Galiani: Nuk toleroj më ndeshje të tillë

Zv.presidenti i Milanit, Adriano Galiani, ishte mjaft nervoz në fund të ndeshjes Milan-Udineze, në të cilën kuqezinjtë pësuan humbjen e parë në kampionatin e sivjetëm. Me ton kërcënues, drejtuesi i "Djallit" iu drejtua kështu futbollistëve të tij: "Nuk toleroj më ndeshje të tilla. Për sa kohë të jem drejtues i Milanit, të dielën në mbrëmje nuk do të lejoj më pushime. Si dënim, futbollistët do të dalin në stërvitje çdo të hënë. Kështu do të vazhdojë deri sa unë të mendoj se kanë marrë dënimin e duhur për atë paraqitje zhgënjyese ndaj Udinezes." Gjithsesi, trajneri i Milanit, Karlo Ançeloti, e ka zbutur disi situatën, duke justifikuar futbollistët e tij: "Jemi të lodhur. Në 27 ditët e fundit kemi luajtur dhjetë ndeshje. E vërteta është se u gjendëm përballë një skuadre mjaft të mirë, që kaloi menjëherë në epërsi, duke na e bërë gjithçka më të vështirë. Më pas humbëm edhe një 11-metërsh. Me pak fjalë, nuk na shkoi mirë asgjë. Në pjesën e dytë u përpoqëm të përdornim forcën, e cila s'është një prej karakteristikave tona kryesore. Sidoqoftë, e përsëris, se në këtë periudhë jemi disi të lodhur."

Milani nuk heq dorë nga Prso

Humbja në kampionat ndaj Udinezes duket se nuk do ta ndalë merkaton e Milanit. Përveç Fabio Bazanit, i cili kërkohet prej kohësh nga Ançeloti, emri i ri që ka filluar të qarkullojë në "Milanelo" është ai i sulmuesit francez të Monakos, Dado Prso. Ky i fundit është 29 vjeç dhe i gjatë 190 centimetra. Deri tani, kroati ka shënuar pesë gola në Ligën e Kampioneve dhe katër në kampionatin francez. Te objektivat e Galianit, së bashku me Prson, bëjnë pjesë edhe Simone Inzagi, Luis Fabiano dhe braziliani 18-vjeçar Eduardo Alkides.

Kalaxe: Gabova. Ju kërkoj falje

Pas kartonit të kuq që mori në ndeshjen e fundit të Milanit për vitin 2003 ndaj Udinezes, Kahkaber Kalaxe ka deklaruar: "Gabova, por nuk do të përsëritet më diçka e tillë, sepse kjo nuk bën pjesë në karakterin tim. U kërkoj falje shokëve që i lashë më një futbollist më pak, drejtuesve të klubit dhe tifozëve. Gjithsesi, tani shoh përpara dhe besoj se Milani do të fitojë në ndeshjen e 6 janarit ndaj Romës."

Një kanadez për Udinezen

"Shumëkombëshes" Udineze mund t'i shtohet një futbollist tjetër i huaj. Bëhet fjalë për një talent të lindur në Kanada. Ky quhet Atiba Hatçinson dhe ka shkëlqyer në botërorin e 20-vjeçarëve. Mesfushori i talentuar aktualisht luan në kampionatin suedez me Osterin dhe e ka bërë për vete trajnerin friulian Spaleti, i cili ka kërkuar me ngulm blerjen e tij.

Fava: Tre muaj të paharrueshëm

27-vjeçari i Udinezes, Dino Fava, ka shënuar ndaj Milanit golin e shtatë në Serinë A, duke u barazuar me Vierin. Për tre muajt e tij të parë në Serinë A, sulmuesi bardhezi thotë: "Kam kaluar tre muaj të paharrueshëm. Ndihem mirë tek Udineze dhe jam krenar që e shoh emrin tim përkrah Vierit në renditjen e golashënuesve."

Zaku: Nuk mund të lihet skuadra kështu

"Qan" edhe ekipi i dytë i Milanos, pas një ndeshjeje ku një çast marrëzie (ai i Almeidës) i ka kushtuar shtrenjtë Interit. Dhe tani vlen fare pak fakti që mesfushori është penduar për atë gabim. "I kërkoj ndjesë klubit, shokëve dhe tifozëve." "Djemve, në dhomat e zhveshjes, u thashë se nuk është kiameti që Interi humbi një ndeshje, - tha Alberto Zakeroni, që është mundur për herë të parë në kampionat, që kur ndodhet në stolin zikaltër, - por s'kishim përse ta mbyllnim ndeshjen me dhjetë veta. S'është e mundur të mbetesh me një forcë më pak në këtë mënyrë. Por vështirësitë tona i tejkalojnë episodet e veçanta dhe unë duhet ta analizoj ndeshjen në tërësinë e saj, në mënyrë që të shoh se ç'mund të bëj që ekipi të përmirësohet. Mund të them vetëm se paraqitja ndaj Lacios s'ka qenë në lartësinë e dy ndeshjeve të fundit në kampionat. Kryesisht në pjesën e parë ia dhuruam ndeshjen Lacios. Luajtëm me topa tepër të gjatë dhe nuk arritëm ta sulmonim kundërshtarin. Kështu e vështirëson në mënyrë të pashmangshme punën." Goli përcaktues i Zaurit ka lindur pas zhvillimit të një aksioni sulmues të Interit: "Nuk i mbyllëm boshllëqet në shtyllën e dytë, - shpjegoi Zakeroni, - dhe ata u treguan të zotët, duke besuar deri në fund. Edhe pse, e përsëris: skuadra nuk më pëlqeu aspak vetëm në pjesën e parë. Në pjesën e dytë, edhe kur mbetëm me dhjetë veta, luajtëm gjithnjë më mirë. Duke luajtur me dy "pyka", kemi pasur edhe raste të mira dhe kemi qenë në brendësi të ndeshjes, edhe pse, natyrisht, duke hasur disa probleme."
Zikaltrit, sidoqoftë, s'kanë arritur të bëjnë një hov cilësor përpara pas shtatë rezultatesh pozitive radhazi (një barazim me Romën dhe gjashtë fitore), që e kishin ringjitur Interin mes vendeve të para. "Është herët për të thënë nëse kjo humbje mund të ketë ndonjë ndikim negativ psikologjik te skuadra. Por, sigurisht, një ndeshje "e shtrembër" në tetë edhe mund të pranohet. Unë po përpiqem të ndërtoj diçka dhe e rëndësishme është të arsyetosh mbi këto baza, përndryshe do të jetojmë gjithnjë me momentin dhe do të jemi të kushtëzuar nga dritë-hije. Megjithatë, kjo humbje nuk e paragjykon ecurinë tonë." Vlerësimi i paraqitjes së individëve të veçantë përqendrohet te mbrojtësi "i maskuar" Adani. "Në Ligën e Kampioneve, ndaj Lokomotivës, luajti anësor, më pas ka mbajtur rolin e qendërmbrojtësit me një rezultat po aq të lartë. Ai po luan me një personalitet dhe siguri të madhe." Trajneri e ka mbyllur fjalën e tij, duke u shprehur lidhur me ardhjet e mundshme të reja tek ekipi zikaltër. Emrat e parë janë ata të Adrianos dhe pikërisht i lacialit Stankoviç, që tanimë është fare pranë largimit nga skuadra e Roberto Mançinit. "Nuk besoj shumë te merkatoja e janarit, por sot do të flas për këtë gjë me presidentin Morati. Do të vlerësojmë se ku duhet të ndërhyjmë, gjithnjë nëse do ta shohim të arsyeshme të ndërhyjmë diku. Unë nuk e lë veten të kushtëzohem nga një ndeshje e vetme, që ka qenë më pak e bukur se të tjerat. Skuadra më pëlqen."

Vieri: Duhet të bëjmë më shumë

Kristian Vieri ka deklaruar pas takimit Lacio-Inter, të fituar 2-1 nga bardhekaltrit kryeqytetas: "Flakëm një rast të mirë për të bërë një hap të rëndësishëm përpara. Gabimi ynë ka qenë që nuk arritëm ta mbyllnim ndeshjen pas golit të epërsisë. Na mungoi fati edhe në rastin kur topi më kërceu mbi thembër. Personalisht jam mirë dhe po punoj mirë, por kjo nuk mjafton. Kjo rënie na detyron të bëjmë më shumë dhe ta bëjmë më mirë. Pauza do të na shërbejë të reflektojmë dhe për të rinisur kampionatin me ide më të qarta. Tetë pikë larg Romës janë shumë, por është herët. Dy javë më parë edhe Juvja dukej e pamposhtshme, por nuk ka qenë kështu."

Korradi: Na nderuan sakrificat

Korradi dhe Delgado, e tashmja dhe e ardhmja. Lacio mund Interin dhe rikthehet në vendin e katërt, sidomos falë sulmuesve të saj. Nga njëra anë, qendërsulmuesi shtatlartë që ka shënuar golin e gjashtë në kampionat dhe nga tjetra "prodhimi" i fundit i sektorit të të rinjve bardhekaltër, që ka dhënë pasimin e golit, i cili i ka mundësuar Zaurit t'i dhurojë Lacios tri pikët, që e rikthejnë skuadrën romane në vendin e katërt në renditje. Bernardo Korradi ka dalë tepër i lodhur nga një ndeshje, ku ka qenë gjithnjë protagonist. Në disa çaste të caktuara, ai ka qenë pika e vetme e referimit në sulm, finalizuesi i harkimit të Stankoviçit në rastin e golit të barazimit, në zënkën me Almeidën dhe në minutat e fundit aq të vuajtura, ku u rreshtua në vijë me mbrojtjen për të ruajtur rezultatin. "Zotësia jonë kryesore është që kemi ditur të izolohemi gjatë kësaj jave ndaj të gjitha problemeve të jashtme. Ishim në kërkim të vazhdueshmërisë dhe e gjetëm atë duke fituar një ndeshje, në të cilën rigjetëm tërësisht vetveten. Nuk ishte takim spektakolar, por kjo pasi në "valle" ishin tri pikë me vlera jetike." Sulmuesi, më pas, i ka dërguar një mesazh të hapur Almeidës: "Më vjen keq, sepse nuk doja të grindesha dhe nuk e di përse ai u zemërua aq shumë. Gjithsesi, një kampion si Matiasi duhet t'i shmangë gjëra të tilla." Tri pikë me "peshë", që e çojnë Lacion në kuotën 28. "E donim patjetër këtë fitore, ndaj u sakrifikuam edhe në nivelin taktik." Vetëm një keqardhje: "Shënova një gol të bukur, por humba një tjetër më fatal. Më vjen keq, sepse nuk e godita mirë një top që më erdhi shumë shpejt. Për fat të mirë, më pas i ndreqi Zauri të gjitha."

Almeida: Pres të pezullohem 1 javë

Matias Almeida është penduar për sjelljen e tij gjatë sfidës Lacio?Inter. Mesfushori argjentinas, pas një dyluftimi me Korradin, u ndëshkua me karton të verdhë dhe, pasi u xhindos, kërkoi të zihej me sulmuesin bardhekaltër. Trefoloni atëherë nxori jashtë kartonin e kuq, të cilin Almeida ia mori nga dora dhe vazhdoi të kërkonte sherrin, ndërsa shokët përpiqeshin ta ndalonin. I shoqëruar nga vërshëllimat e ish-tifozerisë së tij, Almeida u largua nga fusha dhe lëshoi një objekt drejt tribunës "Monte Mario". Ndëshkimi i tij veçse i shkaktoi Interit humbjen dhe do të dënohet rreptësisht edhe nga gjykatësi sportiv. Argjentinasi, në një deklaratë të tij gjatë ditës së djeshme, ka bërë të ditur se është penduar për gjestin e marrë që bëri të dielën në mbrëmje. "Gjesti im, - tha ai, - ka qenë pa dyshim i gabuar. Nuk e di se ç'më hipi, s'mbaj mend asgjë. Kur Trefoloni nxori kartonin e kuq, nuk më panë sytë gjë. Ne nuk luajtëm një ndeshje të mirë dhe, sigurisht, ndëshkimi im ndikoi në ecurinë e saj. Pres që të pezullohem vetëm një javë. Me Korradin s'kam ç'të sqaroj, pasi këto janë gjëra që ndodhin dhe që duhen lënë në fushë. Por, sigurisht, nga një person korrekt si ai nuk i prisja disa fjalë të caktuara... Sidoqoftë, u tregua më dinak se unë."

Morati: Stankoviçi? Është herët

Të nesërmen e humbjes ndaj Lacios në "Olimpiko", presidenti i Interit, Masimo Morati, i rikthehet episodit të kontaktit në zonë mes Kruzit e Stamit: "Ishte një penallti e pastër, edhe pse askush nuk protestoi." Më pas, kreu zikaltër hodhi një vështrim mbi argumentin e ditës në kuadër të merkatos, që ka të bëjë me ardhjen e mundshme të Stankoviçit: "Është ende herët, ? tha ai. ? Më pas mbetet për të parë edhe se ç'do të bëjë Juventusi në merkato."

Kanavaro: Nuk luajtëm mirë

Fabio Kanavaro e ka kritikuar skuadrën pas humbjes në "Olimpiko" ndaj Lacios: "Nuk luajtëm mirë, pësuam dy gola në dy raste, kur e humbëm ne topin. Më vjen keq, sepse kishim mundësi t'i afroheshim kreut të renditjes. Vitin e ri duhet ta nisim nga vargu i rezultateve pozitive të muajit të fundit."

Mançini, heshtje për shtyp

Fitorja ndaj Interit nuk ka mundur t'ia rikthejë buzëqeshjen Roberto Mançinit. Në fund të ndeshjes, trajneri i Lacios nuk u paraqit përpara mediave dhe nuk bëri asnjë deklaratë lidhur me ndeshjen. Duket se Mançini nuk i ka kapërdirë ende disa polemika që kanë nisur gjatë javës në adresë të tij dhe të Stankoviçit.

S. Inzagi në janar tek Udineze

Simone Inzagi do të largohet nga Lacio në janar. Ekipi bardhekaltër po përpiqet t'ia japë hua Udinezes, ndërsa pritet që në fund të sezonit golashënuesi të shkojë te Milani, ku luan edhe vëllai i tij, Filipo.

Juventus: 2004-a, viti i "revolucionit"

Për Juventusin, ky sezon mund të përbëjë mbylljen e një cikli. Në fakt, në qershor, klubi bardhezi jo vetëm do t'i lërë të largohen disa protagonistë të tij, që i kanë pasur vitet e fundit plot me triumfe, duke nisur nga Davidsi e deri te Trezegeja, por do të kryejë edhe një ndërrim në stol. Në fakt, Marçelo Lipi, në rast se Trapatoni do të heqë dorë, duket se me siguri do të drejtojë kombëtaren "axure". Bëhet fjalë për mbylljen e një cikli plot fitore dhe gëzime. Që të gjithë, duke nisur nga Marçelo Lipi, ëndërrojnë ta mbyllin me një tjetër triumf. Fitorja më e lakmueshme është ajo në Ligën e Kampioneve, kupa që në kampin juventin vazhdon të "rrëshqasë" dhe që, edhe për trajnerin viarexhin, është kthyer në njëfarë mallkimi. Nëse Roma vazhdon të vrapojë me këtë ritëm në kampionat, bardhezinjtë do të bënin mirë t'i përqendronin forcat e tyre në arenën ndërkombëtare. Por, pavarësisht sesi do të përfundojë ky sezon, revolucioni tanimë ka nisur. Për Edgar Davidsin dihet prej kohësh. Prishja me klubin është e pashërueshme dhe e vetmja gjë për të parë është nëse ia vlen të vazhdojnë si të ndarë në shtëpi deri në qershor, apo nëse ndokush (lexo Masimo Morati) do të arrijë ta marrë holandezin që në janar. Më pas është David Trezegeja.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.