Dinamo: Tri pikët, para lojës së bukur

. Synimi kryesor i Dinamos në derbin e së shtunës me Tiranën do të jetë tripikëshi, e më pas loja e bukur. Vetë pozicioni në të cilin blutë e kryeqytetit ndodhen pas shtatë javësh kampionat, i bën ata që t'i kushtojnë më shumë rëndësi rezultatit. Ka qenë vetë trajneri Sulejman Demollari ai që pas ardhjes në krye të skuadrës është shprehur se Dinamoja aktualisht ka më tepër nevojë për pikë, pastaj për lojën e bukur

Blutë, ndeshje kontrolli me të rinjtë

Në seancën e djeshme stërvitore, Dinamoja ka zhvilluar një ndeshje kontrolli, ku përballë ka pasur ekipin e të rinjve. Trajneri Demollari, në formacionin e parë, ka rreshtuar formacionin që doli fitimtar javën e kaluar me Elbasanin, përveç portierit Lika. Në rolin e shkatërruesit është aktivizuar Deliallisi, ndërsa Ishka ka luajtur sërish mesfushor. Ndërkohë, në pjesën e dytë, trajneri Demollari ka bërë shumë ndryshime, duke aktivizuar të gjithë lojtarët e gatshëm. Kështu, parashikohet që formacioni anti-Tirana mund të ketë ndonjë ndryshim të vogël nga ai i javës së kaluar. Mendohet që në 11-shen e parë do të rikthehet Bakalli. Sot, blutë do të zhvillojnë vetëm një seancë stërvitore, e cila do të fillojë në orën 14.30.

Dinamo, grumbullim dyditor

Blutë do të grumbullohen qysh sot për t'u rehabilituar përpara derbit me Tiranën, që konsiderohet shumë i rëndësishëm për ta. Është hera e parë që Dinamoja grumbullohet dy ditë para një ndeshjeje të kampionatit. Në orën 19.00, lojtarët e ekipit, stafi teknik dhe ai mjekësor do t'i hipin autobusit për t'iu drejtuar qytetit të Durrësit. Dinamoja do të sistemohet në hotelin "Besami", ndërsa stërvitja e nesërme mendohet të zhvillohet në ambientet ku stërvitet ekipi i Teutës.

Uefa miraton manualin e liçensimeve për klubet të paraqitur nga FSHF

Uefa miraton manualin e liçensimeve të paraqitur nga Federata Shqitpare e Futbollit. Nëpërmjet një faksi të mbërritur në institucionin tonë të futbollit, shefi ekzekutiv i Uefa-s Gerhard Aigner ka njoftuar shqiptarët se manuali i paraqitur prej tyre ka marrë miratimin e UEFa-s. futbolli shqiptar do të liçensohet me rregullat e saj. Aigner ka falenderuar drejtuesit e Federatës, për punën e kryer .
Liçensimet e klubeve në arenën ndërkombëtare do të fillojnë nga viti i ardhshëm, ndërsa përsa i përket kampioantit ajo do e startojë nga viti 2006. Sipas shefit të sektorit të liçensimeve në Federatë, Kreshnik Agolli, klubet janë shumë prapa në këtë drejtim.
Liçensimet e klubeve sipas Uefa-s janë të detyrueshme. Shqipëria është një nga vendet më të prapambetura në këtë drejtim, për vetë infrastrukturën e saj të dobët financiare, ligjore, të organizimit apo terreneve të dobëta.

Imazhe te Ngjitura

1111untitled-1.jpg (2.7 KB, 35 vezhgime)

Braziliani Abilio në kërkim të suksesit personal

Sulmuesi i spikatur i kampionatit tonë në javët e para ëndërron kurorën e golshënuesit më të mirë. Një betejë e tillë nuk do të jetë aspak e lehtë dhe për një sipërmarrje të tillë është i bindur edhe braziliani. Megjithatë paraqitja e bërë, forma e mirë fizike dhe sidomos rritja e vazhdueshme e lojës së të kuqve mund të jenë një ndihmesë e madhe për të.Gjithsesi loja e futbollit ka për qëllim triufin e një grupi dhe jo atë individual. Për këtë arsye edhe Abilio dëshiron së pari trofetë me skuadrën e tij dhe më pas kontributi i tij të shoqërohej edhe me sukseset personale.

Mbrojtësi i Partizanit thekson se katër fitoret në Tiranë, tashmë ndaj Besës, duhen bërë pesë

Behari: S'duhet prishur seria e fitoreve

Sot, në orën 14.30, në stadiumin "Selman Stërmasi" do të luhet ndeshja e parë e javës së tetë të Kampionatit të 65-të Kombëtar të Futbollit, midis Partizanit dhe Besës. Mbrojtësi i të kuqve, Ardi Behari, para sfidës me kavajasit thekson se Partizani sot nuk do ta ketë të lehtë fitoren, por kjo nuk do të bëhet pengesë që ekipi të tregojë karakter të fortë në fushë përballë kundërshtarit të radhës. "Sot, ndaj Besës, duhet të fitojmë patjetër, sepse në të kundërt mund ta humbasim kryesimin. Ekipi nuk ka gabuar asnjëherë deri tani në Tiranë, ndërkohë që edhe nëpër rrethe kemi luajtur shumë mirë. Besa, nga ana tjetër, nuk do të vijë thjesht për shëtitje në kryeqytet, prandaj mendoj se do të zhvillohet një sfidë interesante. Partizani duhet të shfrytëzojë momentin e mirë që po kalon në kampionat. Për këtë arsye, sot, përveç maksimumit të pikëve, do të kërkojmë të jemi më shumë bindës para publikut tonë," - thekson mbrojtësi vlonjat i të kuqve.

Imazhe te Ngjitura

tiranapartizani4.jpg (13.5 KB, 30 vezhgime)

Mbrojtësi shtatlartë ka mbërritur dje në Tiranë dhe ka filluar bisedimet me të kuqtë

Ervin Fakaj "troket" te Partizani

Pas zhurmës së madhe, që u bë pak kohë më parë për ish-lojtarin e kombëtares, Ervin Fakaj, i cili, siç dihet, tashmë ka mbetur pa ekip, duket se përfundimisht ai ka "trokitur" në dyert e klubit "Partizani". Ndonëse letrat për ta federuar me Partizanin kanë kohë që janë dorëzuar në federatë, Fakaj nuk mund të cilësohet zyrtarisht futbollist i të kuqve, pasi nuk e ka sjellë ende kartonin jeshil në klubin e kuq. Sidoqoftë, dje, burime të sigurta pranë lojtarit në fjalë konfirmuan se mbrojtësi vlonjat e ka lënë përfundimisht mërgimin dhe ka zbritur në aeroportin e Rinasit. I pritur nga babai i tij, lojtari i është drejtuar kryeqytetit dhe menjëherë më pas ka kërkuar të takojë presidentin e Partizanit, Albert Xhanin. Kështu, që dje në mbrëmje, ai është futur në bisedime me drejtuesit më të lartë të Partizanit, për të diskutuar më hollësisht për kontratën e re me të kuqtë.

Imazhe te Ngjitura

partizani_alb.gif (7.1 KB, 29 vezhgime)

Duka, Starova dhe Kastrati në kongresin e FIFA-s

Presidenti i FSHF-së, Armand Duka, i shoqëruar nga sekretari i përgjithshëm, Starova, dhe anëtari i komitetit ekzekutiv, Tahir Kastrati, do të marrin pjesë në kongresin e zakonshëm të FIFA-s. Ka qenë ftesa zyrtare e ardhur në FSHF, që i ka detyruar tre personat lartë të Fedratës që të marrin rrugën për në Katar. Nisja do të bëhet sot në mëngjes nga Rinasi. Ndërkohë, kongresi i FIFA-s zhvillohet më 19 dhe 20 tetor. Në këtë kongres, sipas sekretarit të përgjithshëm, Starova, do të diskutohet për projektin e ri të statusit të FIFA-s. "Në këtë takim, pala shqiptare do të jetë e pranishme me tre veta, të cilët do të votojnë për rregullimet që janë bërë në statusin e ri të FIFA-s. Ndërkohë nuk përjashtohen edhe takime me shumë drejtues federatash të tjera," - është shprehur Starova.

Aineri miraton manualin e licensimeve

Dje, sekretari i përgjithshëm i UEFA-s, Gerar Ainer, ka miratuar përfundimisht manualin shqiptar të licensimeve. Eshtë ky lajmi më i fundit i mbërritur në zyrat e Federatës me anë të një faksi të dërguar nga UEFA. Ndërkohë ka qenë vetë sekretari i përgjithshëm i FSHF-së, Sulejman Starova, i cili e ka miratuar një fakt të tillë. Sipas tij, ky miratim i manualit të licensimeve nuk është gjë tjetër, veçse fillimi i një pune shumë kolosale, e cila në fund të majit duhet të ketë përfunduar, nëse Shqipëria dëshiron të marrë pjesë në kupat e Evropës në sezonin 2004-2005. Starova ka konfirmuar që prej ditës së sotme se sektori i licensimeve do të fillojë punën për implementimin e këtij drafti në të gjitha klubet e grupeve A1 dhe A1.

Trajneri i bluve parashikon një derbi tepër të fortë dhe të bukur nesër në "Qemal Stafa"

Demollari: Kam besim te forca e skuadrës

"Vetë fjala "derbi" të bën të mendosh sesa e fortë do të jetë lufta për fitore në takimin e nesërm, ku do të luajnë dy nga skuadrat me më shumë tradita në futbollin shqiptar." Me këtë frazë e ka filluar deklaratën e tij në lidhje me derbin e kësaj jave trajneri i Dinamos, Sulejman Demollari. Ai pohon se gjendja e skuadrës është e kënaqshme, ndaj parashikohet që nesër, në stadiumin "Qemal Stafa", Dinamoja të realizojë synimin e saj, i cili është vetëm fitorja. Shqetësimi i vetëm mbetet gjendja e portierit Lika, aktivizimi i të cilit mund të vendoset vetëm në momentet e fundit, para fillimit të ndeshjes. Trajneri Demollari thekson se gjatë këtyre ditëve është bërë një punë e madhe nga të gjithë pjesëtarët e ekipit, në mënyrë që derbi me Tiranën të kalohet me sukses.

FSHF

Federata Shqiptare e Futbollit, në një seminar për arbitrat e rinj. Drejtuesit e sektorit të arbitrave kanë mbledhur sot një numër të konsiderueshëm gjyqtarësh të rinj nga rrethet e Shqipërisë së mesme, të cilët do të fillojnë së shpejti një seminar tre mujor. Ky seminar do të ketë si synim parësor të gjejë elementin me prespektivë të arbitrimit në Shqipëri. Inspektori i gjykimit në Federatë Uvil Zajmi sqaron .
Gjyqtarët e rinj, janë përshëndetur nga drejtues të ndryshëm të Federatës.
Në fjalën e tyre, njerëzit e Fedratës si Hitaj, Spahiu apo Baçi kanë thënë se gjykimi është një nga plagët e futbollit shqiptar.
Për ta shumë nga gjyqtarët e kastës së vjetër, kanë probleme të ndryshme. Sipas tyre shembulli i këtyre viteve nuk duhet të ndiqet.
Takimin me gjyqtarët e rinj e ka drejtuar inspektori i gjykimit në Federatë, Uvil Zajmi.

Imazhe te Ngjitura

2f.jpg (4.7 KB, 20 vezhgime)

Partizani fiton 3-1 në "Selman Stërmasi" ndaj Besës

Elbasanasit e kuq "shthurin" kavajasit

Partizani - Besa 3-1
Shënues: Duro 55', Bylykbashi 67', 79', Kuli 85'


Partizani
Nallbani 6.5
Behari 7
Beqiri 6.5
Ndreka 6
Grizha 6
Imeraj 6.5
Duro 7
Abilio (Allmuça 71') 6.5
Muzaka 6
Bejzade (Bylykbashi 42') 7
****oka (Hallaçi 58') 6
Trajner: I. Spahiu

Besa
Osmani 5
Xhani 5.5
Sheta 6
Doka 5.5
Qerolli 5.5
Romanishin 5.5
Mergjyshi (Lorja 80') 5.5
Mehmeti 5.5
Ypi (Kollçaku 67') 5
Kuli 6
Kapllani 5.5
Trajner: F. Sejdini
Gjyqtarë: B. Pashaj (Tiranë) F. Hysomema Vlorë), Gj. Shyti (Shkodër).
Kartonë të verdhë: Mehmeti, Mërgjyshi, Kapllani, Abilio, Muzaka.

Imazhe te Ngjitura

besa.gif (8.7 KB, 18 vezhgime)

Partizani - Besa 3-1

Minutat e lojës...

2'- Rasti i parë me protagonist Abilion, që godet në portë lehtësisht, por pa rezultat.
15'- Bekim Kuli provon larg zonës, por topi kalon tej portës së Nallbanit.
23'- Imeraj driblon bukur në afërsi të zonës, gjuan fort dhe topi për pak sa nuk përfundon në kuadrat.
25'- Muzaka-Abilio kombinojnë me njëri-tjetrin në afërsi të zonës, por në fund portieri i miqve del para brazilianit.
32'- Ypi provon jashtë zonës dhe topi del jashtë portës.
34'- Brazilini ****oka del i lirë në zonë, e mban më shumë se duhet topin, duke humbur një tjetër rast të mirë për të kuqtë.
35' - Rasti më i pastër për gol me protagonist Kapllanin, që përfiton nga gabimi i Ndrekës, del i lirë përballë Nallbanit, por nuk shënon dot.
37'- ****oka gjendet sërish i lirë në zonë, e kthen topin pas te Behari, që gjuan menjëherë dhe topi kalon ngjitur me trekëndëshin e majtë të Osamnit.
40'- Duro provon nga larg dhe pret në pozicion Nallbani.
41'- Abilio, me kokë, kalon bukur në zonë. I vetëm me portierin e Besës, gjuan jashtë kuadratit të portës.
47'- Bylykbashi futet në zonë dhe driblon dy-tre lojtarë, por nuk arrin të godasë mirë në momentin e fundit.
50'- Beqiri depërton në afërsi të zonës, godet menjëherë dhe topi kalon mbi traun e portës së Osmanit.
53'- Muzaka rrëzohet në zonë dhe të kuqtë kërkojnë 11-metërsh, por gjyqtari vazhdon lojën.
55'- Momenti i Klodian Duros. Ndonëse topi është në një kënd shumë të pjerrët nga krahu i djathtë, elbasanasi godet mjeshtërisht, duke e dërguar topin në rrjetë. 1-0.
57'- Duro gjuan përsëri mbi traun e Osmanit.
67'- Sërish elbasanasi i Partizanit zë në befasi portierin e Besës, që grushton bukur, por Bylykbashi ndjek aksionin dhe shënon golin e dytë për të kuqtë. 2-0
69'- Kapllani nuk koordinohet si duhet në zonën e Partizanit, duke e humbur topin.
74'- Kombinim i bukur midis Duros dhe Bylykbashit, që finalizohet me një gjuajtje të Allmuçës, por topi përfundon ngjitur me traun e portës.
79'- Bylykbashi bën të heshtë përfundimisht Besën, pas një parabole jashtë zonës, marramendëse për Osmanin, që i duhet vetëm të nxjerrë topin nga rrjeta. 3-0.
85'- Nëse në pjesën e parë Kapllani e fali gabimin e Ndrekës, Kuli bën të kundërtën, pasi futet në zonë dhe shënon lehtësisht golin e vetëm për ekipin e tij. 3-1.

Imazhe te Ngjitura

besa.gif (8.6 KB, 17 vezhgime)

Partizani - Besa 3-1

Komenti...

Dje, në "Selman Stërmasi", të kuqtë kanë korrur fitoren e tretë radhazi, duke treguar edhe një herë se janë të pathyeshëm në fushën e tyre. Kështu, Partizani, pavarësisht nga rezultatet e tjera të javës së tetë, do të mbetet në krye të kampionatit tonë. Dje, ekipi i Spahiut ka zbritur në fushë me disa ndryshime në modulin e lojës. Behari dhe Beqiri në mbrojtje janë parë më të avancuar se në ndeshjet e tjera, ndërkohë që Bejzade, ndonëse i dëmtuar, luante nga minuta e parë në sulm së bashku me ****okën. Loja në pjesës e parë ishte pothuajse e barabartë për të dyja skuadrat, ndaj edhe rezultati ishte i drejtë. Me përjashtim të Kulit dhe Kapllanit, të gjithë lojtarët e tjerë të Besës ishin të detyruar të mbronin, ndërkohë që Partizani, edhe pse sulmonte vazhdimisht, nuk e vuri në rrezik portën e miqve. Në 45 minutat e para, vetëm dy raste të pastra, por të shpërdoruara nga Kapllani për Besën dhe Abilio për Partizanin. Ndërkohë, futja e Bylykbashit i dha më shumë përparësi lojës sulmuese të Partizanit, që pjesën e dytë e filloi ndryshe nga e para. Vetëm 10 minuta pas fillimit të pjesës së dytë, Klodian Duro gjen rastin më të mirë që të tregojë edhe një herë arsyen se përse vlen më shumë se të tjerët. Në një pozicion tepër të pjerrët me portën, futbollisti i kombëtares sonë ekzekuton një goditje dënimi në portë, duke e bërë të pavlefshëm grushtimin e potierit Osmani. Pas shënimit të golit të parë, të kuqtë ndihen më të çliruar në fushë, duke e kontrolluar plotësisht lojën. Gjatë pjesës së dytë, dy elbasanasit Duro-Bylykbashi, luajnë mirë dhe, me kombinimet e tyre mahnitëse, arrijnë të shënojnë edhe dy gola të tjerë. Duro godet fort dhe Bylykbashi shënon pas topit që fiton nga grushtimi i portierit të Besës. Por Bylykbashi tregon pak minuta më vonë se di të shënojë edhe pa ndihmën e patriotit të tij. Nga jashtë zonës shënon me mjeshtëri një gol të rrallë, duke e kaluar topin me anë të një parabole në rrjetën e portierit Osmani. Ndërkohë, në pjesën e dytë, pesë minuta para përfundimit të ndeshjes, pas rastit të vetëm përballë portës së Nallbanit, Besa shënon golin e nderit me anë të Kulit. Nga të kuqtë duhet veçuar edhe loja e mirë e vlonjatëve, Behari dhe Imeraj, si dhe e brazilianit Abilio, që ishte i pafat para portës. Gjithsesi, ishte një fitore e merituar e të kuqve, që kryesojnë me meritë kampionatin tonë.

Imazhe te Ngjitura