Fitorja e tretë radhazi për Vllazninë

Fitorja e tretë radhazi për Vllazninë, megjithëse kjo ndaj Lushnjës nuk bindi. Takimi ka filluar i qetë, me ngacmime të herëpashershme në të dyja portat. Skuadra shkodrane kërkon me ngulm të shënojë golin e parë të këtij takimi, por lushnjarët mbrohen mjaft mirë. Skuadra e Agim Canajt luan me kujdes në prapavijë, duke mos harruar të kundërsulmojë herë pas herë me veprimet e shpejta të Kadiut, Norës dhe Boriçit. Kuqeblutë, nga ana e tyre, kanë vijuar të luajnë me 4 mbrojtës në vijë të drejtë, ndërkohë që është rikthyer në formacion këtë herë i mirënjohuri Edi Martini. Megjithatë, loja e vendësve, me përjashtim të 5 minutave të fundit të pjesës së parë, nuk u ngjit në nivelin e duhur. Vetë mënyra sesi e kërkonin golin futbollistët e Vllaznisë ka lënë shumë për të dëshiruar. Me fillimin e pjesës së dytë pritej që trajnerët e ekipit shkodran të bënin ndonjë zëvendësim apo lëvizje taktike, por asgjë. Megjithatë, goli i Sinanit do të krijonte njëfarë qetësie te shkodranët, të cilët, nga ana tjetër, nuk rregullojnë asgjë në lojën e tyre. Lushnjarët, përkundrazi, duke mos u pajtuar me disavantazhin, hedhin në fushë edhe dy sulmuesit e tjerë, Byzhytin dhe bullgarin Mindev. Për pasojë, duhet pranuar që djemtë e Canajt e rritën shumë lojën e tyre, aq sa nuk dolën me pikë nga Loro Boriçi. Vllaznia ka fituar, por ishte një fitore e kontestuar gjatë nga tifozët e saj.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Esat Rakiqi, zv.trajner i Vllaznisë:

"Ishte një ndeshje e vështirë për ne, ashtu si gjitha ndeshjet e fundit që kemi zhvilluar në Shkodër. Tiofozët tanë, ndoshta me të drejtë, nuk ishin të kënaqur me lojën që zhvilluam, por edhe ekipi nuk ka kaluar momente të mira. Megjithatë, po e mbyllim këtë vit në një vend disi komod, duke pasur parasysh vështirësitë që kaluam në fillim të sezonit."

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Të veçanta

- Shumë pak tifozë në stadium, rreth 1500 veta, por edhe ata e kanë kontestuar gjatë lojën e Vllaznisë, duke replikuar herë pas here edhe me stolin e saj.
- 45 minuta ka qëndruar në nxehje Bokatola, ndërkohë që Haxhiosmanoviçi nuk vendosi për ta aktivizuar në fushë. Një vendim të tillë e mori vetëm në minutat shtesë të ndeshjes, por atëherë ishte afrikani që e refuzoi.
- I pranishëm në ndeshje ka qenë edhe ish?futbollisti i Vllaznisë, gjirokastriti Bledar Devolli. Vetë ai nuk e ka fshehur dëshirën për t'u kthyer sërish në Shkdoër.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Kuqeblutë nuk janë bërë bashkë që nga ndeshja me Lushnjën. Asnjë njoftim zyrtar se kur duhet të mblidhen

Vllaznia, 2003-shi mbyllet pa analizë

Ekipi shkodran ka marrë pushimet dimërore. Që prej së mërkurës, kur luajtën ndaj Lushnjës, kuqeblutë nuk janë stërvitur, por po mendojnë për festat e fundvitit. Pushimi për ta do të vazhdojë deri në ditët e para të janarit, kur do të fillojnë përgatitjet për pjesën e dytë të sezonit. Në fakt, kuqeblutë nuk kanë marrë ndonjë njoftim se kur do të grumbullohen sërish për t'i vijuar stërvitjet dimërore. Sipas vetë atyre, skuadra është në pritje të njoftimit apo telefonatës së drejtuesve të klubit për të bërë takimin e parë për sezonin tjetër. Kësisoj, gjërat mbesin vetëm në kuadrin e deklaratës së presidentit Agron Çela, i cili pak ditë më parë dha disa hollësi mbi vendin dhe datat e zhvillimit të përgatitjeve dimërore. Siç dihet, Vllaznia ka zgjedhur qytetin e Ulqinit për të zhvilluar përgatitjet dimërore për dy fazat e mbetura të kampionatit, stërvitje kjo e planifikuar për t'u zhvilluar nga data 5 deri më 18 janar. Por në këto ditë pushimi, ajo që pritej dhe që duhej të ndodhte ishte një analizë e hollësishme e dy fazave të para të kampionatit, për të evidentuar të metat dhe dobësitë e vërejtura. Këto 4 muaj punë, normalisht kërkojnë edhe një bilanc nga ana e sponsorëve të ekipit, të atyre që kanë meritën e afrimit pranë Vllaznisë dhe moslënien e rrëshqitjes së saj drejt greminës. Çela & Co kanë bërë një punë për t'u pasur zili, ndonëse përvoja e tyre në këtë fushë ka qenë e pakët, për të mos thënë që nuk ka ekzistuar. Megjithatë, edhe vetë ata, në momente të veçanta mund të kenë gabuar në përzgjedhjen e elementit të ekipit apo të disiplinës së tij, në kompetencat e dhëna trajnerit apo dhe në masat ndëshkuese ndaj futbollistëve të veçantë, që shpeshherë kanë tentuar të ngrenë krye. Viti 2003 po mbyllet pa asnjë lloj analize, e cila do t'i shërbente shumë Vllaznisë për ta filluar mbarë 2004-n. Më 5 janar, kur të grumbullohet skuadra, nuk do të jetë e saktësuar ndoshta lista e lojtarëve që Haxhiosmanoviçi dëshiron të ketë në dispozicion. Në të, sipas vetë deklaratës së "Dedës", mund të ketë edhe lojtarë që do të largohen nga Vllaznia. Por a do të jetë dakord me këtë presidenca e klubit, pasi kontratat me futbollistët i kanë nënshkruar në fillim të sezonit?
Sidoqoftë, më 5 janar, kuqeblutë duhet të jenë të grumbulluar në hotelin "Olimpik" të Ulqinit, me shpresën që të jenë të kompletuar edhe me lojtarët që dëshirojnë drejtuesit teknikë të tyre.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Kuqeblutë, merkatoja fokuson lojtarët vendës

Periudha e ndërprerjes së kampionatit do të jetë e shoqëruar edhe me lëvizjet e shumta të skuadrave në merkato. Secila prej tyre do të mundohet të marrë ata lojtarë që dëshirojnë trajnerët e tyre. Këta të fundit, të ndërruar të gjithë në këto 18 javë kampionat, normalisht që dëshirojnë lojtarë të tjerë, ngaqë vetë nuk kanë qenë në stolat e këtyre ekipeve kur ka filluar kampionati. Kështu i ka ndodhur edhe malazezit të Vllaznisë, Dervish Haxhiosmanoviç. Nga çfarë ka rezultuar më vonë, është parë qartë se ai nuk do të dëshironte të kishte në ekip disa lojtarë, ashtu siç do të dëshironte të kishte disa të tjerë. Tani kur mundësia për të ndërhyrë në merkato ekziston, "Deda" ka dhënë preferencën e tij: "Do të dëshiroja që planet tona të merkatos të drejtoheshin drejt kampionatit shqiptar. Aty ka mjaft lojtarë cilësorë, që do të na bënin shumë punë, pa pasur nevojë të testojmë afrikanë, apo ku di unë çfarë tjetër,"- ka deklaruar ai.
Një pohim i tillë ka ardhur ndoshta nisur nga mërzia që krijoi te shkodranët testimi i kongolezëve të shumtë. Malazezi i stolit kuqeblu ka dhënë edhe mendimin e tij sesi duhet operuar në merkato. "E mira do ishte që lojtarët t'i blinim pasi t'i kisha parë unë më parë,"- ka thënë ai. Pavarësisht nga kjo, Haxhiosmanoviçi duket se nuk e fsheh dëshirën për të sjellë në Shkodër edhe dy-tre futbollistë malazezë, që ai e njeh mjaft mirë. Bëhet fjalë për mesfushorin Valento Canaj, që ka luajtur edhe me parë me Vllazninë, dhe për sulmuesin Vukoviç. Të dy këta lojtarë po luajnë me mjaft sukses në radhët e ekipit Com të Podgoricës, që militon në kategorinë e parë të futbollit serbo?malazez. Ndërkohë, emrat e Resulit, Brahjes, Perloshit, Karapicit dhe Devollit tashmë janë bërë të njohur si kandidatë seriozë për t'u veshur kuqeblu në pjesën e mbetur të kampionatit.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Ndoja: Nuk jam rezervë e askujt

Portieri që mbrojti portën e Vllaznisë në 5 javët e fundit të fazës së dytë të kampionatit, Gaspër Ndoja, nuk e konsideron veten inferior në skuadër, pas rikthimit në radhët e kuqebluve të Arjon Mustafës. Në një deklarim të tij për "Sportin shqiptar", ai ka bërë të ditur se do të luftojë për të qenë titullar në formacionin e trajnerit Haxhiosmanoviç. "Unë mendoj se me ardhjen e Mustafës në ekip, porta e Vllaznisë është garantuar më tepër, por kjo nuk do të thotë se tashmë e shoh veten inferior. Ambiciet e mia janë të tilla që të punoj edhe më tepër, për të fituar një vend titullari në formacion,"- thotë 22-vjeçari. Në fakt, karriera e tij sportive është për t'u marrë në konsideratë, sepse u përket të gjitha ekipeve kombëtare të moshave. I dalë nga duart e xhaxhait të tij, të madhit Paulin Ndoja, Gaspër Ndoja është pjekur gradualisht, derisa ka ardhur këtu ku është sot. Largimi i Grimës i hapi vendin e titullarit te Vllaznia, duke iu krijuar mundësia të tregojë aftësitë e vërteta. Në 5 ndeshje që ai e ka mbrojtur portën kuqeblu, Gaspër Ndoja ka bërë një figurë shumë të mirë sportive. Madje është konsideruar njeriu i fitoreve të Vllaznisë në takimet me Flamurtarin, Shkumbinin dhe Lushnjën. Pritjet e tij kanë qenë vendimtare, aq sa te presidenca e klubit u krijua mendimi se Vllaznia nuk do të shikonte nga merkatoja për portier. Megjithatë, rikthimi i Mustafës në "origjinë" është një tregues pozitiv, aq më tepër që rivaliteti për të zënë vend mes katërkëndorit kuqeblu tashmë është rritur. Gaspër Ndoja e sheh shumë të rëndësishme stërvitjen që do të zhvillojë Vllaznia në Mal të Zi, pas së cilës do të kenë marrë rrugë edhe disa pikëpyetje, për sa i takon veshjes së fanellës me numrin 1 te Vllaznia. "Është diçka pozitive që do të zhvillojmë këtë fazë përgatitore, në prag të nisjes së fazës së tretë. Do të jetë një mundësi e mirë për të treguar gjithsecili vlerat e veta, në mënyrë që kur të fillojnë ndeshjet zyrtare, në fushë të luajtë më i miri. Ai që do të tregojë formë të mirë sportive, le ta mbrojë edhe portën e Vllaznisë. Unë do të punoj me ngulm që ta bind trajneri Haxhiosmanoviç se e meritoj të qenit në formacion,"- ka vijuar më tej Gaspri.
Këto fjalë nuk duken pjesë e ndonjë ambicieje të tepërt të tij, por e sinqeritetit për të punuar me dëshirë, në mënyrë që t'i bindë të gjithë se familja Ndoja ka nxjerrë edhe një tjetër portier të talentuar. Po ashtu, në deklaratën e tij, kupton qartë se, më tepër se dëshira për të luajtur vetë, është dhënia e garancisë për ruajtjen e portës shkodrane. "Unë vërtet pretendoj të jem portier i parë i Vllaznisë, por më e rëndësishme është që së bashku me Mustafën ta garantojmë ruajtjen e saj. Sa për vete, them se ajo çka tregova në 5 ndeshjet e fundit është vetëm një pjesë e asaj çfarë di të bëj dhe që do të kem mundësi ta demonstroj në ndeshjet e ardhshme," - thotë në fund 22-vjeçari i talentuar i portës shkodrane, Gaspër Ndoja.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Vllaznia, lamtumirë pushimeve

Skuadra shkodrane u ka dhënë fund ditëve të saj të pushimit, për të nisur kësisoj stërvitjen dimërore. Vllaznia ka lënë dje Shkodrën, për t'u nisur drejt Ulqinit, vend ku do të qëndrojë dy javë me radhë. Në orën 15.00, të gjithë futbollistët e njoftuar nga zëvendëstrajneri Rakiqi janë mbledhur në ambientet pranë stadiumit "Loro Boriçi". Ka qenë i pranishëm i gjithë kontigjenti i futbollistëve, pjesë e skuadrës kuqeblu deri në fund të vitit 2003, duke u shtuar atyre edhe tri blerjet e fundit, Mustafën, Karapicin dhe Resulin. Autobusi i Vllaznisë ka kaluar në pikën doganore rreth një orë më vonë, ndërkohë që në ambientet e hotelit "Olimpik" në Ulqin ka mbërritur rreth orës 16.30. Sipas bisedës telefonike, merret vesh që në orët e para të darkës, me skuadrën shkodrane është bashkuar edhe trajneri i saj, Dervish Haxhiosmanoviç. Ky i fundit ka udhëtuar veçmas nga Podgorica, qyteti i tij i lindjes, drejt Ulqinit, për t'u vënë në krye të kuqebluve. Natën e mbrëmshme shkodranët e kanë kaluar në qetësi, për të vijuar sot paradite me stërvitjen. Siç dihet, në varësi të stërvitjeve të mëparshme, kuqeblutë i pret një "dajak" i fortë. Haxhiosmanoviçi nuk mund të pranojë të këtë në skuadrën e tij lojtarë që nuk mund të vrapojnë, nuk mund të pranojë të drejtojë futbollistë që nuk janë në gjendje të përballojnë si duhet një 90-minutësh. I vetmi që nuk ka mundur të kapërcejë dot kufirin shqiptaro?malazez ka qenë kongolezi Bokatola. Ai ka qenë i pranishëm dje në momentet e nisjes së ekipit drejt Ulqinit, por nuk ka udhëtuar me të, për shkak të mungesës së vizës përkatëse. Pritet që afrikani të pajiset me një vizë të tillë këto 2?3 ditë, për t'iu bashkuar më pas në stërvitje Vllaznisë.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

2003: në 10-vjetorin e Referendumit "Sportklubi i Vitit"

Befasia "Vllaznia" dhe mendësia e prapambetur e shoqërisë sportive shqiptare

* Klubi sportiv i Shkodrës është "Sportklubi i Vitit 2003"

Ndoshta befasia më e madhe e vitit sportiv 2003 që tejkaluam para gjashtë ditëve, është fitimi për herë të parë prej Vllaznisë së Shkodrës, i titullit të "Sportklubit më të mirë të Vitit" në Shqipëri. Eshtë një befasi, sepse klubi sportiv shkodran, më i vjetri dhe më nobël i Shqipërisë, prej të cilit përveç të tjerave, kanë ardhur tek ne mbi 90 përqind të sporteve, duke filluar nga futbolli e duke mbaruar me atletikën e çiklizmin, përjeton situatën e rëndë që përjeton vetë Shkodra e braktisur. Vllaznia e Shkodrës sapo rimëkëmbi stadiumin e saj ende gjysmë të ndërtuar dhe ka pak vite që asaj i funksionon një palestër e mbyllur sportive. Por Shkodra nuk ka pistë atletike, nuk ka rrugë për çiklizëm, nuk ka pishinë noti, nuk ka salla stërvitjeje, nuk ka bazë minimale materiale, nuk ka financë sado pak shtytëse. E për çudi ka sport. Le ta spjegojmë më së pari se çka përfaqëson ky sukses i Vllaznisë. Referendumi "Sportklubi i Vitit" është themeluar nga autori i këtyre rradhëve më 1993 kur ai ishte kryeredaktor i gazetës "Sporti Shqiptar" të risjellë prej tij; dhe ka vazhduar të organizohet në "Futbolli Shqiptar -MAGAZINE" duke u komentuar për të dytin vit me rradhë gjerësisht në të përditshmen "TemA". Qëllimi i këtij Referendumi ka qenë që në fund të vitit të dalë një matës-renditje deri diku objektive, për gjithë klubet e Shqipërisë, të cilët i'a arrijnë të fitojnë sado pak veprimtari, tituj, medalje, arritje ndërkombëtare brenda 365 ditëve. I matur përmes një pikëzimi (3 pikë për një titull kampion, 2 për fitues i Kupës Kombëtare, 3 për rekord kombëtar, 10 për Kampion i Evropës, 5 për Kampion i Ballkanit, 15 për rekord olimpik, botëror a evropian, 7 për medalje ari në turne ndërkombëtarë, 4 për fitues të një ndeshje të KB, KE, Kupës së Evropës e tjerë), Referendumi ka aftësinë të rendisë (klasifikojë) klubet sportive në arritjet e tyre të vitit dhe të japë në masën mbi 80 përqind saktësi, të vlerave të tyre të një viti sportiv. Referendumi dhe Renditja e tij të japin mundësinë të vështrosh, e mandej të analizosh, mbi ecurinë e klubeve sportive, gjëndjen dhe fortësinë e tyre, brishtësinë dhe çformimin e tyre, hopin dhe rënien e tyre. Midis këtij formimi dhe çformimi, midis këtij negativiteti dhe pozitiviteti, përfundimet e Referendumit gjithmonë ngjallin diskutime dhe befasojnë. Sivjet befasia e ka emrin Vllaznia e Shkodrës, ajo e cila nuk kishte fituar asnjëherë vendin e parë gjatë 10 edicioneve të parë të Referendumit qysh nga vitit 1993, kur ai u organizua për herë të parë, fituesit e të cilit, tash duke përfshirë edhe 2003-shin, janë këta:

1993 Partizani

1994 Partizani

1995 SK Tirana

1996 SK Tirana

1997 Partizani

1998 Partizani

1999 SK Tirana

2000 SK Tirana

2001 Partizani

2002 SK Tirana

2003 Vllaznia

Shihet që në 10 edicionet e parë ka sunduar kryeqyteti dhe vetëm dy klubet e mëdhenj të tij, Partizani e SK Tirana, me nga 5 fitore secili. Dhe kur pritej kalimi në krye i njerit prej tyre, papritmas shfaqet Vllaznia e Shkodrës, duke fituar për herë të parë. Madje një nga fitoret më të bujëshme, sepse largësia e saj 55 pikë mbi rivalin më të afërt, klubin Dinamo, është ndër më të thellat në këte histori 11-vjeçare. Kështu, renditja e Referendumit 2003 "Sportklubi i Vitit", sipas pikëzimit tonë, duke gabuar në të mundshmen më të pakët, është kjo:

1. VLLAZNIA / Shkodër 157

2. DINAMO / Tiranë 102

3. SK TIRANA / Tiranë 98

4. PARTIZANI / Tiranë 83

5. STUDENTI / Tiranë 63

6. KS ELBASANI / Elbasan 60

7. TEUTA / Durrës 35

8. FLAMURTARI / Vlorë 32

SKENDEREBEU / Korçë 32

10.BUTRINTI / Sarandë 29

11.LUFTETARI / Gjirokastër 21

TIRANA - HEIM / Tiranë 21

13.SHTERMENI / Shtërmen 18

14.POGRADECI / Pogradec 17

15.KLAJD KLUB / Tiranë 14

16.TOMORI / Berat 9

17.APOLONIA / Fier 7

18.ADA / Tiranë 6

SHKUMBINI / Peqin 6

20.VALBONA / Tropojë 5

21.BESELIDHJA / Lezhë 4

22.ALBPETROL / Patos 3

23.Mj.SPORTIVE / Tiranë 2



Ku u mbështet ose prej ku lindi fitorja befasuese e Vllaznisë?

Tre janë sportet ku Vllaznia ka spikatur gjatë vitit: atletika, boksi dhe peshëngritja. Epërsia e saj ndaj klubeve të tjerë në këto sporte nuk ka qëndruar thjesht te titujt e shumtë të kampionit kombëtar në disiplinat e këtyre sporteve, por edhe në takimet ndërkombëtare dhe rekordet. Dhe gjithçka ka qenë në vazhdimësi. Futbolli natyrisht mbeti përsëri i fortë (Vllaznia qe nënkampione gjatë vitit), por kjo nuk çon fort peshë, sepse nisur nga skema e vlerësimit në Lojërat Olimpike - një displinë sportive është e barazvlerësuar (pra, bie fjala në pikëzimin tonë, kampioni kombëtar i 100 metrave në atletikë merr po 3 pikë sa dhe skuadra kampione kombëtare në futboll). Kësisoj, disiplinat e shumta në atletikë, peshëngritje dhe boks kanë krijuar epërsinë e Vllaznisë, siç ngjet në rastin e Lojërave Olimpike me renditjen sipas numrit të medaljeve të arta. Në gjithë këtë pamje, arritjet e klubit të Shkodrës në atletikë janë vërtet unikale, kur mendon se Shkodra nuk ka një pistë atletike. Eshtë vërtet fantastike të gjesh se ku dhe si i përgatit atletët Vllaznia. Merret me mend se ata përgatiten në copëza pistash e pedanash të sajuara, jashtë çdo standarti, dhe është po kaq e çuditëshme dhe e papranueshme ndërkaq, se si mund të lihet pa pistë atletike Shkodra, e cila i ka dhënë Shqipërisë garën e parë atletike zyrtare qysh më 1920. Përsa i përket boksit dhe peshëngritjes këtu është diçka tjetër, sepse tashmë palestra apo Pallati i Sportit "Qazim Dervishi", ashtu modest dhe i vogël, kryen punë jo të vogla. Ndonëse në tërësi, një bazë materiale më masive e përhapur në qytet, shkolla apo pika banimi, mund të themi se mungon krejtësisht. Shkodra ka pësuar një rënie të dukshme në basketboll, ndërsa gjëndja e saj në volejboll është gati e mjerueshme, si për femra ashtu dhe për meshkuj. E megjithatë, Vllaznia e Shkodrës është Sportklubi më i mirë shqiptar i Vitit për 2003! Fakt që tregon se pasioni i vjetër dhe tradicional sportiv shkodran qëndron edhe në kushte tejet të vështira. Kemi të bëjmë me një rini të talentuar, ushtruese, sa spontane e sporteve aq dhe e gatshme për t'u disiplinuar në stërvitje të rregullta. Mëkat që mungon ajo forcë shtytëse, mbi të gjitha financa, infrastruktura dhe mbarështrimi (menazhimi), çka do t'a udhëzonte përsëmbari Shkodrën sportive drejt një rruge më të kohës në zhvillimin e sporteve. Sporti shkodran ashtu si në gjithë vëndin, nuk tërheq vëmëndjen megjithatë, dhe spektatorët janë tepër larg tij, gjë që po kaq larg e çon vetë rëndësinë dhe respektin për të. Ky është një problem i mprehtë i sportit të sotëm shqiptar, i cili me mostërheqjen e vëmëndjes si një dukuri e rëndësishme sociale, rrezikon të shkasë më tej në çformimin e tij. Le ta vëmë tash Vllazninë fitimtare, përballë klubeve të tjerë. Dhe çka del? Vështroni Renditjen dhe do të kuptoni shumëçka. Ajo që thashë më sipër: epërsia e thellë prej 55 pikësh me rivalin më të afërt të saj, klubin sportiv Dinamo, është pak për t'u bindur për shkarjen e madhe. Rënia e dukshme këte vit e SK Tiranës dhe e Partizanit, të cilët prej 10 vjetësh kanë shkëmbyer fitimet në këtë Referendum, është befasia e kundërt ndaj asaj së parës, fitores së bujshme të Vllaznisë. Dy klubet e shquara të Shqipërisë kanë përjetuar një vit sportiv jo të mirë, duke mbetur dukshëm pas, ndërkohë që Dinamo nga vendi i pestë i vitit të shkuar, ngjitet në të dytin, çka tregon se klubi pesëdhjetë e sa vjeçar, dikur i Ministrisë së Punëve të Mbrendëshme të regjimit komunist, madje deri sot në varësinë e asaj të Rendit të sistemit demokratik (!?), pa një të kaluar të pasur popullariteti, ia arrin të ruajë famën dhe emrin. Them se kjo enigëm përbën një meritë dhe Dinamo e Tiranës për habinë kundërshtuese të një aktualiteti, nuk tradhton famën e një origjine ashtu si dhe Dinamot e tjera lindore të mbetura, të cilat prapë rezistojnë në bashkësinë e sotme dinamase të Evropës Lindore. Plot 11 Dinamo kam arritur të zbuloj unë sot, e ndoshta ka dhe të tjera. Tek janë: Dinamo e Kievit, Dinamo e Zagrebit, Dinamo e Bukureshtit, Dinamo e Moskës, Dinamo e Tbilisit, Dinamo e Minskut, Dinamo e Batumit, Dinamo e Tiranës, Dinamo e Brestit, Dinamo e Bakusë, Dinamo e Erevenit! Siç shihet, në këtë familje puro "sovjetike" (8 nga 11 që janë) dikur komuniste shumëkaratëshe, nuk ndahet edhe Dinamo e jonë, e rishndërruar nga Olimpik në Dinamo prej nostalgjikëve, por ende tejet e fortë në sportet olimpike, sidomos gjatë vitit 2003, pa harruar kurrsesi fortësinë e saj të paluajtëshme në futboll dhe volejboll. Nuk merret vesht nëse e mban kësisoji pasioni i kuadrove të saj, statusi ende i qëndrueshëm shtetëroro - sponsorizues, apo vetë tërheqja magnetike e emrit, fanelës, flamurit të saj të bardhë, asnjëherë si shéj "dorëzimi pakushte". Në të vërtetë, është i vetmi klub, me një qendër të tij sportive unike, ndonëse e drobitur edhe ajo, statusi i së cilës ka ngjallur dhe ka shuar polemika... Duke shkuar më poshtë renditjes, vëren se ende ia arrin të qëndrojë midis më të mirëve, Klubi Sportiv Studenti, për të cilin më fort se lëvizja studentore sportive, duket se edhe ate e mban struktura shtetërore që ne ende kemi në klubet. Ka një rritje të KS Elbasanit falë hopit në peshëngritje, ka rënë Skenderbeu i Korçës, ndërkohë që Teuta e Durrësit dhe Flamurtari i Vlorës - përfaqësues krenarë të dy prej qyteteve sportive më tradicionalë të Shqipërisë - prej vitesh nuk mbajnë peshë të rëndë sportive në vënd. Kjo është rënia e sportit të qyteteve, çka thellohet kur vëren se Luftëtari i Gjirokastrës, Tomori i Beratit, Apolonia e Fierit gjithashtu nuk çojnë peshë më në sportin kombëtar, megjithë befasinë e suksesit të basketbollit gjirokastrit. Pa shkuar mandej, te qytetet e vegjël për të cilët përfaqësimi sportiv duket krejt spontan dhe i papërfillshëm në peshën specifike të sportit kombëtar. Kur klubet e Sarandës dhe të Pogradecit ende mbeten të përmendur, falë notit, për të cilën Shqipëria pak do t'ia dijë, ndonëse ka zhvilluar kampionat kombëtar, madje me praninë e bujëshme të Mbretit Zog, qysh në vitet '30! Gjëndja ishte kjo pra. Dhe ajo çka del më tej nga Referendumi, është vetë një vendnumuro i qartë, në mos vazhdimi i rënies për sportet në Shqipëri. Duket si befasuese ndërkaq, dukja në renditjen e Referendumit "Sportklubi i Vitit" të emrave të rinj si Shtërmeni dhe Klajd Klub. Këta janë krijimet e reja të sportit shqiptar, drita të zbehta (por prap se prap një dritë), klubet sportive që nuk kanë të bëjnë me shtetin, një organizim privat i cili përmes dy sporteve, peshëngritjes i pari dhe boksit i dyti, befasojnë vërtet, duke dhënë një shembull se si diçka e re mund të krijohet megjithate. Rasti i Shtërmenit në peshëngritje, tash për tash, mbetet unikal (i vetëm). Rasti i themelimit të basketbollit nga Valbona e Tropojës - Kampione dhe fituese e Kupës së Shqipërisë në basketboll - gjithashtu mbetet rast i vetëm për krijime të reja, prej të cilëve duhet të lindë përmbysja e madhe në sportin kombëtar, përmbysja për të mirë, natyrisht. Klubi sportiv dihet, është themeli i zhvillimit të sporteve. Po për vite ai nuk lëviz. I mpakur prej varësisë shtetërore dhe asaj të paktë private përmes vetëm sponsorizimeve, i kapur pak prej mundësive të Ligjit të Sportit, çuditërisht ai nuk lëviz. I braktisur prej shtetit thuajse, i lidhur pas tij, si për kafshatën e gojës, i drejtuar nga sponsori i mundshëm spontan, shpesh gati si një lypsar, nuk mund të thuhet se sporti i Klubit Sportiv 2003 i dha një hov më tepër zhvillimit sportiv në Shqipëri. Mungesa e inisiativave të tipit Shtërmen, Klajd Klub apo dhe të klubeve të notit Tirana -Heim e Ada, mungesa e guximit për shkëputje të përgjithëshme nga shteti, qoftë edhe të një klubi të vetëm tradicional, ka shkaktuar bllokimin sportiv në klubet shqiptare. 13 vjet pluralizëm po të analizohen me mënd në krye e me drejtësi, del se për sportet ato nuk mbërritën në frytin e tyre të pjekur. Eshtë interesant ndërkaq, shembulli i klubeve të futbollit, të cilët ndonëse ligjërisht, infrastrukturisht, financiarisht vazhdojnë të varen prej shtetit, madje janë pronë e shtetit, shkalla e rritjes së sponsorizimeve, kryesisht prej firmave prodhuese të disa presidentëve të klubeve, jep një nxitje më ndryshe nga klubet sportive shumësportëshe, qoftë edhe një pavarësi disi tjetër, ndonëse jo fort konform Ligjit ekzistues të Sportit. Kur merret me mënd se edhe këtu as që synohet për shkëputje të përgjithëshme nga "vargojt" shtetërorë, me gjithë rastin e veçuar e të deridikueshëm të Partizanit në futboll. Në sportet e tjerë edhe ky shembull i zbehtë thuajse mungon. E pra, a nuk e shihni se ndodhemi para një ndalese të pakapërcyeshme? Klube shtetërore, stadiume e palestra shtetërore, strukturë shtetërore, punonjës shtetërorë, bazë materiale shtetërore, sponsorizime me pikatore dhe vetëm kaq. Atëherë, çka e mban peng sportin shqiptar? Me sa duket, gjëndja, statusi i Klubit Sportiv Shqiptar që është themeli, ai që duhet shndërruar në Shoqëri Sportive si dikur në themelim të tij: Shoqëria Sportive Vllaznia, Shoqëria Sportive Bashkimi Elbasanas, Shoqëria Sportive Teuta, Shoqëria Sportive Shqiponja, Shoqëria Sportive Skenderbeu, Shoqëria Sportive Ismail Qemali, Shoqëria Sportive Tomori. Madje ka patur edhe Shoqëria Sportive Sportklub Tirana! Nuk është thjesht për emblemë tradicionale!

Ndoshta vitin 2004 do të kemi përfundimet e Referendumit të "Shoqërisë Sportive të Vitit". Duke nënkuptuar me këte, shndërrimin e Klubit Sportiv në Shoqërinë Sportive të mendësisë së re, të përparuar në Shqipëri. Urime "Vllaznisë 2003" megjithate!

Besnik DIZDARI ''Gazeta Tema''

Që nga e hëna, me kuqeblutë po stërviten edhe dy bashkëkombas të trajnerit Haxhiosmanoviç
Vllaznia, në provë edhe dy malazezë

Me skuadrën shkodrane janë bashkuar në përgatitoren dimërore edhe dy futbollistë nga Mali i Zi. Kjo ka ndodhur që prej së hënës, ditë kur Vllaznia ka filluar stërvitjen në qytetin e Ulqinit. Një gjë e tillë bëhet e ditur nga pjesëtarë të kësaj skuadre, përmes linjës telefonike. Dy të sapoardhurit janë rreshtuar përkrah kuqebluve të tjerë, duke iu nënshtruar të njëjtit program stërvitor me ta. Nuk mësohen ende emrat e dy lojtarëve me kombësi malazeze, por ajo çfarë bëhet e ditur është se mosha e tyre është e re, rreth të 20?tave. Nga ana tjetër, thuhet se janë lojtarë të mesfushës dhe të repartit të sulmit. Megjithatë, pavarësisht nga këto të dhëna të para që vijnë përtej kufirit, mund të thuhet se të dy malazezët janë në provë te Vllaznia. Mbi talentin dhe aftësitë e tyre, askush nuk di gjë tjetër, me përjashtim të trajnerit Haxhiosmanoviç. Ky i fundit, me dëshirën për të pasur në skuadrën e tij edhe bashkëkombas, duket se u ka bërë ofertë atyre, për t'u provuar te Vllaznia. Provë kjo që do të zgjasë plot dy javë, deri në ditën e rikthimit të kuqebluve në Shkodër. Nëse testi i tyre do të rezultojë pozitiv, ata do të udhëtojnë bashkë me ekipin kuqeblu drejt Shkodrës nga Ulqini, për të qenë pjesë e Vllaznisë në pjesën e mbetur të sezonit. E përgjithshmja e gjithë kësaj është se shkodranët e paskan shumë të vështirë këto kohët e fundit të bëjnë pa malazezët. Që prej sezonit 1999?2000, kur në krye të skuadrës u ul për herë të parë "Deda", te Vllaznia kanë luajtur, janë provuar dhe kanë ikur me dhjetëra futbollistë nga vendi fqinj. Përgjithësisht, ata kanë lënë shije të mirë, por edhe të hidhur, për sa i takon talentit të tyre. Drejtuesit e Vllaznisë shpresojnë që këta dy të fundit të jenë të dobishëm për skuadrën e tyre. Nga ana tjetër, testimi i tyre konfirmon atë që Vllaznia nuk ka hequr ende dorë nga merkatoja. Pas Mustafës, Karapicit dhe Resulit, gjasat janë që edhe të tjerë lojtarë të vishen kuqeblu.
Edhe pse Vllaznia, që prej dy ditësh, ka nisur stërvitjen e saj në Ulqin të Malit të Zi, ende nuk ka planifikuar asnjë miqësore për ta zhvilluar atje. Mungesa e kundërshtarëve për t'u ndeshur me ta është shkaku i vetëm që e vështirëson një gjë të tillë. Në qendrën turistike "Olimpik", ku janë sistemuar shkodranët, çdo vit ka pasur shumë ekipe malazeze dhe shqiptare, për të zhvilluar aty fazën përgatitore. Me to janë zhvilluar edhe takimet miqësore, të cilat i kanë ndihmuar drejtuesit kuqeblu të kolaudojnë si duhet skuadrën në prag të ballafaqimeve zyrtare. Por këtë radhë gjërat duken ndryshe. Në "Olimpik", përveç Vllaznisë, nuk ka asnjë ekip tjetër shqiptar dhe malazez. Megjithatë, drejtuesit kuqeblu, përmes trajnerit malazez Haxhiosmanoviç, janë duke bërë të gjitha përpjekjet për të zhvilluar ndonjë miqësore në Ulqin. Nga java tjetër mund të organizohet ndonjë miqësore me ekipe të tilla, si Zela, Mlladost, Otranto etj., ekipe këto të Malit të Zi. Ndërkohë, sipas bisedës telefonike, mësohet se gjatë këtyre ditëve e deri në fundjavë, kuqeblutë do të stërviten me nga dy seanca në ditë.


(Gjergj Kola ''Sporti Shqiptar)

Kërcënimet e malazezit për largimin e disa kuqebluve nuk gjejnë përkrahjen e presidencës
Haxhiosmanoviçi, sërish "prapa-kthehu"

Nga skuadra shkodrane nuk do të ketë asnjë të larguar, me gjithë deklaratat e trajnerit Haxhiosmanoviç në përfundim të fazës së dytë të këtij kampionati. Malazezi, në ditët e fundit të vitit të kaluar pati deklaruar se nga skuadra do të iknin të tepërtit. Ai pati lënë të kuptohej se në listën që do të shpallej në prag të fillimit të përgatitjeve dimërore, do të kishte edhe surpriza. Por ka ndodhur ndryshe, teksa në Ulqin janë duke u stërvitur të gjithë futbollistët që e mbyllën 2003?shin të veshur kuqeblu, me përjashtim të kongolezit Bokatola, që është larguar prej dy ditësh dhe ende nuk dihet nëse do të kthehet. Afrikani, me sa duket, nuk e ka duruar dot gjobën që i kishin vënë drejtuesit e klubit pas përfundimit të ndeshjes së fundit të fazës së dytë, prandaj ka ikur. Këtu mbase ka nxjerrë krye edhe njëfarë çarje që ka ekzistuar në skuadër mes futbollistëve, kuptohet një pjesë e tyre, dhe trajnerit Haxhiosmanoviç. Në ecurinë e Vllaznisë në kampionat, nga java në javë u shfaqën probleme të tilla, si refuzimi për t'u aktivizuar, dëshira për të luajtur aty ku u pëlqente lojtarëve dhe jo ku i vendoste trajneri apo edhe hedhja e fanellës drejt stolit teknik të skuadrës. Shembujt nuk kanë qenë të paktë dhe këtu mund të përmenden emrat e Martinit, Cungut, Zmijanit, Dibrës, Bokatolës dhe Belishës, çka solli edhe njëfarë "krisjeje" mes dy palëve, aq sa futbollistët guxuan të deklaronin publikisht se për ndonjë rezultat negativ kishte pjesën e tij të fajit edhe trajneri Haxhiosmanoviç dhe stafi i tij. Por këto deklarata nuk u kapërdinë dot nga "Deda", i cili në ditët e fundit të vitit të kaluar qe bërë si i tërbuar. Ai u shfaq edhe para mediave i nervozuar, duke deklaruar fillimisht rrezikun e rënies nga kategoria të Vllaznisë dhe më pas paralajmërimin për të larguar nga skuadra kundërshtarët e tij. Dhënia e besimit të plotë në adresë të tij nga presidenca e klubit linte të kuptonte se ai do ta bënte të vetën. "Në listën që do të publikohet do të mësoni edhe emrat e atyre që do të largohen nga skuadra. Kuptohet, do të jenë ata lojtarë që nuk kanë dëshirë të stërviten dhe ata që më mirë preferojnë të flasin nëpër gazeta, sesa të luajnë në fushë," - pati thënë atëherë Haxhiosmanoviçi. Mirëpo lista është publikuar dhe të larguar nuk ka asnjë. Kjo gjë, natyrisht, shton edhe pikëpyetjet. Mbase Haxhiosmanoviçi nuk ka pasur forcë ta bindë presidencën për të bërë largime, ose ekziston edhe mundësia tjetër, që Vllaznia, po t'i largonte ata lojtarë që mendonte trajneri, mund të gjendej zbuluar për sa i takon numrit të lojtarëve cilësorë në radhët e saj. Kjo, ngaqë merkatoja e dimrit nuk eci ashtu siç e kishin planifikuar krerët e klubit. Megjithatë, deri në momentin e mbylljes së merkatos ka ende kohë dhe nuk i dihet se çfarë do të ndodhë. Ajo që mund të thuhet tani është se Haxhiosmanoviçi bëri një tjetër "prapa?kthehu".

Imazhe te Ngjitura

vllaznia_shkodarnnnnb,mnk.gif (2.6 KB, 29 vezhgime)

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.