Portieri durrsak e konsideron me vlera pikën e marrë në Peqin, ngaqë rivalët nuk përfituan dot

Shehi: Barazimi, fatmirësisht i vlefshëm

Orges Shehi, një nga pikat kyçe të formacionit të Teutës, njëkohësisht një nga më të mirët në ndeshjen me Shkumbinin, do ta komentonte kështu barazimin në fushën sportive të Peqinit:
- Orges, a ju kënaqi barazimi i arritur në Peqin?
- Them se po, sepse rivalët tanë hodhën hapa të tjera false. Nëse ngjarjet do të rridhnin ndryshe, barazimi nuk do të kishte vlera. Objektivi ynë në këtë ndeshje ishte fitorja, por edhe barazimi nuk mund të quhet rezultat negativ, po të kemi parasysh faktin se luajtëm në një fushë të vështirë, si ajo e Peqinit, përballë një ekipi që tregoi se ka vlera. Mjerisht, humbëm disa raste të mira për shënim, veçanërisht penalltinë, e cila mund t'i jepte rrjedhë tjetër ndeshjes.
- Megjithatë, Teuta kryeson e shkëputur tri pikë nga ndjekësit e saj. Si e komentoni këtë fakt?
- Kjo është meritë totale e ekipit, që ka ditur të luajë me të njëjtin ritëm, si në fushën tonë, ashtu edhe jashtë saj. Pra, kemi treguar se kemi një grup të aftë futbollistësh për të marrë titullin në këtë sezon futbollistik.
- A mendoni se mbrojtja mbetet pika më e fortë e Teutës, duke pasur parasysh se nuk e keni shijuar ende humbjen?
- Sigurisht, mbrojtja mbetet një pikë e fortë e skuadrës sonë, por meritën kryesore e ka i gjithë ekipi. Grupi ynë ka funksionuar si duhet dhe ka ditur ta mbajë larg portës kundërshtarin.

Trajneri bardheblu shprehet se ka provuar emocione të veçanta në ndeshjen e parë në krye të Tiranës

Josa, një 90-minutësh mbi "gjemba"

Tri ditë në krye të skuadrës si trajner dhe çdo gjë e nis me këmbën e mbarë, falë një fitoreje të vështirë 2-1 ndaj Lushnjës. Mirel Josa, i emëruar pak ditë më parë në krye të Tiranës, ka mundur që të rikthejë buzëqeshjen e munguar prej katër javësh në kampin bardheblu. Ai ka ditur që të hedhë në fushë një formacion të gjithin të orientuar në drejtim të sulmit, duke rrezikuar në njëfarë mënyre. Gjithsesi, një shprehje në fjalorin gazetaresk thotë se i fituari nuk gjykohet dhe tashmë Josa i meriton komplimentet. Në një deklarim të tij, i sapoemëruari në stolin bardheblu shprehet se ka ndier emocione në këtë rikthim në skuadër, këtë herë si trajner i saj. "Gjatë gjithë takimit kam qenë i emocionuar dhe vetëm në vërshëllimën e fundit të gjyqtarit jam lehtësuar shpirtërisht. Për mua ishte hera e parë që e drejtoja Tiranën si trajner i saj, çka përbënte një arsye më shumë për t'u ndier i emocionuar, duke e krahasuar me kohën kur kam qenë lojtar. Gjithsesi, në fund, kjo premierë imja u mbyll me një fitore të rëndësishme për ecurinë në vazhdimësi,"- thotë 40-vjeçari. Gjatë gjithë ndeshjes, 20 herë kampionët kanë qenë zotër të fushës dhe kanë dominuar ndaj lushnjarëve, pavarësisht rezultatit minimal të arritur në fund. Një pikë kthese për Tiranën kanë qenë edhe zëvendësimet e bëra, ku si Bulku dhe Merkoçi i kanë kryer më së miri detyrat, ndonëse e filluan ndeshjen nga stoli.

Portieri i bluve mendon se mosfunksionimi i sulmit bëri që Dinamoja të mos e fitonte takimin me Besën

Lika: Humbëm shansin për t'iu afruar kreut

Barazimi i kësaj jave me Besën e Kavajës duket se nuk i ka lënë të kënaqur blutë e kryeqytetit. Ndonëse e ka dominuar lojën gjatë gjithë ndeshjes, Dinamoja nuk ka arritur ta shënojë golin e shumëkërkuar. Kështu, blutë kanë humbur dy pikë tepër të vlefshme në ndeshjen e parë të fazës së dytë. Fitorja jo vetëm që do ta mbante skuadrën në vendin e tretë, por do ta afronte më shumë me kreun e renditjes, duke pasur parasysh edhe hapat e gabuara të Teutës e Partizanit. Sipas drejtuesve të skuadrës, ka qenë reparti i sulmit ai që ka çaluar në takimin me Besën. Sulmuesit dinamovitë nuk kanë qenë në një ditë të mirë dhe këtë gjë e tregon fare qartë fakti se ata u zëvendësuan nga trajneri Sulejman Demollari. Një fakt të tillë e mbështet edhe portieri i bluve, Ilion Lika. Ai pohon se barazimi i arritur në Kuçovë i kushtoi disi shtrenjtë Dinamos, e cila tani ka humbur edhe vendin e tretë pas fitores së Tiranës. Portieri i Dinamos thekson se sulmi i skuadrës u paraqit mjaft dobët në këtë ndeshje dhe, për rrjedhojë, nuk arriti të shënonte dot në portën kundërshtare.
"Unë do ta quaja një hap të gabuar barazimin pa gola me Besën, pavarësisht se është rezultat pozitiv. Këtë javë humbëm shansin më të mirë për t'iu afruar kreut të renditjes. Ishte një takim që u luajt i gjithi në gjysmëfushën e Besës, ku përpjekjet tona për të shënuar golin ishin të vazhdueshme. Besa luajti me një mbrojtje të ngjeshur dhe ne provuam me të gjitha mënyrat për të shënuar, me krose nga krahët dhe gjuajtje nga distanca, por gjithçka mbeti në tentativë.

Trajneri dhe drejtuesit e klubit të kuq theksojnë se gjyqtarët e ndeshjeve blihen me para

Partizani: Gjyqtarët të hetohen

Dje paradite është mbledhur stafi drejtues i klubit "Partizani" për të analizuar jo vetëm humbjen e fundit me Vllazninë, por edhe probleme të ndryshme të skuadrës së tyre, të shfaqura në ndeshjet e fundit. Trajneri Spahiu, pas mbledhjes, e cila zgjati disa orë, u shpreh se problemet e ekipit do të diskutohen sot së bashku me lojtarët, ndërkohë që në mbledhje është diskutuar më shumë për gjykimin e dobët jo vetëm në Shkodër, por edhe gjatë ecurisë së deritanishme të kampionatit. "Ne kërkojmë nga FSHF-ja që të caktohen specialistë të ndryshëm për të hetuar sesi janë gjykuar deri tani ndeshjet e kampionatit. Sot, në mbledhje, me anë të sekuencave filmike, kemi vërtetuar plotësisht që gjykimet krejtësisht të njëanshme ndaj Partizanit nuk janë thjesht rastësi, apo kapriçio të ndonjë gjyqtari, por vijnë ngaqë shumica e atyre që gjykojnë në kategorinë e parë janë të korruptuar. Unë, si trajner, jam shprehuar që në fillim të sezonit se nuk dua të merrem me gjykimet, sepse gjyqtari ndodh që edhe gabon, por kur shoh se gjërat bëhen problem, them se duhet vënë dorë për të mirën e futbollit," - thekson me tepër ashpërsi trajneri i të kuqve. Më pas, për të argumentuar më me hollësi pakënaqësinë që të kuqtë kanë nga gjykimet, trajneri Spahiu shpjegon: "Në Durrës, gjyqtari jep një 11-metërsh të paqenë për Teutën në fund të ndeshjes, duke na mohuar në fund dy pikë. Që gjyqtari gaboi, kjo u vërtetua edhe nga pamjet televizive. Ndaj Tiranës, sërish gjyqtari nuk jep një 11-metërsh për Partizanin. Kujtojmë që ekipi ynë ishte në disavantazh, edhe pse më vonë e fitoi bindshëm derbin. Më pas, me Besën, përsëri Muzaka pengohet në zonë dhe gjyqtari nuk akordon 11-metërsh. Në Vlorë jep 11-metërsh për Flamurtarin, që provat televizive treguan se nuk ishte, edhe pse në pjesën e dytë Partizani e fitoi ndeshjen. Në Peqin, Partizanit i mohohet një tjetër 11-metërsh, pas rrëzimit të ****okës brenda zonës. Provat televizive treguan se ishte 11-metërsh i pastër dhe Partizani humbi përsëri dy pikë. Por historia e gjykimeve vazhdoi edhe këtë javë në Shkodër. Dje, pas provave televizive, vura re se gjyqtari ka gabuar kur nuk i ka dhënë Abilios një 11-metërsh. Nuk them se ndeshja duhej fituar patjetër, por të paktën duhet të merrnim barazimin," - vazhdon më tej trajneri Spahiu.

''Sporti Shqiptar''

Disa nga titullarët e skuadrës vlonjate paralajmërojnë "divorcin" me skuadrën e tyre

Flamurtari: Pas Daiut, edhe të tjerë

Largimi i mbrojtësit Përparim Daiu, i ardhur me shumë bujë nga radhët e Partizanit, i ka vënë në alarm drejtuesit e Flamurtarit. Sikurse dihet, kavajasi ka shpallur divorcin me kuqezinjtë e Vlorës një ditë para ndeshjes me Elbasanin. Largimi i tij, sipas zërave brenda skuadrës, pritet të pasohet nga një sërë largimesh të tjera. Të njëjtën që rrugë ndoqi Daiu, për shkak të problemeve financiare, ka vendosur të ndjekë edhe mbrojtësi Resuli, njëkohësisht kapiten i skuadrës. Me sa merret vesh, këtij të fundit i kanë bërë oferta joshëse financiare, menjëherë pas ndeshjes me Elbasanin, dy skuadra të Grupit A1. Pak a shumë, në të njëjtat ujëra po noton edhe portieri Dine, i cili kërkon të largohet sa më shpejti nga Flamurtari, drejt një skuadre tjetër të A1-shit. Më afër lidhjes së një kontrate me ndonjë ekip ballkanik është mesfushori Sakaj, i cili është testuar para një muaji dhe është në pritje të nënshkrimit të kontratës. Në këtë drejtim, edhe mesfushori Çerçizi nuk ka probleme dokumentacioni që ta pengojnë të shkojë te një nga skuadrat e kryeqytetit me kërkesën e këtyre të fundit. Në të tilla kushte, për "Sportin shqiptar", kryebashkiaku Gjika, ende i pakurorëzuar me shiritin e kuqezi të detyrës së re, shprehet: "Eshtë mirë që asnjë lojtar, gjithashtu edhe trajneri, të mos largohen nga skuadra, pasi premtimet që kam bërë do t'i realizoj deri në fund. Lojtarët e Flamurtarit, së shpejti, do t'i gëzojnë të gjitha të drejtat ekonomike financiare që i takojnë një skuadre të A1-shit. Këto detyrime më takojnë t'i realizoj unë dhe presidenti Selami, prandaj lojtarët të kenë besim.

Sporti Shqiptar

Trajneri i Shkumbinit vlerëson me nota pozitive paraqitjen e ekipit të tij me Teutën

Bici: Meritonim më shumë se një pikë

Shkumbini, pas Partizanit, arriti të frenojë edhe kryesuesen tjetër të kampionatit, Teutën e Durrësit, duke i marrë barazimin. Ekipi peqinas, pas ardhjes së Bicit, ka filluar të ndryshojë për mirë. Një gjë të tillë e dëshmojnë më së miri këtë gjë dy përballjet me ekipet më të mira të këtij kampionati. Merita për këto rezultate, pa dyshim është e të gjithëve, por rol kryesor në këtë rizgjim të Shkumbinit ka veçanërisht trajneri Bici. Lezhjani, duke vlerësuar lojën e ekipit të tij në takimin me Teutën, shprehet: "Futbollistët luajtën më mirë se një javë më parë, ndaj Partizanit. Në ballafaqimin e radhës me Teutën ata dhanë maksimumin. Ndoshta meritonim më tepër, por mungesa e një sulmuesi të mirëfilltë dhe mungesa e besimit në disa raste te futbollistët para portës kundërshtare, u ndie shumë në këtë takim.

JAVA E X E KAMPIONATIT

Rezultatet

Vllaznia - Partizani 2-1
Shkumbini - Teuta 0-0
Tirana - Lushnja 2-1
Besa - Dinamo 0-0
Flamurtari - Elbasani 1-1

Renditja

1. Teuta 24 pikë
2. Partizani 21 "
3. Tirana 20 "
4. Dinamo 19 "
5. Vllaznia 15 "
6. Elbasani 13 "
7. Besa 9 "
8. Lushnja 8 "
9. Flamurtari 5 "
10. Shkumbini 3 "

Shifrat e javës së 10-të

- Faza e dytë e kampionatit nisi me shterpësi golash, vetëm 8, nga të cilët tre të shënuar në 45 minutat e para të ndeshjeve. Ky është numri më i pakët i golave të shënuar në 10 javët e para të kampionatit të sivjetëm kombëtar.
- Me 8 golat e kësaj jave, numri i tyre kapi shifrën 128.
- Vetëm shkodrani E. Martini arriti të shënojë një dopietë ndaj Partizanit, atë që e kishte bërë ndaj kësaj skuadre edhe pas kthimit nga Austria, në vitin 1997.
- Tri barazimet "paqësore" të kësaj jave janë numri më i madh i barazimeve të arritura në këtë sezon.
- Duhej të mbaronin 10 javë kampionat, që Partizani të nënshkruante kapitullimin e parë.
- Pas kësaj jave, 3 janë skuadrat që ruajnë "virgjërinë" e shifrës zero. Teuta kolonën e humbjeve, Vllaznia atë të barazimeve dhe Shkumbini kolonën e fitoreve.
- Nga 8 golat e së shtunës, vetëm dy mbajnë firmën e lojtarëve të huaj, të bullgarit Mindev (Lushnja) dhe të ganezit Ablade (Elbasani).
- Duhej të kalonin plot 9 vjet që Partizani t'i rikthehej golit në stadiumin "Loro Boriçi". Më 9 tetor 1994, Sillo kishte realizuar golin e fundit të të kuqve në këtë stadium.
- Me fitoren ndaj Lushnjës 2-1, Tirana i dha fund "agjërimit" katërjavor. Rikthimi te fitorja e bardhebluve përkon me rikthimin te skuadra e zemrës, këtë radhë në rolin e trajnerit, të Mirel Josës.
- Tirana është e vetmja skuadër që arriti ta mundë Lushnjën dy herë në të dyja fazat.
- Tetë kartonë të kuq të dhënë të shtunën, nga të cilët 6 në takimin Flamurtari-Elbasani, përbëjnë një rast të rrallë në kampionatet tona. Deri tani janë dhënë 22 kartona të kuq dhe 215 të verdhë. Shumë!

Ymer Striniqi ''Sporti Shqiptar''

Tetova: Vllaznia, tjetër provë e vështirë

Mbrojtësi energjik i Teutës, Tetova, nuk ka shumë dëshirë të flasë për barazimin e fundit me Shkumbinin, por sytë i hedh nga sfida që e pret këtë fundjavë, me Vllazninë e Shkodrës. Ballafaqimin me kuqeblutë ai e ka konsideruar një tjetër provë të vështirë, një tjetër ndeshje decizive, ku Teuta do të kërkojë ruajtjen e kreut të renditjes. Në një intervistë për "Sportin shqiptar", Tetova komenton përgatitjet dhe objektivat e skuadrës së tij për këtë sfidë:
- Tetova, si e pret Teuta ndeshjen e radhës me Vllazninë, pas barazimit të fundit me Shkumbinin?
- Si të gjitha ndeshjet e tjera, ku na kërkohet fitorja, sepse vetëm kështu mund ta ruajmë kryesimin. Sigurisht, bëhet fjalë për një ndeshje jo pak të vështirë, pasi përballë do të kemi jo vetëm një ekip me tradita dhe emër në futbollin shqiptar, por edhe një ekip që ka pasur rritje të konsiderueshme në lojërat e tij, sidomos në ndeshjet e fundit. Ndeshja me Vllazninë, pa dyshim përbën një nga sfidat më të forta të kësaj faze në fushën tonë.

Në analizën për Besën, trajneri i bluve ka kritikuar ashpër, veçanërisht, sulmuesit

Demollari "shigjeton" të tijtë

Para fillimit të stërvitjes së djeshme, blutë janë grumbulluar në sallën e mbledhjeve, ku kanë zhvilluar analizën e ndeshjes me Besën. Trajneri i skuadrës, Sulejman Demollari, ka qenë tepër i pakënaqur nga paraqitja e të tijve në takimin e së shtunës, ku një fitore e mundshme do ta ngjiste Dinamon në vendin e dytë. Ai është shprehur i pakënaqur jo vetëm nga rezultati, por edhe nga loja e skuadrës në atë ndeshje, ku lojtarët nuk i zbatuan me përpikëri detyrat taktike. Për këtë arsye, mësohet se trajneri dinamovit i ka kritikuar ashpër futbollistët në analizën e ndeshjes, e cila ka zgjatur disa minuta më shumë se herët e tjera. Në mënyrë të veçantë, trajneri Demollari ka "shigjetuar" repartin sulmues, që ndaj Besës nuk mundi të bënte asgjë. Gjithashtu, numri 1 i stolit blu, në analizën e djeshme ka kritikuar ashpër edhe mosimpenjimin e lojtarëve në disa momente të caktuara të ndeshjes.

Spahiu u shtrëngon "rripat" futbollistëve

Dje, pas analizës së humbjes me Vllazninë, nuk është vendosur asgjë konkrete. Lojtarët titullarë janë kritikuar nga trajneri Spahiu për moszbatim të detyrave në Shkodër. Madje trajneri i të kuqve ka dhënë paralajmërime për të gjithë ata që nuk do të zbatojnë rregullat disiplinore, pasi do të ndëshkohen menjëherë sipas rregullores së klubit. Pra, efektet e analizës kanë qenë të menjëhershme, sepse askush nuk ka kërkuar leje. Aq më tepër pasdite, në seancën e parë të Partizanit, për këtë javë nuk ka pasur asnjë mungesë në stërvitje, me përjashtim të Ndrekës, që u dëmtua. Lojtarët e formacionit bazë kanë punuar me trajnerin Spahiu, ndërkohë që të tjerët me ndihmësin e tij, Gjebrea. Nga lojtarët e formacionit të parë është parë Fakaj të stërvitet me grupin kryesor dhe braziliani Brashini, pas ndeshjes me Vllazninë, nuk ka qenë sërish i preferuari i Spahiut.

Canaj: Ndëshkimi i Mindevit, fatale për ne

Nuk kanë mbetur të zhgënjyer drejtuesit e klubit dhe tifozët lushnjarë nga paraqitja e ekipit të tyre, e cila u përball si e barabartë me Tiranën, edhe pse me një formacion të cunguar. Madje trajneri i Lushnjës, Agim Canaj, ka deklaruar pas ndeshjes se rezultati më i drejtë do të ishte barazimi, nisur nga mënyra sesi u zhvillua ajo. Sipas Canajt, skuadra luajti mirë në mesfushë dhe deri diku në mbrojtje, ndërsa u ndie forca goditëse e repartit të sulmit. Kjo, sipas teknikut verdhejeshil, ka ndodhur për arsye të mungesës së sulmuesve Nora dhe Boriçi si dhe të dëmtimit të sulmuesit energjik Byzhyti. Gjithashtu, për Canajn, largimi me karton të kuq i të vetmit sulmues të mbetur në fushë për lushnjarët, bullgarit Mindev (pa të drejtë, sipas tij), largoi përfundimisht çdo shpresë të "lagunarëve" për të marrë ndonjë barazim në këtë ndeshje.

Flamurtari, "eksodi" s'ka të ndalur

Akumulimi i pakënaqësive te lojtarët e Flamurtarit ka arritur kulmin pikërisht këtë fillimjavë. Të hënën paradite, edhe ata lojtarë që kanë mbetur te skuadra kanë kërkuar lejet e kalimit. Duke shfrytëzuar edhe vajtjen me shërbim për në FSHF të sekretarit të klubit, Hajri Hasani, presidenti Selami, të hënën paradite i ka pajisur me leje kalimi dy nga futbollistët kryesorë të mbrojtjes së Flamurtarit, Lila dhe Resuli, të cilët, së bashku me Daiun e larguar më parë, përbënin treshen e prapavijës kuqezi. Sipas trajnerit Bozhani dhe deklarimeve të vetë futbollistëve, të lartpërmendurit janë larguar dje drejt skuadrave që u kanë bërë oferta. Konkretisht, qendërmbrojtësi Daiu ka filluar stërvitjen te Besa, ndërsa mbrojtësi Resuli, njëherësh edhe kapiten i skuadrës vlonjate, pas kërkesës së drejtuesve portokallinj në fund të ndeshjes me Elbasanin, do t'i bashkohet sot në stërvitje Elbasanit.

Tirana ka "rigjetur" Eldoradon

I mjaftojnë disa minuta në fushë për të treguar se është një nga sulmuesit më decizivë të kampionatit shqiptar. Bëhet fjalë për golashënuesin Eldorado Merkoçi, protagonistin kryesor në fitoren 2-1 të Tiranës ndaj Lushnjes. Edhe pse e nis ndeshjen nga stoli, numri 23 bardheblu në këtë kampionat po tregon një formë të shkëlqyer, duke shënuar tre gola të rëndësishëm. Goli i parë regjistrohet në fitoren 3-2 ndaj Vllazninë në "Qemal Stafa", ndërkohë që i d