TEUTA

Sulmuesi durrsak e konsideron fitoren me Tiranën test për arritjen e objektivave në këtë kampionat

Bespalla: Tani, a nuk jemi pretendentë?

Një prej sulmuesve të dalluar të Teutës, Bespalla, e konsideron ndeshjen e së mërkurës, me kryesuesen Tirana, fitore decizive, e cila, sipas tij, vërtetoi katërcipërisht se skuadra e tij mund ta fitojë titullin. Në një intervistë për "Sportin shqiptar", Bespalla do të shprehej rreth ndeshjes së luajtur në "Qemal Stafa":
- Bespalla, keni qenë pjesëtar i një triumfi të merituar ndaj kryesueses së kampionatit, Tiranës. Si e keni përjetuar këtë fitore të rëndësishme?
- Nuk e teproj po të them se kam qenë në delir. Ishte një fitore e rëndësishme, jo vetëm për faktin se fituam ndaj kryesueses së kampionatit, Tiranës, por i bindëm të gjithë, edhe ata më skeptikët, se Teuta është pretendente kryesore për titull. Fituam jo vetëm me gola, por edhe me lojë. E dominuam plotësisht takimin, në të gjitha drejtimet. Edhe pse në një terren të rënduar nga shiu, Teuta u ngjit në lartësinë e lojës së saj, i zbatoi me rreptësi detyrat taktike dhe tregoi mentalitetin e një ekipi fitues.
- A besonit te një fitore e mundshme në "Qemal Stafa", ndaj Tiranës kampione?
- Sigurisht që po. Ne udhëtuam drejt kryeqytetit me një synim kryesor: të fitonim ndaj Tiranës. E dinim se kundërshtari do të shfaqte probleme psikologjike, sepse i duhej patjetër fitorja, për të bërë autokritikën pas humbjes me Partizanin. Fatmirësisht, kështu rezultoi. Ne shfrytëzuam çdo gabim të Tiranës dhe shënuam plot 3 herë.
- A mendoni se sulmi dhe mesfusha e Teutës ishin repartet që funksionuan më mirë në këtë ndeshje?
- Fituesi, thonë që nuk gjykohet. Prandaj, mendoj se të tri repartet e skuadrës funksionuan mirë. U treguam mjaft të qartë përpara portës kundërshtare, gjë që nuk kishte ndodhur më parë, dhe nuk e lamë kundërshtarin t'i afrohej portës sonë. Kjo tregon se loja e grupit ka qenë çelësi i suksesit ndaj Tiranës.
- A mund të konsiderohet kjo ndeshja më e mirë e Teutës në këtë kampionat?
- Realisht, ishte ndër ndeshjet e mira të Teutës, por nuk mund të them se ishte më e mira.
- Si e shikoni ecurinë e Teutës deri tani?
- Kampionati është i gjatë dhe i fortë. Personalisht, jam i mendimit se ndeshjet direkte me ekipet rivale për titull do të përcaktojnë shumë gjëra. Ne e fituam një betejë të tillë, me Tiranën, kemi barazuar dy të tjera, me Partizanin dhe Dinamon, çka tregon se jemi në udhë të mbarë. Sidoqoftë, duhet të jemi të kujdesshëm, sepse, edhe ndeshjet me skuadrat e ashtuquajtura të dobëta, mund të të sjellin probleme. Duhet impenjim maksimal në çdo ndeshje të kampionatit, sepse, në të kundërt, çdo lloj nënvleftësimi apo euforie do të na largonte nga objektivi.
- A mendoni se me këtë fitore Teuta ka fituar edhe spektatorët e saj?
- Patjetër. Ata që na mbështetën në ndeshjen me Tiranën, ndonëse në një ditë me shi, do ta bëjnë këtë gjë, më të shumtë në numër, edhe në stadiumin tonë. U them atyre se këtë sezon Teuta është më e fortë se kurrë dhe ka hyrë në garë për të fituar titullin kampion.

Llambi Kallço 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

VLLAZNIA :

Mbrojtësi kuqeblu ia atribuon trajnerit malazez meritën e kthesës së madhe të skuadrës

Zmijani: Haxhiosmanoviçi, "arkitekti" i Vllaznisë

Fitorja e së mërkurës ndaj Besës e ka shtuar edhe më tepër entuziazmin në kampin shkodran. Gjithsecili prej kuqebluve tashmë beson më tepër te kjo Vllaznia, e cila, ashtu pa u ndier shumë, po i ngjit një e nga një shkallët e renditjes. Edhe mbrojtësi i njohur i skuadrës shkodrane, Luan Zmijani, duket mjaft entuziast pas tripikëshit të marrë të mërkurën ndaj kavajasve: "Fitorja me Besën ishte shumë e rëndësishme për ne. Kjo jo vetëm se na dha tri pikët e ngjitjes më lart në klasifikim, por sepse tregoi rritjen cilësore të Vllaznisë. Tashmë është realitet që skuadra jonë po hyn në "vallen" e pretendenteve për trofe. Kjo u duk qartë edhe në Durrës, kur luajtëm ndaj Besës dhe ku u shfaq një Vllazni më e fortë se një javë më parë në fushën e lojës. Për ndeshjen ndaj kavajasve nuk mund të evidentosh një apo dy lojtarë, që luajtën mirë, pasi kështu kanë luajtur të gjithë, që nga Cungu, Salihi, Xhahysa etj," - thotë titullari i formacionit kuqeblu, Zmijani. Mbrojtësi 27-vjeçar, me shumë përvojë, evidenton edhe lojën e dy kolegëve të tij të mbrojtjes. Por, mbi të gjitha, sipas tij, merita kryesore për këtë kthesë të Vllaznisë i takon "arkitektit" të saj, trajnerit Haxhiosmanoviç, njeriut që besoi shumë te vlerat e futbollistëve kuqeblu. Me një fjalë, sipas Zmijanit, është ai, "Deda", që i ka bërë sërish të rëndësishëm futbollistët e Vllaznisë. Ndër "të privilegjuarit" e malazezit ai shikon edhe veten. Kujtojmë këtu që, ai, bashkë me ndonjë tjetër kuqeblu të rikthyer së fundi te Vllaznia, ishin shndërruar në "endacakë", që gjenin strehë te skuadra të kategorisë së dytë, si Besëlidhja apo Laçi. Mirëpo pas ardhjes se Haxhiosmanoviçit në krye të skuadrës shkodrane, është vërtetuar se Vllaznia ka shumë nevojë për kontributin e "pinjollëve" të saj. Dora e malazezit konsiderohet "ilaç" nga mbrojtësi Zmijani. Edhe fitoren e fundit në kampionat, 27-vjeçari ia atribuon kryesisht trajnerit të tij: "Nëse ndaj Besës fituam, kjo erdhi si pasojë e përgatitjes në të gjitha drejtimet, veçanërisht në planin fizik. Për këtë, një meritë jashtëzakonisht të madhe ka trajneri Haxhiosmanoviç. Kur ke forcë në këmbë, edhe loja në fushë të bëhet më e lehtë. Prandaj jo më kot thashë që nga java në javë jemi bërë më të fortë." Me sa duket, problemet për Vllazninë po vijnë duke u mbyllur dhe skuadra po konsolidon një ansambël të mirë. Reparti i mbrojtjes, me aq shumë probleme në javët e para të kampionatit, tani duket se i ka lënë prapa. Vetë Zmijani premton se, bashkë me rezultatet pozitive, do të përmirësohet vazhdimisht edhe loja e repartit ku luan.

Gjergj Kola 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

VLLAZNIA :

Fitorja me Besën, 4 milionë lekë

Përveç marrjes së tri pikëve, fitorja e së mërkurës me Besën ka "kushtuar" 4 milionë lekë të vjetra, shumë kjo që ka shkuar në xhepat e futbollistëve dhe drejtuesve teknikë të Vllaznisë. Kaq ka qenë vlera e premios që drejtuesit e lartë të klubit kanë akorduar menjëherë pas këtij takimi. Arritja e objektivit në këtë ndeshje nuk ka sesi të mos i gëzojë dyfish kuqeblutë. Për ta është hera e parë që përfitojnë shpërblim në këtë kampionat.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

ELBASANI

Rezultatet e fundit negative të portokallinjve vënë në dyshim ekzistencën e stafit teknik

Elbasani, kur "peshku qelbet nga koka"

Rezultatet pozitive të Elbasanit në këtë fillimkampionati krijuan idenë se ky ekip do të ishte një nga pretendentët kryesorë për titull. Por shumë shpejt, aty nga java e katërt, u pa se gjithçka për ata që e kishin çuar nëpër mend një gjë të tillë, kishte qenë veçse iluzion. Në katër javët e fundit, elbasanasit kanë marrë vetëm një pikë, nga 12 të mundshmet, çka tregon se problemet janë serioze në këtë ekip. Në fillimjavë, gjatë analizës që bëri stafi drejtues i portokallinjve për mungesën e rezultateteve pozitive, palët ia hodhën përgjegjësinë njëri-tjetrit. Në fund, të gjithë së bashku, trajnerë e futbollistë, u zotuan para financuesve se, që në ndeshjen me Dinamon, do të bënin autokritikë. Pra, në këtë ndeshje do të niste kthesa e shumëpritur. Mirëpo kjo ndeshje, në të cilën Elbasani humbi, tregoi se situata në kampin portokalli po përkeqësohet më tej. Trajneri Sejdini, pas përfundimit të ndeshjes Elbasani-Dinanmo, si zakonisht, kur humbet, nuk pranoi të japë asnjë shpjegim për dështimin. Të njëjtën gjë bënë edhe futbollistët portokallinj, ndërkohë që presidenti Kumuria, tepër i mërzitur, u largua nga stadiumi "Ruzhdi Bizhuta" pa mbaruar ende takimi.
Edhe dje, të kontaktuar nga ana jonë, futbollistët elbasanas dhe drejtuesit e tyre nuk kanë pranuar ta komentojnë humbjen e radhës. Ndërkohë, në qarqet sportive të Elbasanit kanë filluar pëshpëritjet e para për ndryshimin e stafit drejtues të ekipit. Burime të besueshme nga radhët e grupit të financuesve të Elbasanit deklaruan për "Sportin shqiptar" se pozitat e stafit drejtues të portokallinjve janë tronditur seriozisht. Nga ana e saj, presidenca portokalli po gjykon situatën dhe pritet të marrë ndonjë vendim. Megjithëse ka zëra, ende nuk mund të thuhet nëse do të mbeten apo do të largohen trajnerët aktualë të Elbasanit në drejtim të këtij ekipi. Thuhet se, brenda kësaj fundjave, do të bëhet i ditur edhe qëndrimi zyrtar i financuesve të ekipit. Gjithsesi, për portokallinjtë, një gjë është e vërtetë: në ekip nuk ka harmoni dhe kjo ka sjellë mungesën e rezultateve.


Fatmir Popja 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Elbasani "ha kokën" e trajnerit Sejdini

Mbrëmë vonë, stafi i financuesve të Elbasanit është mbledhur për të analizuar situatën kritike të skuadrës së tyre në javët e fundit. Të gjitha "shigjetat", sikurse pritej, janë drejtuar nga trajneri aktual i portokallinjve, Astrit Sejdini. Madje, po në analizën e mbrëmjes që shkoi, financuesit e skuadrës elbasanase e kanë shkarkuar Sejdinin nga detyra e trajnerit, me motivacionin për rezultate të dobëta. Njëkohësisht, ata kanë qenë të një mendjeje në propozimin e trajnerit të ri, i cili, sipas të gjitha gjasave, do të jetë specialisti i futbollit elbasanas, Edmond Mustafaraj.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

DINAMO :

Kapiteni i bluve mendon se skuadra e meritoi plotësisht fitoren në takimin me portokallinjtë

Pisha: Dinamoja rigjeti veten në Elbasan

Dinamoja është rikthyer te fitorja në javën e shtatë të kampionatit, ndërsa trajneri i saj i ri, Sulejman Demollari, ka marrë atë që kishte premtuar, tripikëshin. Fitorja e së mërkurës në fushën e vështirë të Elbasanit, falë një goli të Ziambos, e ka ndryshuar krejtësisht atmosferën në kampim blu, duke i shërbyer më shumë moralit të skuadrës. Blutë kanë ngelur sërish në vendin e katërt, por vetëm me një pikë diferencë nga Tirana e vendit të tretë dhe tri pikë nga Partizani dhe Teuta, që kryesojnë tabelën e renditjes. Sipas Arjan Pishës, Dinamoja ndaj Elbasanit tregoi një përmirësim të dukshëm, në krahasim me ndeshjet e mëparshme, duke luajtur me më shumë agresivitet e vendosmëri. Kapiteni dinamovit thekson se ishte një fitore plotësisht e merituar, e cila ka ardhur në momentin e duhur. Në intervistën e tij dhënë për "Sportin shqiptar", Pisha do të shprehej:
- Dinamoja fitoi në një fushë tepër të vështirë, siç është ajo e Elbasanit. Ku e shikon kapiteni Pisha "çelsin" e suksesit?
- Dinamoja e meritoi plotësisht fitoren, sepse luajti më mirë se kundërshtari. Mendoj se, para sa gjithash, në këtë ndeshje Dinamoja tregoi shpirt të lartë gare, gjë që në takimet e fundit ndoshta ka munguar. Gjithashtu, ekipi luajti me më shumë agresivitet përballë kundërshtarit dhe kjo bëri që ne të fitonim me Elbasanin. Në njëfarë mënyre, në këtë ndeshje Dinamoja gjeti veten. Ishte një fitore shumë e rëndësishme, sepse erdhi në një moment disi delikat për ne. Besoj se tani e kemi kaluar atë moment të vështirë, pas humbjes me Partizanin dhe dy barazimeve në fushën tonë.
- Sa ka ndikuar ardhja e trajnerit Demollari në këtë fitore?
- Do të thosha fitorja jonë ndaj Elbasanit nuk ka të bëjë shumë me ardhjen e trajnerit Demollari. Natyrisht, ai ka meritë të padiskutuar, ashtu si edhe trajneri i mëparshëm, Marko, për fitoret që Dinamoja arriti në fillim të kampionatit. Por mendoj se kryesorja qëndron te fakti që ekipi diti të reagojë pas atyre ndeshjeve jo të mira që zhvilloi në javët e fundit.
- Cili është mendimi juaj në lidhje me gjykimin e Velçanit në këtë takim?
- Ishte një gjykim jokorrekt nga ana e gjyqtarit Sazan Velçani. Kjo u pa fare qartë nga të gjithë ata që ishin të pranishëm në stadium. Janë disa episode që duhen përmendur, ku gjyqtari e ndëshkoi Dinamon. Na janë mohuar të paktën dy 11-metërsha flagrantë, por edhe në disa raste të tjera gjyqtari Velçani nuk veproi si duhet. Mendoj se, jo vetëm Velçani, por të gjithë gjyqtarët e tjerë duhet jenë më korrektë me Dinamon, sepse nuk kanë qenë të tillë në javët e mëparshme.
- Tirana ka gabuar sërish. Fitojnë Partizani dhe Teuta, ndërsa Dinamoja vetëm shkurton diferencën e pikëve me ekipet kryesuese...
- Unë do të thosha se kampionati i sivjetëm do të jetë tepër i fortë. Kjo gjë u vërtetua këtë javë, kur pretendentet kryesore për titull, si Partizani, Dinamo dhe Teuta, fituan jashtë fushave të tyre. Për momentin, Tirana nuk po kalon një moment të mirë, ashtu si Dinamoja para pak javësh. Javët e ardhshme do të jenë më interesante dhe, me një ngritje të mundshme të Vllaznisë, kampionati do të bëhet më i bukur dhe lufta për titull do të bëhet shumë e fortë.
- Ndërkohë, takimi i ardhshëm do të jetë derbi me Tiranën. Si e parashikoni?
- Kemi dhjetë ditë kohë, të cilat më shumë do t'i shërbejnë trajnerit Demollari për të njohur më mirë skuadrën. Parashikoj një takim të vështirë për vetë faktin se Tirana vjen pas dy humbjesh radhazi në kampionat. Të dyja skuadrat do të kërkojnë fitoren dhe shpresoj të luhet një ndeshje e bukur.


Blutë, sot analiza e Elbasanit
Pas ndeshjes me Elbasanin, blutë i janë drejtuar menjëherë fushës stërvitore. Dinamoja ka zhvilluar dje një seancë stërvitore, e cila ka filluar në orën 9.30, ndërsa pasdite futbollistët janë lënë të lirë nga trajneri Demollari. Seanca e djeshme ka qenë më e gjatë për lojtarët që nuk u aktivizuan në ndeshjen me Elbasanin dhe për ata që u aktivizuan si zëvendësues. Ekipi do të grumbullohet sot, në orën 10.00, në një nga sallat e kompleksit, ku do të bëhet analiza e takimit të së mërkurës me Elbasanin. Trajneri Demollari ka kërkuar që të jetë gati një televizor me videoregjistrator, në mënyrë që analiza të bëhet edhe me ndihmën e pamjeve filmike nga kjo ndeshje.

Ishka, i diferencuar në stërvitje
Futbollisti Sokol Ishka ka punuar në mënyrë të diferencuar në seancën e djeshme stërvitore. Ai ka pësuar një dëmtim në kofshë pas një goditjeje që ka marrë në takimin me Elbasanin. Ishka është detyruar të largohet nga fusha e lojës në minutën e 34-t, duke ia lënë vendin Artion Poçit. Parashikohet që lojtari të jetë riaftësuar për derbin e javës së ardhshme me Tiranën. Ndërkohë, mungesa e vetme në stërvitjen e djeshme të Dinamos ka qenë ajo e portierit Ilion Lika, i cili është grumbulluar me ekipit tonë kombëtar për miqësoren me Portugalinë.


Fatjon RUPI 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

LUSHNJA

Me gjithë ultimatumet e stafit presidencial për pikë të plota, "lagunarët" kanë marrë dy barazime

Lushnja, vetëm 2 pikë në "javët e sulmit"

Dy javët e kampionatit kombëtar të futbollit në Grupin A1, që u mbyllën pardje, kanë qenë "javët e sulmit" për skuadrën lushnjare. Kjo, pasi drejtuesit e lartë të klubit dhe stafi presidencial, pas humbjes me Besën, dhanë ultimatum për verdhejeshilët: në ballafaqimet me Dinamon dhe Shkumbinin të merrnin me çdo kusht dy fitore, pra 6 pikë. Mirëpo nuk ka ndodhur aspak kështu. Brenda harkut kohor të katër ditëve, "lagunarët" kanë regjistruar 2 barazime pa gola. Nëse barazimi i së shtunës së kaluar, në "Selman Stërmasi", ndaj Dinamos së fortë, është vlerësuar sukses për Lushnjën, ai i arritur në Berat, ndaj Shkumbinit, të mërkurën, është konsideruar një dështim i plotë. Skuadra peqinase, që nuk e kishte provuar shijen e pikës në 6 javët e para të këtij kampionati, arriti t'ia shkëpuste atë Lushnjës, duke vërtetuar në njëfarë mënyre se, në gjendjen ku ndodhet, nuk është pa "shokë". Ç'është më e keqja, për këtë situatë jo të mirë te Lushnja, nuk po ndahen përgjegjësitë dhe nuk gjenden rrugët për daljen nga kjo rrugë pa krye. Në fakt, lushnjarët e kanë dominuar totalisht ndeshjen me Shkumbinin, por kjo nuk ka mjaftuar. Tifozerinë lushnjare po e habit çdo ditë e më shumë fakti që trajneri Cikleanu gjen kurajo t'i bëjë elozhe ekipit që drejton, në një kohë që rezultatet janë mjaft negative, pa folur këtu për shterpësinë e golave. Po ç'thonë vetë futbollistët lushnjarë për këtë situatë? Blerim Hasalla, njëri prej titullarëve të ekipit, shprehet: "Përpara ndeshjes me Shkumbinin, askush prej nesh nuk e ka çuar ndër mend një rezultat të tillë. E kishim vlerësuar në maksimum këtë ndeshje, sepse kërkonim të merrnim maksimumin e pikëve dhe të shënonim sa më shumë gola. Gjithashtu, nisur edhe nga morali i lartë i skuadrës, pas barazimit me Dinamon, mendonim se 3-pikëshi me Shkumbinin do të ishte i padiskutueshëm dhe do të na i forconte disi pozitat në renditje. Mirëpo nuk arritëm asnjë prej këtyre synimeve, por pësuam një zhgënjim të plotë." Më tej, mëngjarashi i Lushnjës, duke komentuar ndeshjen me Shkumbinin, shton: "Luajtëm në presing ndaj kundërshtarit dhe duhet ta kishim fituar patjetër këtë sfidë. Mirëpo çaluam shumë në organizimin e aksioneve të rrjedhshme. Nuk po e gjejmë dot "ilaçin" e shënimit të golit, edhe pse në këtë drejtim po punohet shumë, si me sulmuesit, ashtu edhe me mesfushorët." Njëkohësisht, Hasalla mendon se mungesa e sulmuesit Kornea ndikoi jo pak në funksionimin e sulmit lushnjar në këtë ndeshje. Një pengesë tejtër, sipas Hasallës, për mosarritjen e fitores, ishte edhe moti i keq, që krijoi një terren mjaft të rënduar me baltë e shi.

Pëllumb Peci 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

TIRANA :

Presidenti bardheblu analizon situatën në skuadrën e tij dhe tregohet i ashpër me krerët e FSHF-së

El Sajed: Tirana vuan mendjemadhësinë

"Nuk ka asnjë dyshim që pjesën më të madhe të fajit në dy humbjet e Tiranës e kanë vetë futbollistët." Ky është mendimi i presidentit egjiptian Metuali El Sajed, i cili ndihet tejet i shqetësuar për ecurinë e fundit të skuadrës së tij. Sipas tij, lojtarët po vuajnë mendjemadhësinë e sukseseve të arritura në sezonin e kaluar dhe po bëjnë shumë gabime në mbrojtje. Për humbjen me Teutën, egjiptiani një pjesë të fajit ia adreson gjyqtarit Guzja, i cili, sipas tij, bëri shumë gabime. Ndërkohë, në fund të deklarimit të tij, El Sajedi është i bindur se Tirana do të dalë nga kjo gjendje e vështirë momentale, duke filluar nga derbi i ardhshëm me Dinamon.
- Zoti president, më shumë se çdokush tjetër në skuadër, tifozët e Tiranës, pas dy humbjeve të fundit, kërkojnë të dëgjojnë fjalën tuaj...
- Edhe unë e ndaj shqetësimin tim me tifozët bardheblu për dy humbjet e fundit me Partizanin dhe Teutën brenda në "Qemal Stafa". Është për të ardhur keq dhe akoma nuk po u besoj syve sesi i kemi lënë këto gjashtë pikë të na ikin nga duart. Skuadra po kalon një moment të vështirë dhe kjo duket shumë mirë dhe nga loja që ajo po zhvillon sidomos në tri javët e fundit.
- Konkretisht, çfarë mendoni se nuk shkon ashtu si duhet brenda ekipit?
- Për mendimin tim, janë disa probleme, të cilat e kanë sjellë Tiranën në këtë gjendje. Kryesore është se Tirana vuan mendjemadhësinë e sukseseve. Sezonin që kaloi, ne u shpallëm kampionë të vendit me diferencë pikësh nga kundërshtarët. Kaluam një tur paraeliminator në Ligën e Kampioneve, si dhe e nisëm edicionin e ri me 5 fitore të thella. Kjo solli edhe njëfarë euforie te lojtarët, të cilët edhe me ndihmën e medias, por edhe ndoshta me një stërvitje pa përkushtim, pretenduan se janë vërtet të pathyeshëm. Koha tregoi që nuk është ashtu. Nëse nuk e vlerëson si duhet kundërshtarin, ndëshkohesh si në rastin konkret. Problem tjetër, i cili mendoj se është pjesë e zhgënjimit të tanishëm, është edhe fakti që skuadra mund të ndiejë njëfarë lodhjeje. Sapo u shpallëm kampionë, lojtarët bënë vetëm disa ditë pushim dhe në muajin qershor nisëm fazën përgatitore në Hungari, për takimet evropiane. Për katër muaj rresht kemi qenë në formë të shkëlqyer, ndërkohë që tani po përjetojmë një rënie. Së fundmi, dua të them se probleme kemi shfaqur në prapavijë, ku po pësojmë gol nga çdo pozicion. Ndoshta po vuajmë mungesën e kapitenit Nevil Dede të dëmtuar, i cili është zemra e Tiranës, për vetë shpirtin e lartë të garës që vë në fushë.
- Duke analizuar humbjen me durrsakët, kujt ia vini pjesën më të madhe të fajit?
- Për mua, pjesa më e madhe e fajit bie mbi lojtarët. Janë ata shkaktarët kryesorë të kësaj gjendjeje anormale që po kalojmë.
- Kjo do të thotë se rrugëzgjidhja më e drejtë për t'i ndëshkuar ata është vënia e gjobave, si këto dy të fundit, prej më shumë se 1 mijë dollarë?
- Për mua, kjo praktikë është më se normale. Unë kam 25 vjet që jetoj me futbollin dhe e di shumë mirë që, nëse lojtarit i cënohet ana financiare, atij nuk i vjen mirë dhe në një farë mënyre zgjohet nga gjumi. Asnjërit prej tyre të mos i vijë keq për këto gjoba, pasi unë kam shpenzuar shifra marramendëse për t'i afruar ata në skuadër dhe për çdo fitore e kanë marrë premion e parashikuar në kontratë.
- Në lidhje me gjykimin, a do të kishit ndonjë koment?
- Sigurisht. Ndaj Teutës vura re një gjykim tendencioz të gjyqtarit Lulëzim Guzja. Ai nuk ishte në gjendje të mbante ritmin e takimit, duke na ndëshkuar me një penallti të paqenë që në minutat e para dhe nxori nga loja me karton të kuq një prej lojtarëve tanë. Guzja e ka drejtuar disa herë Tiranën dhe asnjëherë nuk ka qenë në nivelin e duhur. Për mua, ai është një gjyqtar i dështuar dhe, më këtë rast, u bëj thirrje drejtuesve të FSHF-së të mos lejojnë të drejtojë skuadrën time asnjë gjyqtar pa stemë ndërkombëtare. Nuk pranoj kurrsesi që të tilla gabime të drejtuesve të futbollit shqiptar të ndodhin me ekipin tim.
- Mendoni se Tirana do të ketë forca të dalë nga ky moment i errët që po kalon dhe cili duhet të jetë "ilaçi" i duhur?
- As që diskutohet. Nuk është hera e parë që na ndodh një gjë e tillë dhe ne gjithmonë kemi gjetur forca për ta rimarrë veten. Çdo skuadër mund të përjetojë një moment të vështirë dhe Tirana ka treguar forcë dhe karakter për t'u kthyer në normalitet. Falë Zotit, këto probleme që na lindën tashmë janë vetëm në fillim të sezonit dhe ne do të kemi rastin tonë, që në 29 javët e mbetura të tregojmë se jemi kampionë në fuqi dhe nuk dorëzohemi kollaj. Ditët e pushimit që kemi në dispozicion, si rrjedhojë e ndeshjeve të kombëtares, do të na shërbejnë për t'u ngritur fizikisht, por edhe psikologjikisht. Unë jam i bindur se kthesa e madhe do të vijë në derbin e radhës, me Dinamon. Kini vetëm durim.

Aurel CELIBASHI 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Mema, i besuari i presidentit

Një shprehje të tillë e ka thënë në momentin kur e ka emëruar trajner të skuadrës dhe vazhdon ta përsërisë, edhe pse skuadra ka humbur me dy rivalë të drejtpërdrejtë në luftën për titull. Presidenti bardheblu El Sajed nuk ia adreson fajin e humbjeve të fundit të Tiranës trajnerit Sulejman Mema, por lojtarëve të tij. Sipas egjiptiani, Mema është një nga trajnerët më të mirë në Shqipëri dhe do të qendrojë në krye të skuadrës derisa ai të jetë president. "Sulejman Mema është i besuari im. Për mua, ai është një nga trajnerët më të zot që ka futbolli shqiptar dhe, për aq kohë sa unë do jem në krye të skuadrës, ai do të jetë teknik i Tiranës. Dy humbjet e fundit në kampionat nuk janë për faj të tij, por të lojtarëve, të cilët nuk zbatuan me korrektësi udhëzimet e duhura,"- thotë njëshi i klubit bardheblu, Metuali El Sajed.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Presidenti: Klodian Duro s'është më i mirë se Ervin Bulku

"Klodian Duro nuk është më i mirë se Ervin Bulku." Ky ka qenë deklarimi i presidentit El Sajed në lidhje me eurogolin e shënuar nga elbasanasi në derbin Partizani-Tirana. I pyetur nga "Sporti shqiptar" nëse i ka mbetur merak që nuk mundi dot ta afronte në skuadër një prej lojtarëve të kombëtares, siç është Duro, El Sajedi përgjigjet: "S'ka pse të më mbetet merak një gjë e tillë. Duro nuk është kurrsesi më i mirë se kapiteni i Shpresës, Ervin Bulku, që ne kemi në skuadër. Në derbin me Partizanin, përveç një goli të bukur, ai nuk bëri asgjë. Nëse Duro do të ishte një lojtar kaq i mirë, siç mendoni ju, nuk do vinte të luante në kampionatin shqiptar, por do të qëndronte në Turqi,"- deklaron presidenti.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

BESA :

Mbrojtësi kavajas analizon lojën e dobët të ekipit ndaj kuqebluve

Doka: Të gjithë gabuam ndaj Vllaznisë

Askush nuk e kishte menduar, të paktën para takimit, një humbje të Besës në fushën e saj, ndaj Vllaznisë. Edhe më skeptikët, në parashikimet e tyre, shkonin deri te barazimi, nisur nga dy fitoret e kavajasve në trasfertë. Mirëpo loja që zhvilloi Besa ndaj Vllaznisë nuk la shteg për asnjëlloj rezultati tjetër, veç humbjes. Mbrojtja, reparti i cilësuar më i miri në javët e fundit, në këtë takim iu bashkua lojës së dobët të të gjithë ekipit. Indrit Doka, njëri ndër mbrojtësit më me eksperiencë në radhët e Besës, shprehet kështu për humbjen e së mërkurës: "Ishte një takim që duhet harruar sa më shpejt. Për mua, takimi me Vllazninë është më i dobëti në këtë fillimkampionati, përjashto atë ndaj Tiranës. Defekti ynë kryesor në këtë takim ishte mesfusha e, për pasojë, e gjithë barra e lojës i binte mbrojtjes. Ndryshe nga takimet e tjera, edhe forcat e krahut nuk sulmuan, por i lejuan kundërshtarët shkodranë të vinin lehtësisht deri te hundët e portierit. Gjithashtu, loja e Besës çaloi këtë radhë edhe në drejtim të sulmit. Vllaznia ishte takimi i 7-të radhazi që Kapllani nuk shënon, por mund të quhet pa frikë njeriu i rasteve të humbura. Ashtu si me Lushnjën dhe Flamurtarin, edhe ndaj Vllaznisë, atij iu paraqitën dy raste të pastra shënimi. Nëse do të shënonte, punët do të rridhnin krejt ndryshe për skuadrën tonë."
Në fakt, "thembra e Akilit", për të gjithë të pranishmit në stadium, ishte pa dyshim loja thuajse amatoreske e mesfushës kavajase. Dihet se Besës i mungon një organizator i mirëfilltë, por ndaj Vllaznisë të gjithë mesfushorët jo vetëm nuk organizonin, por silleshin në mesfushë sikur të mos u interesonte fare loja. Përkundër tyre, Cungu e Sinani u bënë zotër të lojës dhe nuk e patën të vështirë, sidomos Sinani, të shfaqej edhe si sulmues krahu, apo përballë zonës së rreptësisë së Besës. I vetmi lojtar që luajti me gjithë shpirt ishte Kuli. Mirëpo edhe ky, sapo merrte topin, gjendej nën mbulimin e dy apo tre lojtarëve të Vllaznisë. Me mbulimin e Kulit, Vllaznia arriti të shmangte burimin kryesor të rrezikut kavajas portën e Grimës. Përfundimisht, Besa humbi një takim të radhës, por, nga mënyra sesi humbi, la një shije tepër të hidhur. Në radhë janë dy takime tepër të vështira ndaj kryesuesve, Partizanit dhe Teutës. Humbja ndaj Vllaznisë ka "djegur" më shumë se ç'mendohej.

Feriz Ferizaj 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.