Aleks Del Piero nuk ndodhej në listën e të grumbulluarve për takimin e parë çerekfinal të Ligës së Kampioneve, në program nesër. Fantazisti i Juventusit, të cilit pas 13 minutash lojë iu desh ta braktiste fushën të shtunën në mbrëmje ndaj Romës, është ndalur për shkak të një problemi muskular në kofshën e majtë, i njëjti shqetësim që ndjeu edhe në ndeshjen ndaj Livornos.

Vetëm 13 minuta në fushë dhe vetëdija e hidhur që u bë realitet dje pasdite, do të mungojë në sfidën e nesërme ndaj Arsenalit. Alesandro Del Piero duket se po persekutohet nga tersi, sepse ndaj Romës nuk pati kohë as të ambientohej me ndeshjen. Ai u detyrua të largohej menjëherë nga fusha, për shkak të një shqetësimi në kofshën e majtë, të cilën e kishte lënduar qysh të shtunën e kaluar në Livorno.

Roma me siguri nuk i sjell edhe aq fat Del Pieros. Mjafton të kujtojmë sezonin 2003 04, në javën e 3-të, kur kapiteni në minutën e 14-të të pjesës së parë, pra vetëm një minutë më vonë se dëmtimi i kësaj të shtune, u detyrua t'ia linte vendin Di Vaios, pas një shqetësimi muskular në pulpë. Kësaj here bëhej fjalë për Ligën e Kampioneve dhe për Arsenalin më konkretisht, por duke parë formën e shkëlqyer që po kalon sulmuesi bardhezi, për Juven është vërtet një "mace e zezë". Pra nuk ka "Hajburi" për Del Pieron, kështu që do t'i lihet hapësirë dyshes Ibra Trezege. Juves do t'i duhet të bëjë edhe pa të pezulluarin Pavel Nedved: në vend të çekut do të luajë Adrian Mutu. Qëndron fakti se në sfidën e Champions-it, Juvja nuk do të paraqitet me kartëvizitën më të mirë të mundshme.

Fabio Kapelo kësaj here nuk kërkon justifikime: sipas trajnerit, barazimi ndaj Romës është i drejtë, edhe pse me pak brengë që skuadra e tij pësoi gol në minutat e fundit nga një goditje standarde. "Në pjesën e parë Roma luajti më mirë se ne, - pohoi trajneri. - Ishim të paqartë dhe të pasaktë, edhe pse arritëm të ndërtonim një rast për të shënuar golin e parë me Trezegenë. Ndërsa në pjesën e dytë, edhe pse ishim me dhjetë lojtarë, luajtëm shumë mirë. Më vjen keq që pësuam gol në atë mënyrë." Kapelo megjithatë ka qenë i kënaqur nga loja e shprehur nga skuadra në pjesën e dytë.

"Roma është një skuadër e shkëlqyer dhe vitin e ardhshëm duhet të kemi kujdes prej saj, - nënvizoi trajneri i Juventusit, - sepse do të luftojë me siguri për diçka të rëndësishme. Ndihem i kënaqur nga paraqitja jonë në planin fizik dhe në atë të vullnetit, por më vjen keq që shpenzuam kaq shumë energji në kuadër të sfidës së Champions-it, duke pasur parasysh edhe faktin që Arsenali nuk luajti." Inferioriteti numerik u kushtoi shumë energji bardhezinjve; mjafton të kihet parasysh se Ibrahimoviçit, në pjesën e dytë, iu desh të mbante të gjithë peshën e sulmit. "Ibrahimoviçi luajti një ndeshje të shkëlqyer, - deklaroi Kapelo, - vrapoi, e mbajti topin dhe kreu veprime të rëndësishme. Megjithatë, të gjithë më pëlqyen shumë, edhe pse nuk më pëlqen të flas për lojtarë të veçantë." Diçka edhe për Del Pieron, i cili i detyrua të largohej nga fusha pas pak minutave të luajtura: "Ndjeu shqetësime në këmbë, ku kishte marrë edhe një goditje më parë. Kam dyshime të forta lidhur me praninë e tij në ndeshjen ndaj Arsenalit." Megjithatë mendohet të bëhet fjalë thjesht për një kontraktim të kofshës së majtë. Dhe vetë Del Piero s'është dukur i shqetësuar: "U dëmtova në një tjetër pikë të këmbës, por s'besoj se është diçka e rëndë."

Faketi humbet durimin me Interin
Humbja në Parmë largon gjithnjë e më shumë vendin e dytë, por tani në shtëpinë zikaltër ajo që ka rëndësi, është që skuadra ta rimarrë veten ndaj Vilarealit në Champions. Xhiaçinto Faketi është i zemëruar: "Kjo nuk është mënyra më e mirë për t'iu afruar në çerekfinale të Ligës së Kampioneve, duhej një tjetër rezultat, - tha presidenti i Interit. - Skuadra më pëlqeu në pjesën e parë, pastaj pas gabimit të Uomesë pësuam rënie. Më vjen keq për të, nuk po luante keq, për në raste të tilla nuk duhet rrezikuar." Tjetër problem për presidentin zikaltër përfaqësohet nga zhgënjimi i disatë i Adrianos. Nëse Mançini e zëvendëson dhe pas ndeshjes bën të ditur se braziliani s'është më i paprekshëm, Faketi mbështet: "Adriano? Shpresuam që të zhbllokohej dhe Mançini i ka dhënë besim gjithnjë. Ai në stol ndaj Vilarealit? Vendos trajneri, unë s'kam gjë për të thënë."

Esteban Kambiaso e "dëbon" krizën
Nuk ka asnjë krizë për Interin dhe për Adrianon, kështu e mendon Esteban Kambiaso një ditë pas humbjes së zikaltërve në Parmë: "Mendoj se dritë-hijet u ndodhin të gjithëve, por të mos kapemi vetëm te golat, sepse ka futbollistë që luajnë në shërbim të skuadrës, edhe kur nuk arrijnë të shënojnë gola. Adriano dhe Martinsi, nëse zhbllokohen, mund të shënojnë dy apo tre gola në të njëjtën ndeshje dhe kjo mund të ndodhë që të mërkurën në mbrëmje ndaj Vilarealit, në ndeshjen që do të luajmë në "San Siro" çerekfinalen e parë të Championsit." Argjentinasi i mbron shokët e skuadrës, të cilët janë kritikuar shumë kohët e fundit: "Atyre nuk u mungon talenti, vërtet nuk kanë shënuar shumë gola kohët e fundit, por do të ishim më të shqetësuar po të mos kishim krijuar raste për shënim."

__________________
The heaven's sound is composed inside your heart, listen to its beat to syncronize your life onto the angel's steps.

Nuk ka të sosur kriza e Adrianos. Pas një tjetër paraqitjeje të dobët, si ajo e së shtunës ndaj Parmës, braziliani rrezikon ta humbasë vendin në skuadër. "Mund edhe të ndodhë që Adriano të qëndrojë jashtë, ka theksuar Mançini pas ndeshjes. Ai është një lojtar si të tjerët. Zëvendësimi? Kam në dispozicion katër sulmues dhe është e qartë se do të përpiqesh të ndryshosh diçka kur kjo është e nevojshme."

Kësaj here kupa është mbushur plot. Humbja ndaj Parmës, që vuri në dukje edhe një tjetër herë dobësinë e sulmuesve zikaltër, ka qenë pika klasike që e ka derdhur kupën e mbushur plot. Pasi dha disa shenja rizgjimi në ndeshjet e mëparshme, Adriano zhgënjeu sërish dhe Mançini e thirri në stol kur duheshin edhe 20 minuta që takimi të përfundonte. Një zgjedhje për të cilën duket se brazilianit s'i ka ardhur mirë, por që mund të jetë vetëm fillimi i "strategjisë" së re të Mançinit. Trajneri zikaltër pas ndeshjes nuk i ka kursyer qortimet ndaj brazilianit, vendi i të cilit në skuadër s'është aspak i sigurt: "Mund të ndodhë që edhe ai të qëndrojë jashtë, i ka rënë shkurt tekniku interist. Ai është një lojtar si të tjerët dhe mund të luante më mirë, sikurse edhe Rekoba, Martinsi dhe gjithë të tjerët." Shansi i fundit për "Perandorin" mund të jetë takimi i parë çerekfinal i Ligës së Kampioneve, në program të mërkurën në mbrëmje në "San Siro" ndaj Vilarealit. "Shpresoj që sulmuesit t'i kthehen golit që të mërkurën, - tha Mançini, - sepse ndodh që në disa periudha të shënojnë më shpesh sesa në disa të tjera." Por qëndron fakti se kriza e Adrianos po zgjat pak si shumë: golin e fundit e ka shënuar në "San Siro" ndaj Sampdorias dhe më pas ra sërish në plogështi. Dhe tani mbërrin ky ultimatum nga ana e trajnerit. Adrit s'i mbetet gjë tjetër, veçse të përgjigjet nga fusha.

Kharja: Një pikë sa një fitore
Spaleti: Roma ime luajti shkëlqyeshëm
Ka qenë një barazim me vlerat e një fitoreje ai i arritur nga Roma në fushën e Juventusit. Verdhekuqtë u paraqitën shumë mirë dhe në minutat e fundit arritën edhe të shënonin. Luçiano Spaleti ka qenë entuziast. "Luajtëm një ndeshje të madhe, tha trajneri i verdhekuqve. Kjo është gjëja që më kënaq më shumë, kur luajmë mirë. Nëse skuadra do të vazhdojë kështu, në fund do ta marrë shpërblimin e saj, pavarësisht nga pozitat në renditje. Për mua rëndësi ka qëndrimi i djemve në fushë, sepse pa këto qëndrime nuk mbërrijnë fitoret." Roma tani ndodhet vetëm një pikë larg Fiorentinës: të dielën do të luhet ndeshja direkte mes dy ekipeve dhe verdhekuqtë mund t'i kthehen sërish vendit të 4-t. "Një pikë më shumë s'ndryshon ndonjë gjë të madhe në kuadër të Firences, - tha Spaleti, - duhet të shkojmë atje ta luajmë ndeshjen me forcë fizike, cilësi dhe dinakëri." Të shënosh golin e barazimit pesë minuta nga fundi kundër një rivali historik si Juventusi, është një gjë e rëndësishme. Housine Kharja është në "qiellin e shtatë". "Është goli më i rëndësishëm i karrierës sime, nuk mund të shpresoja më shumë, dua t'ia kushtoj familjes sime dhe tifozëve. Jam një lojtar për Romën dhe nuk e di nëse mjafton ky gol për ta treguar. Jam i lumtur, sepse nuk meritonim të humbisnim. Për mënyrën sesi shkoi loja, edhe një pikë ka shihej e fitores."

__________________
The heaven's sound is composed inside your heart, listen to its beat to syncronize your life onto the angel's steps.

Pas së shtunës me "big" ët në fushë, ku Milani mundi Fiorentinën, Interi humbi në Parmë dhe Roma barazoi me Juventusin në Torino, pjesa tjetër e skuadra të Serisë A ka "folur" e gjitha për Lacion. Në "Olimpiko", Lacio me dy gola të Odos mund Sampdorian dhe tani e sheh më afër UEFA n. Edhe Palermo falë fitores ndaj Trevizos i afrohet veprimtarisë europiane. Askoli dhe Kievo ndajnë nga një pikë pas barazimit të djeshëm, ku venetët barazojnë në minutat shtesë me Amaurin. Në barazim ka përfunduar edhe sfida direkte për shpëtimin mes Mesinës dhe Udinezes. Tension dhe gola në Kaljari, që ka humbur përballë Rexhinës në një tjetër sfidë direkte shpëtimi të kampionatit. Jashtë fushe ka fituar edhe Leçe, e cila ka gjunjëzuar Sienën në shtëpinë e vet.

Sukses i rëndësishëm për Empolin, që i shkakton Livornos së Macones humbjen e tretë radhazi. Në ditën e rikthimit në stadium të ish-lacialit të famshëm Xhorxhio Kinalja, i ulur në tribunë disa radhë më tutje nga rivali Klaudio Lotito, skuadra e Delio Rosit gjunjëzon Sampdorian, falë një dygolëshi të kapitenit Masimo Odo dhe merr fluturimin drejt Europës. Gjatë ndeshjes ka pasur edhe minuta ankthi, pasi mbrojtësi blukaltër, Falkone, ka pësuar një dëmtim të rëndë në qafë, duke dalë me barrelë nga fusha. Për skuadrën e Novelinos, gjendja është shqetësuese, pasi ajo e djeshmja është humbja e gjashtë radhazi, ndërsa bardhekaltrit renditen në vendin e gjashtë në tabelë, me pikë të barabarta me Kievon, duke parakaluar Livornon. Pikërisht dy surprizat e kampionatit kanë përjetuar një të diel jo pozitive. Kievoja e Pilonit duhet të falënderojë sulmuesin Amauri, që në mega-shtesën e minutave të dhëna nga gjyqtari i katërt Datilo (7 minuta në fund), ia ka arritur të dalë e pathyeshme nga stadiumi "Del Duka". Dygolëshi i "bomberit" brazilian ka bërë "xing" me atë të mbrojtësit askolan Paçi.

Livornos së Karleto Macones i ka shkuar edhe më keq, sepse Empoli më i mirë i këtij sezoni fiton derbin toskan dhe i largohet zonës së ftohtë të renditjes. Të shkëlqyer golat e Tavanos dhe Bushesë, ndërsa për skuadrën e kuqërremtë shënoi Kristiano Lukareli me 11-metërsh. Kjo për Maconen është humbja e tretë radhazi, pas atyre të pësuara me Juven në shtëpi dhe Parmën në "Tardini".

I afrohet zonës së Kupës UEFA edhe Palermoja, që humb shumë raste dhe vuan kundër Trevizos së vendit të fundit, por në pjesën e dytë fiton falë një gol me kokë të sulmuesit nigerian Makinua. Fitore të rëndësishme jashtë shtëpisë për Rexhinën dhe Leçen, respektivisht ndaj Kaljarit dhe Sienës. Në Sardenjë vendosin golat e Alesandro Lukarelit dhe Tedeskos, por në fund të ndeshjes, mes këtij të fundit dhe kaljaritanëve Lopez, Abeijion dhe Lanxhela ka pasur një grindje me grushte në tunelin që të çon drejt dhomave të zhveshjes. Sipas të pranishmëve, kalabrezi paska provokuar Abeijionin. Në Sienë, goli i Erion Bogdanit nuk mjaftoi që skuadra e De Kanios të merrte një pikë kundër Leçes, që shënoi e para me Xhakomacin dhe Vuçiniçin. Sulmuesi shqiptar (për të është goli i 9-të në këtë sezon), përveç rastit të golit, goditi edhe një herë shtyllën me kokë, kur ndeshja ishte 1-0 për puljezët.

Emocione dhe vetëm një barazim në Mesinë mes vendësve dhe Udinezes. Siçilianët kanë shënuar të parët me anë të Di Napolit, por friulianët u përgjigjën më pas me nigerianin Obodo. Ka qenë një ndeshje ku dy portierët respektivë, Storari dhe De Sanktis, kanë qenë më të mirët në fushë.

Palermo - Trevizo 1 0
Shënues: Makinua 57'
Palermo: Aliardi, Biava,Terlici, Barzali, Konteh, Xh.Tedesko (Makinua 23'), Korini, Mutareli, Brienxa (Gonzales 62'), Di Mikele, Karaçiolo (Rinaudo 46'). Tr: Papadopulo.
Trevizo: Zankope, Maxhio, Valdes, Gustavo, Dosena, E.Filipini, Basexhio, A.Filipini,Gigu (Rexhinaldo 78'), Vashak (Fava 80'), Begeto (Borielo 46'). Tr: Bortoluci.
Gjyqtar: De Santis.
Karton i verdhë: Korini.

Kaljari - Rexhina 0-2
Shënues: A.Lukareli 8', Tedesko 20'
Kaljari: Kimenti, Kanini Lopez, Agostini (Kosu 55'), Ferri (Pizano 55'), Abeijon, Budel (Kapone 70'), Gobi, Lanxhela, Suazo, Espozito. Tr: Soneti.
Rexhina: Pelicoli, I.Françeskini, De Roza, A.Lukareli, Lanzaro, Biondini (Xhiosa 83'), Paredes, Tedesko, Vixhiani, Koca (Modesto 68'), Amoruzo (Bianki 86'). Tr: Maxarri.
Gjyqtar: Mesina.
Kartonë të verdhë: Abeijon, Koca, Biondini, I.Françeskini, Vixhiani, Lanxhela, Kapone, Bianki, Kimenti.

Mesina - Udineze 1-1
Shënues: Di Napoli 30'/ Obodo 37'
Mesina: Storari, Zanki, Razaei, Aronika, Parisi, Skuli, Donati, D'Agostino (Sulo 65'), Bondi (Noverino 46'), Di Napoli, Muslimoviç (Flokari 65'). Tr: Muti.
Udineze: De Sanktis, Bertoto, Natali, Zapata, Felipe (Pieri 72'), D.Zenoni, Obodo, Kandela, Muntari, Di Natale (Bareto 75'), IaKuinta. Tr: Galeone.
Gjyqtar: Bertini.
Kartonë të verdhë: Bertoto, Iakuinta, Felipe, Zanki.

Lacio Sampdoria 2 0
Shënues: Odo 70', 88'(pen)
Lacio: Peruci, Odo, Sivilja, Zauri, Beleri, Behrami, Mudingaji, Liverani, Mauri (Manfredini 78'), Di Kanio (Pandev 52'), Roki.
Tr: D.Rosi.
Sampdoria: Antonioli, K.Zenoni, Falkone (Gasbarroni 45'), Sala, Kastelini, Diana, Volpi, Palombo, Toneto, Flaki, Foti (Kutuzov 46'). Tr: Novelino.
Gjyqtar: Rozeti.
Kartonë të verdhë: Behrami, Falkone.

Siena - Leçe 1-2
Shënues: Bogdani 85'/ Xhakomaci 4', Vuçiniç 71'
Siena: Fortin, Negro, Koloneze, Portanova, Gastaldelo (Falsini 46'), Folio (Volpato 62'), D'Aversa, Vergasola, Lokateli, Bogdani, Kieza (Alberto 78'). Tr; De Kanio.
Leçe: Siçinjano, Kaseti, Diamouten, Stovini, Rulo, Xhakomaci, Ledezma, Xh.Del Vekio, Babu (Pekorari 66'), Pinardi, Vuçiniç. Tr: Rico-Paleari.
Gjyqtar: Pantana.
Kartonë të verdhë: Stovini, Daimouten, Kaseti, Portanova, Xh.Del Vekio, Falsini, Vuçiniç.
Karton i kuq: Koloneze.

Askoli - Kievo 2 2
Shënues: Paçi 45', 61'/ Amauri 25', 92'
Askoli: Kopola, Karbone, Paçi, Domizi, Del Groso (Karielo 83'), Foxhia (Lauro 70'), Guana, Parola, Fini, Kualjarela, Budan (Ferrante 83'). Tr: Silva (Xhiampaolo i pezulluar).
Kievo: Fontana, Malago, D'Ana, Moro, Lana (Xhemiti 85'), Luçiano, Xhiunti, Brigi, D.Françeskini (Tiriboki 67'), Amauri, Obina, (Pelizier 81'). Tr; Pilon.
Gjyqtar: Datilo
Kartonë të verdhë: Amauri, Brigi, Lauro, Luçiano.

Empoli - Livorno 2-1
Shënues: Tavano 39', Bushe 51'/ K.Lukareli 87'(pen)
Empoli: Bali, Raxhi (Askoli 72'), Koda, Pratali, Lukini, Moro, Almiron (Fiçini 60'), Bushe, Vanuki, Tavano, Rigano (Poci 46'). Tr: Kanji.
Livorno: Amelia, Grandoni, Arxhili (Baleri 56'), Galante, Pfertzel (Sezar Prates 46'), Morrone, Pasoni, Ruotolo (Koluçi 56'), Koko, Paladino, K.Lukareli. Tr: Macone.
Gjyqtar: Morganti.
Kartonë të verdhë: Rigano, Ruotolo, Pasoni.

Renditja
1.Juventus 78 24 6 1 61 20
2.Milan 70 22 4 5 70 25
3.Inter 65 20 5 6 56 24
4.Fiorentina 60 18 6 7 52 34
5.Roma 59 17 8 6 57 31
6.Kievo 45 11 12 8 44 37
7.Lacio 45 11 12 8 41 39
8.Livorno 44 11 11 9 32 34
9.Palermo 43 11 10 10 41 42
10.Parma 38 10 8 13 36 49
11.Sampdoria 37 10 7 14 42 42
12.Askoli 37 8 13 10 34 39
13.Siena 35 9 8 14 36 49
14.Rexhina 34 9 7 15 31 49
15.Empoli 32 9 5 17 34 52
16.Kaljari 31 7 10 14 32 45
17.Udineze 29 7 8 16 29 49
18.Mesina 28 5 13 13 29 43
19.Leçe 21 5 6 20 23 49
20.Trevizo 15 2 9 20 17 45

Seria A, java e 32 të
Të shtunën, 1 prill
Leçe - Milan 18.00
Trevizo - Juventus 18.00
Inter - Mesina 20.30

Të dielën, 2 prill
Kievo - Livorno 15.00
Fiorentina - Roma
Lacio - Empoli
Palermo - Askoli
Rexhina - Siena
Sampdoria - Kaljari
Udineze - Parma

Golashënuesit
25 gola: Toni (Fiorentina).
20 gola Trezege (Juventus).
19 gola: Shevçenko (Milan).
16 gola: Xhilardino (Milan), Tavano (Empoli).
15 gola: Toti (Roma), Suazo (Kaljari), K.Lukareli (Livorno).
13 gola: Adriano (Inter).
12 gola: Roki (Lacio), Di Napoli (Mesina).
10 gola: Del Piero (Juventus), Kruz (Inter), Pelizier (Kievo), Inzagi (Milan), Kieza (Siena).
9 gola: Bogdani (Siena), Bonacoli (Sampdoria), Kaka (Milan), Simplisio (Parma).
8 gola: Karaçiolo (Palermo), Koca (Rexhina), Mansini (Roma), Amauri (Kievo).

__________________
The heaven's sound is composed inside your heart, listen to its beat to syncronize your life onto the angel's steps.

Fitorja ndaj Fiorentinës ishte e rëndësishme për Milanin në prag të ndeshjes së parë çerekfinale në Champions ndaj Lionit. Por duke parë barazimin e Juventusit me Romën dhe suksesin ndaj vjollcëve, tifozët kuqezinj i kanë kthyer sytë edhe te kampionati. Një kampionat i "pushtuar" tërësisht nga bardhezinjtë, të cilët, pas ndalesës në "Dele Alpi" me verdhekuqtë e Spaletit, e shohin veten 8 pikë larg vendit të dytë. Dhe Milani, si gjithnjë i kujdesshëm, nuk tregohet euforik. Në kor, tre autorët e golave kundër Fiorentinës, Shevçenko, Kaka dhe Gatuzo, përveç se të kënaqur për fitoren, ulin entuziazmin dhe janë të përqendruar vetëm te Lioni.

SHEVÇENKO - Juventusi është ende larg dhe mendja tani është e gjitha për Lionin. Koncepti i shprehur nga Karlo Ançeloti, mbështetet edhe nga lojtarët e tij, siç konfirmon Andrei Shevçenko, i cili shënoi golin e barazimit ndaj Fiorentinës: "Është një periudhë e bukur për mua, - shpjegon ukrainasi, - për sulmuesit e tjerë dhe para së gjithash për Milanin. Çdo gjë po e bëjmë me lehtësi, i lejojmë pak hapësirë kundërshtarit dhe krijojmë shumë raste. Tani Juventusi është disi më pranë, por tetë pikë janë shumë për të shkurtuar largësinë në renditje, ose të flasësh për një përmbysje. Të shohim atë që do të ndodhë në javët e ardhshme, por pa harruar që nuk varet nga ne dhe Milani duhet të mendojë para së gjithash të fitojë ndeshjet e tij, duke luajtur mirë. Dhe nëse për kampionatin rrezikojmë të jemi me vonesë, për Ligën e Kampioneve jemi në luftë të plotë. Në Lion, duhet të tregojmë të njëjtën vendosmëri që shfaqëm në fushë ndaj Fiorentinës."

KAKA - Në fund të stërvitjes së mëgjesit të djeshëm, Riki Kaka, nuk e ka fshehur gëzimin e tij për suksesin ndaj Fiorentinës dhe për ecurinë e Milanit në ndeshjet e fundit të kampionatit, në të cilat ka rikuperuar shumë terren ndaj rivalëve. "Ishte synimi ynë dhe po ia arrijmë qëllimit, pra të marrim sa më shumë pikë, - tha fantazisti. - Po gjejmë vazhdimësinë e duhur dhe po luajmë mirë. Edhe të shtunën, kur pësuam gol, ishim të vendosur mirë në fushë, madje ishim ne ata që po krijonin raste për të shënuar: ata shënuan nga një goditje dënimi. Më pas, në pjesën e dytë, lëvizëm më mirë, u përmirësuam dhe gjetëm hapësirat për ta çuar rezultatin në 3-1." Më pas një koment për mikun dhe shokun e skuadrës Kostakurta, i cili shfaqi një formë të shkëlqyer ndaj vjollcëve: "Billi është gjithnjë befasues, ai është një lojtar dhe një shembull i madh për ne." Të mërkurën, ndërkohë, e ka radhën Liga e Kampioneve: kuqezinjtë i pret Lioni në stadiumin "Gerland". Kakaja garanton: "Skuadra është e karikuar dhe e motivuar, kemi shumë besim në vetvete, çka buron nga fakti që po luajmë ndeshje të bukura. Ndaj Lionit kemi mundësinë ta ruajmë këtë ritëm."

GATUZO - Tashmë është "marka" e tij e fabrikës. Sikundër ndodhi kundër Palermos në ndeshjen e fazës së parë, Rino Gatuzo shënon dhe pastaj qarkullon gjatë gjithë fushës për të festuar drejt tifozëve kuqezi që ndodhen në tribunën e jugut. "Jam i kënaqur për golin, për paraqitjen, për fitoren e skuadrës, - thotë mesfushori luftarak. - Juventusi barazoi, por unë parapëlqej të mos e shikoj renditjen dhe të përqendrohemi tek ajo që bëjmë në fushë. Pastaj të shohim, por tani objektivi i parë është Liga e Kampioneve dhe të mërkurën kemi një takim shumë të rëndësishëm."

Ançeloti: Një fitore që na jep besim
Karlo Ançeloti ishte aq i përqendruar për kampionatin, saqë fjalët e para pas fitores ndaj Fiorentinës ia ka kushtuar angazhimit të së mërkurës: "Ishte një sukses i rëndësishëm në kuadër të Champions-it." Në kampin kuqezi mendojnë se tanimë titulli kampion i takon tjetërkujt dhe kështu që ndeshja ndaj Lionit kthehet në objektivin sezonal: "Ndeshja e luajtur ndaj Fiorentinës na jep shumë besim për ndeshjen ndaj Lionit, - shpjegoi trajneri. - Skuadra më pëlqeu shumë dhe Kostakurta luajti shkëlqyeshëm. Ishte mbitëgjitha për t'u lavdëruar reagimi ynë pas golit të tyre të avantazhit. E merituam fitoren. Ndalimi i Juventusit? Energjitë sa vijnë e pakësohen dhe kështu që mund të ndodhë ndonjë incident gjatë rrugës, edhe pse një barazim ndaj Romës s'është fundi i botës. Por ne më mirë se tetë pikët e disavantazhit do të mendojmë për 5 pikët e avantazhit që kemi ndaj të tretëve. Reali? Interesimi i Real Madridit më gëzon. Por unë zgjodha Milanin, që për momentin më duket më tepër si diçka e imja."

"As": Karloja e do Ronin te Reali
Nuk rresht së habituri e përditshmja spanjolle "As". Pasi shkroi se rinovimi i Ançelotit ishte i rremë, gjetja e fundit ka të bëjë me kushtet që trajneri kuqezi do t'i kishte kërkuar Realit për "zbarkimin" e tij mes "galaktikëve": e para do të kishte të bënte me qëndrimin e Ronaldos në Madrid. Në fakt, "Fenomeni" do të ishte një element thelbësor për projektin e tij: "Nëse shkoj në Madrid, dua ta kem në skuadër," - mësohet të ketë thënë ai. Pikërisht ky qëllim e ka shtyrë Martinin të dojë Ançelotin dhe të heqë dorë nga Kapelo, i cili, kur u kontaktua në dhjetor, kërkoi shitjen e Salgados, Helgerës, Roberto Karlosit dhe të vetë "Fenomenit".

__________________
The heaven's sound is composed inside your heart, listen to its beat to syncronize your life onto the angel's steps.

Te Milani që "shkatërroi" Fiorentinën, në piedestal janë ngjitur "plakushët" e zakonshëm. Në fakt, më i miri në fushë ka qenë tanimë thuajse 40-vjeçari Kostakurta, i cili dha asistin për golin e Kakasë dhe që ia la vendin në minutën e 30-të të pjesës së dytë 38-vjeçarit Maldini, i rikthyer në fushë 109 ditë pas dëmtimit. Tani Ançeloti mund ta ketë parasysh "gardën e vjetër" edhe në ndeshjen e Champions-it ndaj Lionit.
Milani, pas suksesit ndaj Fiorentinës, mund të shijojë shkëputjen e reduktuar nga Juventusi ( 8 pikë), por mbi të gjitha mund të ripërqafojë "gardën e vjetër", e cila u kthye fuqishëm në nderimet e kronikave. Në fakt, në sfidën e "San Siros" ndaj vjollcëve spikati padyshim paraqitja e Alesandro "Billy" Kostakurtës, i cili në moshë thuajse 40-vjeçare (i mbush në prill) u tregua i vëmendshëm dhe i saktë në mbrojtje, duke u hedhur edhe në sulm kur e kërkonte nevoja. Aq sa në pjesën e dytë dha edhe një asist për golin e Kakasë. Një paraqitje e madhe ajo e Billit, të cilin Ançeloti mund ta aktivizojë edhe në ndeshjen e Ligës së Kampioneve ndaj Olimpikut të Lionit. Kostakurta, kur filloi të shfaqte shenja lodhjeje, u zëvendësua për t'ia lënë vendin një tjetër ylli të paperëndueshëm kuqezi: thuajse 38-vjeçarit Paolo Maldini. Në çastin e kthimit të tij në fushë, 109 ditë pas dëmtimit, kapiteni u prit me brohoritje nga tifozët milanistë. Por ndërrimi mes dy të "pavdekshëmve" ishte një moment emocionues për shumë njerëz. "E përqafova Billin kur doli, - pohoi Ançeloti në fund të ndeshjes, - sepse paraqitja e tij më befasoi: pashë një anësor të një niveli tepër të lartë, të pakursyer dhe dinamik. 'Plakushët' përbëjnë tabanin e kësaj skuadre dhe janë një shembull për të gjithë." "Billi është i jashtëzakonshëm, - ka thënë Adriano Galiani, stratosferik dhe e meritonte rinovimin e kontratës."

Prandeli: Fiorentina më pëlqeu
Të humbasësh në "San Siro", mund edhe të qëndrojë, sidomos ndaj një Milani si ai i së shtunës. Dhe kështu që Çezare Prandeli e merr humbjen me filozofi: "Na mungoi shkëlqimi i nevojshëm, ka shpjeguar trajneri vjollcë. Ishte një ndeshje e fortë dhe për shumë minuta skuadra më pëlqeu, ishim shumë të rregullt. Me kalimin e minutave hasëm disa vështirësi, për shkak të ndeshjes që kishim luajtur në mesjavë ndaj Kaljarit. Milani e përdori mirë freskinë e tij, ndërsa ne e humbëm shkëlqimin." Pas humbjes, në kampin e Fiorentinës mendojnë për sfidën për Champions-in ndaj Romës: "Do të jetë një ndeshje e rëndësishme, përfundoi Prandeli, por nuk do të jetë përcaktuese në luftën për të shkuar në Champions."

__________________
The heaven's sound is composed inside your heart, listen to its beat to syncronize your life onto the angel's steps.

Trembëdhjetë gola. Pak, fare pak për vitin 2006 nga ana e sulmuesve zikaltër. Kjo është shenja e një krizë globale që rrezikon ta kompromentojë sezonin. Nesër mbërrin në "San Siro" Vilareali (Figo do të mungojë) dhe vetëm Martinsi arrinte të qeshte me të madhe në stol në Parmë, ndërkohë që skuadra luftonte për të mbijetuar. Nga ana tjetër, të gjithë lojtarët, kur nuk luajnë, janë gjithnjë të gatshëm të garantojnë dashuri të vërtetë për Interin, por rrallëherë e tregojnë në fushë në momentet vendimtare, kur duhen fituar ndeshjet që kanë rëndësi. Tekefundit, duke "peshkuar" mes Moratit, Faketit dhe Mançinit, do të gjendet gjithnjë një fajtor. Megjithatë, ajo që ka rëndësi, janë vetëm shifrat. Kruzi (5 gola në 84 ditë) udhëheq katërshen; Adriano është ndalur në kuotën e tre golave, ndërsa Rekoba dhe Martinsi mbyllin këtë renditje speciale me nga dy gola. Sulmuesi i pestë, pas shitjes së Vierit (12 gola në kampionatin 2004 2005), nuk ka ardhur ende në Milano. Shifra të tilla do t'i shkonin për shtat një ekipi që lufton për të mos rënë nga kategoria.

Çdokush prej të "pandehurve" e ka nga një justifikim, por morali i përrallës është se kriza kolektive e sulmuesve deri tani e ndali gjëmimin e vështirë të Interit ndaj Juves dhe e ka larguar skuadrën edhe nga Milani i vendit të dytë. Adriano, që u duk sikur rilindi me golin që i shënoi Sampdorias (11 shkurt), ra sërish në depresion, pasi gaboi 11-metërshin ndaj Ajaksit dhe këtë e rrëfeu edhe të hënën e kaluar përballë tifozëve, edhe pse duken ende të paqarta arsyet e vërteta të mërzisë së tij. Gjurmët e Martinsit janë humbur që kur shkoi në Kupën e Afrikës, përvojë që vazhdon ende ta kushtëzojë rendimentin e tij; Rekoba, që e rimori veten pas dëmtimit në Sienë (8 janar), u duk shumë në formë ndaj Lacios (dygolësh, 19 shkurt), por i zbehtë ndaj Parmës, edhe sepse nuk kishte hapësira dhe e majta e tij nuk arriti të sillte rezultate të kënaqshme. Kruzi, i vetmi që ka shënuar në kampionat dhe në Champions (ndaj Ajaksit në Amsterdam), luan pak dhe hyn vetëm nëpër situata gjysmë të dëshpëruara.

Sikurse u pa edhe në Parmë, i vetmi që di të luajë mirë në ajër është Kruzi: Adrianos s'i pëlqejnë topat e lartë; Martinsi dhe Rekoba kanë karakteristika të tjera. Deri tani, ata që e kanë mbajtur në këmbë Interin, kanë qenë golat e mbrojtësve dhe të mesfushorëve (Figo, Stankoviç, Kambiaso), por edhe ata që luajnë në sektorin nevralgjik, nuk janë dukur krejt pa faj, sepse në disa ndeshje loja zhvillohet me ngadalësi: mbajtje e tejzgjatur e topit, shumë pasime anësore, me rezultatin që kur topi mnbërrin te sulmuesit, skuadra kundërshtare i ka mbyllur të gjitha hapësirat. Gjithsesi, maja e ajsbergut të kësaj krize mbetet çështja "Adriano".

__________________
The heaven's sound is composed inside your heart, listen to its beat to syncronize your life onto the angel's steps.

Masimo Morati ka ndërhyrë në kuadër të polemikës që ka të bëjë me praninë që nga minuta e parë e Adrianos, në sfidën e Ligës së Kampioneve ndaj Vilarealit, duke ia lënë Roberto Mançinit vendimin përfundimtar: "Unë nuk kam të bëj me këtë gjë, besoj se është trajneri ai që duhet të vendosë, - deklaroi ai. - Janë trajnerët ata që duhet t'i marrin përsipër këto përgjegjësi, më pas është e qartë se mund të diskutohet, por në këto ndeshje delikate është e rëndësishme të kesh autonomi të plotë."

Adriano po, Adriano jo, është kjo dilema që ka mbërthyer mendjet e drejtuesve, tifozëve dhe trajnerit të Interit një ditë përpara ballafaqimit shumë të rëndësishëm të Ligës së Kampioneve ndaj Vilarealit. Nëse nga njëra anë hipoteza për ta lënë Adrianon pushim dhe për t'i lënë hapësirë Martinsit, Kruzit dhe Rekobës, po bëhet ideja kryesore në mendjen e trajnerit, nga ana tjetër Masimo Morati ka pohuar se nuk do të ishte një dramë nëse braziliani do të lihej në stol, duke theksuar besimin e plotë që ka te zgjedhjet e Mançinit. "Nuk merrem me këto gjëra, besoj se duhet t'i vendosë trajneri, ka deklaruar pronari zikaltër teksa dilte nga zyrat e firmës së tij Saras. - Janë trajnerët ata që i marrin përsipër këto përgjegjësi. Është e qartë se më pas edhe mund të diskutohet, por unë besoj se në ndeshje kaq delikate, është e domosdoshme të kesh autonomi të plotë." Por është e pamohueshme nga ana tjetër se Interi po has vështirësi në shënimin e golave: "Këtë defekt e mbartim që nga fillimi i vitit, besoj se nganjëherë nuk shërben të sulmosh shumë, ndoshta edhe mund të mbyllesh pak dhe të arrish të marrësh rezultatin që synon. Adriano? Mund të zhbllokohet vetëm duke shënuar dhe të gjithë shpresojmë dhe lutemi për të."

Mançini, Champions-i mundësia e fundit
Pas fundjavës së punës në Londër, Morati do ta kishte kaluar me kënaqësi të dielën e tij në Forte dei Marmi. Por humbja në Parmë, së bashku me zëvendësimin e Adrianos, ia ndryshuan programin. Kështu që pronari zikaltër u mbyll në shtëpinë e tij, ku shqyrtoi kasetën e ndeshjes së "Tardinit". Morati më pas ka folur me Faketin, me të cilin ka rënë dakord për ta mbështetur Mançinin në rast se trajneri do ta lërë në stol brazilianin në Champions. Por në rast se disfata e javës së fundit në kampionat do të reflektohet edhe në Champions, Mançini vetë s'duhet të jetë edhe aq i sigurt se do ta drejtojë Interin edhe në sezonin e ardhshëm. Mourinjo është me siguri një emër që pëlqehet. Dhe në këtë kuadër çerekfinalet dhe gjysmëfinalet e mundshme të Champions-it janë njëfarë mundësie e fundit për Mançinin: Kupa e Italisë mund të mos mjaftojë më, sidomos nëse do të përsëritej vendi i tretë i sezonit të kaluar.

Simplisio dhe Barone, e ardhmja në mesfushë?
Fabio Simplisio do të jetë zëvendësuesi i Kristiano Zanetit tek Interi në sezonin e ardhshëm. Mesfushori brazilian ka kohë që ndiqet nga klubi milanez, që kohët e fundit ka biseduar edhe me Parmën dhe me përfaqësuesin e lojtarit. Kartoni i tij kushton 8 milionë euro, por ka mundësi që Interi të përdorë strategjinë e këmbimeve. Morati ka ndër mend edhe të arrijë një marrëveshje me Palermon për Simone Baronen: mesfushori çmohet shumë nga Mançini dhe Zamparini tashmë po mendon sa para t'i kërkojë klubit të pasur zikaltër.

__________________
The heaven's sound is composed inside your heart, listen to its beat to syncronize your life onto the angel's steps.

"Në futboll mund të ndodhë gjithçka. Por tani mendojmë vetëm për ndeshjen e Ligës së Kampioneve ndaj Lionit." Milani po kalon një moment të shkëlqyer. Skuadra e Ançelotit fitoi bindshëm të shtunën në mbrëmje ndaj Fiorentinës dhe tani ndodhet tetë pikë larg Juventusit kryesues. Titulli ndoshta është një objektiv që nuk mund të arrihet më, por me siguri ka pak brengë dhe keqardhje në kampin kuqezi, që nuk arritën të shprehnin të njëjtën forcë dhe të njëjtën konkretësi edhe në fazën e parë të Serisë A. "Brenga? Nëse ka ndonjë, nuk është ky momenti i duhur për ta nxjerrë në pah, sepse sezoni ka hyrë në gjallërinë e tij, - ka deklaruar Karlo Ançeloti për mikrofonët e "Tg5". Tani duhet të mendojmë t'i bëjmë gjërat sa më mirë. Ndoshta më pas mund të flasim në fund të sezonit për këto gjëra. Por objektivisht mendoj se kemi pasur mjaft vazhdimësi, edhe pse kemi kaluar disa momente delikate, sikurse është normale."

"Nëse mund ta kapim Juven? Njëfarë shprese na e jep fakti se në futboll mund të ndodhë gjithçka, - ka theksuar trajneri kuqezi, - gjë të cilën unë e kam mësuar kur drejtoja Juven dhe tetë javë përpara përfundimit kishim nëntë pikë avantazh ndaj kuqezinjve. Por hëpërhë nuk është ky mendimi që na stimulon, por ndeshja e ardhshme e Ligës së Kampioneve ndaj Lionit."

Milani që është parë në takimet e fundit, duket thuajse pranë përsosmërisë. "Trajneri e kërkon gjithnjë përsosmërinë dhe e ëndërron atë, - ka shpjeguar Ançeloti, - por është i ndërgjegjshëm se nuk do ta arrijë kurrë, sepse në futboll edhe variacionet e vogla mund të japin rezultate të mëdha. Në këtë moment, Milani është një skuadër e stimuluar dhe e motivuar në të gjithë elementët përbërës të tij." Kapitulli i së ardhmes. Nuk rreshtin zërat këmbëngulës, që nga Spanja vazhdojnë të thonë se do të shkojë te stoli i Real Madridit. "Mjafton të shkoni në 'Lega Calcio' dhe të shikoni kontratën që është depozituar, - ka nënvizuar Karleto, - një sinjal besimi, që tregon se puna e kryer është konsideruar pozitive dhe kjo gjë i jep shumë qetësi një trajneri."

Sheva: Mungesa e Zhuninjos, plus për ne
Shevçenko ndihet i lehtësuar. Kur mungon një ditë nga ndeshja e Ligës së Kampioneve ndaj Lionit, sulmuesi ukrainas i Milanit e shikon formacionin e francezëve dhe buzëqesh: "Do të mungojë Zhuninjo, vuri në dukje ai, dhe ky është një plus për ne. Ai është një "As" për goditjet e dënimit, shumë më i zoti se Ronaldinjo." Qendërsulmuesi i "Djallit" ka shumë besim te mundësitë që ka skuadra e tij për të shkuar në gjysmëfinalet e veprimtarisë kryesore europiane: "Mendoj se Lioni në fushën e tij do të marrë më shumë goditje të lira se në "San Siro", për të cilat Zhuninjo është thjesht i jashtëzakonshëm. Kështu që kjo mungesë është një mundësi e madhe për ne. Për më tepër, përfundoi ish-"Topi i artë", - është më mirë që edhe ata të mos e harrojnë Andrea Pirlon, që është një specialist i madh goditjesh".

Mesina: Ikën Bortolo Muti, vjen Ventura
Pas zërave të shumtë mbërriti edhe zyrtarizimi. Bortolo Muti s'është më trajneri i Mesinës. Shkarkimi, që u vendos pas një mbledhjeje të krerëve të klubit që kryesohej nga presidenti verdhekuq Pietro Franxa, është bërë i ditur nga klubi përmes faqes së tij në internet. Në vend të trajnerit bergamask do të mbërrijë Xhiampiero Ventura, i cili ka ende një kontratë me Napolin, klub nga i cili ishte shkarkuar për t'ia besuar stolin Rejës.

Ajaks, Shneijder: Jam gati për Milanin
Milani i ka drejtuar sytë nga Uesli Shneijder, 21-vjeçari që është një pikë fikse e mesfushës së Ajaksit. Ka kohë që në klubin kuqezi flitet për të dhe bisedimet duhet të jenë shtrirë përderisa zërat kanë mbërritur deri te vetë lojtari. "Ndihem i nderuar nga ky interesim, Milani është një klub fantastik, tha Shneijderi. Për sa kohë nuk do të ketë diçka përfundimtare, nuk mund të them asgjë më shumë. Besoj se jam gati, por vendimi u takon të tjerëve."

Inzagi: Për botërorin nuk jam dorëzuar
Pipo Inzagi rihedh kandidaturën e tij për një vend në botërorin e Gjermanisë: "Nuk jam dorëzuar, shpresoj ende, - tha sulmuesi i Milanit. - Kush është ai që nuk dëshiron të luajë në kombëtare? Kam fituar thuajse gjithçka në karrierën time dhe me kombëtaren më mungon diçka për ta fituar. Dua të ndaloj këtu për të shmangur atë, që fjalët e mia mund të keqinterpretohen. Me Lipin kam një marrëdhënie shumë të bukur. Jam i kënaqur që jam kthyer kështu pas asaj të kaluare."

__________________
The heaven's sound is composed inside your heart, listen to its beat to syncronize your life onto the angel's steps.

Një skuadër e pasuruar. Nga fillimi i sezonit deri më sot janë të paktën 5 lojtarët e Romës, të cilëve vlera e merkatos u është rritur falë rendimentit të tyre. Vitin e shkuar, organika ishte vlerësuar 130 milionë, ndërsa sot i ka kaluar 200 miliorë eurot.
Alberto Akuilani - Është 23 vjeç, mesfushor, pikë referimi në U-21. Këtë vit ka luajtur 20 ndeshje dhe ka shënuar 2 gola.
Çezare Bovo - Është 23 vjeç, mbrojtës. Ka luajtur 18 ndeshje në kampionat.
Filip Mekses - 23 vjeç, mbrojtës francez. Është në sezonin e tij të dytë te Roma. Objekt misterioz vitin e shkuar, por në këtë kampionat është kthyer në pikë e palëvizshme e mbrojtjes.
Simone Perrota - 28 vjeç, mesfushor. 28 ndeshje dhe 4 gola në kampionat.
Rodrigo Tadei - 26 vjeç, mesfushor brazilian: 5 gola në 30 ndeshje.
Pak, por të mirë. Në kuptimin që romanistët janë pak, por flasin të dhënat dhe faktet. Edhe të shtunën ndaj Juventusit, Spaleti ka bërë zgjedhje të detyruara në të gjithë sulmin (Toti, Montela, Nonda) jashtë "loje" si dhe me De Rosin dhe Çivunë po të dëmtuar për 2-3 javë. Mbi përshtatjen e vlerave tekniko-ekonomike flet renditja: vendi i pestë, një pikë larg zonës së Championsit dhe Fiorentinës, 11 fitoret radhazi në kampionat (rekord i ndaluar nga Interi) dhe një organikë që është rivlerësuar pas një sezoni "të frikshëm" një vit më parë.

"BUMI" I MEKSESIT - Akuilani, Bovo, Mekses, Perrota dhe Tadei. Mjafton t'i përmendësh sipas rendit alfabetik për të treguar pesë lojtarët, që në bursën e vlerave të merkatos së futbollit kanë shtuar kuotat e tyre. Shifra më e lartë i përket francezit Filip Mekses, i cili 110 ditë më parë, kur ishte seanca përfundimtare në duelin Roma-Okser, lidhur me kalimin e tij në kryeqytet, u shpreh pak a shumë hapur, që ndoshta ishte më mirë ta humbiste (Roma) sesa të paguante 7 milionë euro. I çliruar nga sikleti i një historie shumë më të madhe se ai, francesi spikati me "fluturimin" e tij dhe përbën sot me Çivunë dyshen qendrore të mbrojtësve më në formë të kampionati