të marrim edhe pikët që na duhen. Një bindje të tillë e mbështes tek aftësitë e trajnerit Sejdini dhe tek aftësitë e shokëve të mi. Realisht, këto mundësi, deri më sot, nuk kemi arritur t'i shprehim.
Feriz Ferizaj 'SPORTI SHQIPTAR'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

DINAMO :

Mbrojtësi i bluve mendon se skuadra duhet të përqendrohet në ndeshjet e javëve të ardhshme

Dervishi: Duhet të rikuperojmë tri pikët

"Qetësi" totale në kampin dinamovit, ku futbollistët mezi presin ndeshjen e radhës për t'iu kthyer sërish fitores. Dinamoja do të luajë ditën e premte në stadiumin "Selman Stërmasi" takimin me Teutën e Durrësit, i vlefshëm për javën e pestë të kampionatit. Aktualisht, ekipi durrsak ndodhet në vendin e tretë të renditjes, në kuotën e 10 pikëve. Për blutë, fitorja ndaj Teutës është e vetmja mënyrë për të harruar sa më shpejt humbjen me Partizanin. Kështu mendon edhe mbrojtësi peqinas i Dinamos, Klodian Dervishi, i cili pranon faktin se mbrojtja ka qenë vërtet në një ditë të keqe në derbin e javës që kaloi. Ai pohon se tani nuk më vend për komente në lidhje me atë ndeshje. Sipas stoperit blu, Dinamoja duhet të përqendrohet plotësisht te ndeshjet që ka përpara, në të cilat nuk duhet të gabojë më. Dervishi thekson se janë luajtur vetëm katër javët e para të kampionatit dhe skuadra i ka të gjitha mundësitë për ta rikuperuar tripikëshin e humbur. Ne deklaratën e tij për gazetën "Sporti shqiptar", futbollisti do të shprehej:
"Nuk duhet ta kishim humbur derbin me Partizanin për mënyrën sesi luajtëm, por tani ajo është një ndeshje që i përket së kaluarës dhe nuk ia vlen të komentohet më. Skuadra duhet të mendojë për ndeshjet që ka përpara, sepse ato janë shumë më të rëndësishme dhe duhen fituar. Janë tri pikë që duhen rikuperuar sa më shpejt, ndoshta para përfundimit të fazës së parë. Shpresojmë që Tirana të gabojë në javët e ardhshme, pasi ka ndeshje të vështira, ndërsa për Dinamon nuk ka rrugë tjetër, veç fitores. Kampionati është tepër i gjatë dhe mendoj se ekipi i ka të gjitha mundësitë për të marrë kryesimin e tabelës së renditjes."
Parashikohet që Dervishi të luajë si titullar në takimin e së premtes me Teutën, përkrah Pishës dhe Gallos. Ai e vlerëson Teutën si një kundërshtare tepër të fortë, ndërsa parashikon një ndeshje të vështirë në "Selman Stërmasi". Por, sipas peqinasit, Dinamoja nuk duhet ta vërë në diskutim aspak fitoren ndaj durrsakëve, sepse çdo rezultat tjetër në këtë ndeshje do të ishte fatal për ecurinë e kampionatit. Mbrojtësi e përfundon deklaratën e tij duke thënë:
"Me Teutën, Dinamoja do të fitojë patjetër, për të treguar karakterin e saj si ekip pretendent për titull. Mendoj se do të jetë një ndeshje e fortë, sepse Teuta ka një skuadër të kompletuar, për më tepër ndodhet para nesh në renditje. Megjithatë, nuk duhet ta vëmë në diskutim fitoren, sepse pastaj do të komplikohej gjithçka. Jemi duke punuar shumë në stërvitje dhe besoj se do ta kalojmë me sukses."
Fatjon RUPI 'SPORTI SHQIPTAR'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

DINAMO :

Rizvanolli në pritje të kontratës

Sulmuesi i ekipit tonë Shpresa, Erion Rizvanolli, që në fund të javës së kaluar, është bashkuar në stërvitje me blutë e kryeqytetit. Ndërkohë pritet që brenda pak kohësh ish-futbollisti i Tiranës në kampionatin shqiptar të firmosë një kontratë me Dinamon. Gjatë dy viteve të fundit, sulmuesi është aktivizuar në kampionatin kroat. Ka qenë dëshira e të dyja palëve, e drejtuesve të Dinamos dhe e vetë futbollistit, për ardhjen e tij te blutë. Rizvanolli pohon se nuk është gjithçka në dorën e tij për sa i përket kontratës. Ai është shprehur gjithashtu se, nëse firmos për Dinamon, dëshiron të japë 100% të mundësive të tij në shërbim të skuadrës. Ndërsa për sa i përket aktivizimit, lojtari thotë se është çështje që i përket trajnerit të skuadrës.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

DINAMO :

Blutë, tashmë me masazhator

Tashmë skuadra e Dinamos do të ketë edhe masazhatorin e saj, i cili i mungonte prej disa javësh. Masazhatori i ri quhet Bat Kastrati dhe që tani e tutje do të jetë ndihmësi i mjekut Asllan Kasa. Ai ka zënë vendin e lënë bosh nga Tomson Gjinali, i cili është larguar edhe javët e fundit, ndërsa stafi mjekësor i Dinamos përbëhej vetëm nga mjeku Asllan Kasa. Që dje, masazhatori Kastrati ka filluar punën, duke zhvilluar ushtrime të ndryshme me lojtarët e dëmtuar.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

FLAMURTARI :

Në kampin kuqezi, të gjithë presin mbështetjen financiare të presidentit

Flamurtari, duke pritur Selamin...

Skuadra e Flamurtarit po vazhdon përgatitjet për ndeshen e javës së pestë të kampionatit. Sikurse dihet, kuqezinjtë do të presin këtë të shtunë në stadiumin e tyre Shkumbinin e Peqinit. Gjithsesi, në dy ditët e para të stërvitjes, nuk duket ndonjë angazhim i veçantë për këtë ndeshje. Kjo, pasi futbollistët e Flamurtarit e kanë më shumë mendjen te premtimet e presidentit Selami, për anën financiare. Mirëpo, deri tani, presidenti nuk është bërë i gjallë, duke e shtuar së tepërmi ankthin dhe pasigurinë në kampin kuqezi të Vlorës. Për pasojë, skuadra nuk e ka zhvilluar analizën e zakonshme të ditës së hënë, sepse presidenti Selami, edhe pse pritej të ishte i pranishëm, nuk e ka bërë një gjë të tillë. Në këto kushte, futbollistë dhe stafi drejtues kanë preferuar më mirë të dalin në stërvitje, sesa të "grijnë sallatë" me njëri-tjetrin, pa zgjidhur asnjë punë. Duke folur për situatën aktuale në skuadër, trajneri Ardi Bozhani shprehet: "Prisja që ditën e hënë të zhvillonim analizën e ndeshjes që luajtëm fundjavën e kaluar ndaj Besës. Në këtë analizë prisnim të vinte edhe presidenti Selami, por kjo nuk ndodhi dhe për pasojë nuk e zhvilluam dot."
Gjithashtu, Flamurtari nuk i ka zhvilluar seancat e paradites, në dy ditët e para të stërvitjes së kësaj jave. Trajneri Bozhani është mjaftuar vetëm me zhvillimin e seancave të pasdites, ku "menuja" e saj përbëhej nga ushtrime aerobike dhe vrapime të distancave të ndryshme. Këto dy ditë, minutat e fundit të stërvitjes trajneri Bozhani ia ka kushtuar lojës me topin, të shoqëruara edhe me disa minuta loje me dy porta. Sidoqoftë, përqendrimi i lojtarëve nuk është maksimal në stërvitje. Të gjithë janë me sytë nga presidenti Bozhani, nga i cili presin garanci financiare. Në lidhje me këtë problem, trajneri Bozhani shton: "Nuk ka asgjë të re, për sa u takon problemeve financiare. Lojtarët janë të pavendosur për të luajtur apo jo ditën e shtunë, ndaj Shkumbinit të Peqinit. Gjithçka në këtë drejtim varet nga mbajtja e premtimit të Selamit, që deri ditën e ndeshjes do ta shlyejë këstin e parë të kontratave. Në qoftë se futbollistët titullarë nuk marrin pjesë në ndeshjen ndaj Shkumbinit, do të jetë shumë e vështirë për ne. Duke e parë një situatë të tillë, të pasigurt, unë jam përgatitur për të dy variantet, edhe për formacionin titullar, por edhe për të dytin. Ditën e mërkurë, në ndeshjen e kontrollit, do t'i provoj të dyja formacionet. Në pjesën e parë do të luajë formacioni bazë, ndërsa në pjesën e dytë do të aktivizoj ata që luajtën ndaj Albpetrolit, për kupë."
Në fund të fjalës së tij, trajneri Bozhani ka thënë se do të kontaktojë nëpërmjet celularit me presidentin Selami, për ta pyetur se çfarë do të bëjë në lidhje me këstin e parë të kontratave të lojtarëve.
Kastriot Brahimi 'SPORTI SHQIPTAR'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.