SERIE A - Kampionati Italian - Faqja 11

AlbShkodra · #**351** 21-05-2004, 08:27

Emersoni u thotë "jo" Realit

Emersoni (28 vjeç) i ka thënë "jo" Realit të Madridit dhe i ka ndërlikuar planet e Romës, që kishte ndër mend t'ua shiste brazilianin spanjollëve, për të shmangur kështu kalimin e tij te Juvja (tani duket e sigurt). Ndërkohë që po punohet për të përcaktuar nëse ekzistojnë mundësitë për t'i rinisur bisedimet, dje, lidhur më këtë çështje, është shprehur vetë Emersoni: "Kërkoj vetëm qartësi, - ka deklaruar ai. - Nuk mund të pranoj që të mbetem në një gjendje të tillë. Po pres një telefonatë nga ana e agjentit tim për të mësuar nëse ka arritur një marrëvshje me klubin apo jo. Nëse nuk do të më telefonojë, do të paraqitem gjithsesi në grumbullimin e skuadrës, por s'duhet të jem unë ai që të ngulmojë që të më zgjatet kontrata."

AlbShkodra · #**352** 21-05-2004, 08:28

Redondo: Milan, nuk do të harroj!

Në një intervistë ekskluzive për faqen zyrtare të Milanit në internet, midis të tjerave mesfushori argjentinas Fernando Redondo i ka dhënë zyrtarisht lamtumirën Milanit: "Më vjen shumë keq që do të largohem nga Milani, por kam nevojë të shkoj diku gjetkë për të luajtur më rregullisht. Në moshën që kam jam i vetëdijshëm që nuk kam shumë vite karrierë përpara dhe më duhet t'i shfrytëzoj sa më mirë ato. Unë e konsideroj shumë pozitive eksperiencën time te Milani dhe do të mbetem tifoz i kuqezinjve përgjithmonë. Edhe një herë dua të falënderoj tifozët për marrëdhëniet e veçanta që kemi pasur dhe për mbështetjen që më kanë dhënë. Nuk do ta harroj kurrë." Argjentiansi flet për të kaluarën: "E vetmja gjë për të cilën më vjen keq gjatë eksperiencës sime në Milano ka qenë dëmtimi i rëndë që pësova në vitin e parë, kjo sepse atëherë isha në kulmin e karrierës sime. Por kjo është jeta, ndaj duhet të përballesh me momentet e vështira të saj. Gjithsesi, arrita të zbres në fushë me Milanin dhe të fitoj një kampionat, një Kupë Italie, një Superkupë Evrope dhe, çka është më e rëndësishmja, Ligën e Kampioneve." Ndërsa për të ardhmen Redondo thotë: "Në qershor, pas turneut në Kinë, që do të luaj me Milanin, do të vendos se ku do të luaj sezonin e ardhshëm. Me siguri nuk do të qëndroj në Itali, sepse nuk mund të luaj kundër Milanit. Një ditë do të kthehem sërish në Milanelo për të takuar drejtuesit dhe për të parë një ndeshje në "San Siro". Eshtë një stadium madhështor, të cilin nuk do ta harroj kurrë."

AlbShkodra · #**353** 21-05-2004, 08:29

Roma: Samueli te Reali, Zebina te Juve

Samueli është i Realit të Madridit. Mungon ende zyrtarizimi dhe, me sa duket, Roma do të përpiqet ta "zvarrisë" sa më shumë të jetë e mundur, të paktën deri në fund të majit, për arsye të karakterit financiar, që lidhet me planin e rishërimit të klubit. Marrëveshja mes dy klubeve është arritur. Shifra që do të hyjë në arkat e skuadrës romane do të jetë rreth 22 milionë euro. Mes së hënës dhe së martës, Florentino Perezi ka realizuar gjithçka. Presidenti i klubit spanjoll kishte afruar fillimisht 18 milionë euro dhe më pas e kishte çuar ofertën deri në 20. Por në orët e fundit ajo shkoi deri në 22, duke marrë edhe përgjigje pozitive nga ana e familjes Sensi. Dhe të hënën, pikërisht në Madrid mund të thonë diçka më shumë, duke pasur parasysh se Perezi tanimë e ka në xhep marrëveshjen pesëvjeçare me argjentinasin (menaxheri i mbrojtësit ndodhet në Romë prej së hënës, por ka nga ata që garantojnë se gjatë rrugës është ndalur më parë në kryeqytetin spanjoll. Me siguri, të hënën mbrëma ai ka pasur një takim të gjatë edhe me Baldinin). Samueli do të përfitonte diçka më pakë se 4 milionë euro në sezon. Baldini ka disa javë që po punon për të kërkuar zëvendësuesin e argjentinasit dhe të Zebinasë, i cili të hënën ka arritur marrëveshjen me Juven. Tani është zyrtare: mbrojtësi francez 25-vjeçar, pas 4 sezonesh me Romën, do të veshë fanellën bardhezi në kampionatin e ardhshëm. Zebinaja, i cili ndodhej fare pranë Milanit, bëhet i Juves me parametër zero. Klubi torinez do ta bëjë publike arritjen e marrëveshjes sot ose nesër. Tani qendërmbrojtësi do ta ketë më të vështirë dhe do të mbajë më tepër përgjegjësi, pasi do ta nisë titullar sezonin e ri. Mulati shtatlartë është shprehur: "Ndaj Juves kam shënuar golin tim të vetëm në kampionat me fanellën verdhekuqe. Siç duket, kjo ka qenë një shenjë fati. Është një nder për mua që do të lë një skuadër të madhe si Roma, për të shkuar në një tjetër klub të madh, sikurse është Juventusi." Strategjia e Romës tani është kjo: objektivi i parë është Meksesi, qendërmbrojtësi i Okserrit. Francezi po diskuton me klubin e tij për të shmangur ndonjë gjyq dhe për t'u larguar, sikurse i ishte premtuar me një shifër më të vogël, në krahasim me çmimin aktual të kartonit, rreth 10 milionë euro. Nëse Meksesi do të arrijë t'ia dalë mbanë shpejt, Roma mund ta blejë rreth 5 milionë euro. Të njëjtën shifër, ndoshta edhe diçka më pak, Roma mund ta investonte edhe për Bonerën, i cili s'është alternativë për Meksesin, por zëvendësuesi ideal i Zebinasë, ose më saktë një mbrojtës që di të luajë si në qendër ashtu edhe në krah. Kësisoj, francezin plus Bonerën. Nëse s'do të mbërrijë Mekesesi, Baldini mund të marrë Ferrarin, që mbetet alternativa kryesore.

AlbShkodra · #**354** 21-05-2004, 08:30

Parmensi: E ardhmja është imja

E ardhmja është imja dhe më përket mua. Nëse vazhdoj të bëj mirë, një ditë do të jem edhe unë pjesë e kombëtares së të mëdhenjve." Diplomaci e vërtetë e Alberto Xhilardinos, zbulimi i ri i futbollit italian, që mbush 22 vjeç në korrik dhe është golashënuesi i dytë më i mirë i kampionatit të Serisë A, me 23 gola, një më pak se Sheva. I qeshur, i gatshëm dhe i qetë, "Xhila" është paraqitur dje në Koverçiano, në ditën e parë të stërvitjes me U-21. Pavarësisht nga dëshpërimi personal dhe popullor, që provokoi mungesa e grumbullimit në kombëtaren e të mëdhenjve në Euro 2004, sulmuesi i ri i Parmës ka vendosur, duke marrë shkas edhe nga këshillat e njerëzve të afërt, të mos polemizojë. Në fjalët e tij kuptohet keqardhja që nuk do të marrë pjesë në evropian. "Nuk e mohoj që kam shpresuar, - pranon Xhilardino, - por nuk kam ndier asnjë keqardhje dhe e kam përjetuar gjithçka me qetësi, pa polemika. Nëse do të thirresha nga Trapatoni, do të ishte një kënaqësi më shumë pas një sezoni të mrekullueshëm. Kam ditur ta pres radhëm time, edhe pse Prandeli më ka dhënë gjithnjë besim, ndërsa kur Adrianoja u largua, isha i gatshëm. Si po reagoj pas këtij popullariteti? Duke qëndruar me këmbë në tokë dhe duke kujtuar të gjitha sakrificat e bëra." Pyetjes nëse Trapatoni i telefonoi për t'i dhënë një shpjegim, Xhilardino u përgjigj: "Nuk më telefonoi, sepse nuk ishte nevoja. Nëse është justifikuar me faktin që s'kam përvojë ndërkombëtare, ndoshta ka pasur arsyet e veta dhe diçka të vërtetë ka, duke parë që ka thirrur lojtarë të aftë dhe të mirë, si Vieri e Korradi, që i çmoj gjithnjë. Megjithatë, tani jam i përqendruar te kjo aventurë. Dua të fitoj Evropianin U-21 për të marrë më pas pjesë në olipiadë." Më pas, numri 11 verdheblu, që kërkohet nga gjysma e klubeve të Evropës, shtoi për merkaton: "Shpresoj të marr një vendim pas Evropianit dhe uroj që kur të kthehem në Parmë, të gjej përgjigje pozitive nga klubi. Nëse nuk do të jetë kështu, do të shoh. Di që ka një interesim të Juves dhe është një hipotezë e hapur, edhe pse nuk kam takuar asnjë drejtues të klubit bardhezi deri tani. A më pëlqen të luaj me Totin e Kasanon? Po, shumë, Roma është një tjetër zgjidhje. E përsëris, nëse nuk mund të qëndroj në Parmë dhe nëse më vjen një ofertë e mirë, do të zgjedh Italinë. Nëse nuk ndodh kështu, jam i gatshëm të pranoj oferta edhe jashtë Italisë."

AlbShkodra · #**355** 21-05-2004, 08:31

Laursen: Faleminderit dhe lamtumirë Milan!

Pas blerjes së Jap Stamit, danezi Martin Laursen i ka dhënë lamtumirën Milanit. "Preferova të mos e rinovoj kontratën dhe do t'u kërkoj drejtuesve të Milanit që këtë verë të më shesin. Dua të falënderoj Milanin për eksperincën që më dha në këto dy vite të mia me ngjyrat kuqezi. Shpresoj të gjej një skuadër të re përpara kampionatit evropian, në mënyrë që të luaj i qetë në Portugali."

AlbShkodra · #**356** 21-05-2004, 08:31

Kozmi, alternativa e "Don Fabios"

Në rast se gjatë takimit të së enjtes drejtuesit e Romës dhe Fabio Kapelo nuk do ta gjejnë gjuhën e përbashkët për shkak të shitjeve të mundshme këtë verë të Emersonit dhe Samuelit, Roma e ka gjetur zëvendësuesin e tij. Bëhet fjalë për trajnerin aktual të Peruxhias, Serse Kozmi, një tifoz i deklaruar i verdhekuqve. Kozmi ka bërë të ditur se do të largohet nga Peruxhia, pavarësisht nga rezultati i ndeshjes shtesë që skuadra umbre do të luajë për qëndrimin në Serinë A me të gjashtën e Serisë B. Kozmi është bërë alternativa kryesore për të zëvendësur Kapelon, pasi Karleto Macone zgjati kontratën e tij me Bolonjën. Gjithsesi, kjo do të ndodhë vetëm në rast se "Don Fabio" vendos të japë dorëheqjen. Të premten vendoset gjithçka.

AlbShkodra · #**357** 22-05-2004, 07:09

Zebina: Te Juvja për të fituar
"Juventusi ka mendësinë e veriut. Një klub që ka një kulturë të vërtetë të fitoreve. Te Roma kemi pasur lojtarë të jashtëzakonshëm. Kemi qenë edhe kampionë të Italisë, një moment i mrekullueshëm, por unë kam ende oreks. Mund të kishim fituar edhe më shumë. Shpresoj t'ia dal me Juventusin". Një ditë pas kalimit te Juventusi, Xhonatan Zebina shprehet: "Gjithçka ndodhi shumë shpejt dhe bisedimet e para me Juven u bënë para tri ditësh. Ata treguan se më donin vërtet. Me Milanin kishim pasur kontakte në 2-3 muajt e fundit, pastaj asgjë. Me Romën nuk m'u dha mundësia të rinovoj kontratën për vështirësitë ekonomike që dihen. Megjithatë, kam ardhur këtu për të fituar."

AlbShkodra · #**358** 22-05-2004, 07:10

Juve: Deshampi vjen pas "Championsit"

Vazhdon heshtja dhe enigma mbi trajnerin e ri të Juventusit. Por është një heshtje që flet dhe parashkruan emrin e Didier Deshampit. Juventusi, prej dy javësh, shtyn ditë pas dite pohimin, duke u justifikuar gjithnjë me mënyra të ndryshme, si për shembull me atë të javës që vjen, dita e finales së Ligës së Kampioneve. Është një kërkesë e bërë nga vetë trajneri francez për të mos i shpërqendruar lojtarët e Monakos para sfidës vendimtare të Gelzenkirshenit. Dhe drejtuesit bardhezinj e kanë kuptuar dhe miratuar vendimin e tij. Luçiano Moxhi kishte premtuar zyrtarizimin e pasardhësit të Lipit një ditë pas finales së Kupës së Italisë (13 maj) të mërkurën e shkuar, gjë që nuk u bë dhe drejtori i përgjithshëm juventin kërkoi një tjetër javë kohë. Por para dy ditësh skadoi edhe ajo. Tani, në rrugën "Galileo Ferraris" (selia qendrore e klubit bardhezi), të bëjnë të ditur se midis ditës së sotme dhe së hënës që vjen mund të shpallet pohimi i pritur.

AlbShkodra · #**359** 22-05-2004, 08:12

BOLOGNA KONFIRMON IGLI TARE-n

Igli Tare do të qëndrojë edhe një sezon tjetër në skuadrën e Bologna-s. Kjo si pjesë e planit të forcimit të skuadrës, ku të pashitshëm janë tre personazhe të saj, traineri Carletto Mazzone, portieri Gianluca Pagliuca dhe bjondi shtatlartë i kuqezinjve, protagonist i një sezoni perfekt në të parin që u aktivizua me skuadrën kuqeblu, pas transferimit nga Brescia. Konfirmohet edhe një herë forma e mirë e Tare-s, që e bën atë sërish sulmuesin kryesor të skuadrës sonë përfaqësuese aktualisht. Ndërkohë mes atyre që do të largohen spikasin emrat e portierit austriak Manninger, Zaccardo-s, Troise-s dhe Emiliano Moretti-t. Lënë Bologna-n edhe mesfushorët Dalla Bona e Guly. Mund të qëndrojnë të rinjtë Loviso, e Meghni si dhe veterani Nervo. Dyshime për Locatelli-n, Colucci-n e Pecchia-n, ndërsa jepet i sigurtë edhe transferimi i Claudio Belluci-t.

AlbShkodra · #**360** 31-05-2004, 22:51

CARVALHO ME ÇDO KUSHT!

Ricardo Carvalho dhe Inter, një “martesë” që mund të bëhet. Zikaltërit e ndjekin prej kohësh qëndërmbrojtësin e Porto-s dhe paraqitja e tij ka bindur. 26 vjeçari është gati për të përballuar kampionatin Italian dhe në rrugën “Durini”, janë të vendosur për t’a marrë në “Appiano Gentile”. Pengesa e vetme që mund të gjejë Inter është transferimi i Josè Mourinho, që kërkon t’a marrë mbrojtësin te Chelsea. Në rast të kundërt, zikaltërit janë të lirë të bisedojnë me “dragone”, kampion i Evropës. Porto ka fiksuar një çmim prej 9 milionë eurosh, por tratativa mund të vendosë gjithshka shumë shpejt.

AlbShkodra · #**361** 31-05-2004, 22:52

LUIS FABIANO KERKON KUQEZINJTE
Luis Fabiano dëshiron Milan. Kuqezinjtë kanë ndërkohë një opsion për talentin e ri brazilian, që do t’a shfrytëzojnë me shumë mundësi sezonin e ardhshëm. Aktualisht nuk ka hapësirë për mikun e Kakà te “rossoneri”-t, që do të plotësojnë boshllëkun e krijuar në sulm me Bernardo Corradi-n, lojtar me eksperiencë të provuar. Një vit mund të ndihmojë Milan-in që kërkon të studiojë progresin e “xhevahirit” në San Paolo, si teknikisht dhe në karakter.
Ajo që mbetet, është se 23 vjeçari ka siguruar se nuk do të dijë për Spanjën dhe Barcellona-n, që kanë bërë gati edhe një ofertë për të, duke shkuar aq larg sa përmënd edhe dokumentat false për të shkuar në Itali. Edhe një vit dhe Kakà do të bashkohet me mikun e tij në Milanello.

AlbShkodra · #**362** 05-06-2004, 09:52

Inter, zgjidhet çështja "Solari"
Është mbyllur më në fund dje në mëngjes në Lozanë çështja "Solari". Reali i Madridit do t'i paguajë 8 milionë Interit, duke zgjidhur kështu mosmarrëveshjen dyvjeçare me zikaltrit. Marrëveshje është arritur falë ndërhyrjes së UEFA-s. Likuidimi i plotë do të kryhet më dy këste. Në gusht 2002 Ronaldo kaloi te "merengesat për 35 milionë euro, plus një lojtar (Solari) që mund të merrej brenda janarit të 2003-shit. Në rastë refuzimi, Interit do t'i takonin 10 milionë euro. Dhe Solari nuk ka ardhur kurrë në Milano, duke qenë se nuk ka arritur një marrëveshje me klubin e rrugës "Durini". Kësisoj, Gjykatës Ndërkombëtare Sportive i ishin drejtuar madrilenët, të cilët e kundërshtonin kërkesën prej 10 milionë eurosh të klubit italian. Që në dy shkallët e para të gjykimit, zikaltërve u ishte dhënë e drejtë.

Di Vaio: Eshtë ëndërr të luash me Adrianon
Marko Di Vaio është gati për të kaluar tek Interi dhe ëndërron të luajë bashkë me Adrianon. Në Koverçiano, argumenti i ditës së djeshme ka qenë rikthimi i mundshëm i Kristian Vierit te Juvja. Morati do të ishte i gatshëm ta shiste në këmbim të sulmuesit bardhezi. "Varet gjithçka nga Vieri, nga dëshira e "Bobos", ? ka deklaruar golashënuesi roman, i cili te Juvja nuk ka gjetur kurrë aq hapësirë sa do të kishte dëshiruar. ? Me sa kuptoj unë, çështja do të realizohet. Tek Interi do të rigjeja Adrianon. Për mendimin tim, ai ka karakteristikat për t'u bërë lojtari më i madh në botë. Me të kam luajtur tre muaj te Parma dhe aq më ka mjaftuar për të kuptuar se ai ka një potencial të jashtëzakonshëm. Duke parë karakteristikat e tij dhe ato të mia, them se është pikërisht ai partneri im ideal në sulm. Adriano?Di Vai, dyshja ideale e Mançinit? Nuk e di, ashtu sikurse nuk e di nëse do të jetë ai trajneri i ri i Interit, apo do të qëndrojë Zakeroni. Do të doja që klubi të më thoshte diçka, ? përfundoi Di Vaio, ? në një mënyrë apo në tjetrën, brenda pak ditëve. Megjithatë, derisa të mos më thonë të kundërtën, unë ndihem pjesë e Juves."

AlbShkodra · #**363** 12-06-2004, 18:18

MORATTI REFUZON ANGLEZET

Oferta e zakonshme e Roman Abramovich, gjithnjë në kërkim të yjeve në kampionatin italian. Sërish objektivat e miliarderit rus lidhen me Inter.
Braziliani Adriano, 22 vjeç kërkohet nga padroni i Chelsea-t që është gati të ofrojë 45 milionë euro plus argjentinasin Crespo. Kjo pas përgjigjes negative që mori për ukrainasin Shevchenko. Mirëpo Moratti përsërit kolegun Galliani – “Më vjen keq, por ylli ynë nuk preket".