Beratasit fitojnë thellë 4-1 ndaj shijakasve
Tomori, "leksion" golash Erzenit

Tomori ka shënuar plot katër gola dhe ka marrë 3 pikë të vlefshme duke mposhtur skuadrën e Erzenit, e cila mbetet në kuotën e 1 pike. Ishte një fitore e merituar, pasi Tomori e kërkoi golin që në minutat e para me anë të lojtarit "gol", Klodian Arbrit, dhe 18- vjeçarit Mile. Mesfusha punoi shumë për sulmin ku regjisor ishte Gjata, i mbështetur mirë nga i palodhuri Iljazi. Deri në minutën e 20-të loja e të dy skuadrave u përqendrua në mbrojtje, derisa do të vinte minuta e 32-të e pjesës së parë, kur sulmuesi beratas Arbri, pasi përfiton nga një rreshtim i gabuar i mbrojtjes shijakase, nuk fal, duke shënuar në krahun e majtë të portierit Paja. Me rezultatin 1-0 për Tomorin skuadra shkojnë në dhomat e zhveshjes. Pjesën e dytë Erzeni e nisi me dy ndërrime të detyruara. Karapici dhe Kamberi ia lenë vendin Deliallisit dhe Sherës, gjë që solli ndryshime edhe në rreshtimin e lojtarëve. Gjithsesi, në këtë pjesë Tomori dominoi plotësisht duke lëvizur sa në mesfushë, aq edhe në sulm, ku Arbri dhe Mile u shfaqën rrezikshëm para portës mike. Erzeni punoi pak në sulm dhe rrallë u shfaq para portës së Duros. Në minutën e 53-të, Keçi rrezikon seriozisht, por Duro shpëton portën. Topi i grushtuar prej tij shkon në drejtim të Arbrit, i cili shpërthen në krahun e djathtë, shmang portierin duke e kaluar topin për të dytën herë në rrjetë. Vetëm pas një minute dhe Deliallisi kundërpërgjigjet me një eurogol nga një distancë rreth 20 metra. Ndërkohë që shijakasit kërkonin golin e barazimit, Gjata ndërmerr një aksion personal, futet para zonës, Paja ndërhyn në mënyrë të gabuar dhe detyrohet të lerë fushën e lojës me kartonin e kuq. Gjyla bën ndërrim tjetër të detyruar, largon sulmuesin Keçi dhe fut portierin Varoshi. Për 39 minuta Erzeni detyrohet të luajë me dhjetë lojtarë. Nga kjo epërsi përfituan djemtë e Arbrit, të cilët shënuan edhe dy gola të tjerë në minutën e 70-të, Arbri dhe në minutën e 83-të Mile realizon nga një eurogol cecili me goditje fluturimthi me të majtën. Përfundimisht Tomori rikthehet te goli dhe fitorja, ndërkohë që Erzeni mbetet në kuotën e 1 pike në fund të tabelës së renditjes.

Opinione
Theodhori Arbri, trajner i Tomorit:
"Luajtëm më mirë se kundërshtari. E rëndësishme është që u rikthyem te goli dhe fitorja. Tani mund të them se kthesa ka filluar. Kemi marrë një 3-pikësh të vlefshëm dhe kemi zhvilluar një ndeshje të mirë."
Ilir Gjyla, trajner i Erzenit:
"Ekipi ka mungesa të shumta si në përbërje, ashtu edhe në përgatitje. Na dëmtuan shumë daljet e detyruara të Karapicit dhe Kamberit. Kemi shumë për të bërë. Tomori e meritoi fitoren. Unë i uroj sukses."

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

MINUTE PAS MINUTI NDESHJET E 14 GUSHTIT

Pse u dyshua për ndeshjet e shitura
Përballë Dinamos një ekip modest belg


Të gjithë jemi dëshmitarë të atyre humbjeve skandaloze të skuadrave shqiptare në turin e parë paraeliminator të Kupës UEFA. Dinamo, fituese e Kupës së Shqipërisë dhe një nga skuadrat më dinjitoze të kampionatit kombëtar, humbet me katër gola disavantazh në stadiumin "Qemal Stafa" përballë ekipit belg të Lokerenit, i cili merrte pjesë për herë të parë në një aktivitet europian kaq të rëndësishëm. Fitorja 4-0 në Shqipëri e belgëve habiti të gjithë, por më shumë u habitën specialistët e futbollit, sepse të gjithë pas asaj ndeshjeje deklaruan: Dinamo sikur e la vetë ndeshjen. Dhe në fakt ashtu dukej, pasi futbollistëve shqiptarë u mungonte dëshira për të shënuar.DinamoKa qenë data 14 gusht kur është zhvilluar takimi i parë në Tiranë. Ndoshta ekipi belg mund të ishte kualifikuar njësoj për në turin pasardhës, por mënyra e marrjes së fitores në Tiranë linte shumë për të dëshiruar. Ndeshja e kthimit në Belgjikë (më 28 gusht)ishte thjesht një shëtitje për belgët, ku ata fitojnë 2-1. Në ndeshjen e zhvilluar në "Qemal Stafa" Dinamo pëson tre gola që në pjesën e parë. Që në minutën 18 shënon De Beule, ndërsa më pas, në të '40 shënon Baldvinson dhe në të '45 sërish shënon Van Hoeyland. Ky ka qenë dhe goli i turpit, pasi topi është mbajtur gjatë në zonë nga blutë (sikur donin të shënonin në portën vet). Pjesa e dytë nuk ka ndryshuar asgjë për tanët. Kur pritej një reagim i Dinamos është sërish Lokereni që shënon (minuta e 55-të, sërish De Beule). Blutë e kryeqytetit nuk kanë bërë asnjë përpjekje, qoftë për të shënuar një gol nderi. Lojë kishte plot dhe mund të shënoheshin edhe 2-3 gola, pasi ishte edhe një takim i kthimit për të vendosur kualifikimin për më tej. Por nga pamja e jashtme dukej se Dinamo donte që takimi të përfundonte kështu, madje kanë qenë sërish belgët që kërkonin fitoren.VllazniaDisi më ndryshe kanë rrjedhë ngjarjet në stadiumin "Loro Boriçi" të Shkodrës po atë ditë më 14 gusht. Vllaznia përballej me ekipin skocez të Dandit dhe kundërshtari i kuqebluve ishte vërtet më serioz. Ekipi i Vllaznisë vinte nga një krizë e gjatë, por gjithsesi humbja 2-0 përballë publikut të zjartë ishte e pafalshme. Miqtë shënojnë golin e parë që në minutën e 20-të të pjesës së parë (shënon Nemsadze), ndërsa golin e dytë e shënojnë që në fillim të pjesës së dytë. Reagimi i shkodranëve ka qenë më i madh krahasuar me ndeshjen e Dinamos, pasi vetëm fati i ka shpëtuar skocezët nga dy rastet e pastra të shënimit (Mancaku godet shtyllën). Vllaznia e humb edhe ndeshjen e dytë në Skoci me rezultatin 4-0.Në Shqipëri ushtrojnë aktivitetin 6 kompani basteshSi fitohen milionat me kompanitë e basteveTë luash bast është parashikimi i një ndeshjeje apo i shumë i ndeshjeve, por mund të luhet bast edhe me numrin e golave që shënohet në një ndeshje, apo në diferencën e golave që mund të shënojë njëra skuadër më shumë se tjetra. Për çdo ndeshje apo kuotë golash vendoset një koeficient, i cili shpeshherë vendoset duke parë nivelet e skuadrave dhe pozicionin që zënë ato në renditjen e kampionatit. Mund të vendoset bast edhe me përfundimin e pjesëve të para dhe të gjithë ndeshjes. Ka edhe bast tek, për të cilin vendoset një shumë më e madhe lekësh dhe ndeshja zgjidhet nga kompania e basteve me skuadra të një niveli të barabartë. Në Shqipëri ka disa kompani bastesh, të cilat i marrin koeficientët e ndeshjeve (me pak ndryshime) apo të golave nga kompanitë europiane të basteve. Eurolloto, Eurobast, Eurobet, Probast, ASG, Llotomania apo edhe ndonjë tjetër janë kompanitë më të përhapura në Shqipëri, të cilat çdo ditë presin baste nga shqiptarët. Ndeshjet që mund të parashikohen kanë një koeficient shumë të vogël (nga 1,1 deri në 1,4). Koeficientët shumëzohen ndërmjet tyre dhe në fund shumëzohen me shumën e lekëve që vendoset bast.

Eduard Ilnica ''Gazeta Shqiptare''

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Sekretari Lluca dhe dy trajnerët Deliu dhe Gjata japin dorëheqjen

Shkumbini, skuadra pa drejtues

Humbja e fundit e Shkumbinit me Besën, e pësuar në fushën e vet me rezultatin 1-2, ishte e 6-të në gjashtë javë kampionat për ekipin bardhekaltër. Në këtë situatë, drejtuesit e klubit dhe të ekipit e shohin më e arsyeshme që të japin dorëheqjen. Kjo gjë bëhet e ditur për "Sportin shqiptar" nga sekretari i klubit, Naim LLuca. Ky i fundit mendon se me këtë veprim i jepet mundësi dhe shanse ekipit që të ecë më përpara. "Pas humbjes me Besën në fushën tonë, që ishte e 6-ta radhazi në këtë kampionat, bashkë me trajnerin Deliu dhe zëvendësin e tij Gjata vendosëm të japim dorëheqjen. Kjo bëhet për t'i dhënë mundësi ekipit të dalë nga kjo gjendje e keqe e të ndryshojë në të ardhmen. Ndoshta largimi ynë do të ndikojë për mirë. Bashkë me trajnerin Deliu, në këtë situtatë të vështirë, kur ekipi ka qenë pa mbështetje dhe pa president, jemi përpjekur dhe kemi bërë gjithçka për t'i mbajtur futbollistët në pozitat që duhet. Por janë rezultatet jo të mira ato që na detyrojnë të hedhim këtë hap në të mirë të ekipit e të futbollit peqinas," - deklaron sekretari Lluca. Sipas Llucës, ky vendim u mor bashkë me Deliun, por drejtuesit peqinas mendojnë të qëndrojnë në krye të klubit dhe të ekipit përderisa pushteti vendor të marrë masat për zëvendësimin tyre. Kjo me argumentin që të mos lejohet shpërbërja e ekipit në këto momente të vështira.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Trajneri i Partizanit thekson se e shtuna duhet harruar, sepse përpara është sfida me Flamurtarin

Spahiu: E "çarmatosëm" Tiranën

Tifozët e zjarrtë të Partizanit kanë të drejtë të gëzohen më fund, pasi të shtunën të kuqtë jo vetëm e fituan ndeshjen me rezultatin 3-1 ndaj rivales kryesore për titull, Tiranës, por e mposhtën nga të gjitha drejtimet. Për tifozët e Partizanit, fitoret ndaj Tiranës nuk kanë të njëjtën vlerë me të tjerat, pasi mbahen mend gjatë në memorien e tyre për vetë pozitat që kanë këto dy skuadra në kampionatin tonë. Sidoqoftë, Partizani, me këtë fitore, është ngjitur në kuotën e 14 pikëve, vetëm 1 pikë larg Tiranës. Ndonëse në derbin e parë të këtij sezoni ekipi i Spahiut u ka dhënë një leksion të mirë bardhebluve, trajneri i Partizanit, modest në natyrën e tij, shprehet se ekipi nuk është ende në vend të parë, aq më tepër që kampionati ka edhe 30 javë deri në fund. "Partizani synon titullin kampion, ndaj edhe fitorja erdhi si pasojë e punës së deritanishme. Megjithatë, ekipi nuk duhet të mbytet nga euforia, por t'i përkushtohet ndeshjes tjetër me Flamurtarin. Në një intervistë për "Sportin shqiptar", Spahiu thekson:
- Partizani e ka fituar derbin, por besoj se më shumë jeni i kënaqur që ka bindur edhe me lojë, apo jo?
- Patjetër. E rëndësishme për mua është që ekipi tregoi deri në fund të ndeshjes dëshirë dhe vullnet për të luajtur futboll. Synimi ynë, siç e kishim shprehur edhe para derbit, ishte fitorja, pasi vetëm kështu mund ta ndalnim Tiranën kryesuese. Partizani, ndonëse e nisi lojën në disavantazh të një goli, që e pësuam në sekondat e para, ishte në gjendje që ta ndryshonte rrjedhën e lojës dhe të fitonte bindshëm derbin. Kjo fitore mua personalisht më ka dhënë më shumë kurajo dhe siguri për vazhdimin e kampionatit.
- Cili është komenti juaj për lojën e Klodian Duros?
- Duro është një ndër lojtarët më ta mirë që ka futbolli ynë dhe, natyrisht, pika kyçe e skuadrës së Partizanit, ndaj dhe te goli i parë e gjithë merita ishte e tij. Por të shtunën mendoj se ka fituar e tërë skuadra jonë, e cila luajti mirë. Lojtarët i zbatuan përgjithësisht detyrat që kisha caktuar në fillim të ndeshjes. Kështu, duhet përmendur loja e mirë e Beharit nga krahu, që jo vetëm ishte i saktë në mbrojtje, por edhe protagonist në dy golat e tjerë. Gjithashtu, Beqiri ka qenë i palodhur gjatë gjithë ndeshjes, duke punuar shumë në krahun e tij. Madje edhe sulmuesit, Abilio dhe Muzaka, luajtën sa në sulm, aq edhe në mbrojtje. Pra, ishte një skuadër e ****kuar më së miri për të fituar ndeshjen ndaj Tiranës.
- Gjatë javëve të para, Partizani ka pasur defekte në lojë. Po pas derbit me Tiranën a ju mbetet gjë për të korrigjuar?
- Sigurisht. Një trajner gjithmonë e sheh kur loja e ekipit ka të meta në fushë dhe asnjëherë nuk është perfekte. Kështu, edhe ndaj Tiranës, ndonëse jo në atë masë sa në pesë ndeshjet e tjera, ekipi nxori në pah disa të meta, që duhen korrigjuar sa më shpejt.
- Partizani ka ndalur Tiranën. Si e shikoni të ardhmen e kampionatit, të paktën për fazën e parë?
- Unë mund të flas për Partizanin. Ne vërtet e fituam ndeshjen kryesore të fazës së parë, por nuk duhet të mbytemi nga euforia, sepse mund ta pësojmë në ndeshjet e tjera. Kampionati është shumë i gjatë dhe tani nuk mund të diskutohet fare titulli kampion. Përveç Teutës, që ndodhet pranë nesh, kam mendimin se edhe Dinamoja do të ngrihet në ndeshjet e tjera.
- Përpara keni Flamurtarin...
- E di. Duke filluar që sot, do të mendojmë vetëm për Flamurtarin, pasi Tirana ka kaluar tashmë. Nuk kemi fituar asnjë ndeshje deri tani në trasfertë, kështu që duhet të rregullojmë shumë gjëra për javën e shtatë.
Aranit MURAÇI 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Të kuqtë, sot rikthehen në fushë

Pas fitores së arritur të shtunën ndaj Tiranës, ekipi i Partizanit pritet të fillojë sot stërvitjen me intensitet të plotë, pasi të mërkurën të kuqtë do të luajnë ndaj Flamurtarit të Vlorës. Sot, pasi të bëjnë pjesën e teorisë, ekipi i Spahiut do të zhvillojë seancën e parë stërvitore për këtë javë. Sipas trajnerit të Partizanit, koha nuk mjafton, ndaj ekipi duhet të punojë me qëllim që të vazhdojë ecurinë pozitive të ndeshjeve edhe në javët në vijim. Për takimet në trasfertë, si kjo e ndeshjes së radhës, trajneri i të kuqve u shpreh me rezerva për terrenin, duke theksuar se është faktori kryesor që e pengon ekipin e tij për të dalë në lojën e parashikuar. Edhe në takimin e radhës, Partizani nuk do të jetë i kuzhtëzuar me mungesat e lojtarëve.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Tekniku bardheblu komenton humbjen shkatërruese 3-1 të skuadrës së tij ndaj rivalëve të kuq

Mema: Të paktën jo me Partizanin

Më shumë se çdokush tjetër në skuadrën e Tiranës, peshën e humbjes në derbi e ndien trajneri i kampionëve, Sulejman Mema. E ndien veten të tradhtuar nga ajo çfarë të besuarit e tij dhuruan në fushë gjatë 90 minutave me Partizanin, megjithatë nuk dorëzohet. Edhe pse është e vështirë të komentosh disfata të tilla në derbi, Mema, si një profesionist i vërtetë, ka pasur kurajon të flasë dhe të vërë në dukje dobësitë e djemve të tij. Sipas Memës, humbja erdhi si rrjedhojë e një loje pa karakter dhe ide e të gjithë futbollistëve që u aktivizuan. "Ndeshja me Partizanin ka qenë më e dobëta që ekipi im ka zhvilluar deri tani. Të gjithë futbollistët zhvilluan një lojë pa karakter, një cilësi që Tirana e ka pjesë të strategjisë së saj. Normalisht, kur je i pamotivuar dhe luan një futboll demode, rezultati është i pritshëm,"- shprehet njëshi i stolit bardheblu. Duke bërë një radiografi të minutave të luajtura, Sulejman Mema thotë: "Takimin e nisëm mirë, kur që në sekondat e para të lojës e gjetëm rrugën e golit. Kjo solli njëfarë euforie në lojën tonë dhe, si pasojë, lëshuam shumë në mesfushë dhe në mbrojtje. Lojtarët e Partizanit nuk u dorëzuan dhe filluan gradualisht të merrnin frenat e lojës, duke fituar pjesën më të madhe të dyluftimeve. Qe e pabesueshme t'i shikoje ato gabime që bënin futbollistët e mi. Këtu nuk e kam fjalën vetëm për portierin, por të gjithë skuadrën në tërësi. Dolëm tërësisht nga detyrat që u dhashë djemve para fillimit dhe në mes të ndeshjes. Kjo solli një shkëputje të reparteve nga njëri-tjetri dhe sulmuesit ishin larg portës,"- vazhdon në idenë e tij trajneri bardheblu. Në lidhje me zëvendësimet e kryera, Mema pranon që edhe ato nuk rezultuan të suksesshme. "Me zëvendësimet e kryera, u mundova t'i jepja një impuls të ri lojës, por sërish qe e pamundur." Po Prenga? "E aktivizova Sokolin për vetë mënyrën e lojës dhe pasimet e sakta që ai di të japë. Ndërkohë, rrezikova gjithçka kur lashë në fushë katër sulmues, pasi nuk kishim çfarë të humbisnim,"- bën të ditur trajneri i 20 herë kampionëve. Ndërkohë, për kundërshtarin, Sulejman Mema shpreh fjalët më të mira, kur deklaron: "Partizani e meritoi fitoren, pasi në lojën e tij ishte më i fortë, më i motivuar dhe i saktë njëkohësisht."
Në fund të komentit të tij, ai thotë se i vjen shumë keq për humbjen e pësuar nga rivalët historikë të Partizanit dhe falënderon tifozët bardheblu për mbështetjen që i dhanë skuadrës në shkallët e stadiumit. "Ajo që më vjen keq, është fakti se të paktën nuk duhet të kishim humbur me Partizanin. Dihet që të kuqtë janë rivalët tanë historikë dhe humbje të tilla lënë pas një shije më të hidhur. Gjithsesi, së bashku me tifozët, nuk duhet të dorëzohemi në asnjë mënyrë këtu, duke menduar për ndeshjen e radhës ndaj Teutës, që e kemi në prag. Nuk ka kohë dhe duhet medoemos të korrigjojmë gabimet e bëra, që të mërkurën ta lëmë pas imazhin e keq që krijuam me Partizanin,"- i ka dhënë fund deklarimit të tij trajneri i suksesshëm, Sulejman Mema.
Aurel CELIBASHI 'SPORTI SHQIPTAR'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Kampionët, flamuri bardheblu në "gjysmështizë"
Hidhërimi në kampin bardheblu pas humbjes të së shtunës me Partizanin është i madh. Jo vetëm për faktin se u humbën tri pikë të radhës, por sepse është e vështirë të pranohet realiteti që të humbasësh një derbi me një rival historik. Rezultati 3-1 në disfavor është shumë për një Tiranë, e cila në këtë kampionat lufton me petkun e kampiones. Lojtarët bardheblu kanë zhgënjyer jo vetëm veten e tyre, por edhe atë tifozeri të zjarrtë që kishte mbushur shkallët e stadiumit. Javë për javë, trajneri Mema e kishte vënë theksin e tij në nënvleftësimin dhe lojën me shumë gabime që bënin djemtë e tij. Megjithatë, Tirana vazhdonte të fitonte, edhe pse në disa momente (me Shkumbinin dhe Vllazninë) sharra në një moment i ngeli në gozhdë. Dy ndeshjet e fundit ishin paralajmëruese për kampionët, se diçka nuk po shkon si duhet në skuadër, sidomos në mbrojtje. Kambanat e alarmit kishin rënë disa herë, por bardheblutë vazhdonin të qëndronin stoikë në idenë e tyre se janë të pamposhtur këtë sezon. Ata harruan që Partizani (me ardhjen e Duros) nuk është më një rival si të gjithë të tjerët dhe çdo gjë e morën lehtë në këtë derbi të dytë të sezonit, pas atij me Dinamon në Superkupë. Dhe goditja erdhi, madje e fuqishme. Normalisht, flamuri bardheblu për kampionët në këto momente është në "gjysmështizë". Është e vështirë që prej lojtarëve të nxjerrësh të paktën një fjalë. Gjithsesi, kjo nuk do të thotë se çdo gjë ka përfunduar me kaq. Është luajtur vetëm java e gjashtë dhe janë akoma edhe 30 të tjera. Bardheblutë humbën një betejë, por jo luftën. Më mirë se kushdo tjetër, ata do të dinë ta rimarrin veten edhe pas kësaj humbjeje. Dhe Teuta, të mërkurën pasdite, mendohet që do të jetë pika e kthesës për 20 herë kampionët.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Trajneri i durrsakëve ka mbetur i kënaqur nga loja e të tijve ndaj portokallinjve

Lika: Elbasani, fitore e merituar

Fitorja e Teutës ndaj ekipit të Elbasanit të shtunën që kaloi, i ka forcuar pozitat kryesuese të durrsakëve. Tashmë ata e shikojnë veten vetëm 1 pikë pas kryesueses së kampionatit, Tiranës, dhe me pikë të barabarta me Partizanin. Në lidhje me fitoren më të fundit, trajneri i bregdetarëve, Hasan Lika, ka folur pak, sepse mendja e tij tashmë ka "fluturuar" te ndeshja e së mërkurës, në kryeqytet, ndaj Tiranës. Gjithsesi, për të dyja këto ballafaqime të afërta me njëra-tjetrën në kampionat, numri 1 i stolit të Teutës do të komentonte:
- Lika, a mbetët i kënaqur nga loja e skuadrës në ndeshjen e fituar pastër me Elbasanin?
- Sigurisht që po. Ne fituam edhe ndaj Lushnjës, por nuk luajtëm aq mirë sa me Elbasanin. Ndaj Elbasanit mendoj se kemi arritur një fitore të merituar. E filluam gjithçka mirë, krijuam raste për shënim, epërsi në lojë dhe, për pasojë, edhe shënuam golin e parë. Mirëpo, më pas, skuadra u tërhoq disi në gjysmëfushën e saj, çka i dha kurajo kundërshtarit, që mori frenat e lojës në dorë. Kjo solli edhe barazimin e përkohshëm të rezultatit të ndeshjes. Kemi vuajtur shumë në minutat e fundit të pjesës së parë, sepse na u dëmtua Tetova dhe Zëre. Me fillimin e pjesës së dytë, u detyruam të bëjmë ndryshime. Fatmirësisht, këto ndryshime na siguruan edhe suksesin. Në njëfarë mase, fitorja erdhi edhe si rezultat i gabimeve të kundërshtarit, por, mbi të gjitha, është meritë e skuadrës.
- Në momente të caktuara të ndeshjes me Elbasanin keni reaguar ashpër ndaj gjyqtarit. Kjo do të thotë se keni rezerva për gjykimin e Likjes?
- Jo, nuk mund ta them këtë. Megjithatë, mendoj se gjykimi nuk u ngrit në nivelin e ndeshjes. Unë jam dakord që gjyqtarë të tillë që kërkojnë të afirmohen, duhen përkrahur nga të gjithë, por ama mendoj se mund të bëhej një zgjedhje më e mirë për gjykimin e një ndeshjeje të tillë. Si ndaj nesh, ashtu edhe ndaj kundërshtarit, gjyqtari bëri disa gabime që rënduan psikollogjikisht mbi futbollistët.
- Në horizont duket ndeshja me Tiranën...
- Që tani (pas ndeshjes me Elbasanin) kam filluar të mendoj për Tiranën. Fatkeqësisht, dëmtimet e Zëres dhe Tetovës na e vështirësojnë punën për ndeshjen e ardhshme. Kam frikë se, si Zëre, ashtu edhe Tetova, nuk do të riaftësohen dot deri të mërkurën, ditën e ndeshjes me Tiranën.
- Me ç'pretendime shkoni në këtë ndeshje kyçe për vijueshmërinë pozitive të kampionatit?
- Tirana, pavarësisht se ka humbur ndaj Partizanit, ka vlera të padiskutueshme. Madje, dështimi në ndeshjen me të kuqtë do t'i detyrojë kampionët në fuqi të bëjnë autokritikë para sportdashësve të tyre. Prandaj, kjo ndeshje do të jetë tepër e vështirë për ne.
- A mendoni se Teuta ka avantazhe psikologjike, sepse vjen pas një fitoreje të pastër me Elbasanin, ndërkohë që kundërshtari pas humbjes shokuese me Partizanin?
- Jo, nuk mendoj kështu. Nuk duhet të nisemi nga fakte të tilla për ta gjykuar këtë ndeshje. Të tilla avantazhe psikologjike në dukje, kur ekzagjerohen, japin më tepër efekte negative. Tirana është një nga skuadrat më të mira të kampionatit shqiptar dhe kjo do të thotë shumë. Humbja e radhës në kampionat nuk do të thotë që Tirana është në vështirësi.
Llambi Kallço 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Talenti 19-vjeçar është kthyer në lojtarin kyç të momentit për kuqeblutë

Salihi: Po bëj vetëm detyrën

Vllaznia po rritet dita-ditës dhe, bashkë me rezultatet pozitive që po merr, po evidenton edhe disa futbollistë të rinj të talentuar e me perspektivë. Njëri prej tyre është edhe Hamdi Salihi, autori i dy golave në ndeshjen me Flamurtarin. Tashmë nuk bëhet më fjalë për ndonjë debutues dosido, por për një futbollist që po mban peshën kryesore të skuadrës së Vllaznisë. Nga Salihi, 19-vjeçari i talentuar i kuqebluve, janë kthyer sytë e të gjithë sportdashësve shkodranë, të cilët kërkojnë që Vllaznia e tyre të ngjitet atje ku i takon. Pavarësisht nga momenti i mirë që po kalon, Salihi, në fjalët e tij, tregohet tepër modest. Meritën për golat e shënuar ia dedikon tërë skuadrës. "Vërtet kam qenë unë ai që kam shënuar, por kjo nuk është vetëm meritë personale. Natyrisht, merita e golave të mi u takon edhe dy sulmuesve kryesorë të ekipit tonë, Sinanit dhe Martinit. Këta dy lojtarë me emër kanë qenë në qendër të vëmendjes së mbrojtjeve kundërshtare dhe, nga kjo, kam përfituar më shumë unë," ? ka thënë për "Sportin shqiptar" futbollisti i Vllaznisë, Hamdi Salihi. Forma sportive që po tregon ky lojtar i përfaqësueses Shpresa në javët e fundit është vërtet e admirueshme, po të merren parasysh problemet që ka kaluar Vllaznia muajt e verës. Sipas vetë futbollistit, kjo formë e mirë e tij vjen si rrjedhojë e punës që ka bërë në stërvitje dhe e ndihmës që i kanë dhënë shokët e skuadrës: "Forma e mirë sportive që gëzoj aktualisht ka ardhur si pasojë e punës së mirë që kam bërë gjatë fazës përgatitore, ndonëse skuadra kaloi mes shumë problemesh. Sidoqoftë, jam përpjekur të bëj më të mirën dhe besoj se tani po korr frytet e kësaj pune," - shton Salihi.
Hamdi Salihi është vetëm 19 vjeç. Ai është lojtari më i ri i formacionit kuqeblu, gjë e cila nuk e ka penguar aspak për të qenë lojtari kyç i momentit për Vllazninë. Ai është golashënuesi më i mirë i kuqebluve, me 3 gola të shënuar. Vetë Salihi deklaron se, për të, objektiv kryesor nuk është shtimi i numrit të golave, por arritja e rezultateve pozitive të skuadrës së tij. "Dëshira ime, natyrisht, është që ta ruaj këtë formë sportive. Për sa i takon shënimit të golave, nuk e vras shumë mendjen për numrin e tyre. Rëndësi ka fakti që Vllaznia të ecë përpara dhe të arrijë suksese," ? e ka mbyllur deklarimin e tij Salihi, futbollisti 19-vjeçar i kuqebluve.
Gjergj KOLA 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Drejtuesit dhe futbollistë vlonjatë i kërkojnë Federatës drejtësi në gjykime

Flamurtari: Na ndëshkoi gjyqtari

Flamurtari i Vlorës, skuadra me tradita në futbollin shqiptar, vazhdon të "përpëlitet" në fundin e tabelës së renditjes së Grupit A1. Humbja skualifikuese e mesjavës në kupë, duket se ka ndikuar në humbjen e qetësisë së duhur në kampin kuqezi. Me goditjen tjetër që mori nga Vllaznia në stadiumin "Loro Boriçi", Flamurtari vazhdon të notojë në ujëra të turbullta. Menjëherë pas përfundimit të ndeshjes, trajneri Ardi Bozhani është shprehur: "E kemi kontrolluar tërësisht pjesën e parë të ndeshjes, si në lojë, ashtu edhe në rezultat. Po ç'e do, gjatë gjithë lojës, gjyqtari, me veprimet e tij, na ka dëmtuar padrejtësisht. Si të mos mjaftonte kjo, në rastet e të dy golave, ne kemi goditur vetveten. Mbrojtësit tanë i kanë dhuruar Salihit dhe Sinanit asiste, të cilat nuk i kishin aspak të vështirë t'i kthenin në gol."
Sulmuesi kryesor i skuadrës, Anesti Vito, njëherësh edhe autor i golit të vetëm të kuqezinjve në "Loro Boriçi", duke folur për këtë humbje, edhe nga pozicioni i zëvendëstrajnerit, shprehet: "Skuadra jonë e kontrolloi më mirë lojën sesa kundërshtari. Madje mund dhe duhet të kishim shënuar gola të tjerë. Kur menduam se e kishim futur në "dorë" fitoren, u ndëshkuam në dy raste nga gabimet në pasime të mbrojtësit Diamanti. Për sa i përket golit të tretë, sulmuesi shkodran e ka prekur topin me dorë, pastaj e ka goditur për në rrjetën e portës sonë. Mirëpo gjyqtari nuk deshi ta shikonte këtë faull. Aq e dukshme ishte "gafa" e gjyqtarit Guzja, sa sportdashësit objektivë shkodranë kanë thërritur në kor: "Arbitri! Arbitri!" Sipas mendimit të lojtarëve dhe trajnerit vlonjat, skuadra e Flamurtarit ka zhvilluar një ndeshje me nivel të mirë jashtë fushës së saj, por, çuditërisht, është ndëshkuar nga gjyqtarët. Sa herë që skuadra luan jashtë fushës së saj, hyjmë me frikë në lojë, për arsye të njëanshmërisë së gjykimeve nga gjyqtarët. Në çdo dyluftim që kishim me shkodranët, ai jepte goditje dënimi kundër nesh, ndërkohë që për ne ka dhënë vetëm 4 faulle, pa marrë parasysh rastin e golit të tretë, kur sulmuesi shkodran e preku topin me dorë dhe shënoi," - shprehet më tej Vito. Në përfundim të fjalës së tij, "njeriu i dyfishtë" i Flamurtarit i bën apel FSHF-së që të bëjë kujdes në këtë drejtim: "Me të tillë gjyqtarë po na bezdiset kampionati dhe futbolli. Raste të tilla nuk duhet të anashkalohen nga komisionet përkatëse juridike të FSHF-së, por duhet të ndëshkohen rreptësisht, sipas rregulloreve teknike. Kam vënë re se gjyqtarët tanë i bëjnë padrejtësitë vetëm ndaj ekipeve që nuk kanë financa të shëndosha, çka tregon se edhe korruptohen."
Kastriot Brahimi 'Sporti Shqiptar'

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Ish-futbollisti i famshëm i bluve merr tani drejtimin e skuadrës

Demollari, "timonieri" i Dinamos

Sulejman Demollari është trajneri i ri i skuadrës së Dinamos. Ai e ka bërë prezantimin e tij me ekipin dje pasdite, në një takim të zhvilluar në mjediset e klubit "Dinamo", ku merrnin pjesë drejtuesit më të lartë të skuadrës, të gjithë futbollistët dhe përfaqësues të mediave të ndryshme sportive. Ka qenë presidenti i bluve, Mihal Delijorgji, ai që e ka konfirmuar ardhjen e Demollarit në krye të ekipit vetëm pak ditë pas largimit të Andrea Markos. Kjo zgjedhje e presidentit dinamovit është mbështetur unanimisht dhe është vlerësuar shumë edhe nga shefi i klubit, Gjergj Ruli, drejtori teknik Mujo Targaj etj. Demollari ka një karrierë të pasur si futbollist, ndërsa si trajner më parë ka drejtuar vetëm ekipin tonë përfaqësues. Ai ka qenë një nga futbollistët më cilësorë të Dinamos dhe të kombëtares sonë. Demollari është një ndër të parët futbollistë shqiptarë që ka luajtur edhe në kampionate të huaja, ku mund të përmendim atë rumun, grek, hungarez, dhe italian. Kohët e fundit, Demollari ishte emëruar nga presidenti i Dinamos, Delijorgji, në postin e menaxherit të skuadrës. Në takimin e zhvilluar dje, Demollari ka falënderuar drejtuesit e Dinamos për besimin që kanë treguar ndaj tij. Ai e ka quajtur kënaqësi të qenit trajner i një skuadre, më të cilën ka kaluar momentet më të bukura të karrierës së tij futbollistike. Në fjalimin e tij të shkurtër, trajneri i ri është shprehur se Dinamoja do ta kalojë shumë shpejt momentin e vështirë në të cilin ndodhet aktualisht. Për këtë, ai ka kërkuar bashkëpunimin e të gjithë futbollistëve me stafin teknik dhe vlerësim maksimal nga ana e tyre në ndeshjet e ardhshme të kampionatit. Trajneri Demollari do të zhvillojë sot seancën e parë stërvitore, duke filluar përgatitjet për takimin e së mërkurës, me Elbasanin. Ndërkohë pritet që gjatë kësaj jave të zgjidhet edhe ndihmëstrajneri i Dinamos, vend që për momentin është ende bosh.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.