Malazezi i kuqebluve u tërheq vëmendjen të tijve për ndeshjen e radhës me Elbasanin
"Deda": Djema, harrojeni Amerikën!

Trajneri i Vllaznisë, Dervish Haxhiosmanoviç, apo "Deda" siç e thërrasin shkurt, u ka bërë dje thirrje futbollistëve të tij që ta heqin mendja nga Amerika, sepse i pret Elbasani. Ai ka dashur t'u tërheqë vëmendjen kuqebluve për t'iu përveshur stërvitjes dhe për t'u ballafaquar denjësisht në sfidën e radhës në kampionat. Kështu, pasditen e djeshme, shkodranët, pas plot një jave të ndarë më dysh, janë stërvitur të gjithë bashkë. Në orën 15.00, kuqeblutë kanë zhvilluar seancën e radhës, e cila ka konsistuar në një ndeshje kontrolli, e programuar për t'u luajtur në "Loro Boriçi". Për ta ndjekur ka qenë presidenti Çela dhe zv.presidenti Amuli, përfshi këtu edhe anëtarin e kryesisë, Hoxha. Gjithashtu, në shkallët e stadiumit ka pasur mjaft tifozë, të cilët duket se i kishte marrë malli për skuadrën. Në fillim të seancës, Haxhiosmanoviçi u ka folur shkurt lojtarëve për punën që i pret, ndërkohë që "uikendi" amerikan duhet fshirë nga mendja. Gjatë atyre minutave të ndeshjes së kontrollit është parë që të besuarit e malazezit për ndeshjen me Elbasanin do të jenë pothuajse po ata, që kanë luajtur në takimet e fundit. Në portë mbetet titullar Grima, ndërkohë që para tij janë rreshtuar Osja, Zmijani, Belisha dhe Doçi. Në mesfushë kanë luajtur Xhahysa, Salihi, Cungu dhe Ahi, ndërsa dyshja Sinani Martini ka qenë në sulm. Po ashtu, dje ka rënë në sy edhe prania e futbollistit shkodran Alban Hasani, i larguar së fundi nga Laçi, i cili ka filluar stërvitjen me kuqeblutë. Në stadium është parë edhe lezhjani Alket Kruja, i cili, me sa duket, do të provohet për të zënë vend te Vllaznia.

Gjergj Kola ''Sporti Shqiptar''

Rakiqi: "Vetëm për fitore ndaj Elbasanit"

Pas kthimit nga SHBA, skuadra shkodrane po përgatitet për ndeshjen e radhës ndaj Elbasanit, që do të luhet të shtunën në stadiumin "Ruzhdi Bizhuta". Zëvendëstrajneri i ekipit kuqeblu, Esat Rakiqi, thotë se "të shtunën do të kemi një ndeshje të vështirë me Elbasanin, por për këtë jemi të përgatitur nga të gjitha aspektet. Ne e kemi vlerësuar mjaft këtë ndeshje, ndërkohë që të gjithë futbollistët gëzojnë një formë shumë të mirë sportive. Kjo na bën optimistë se do të jemi fitues të këtij takimi". Sipas tij, Vllaznia shkon në këtë përballje pas disa ndeshjeve mjaft të mira si, ndaj Teutes, Partizanit etj. "E dime se do të jetë një ndeshje e vështirë për ne, pasi Elbasani ka pësuar të mërkurën një humbje në Peqin, ndaj do të përpiqet që t'i rikthehet fitores para tifozëve të vet, thotë Rakiqi. Por, ne do të dimë t'i përgjigjemi lojës së tyre me lojë të fortë, të bukur dhe rezultative". "Jam i bindur se me lojtarë të tillë si, Sinani, Martini, Salihi etj, do të shpalosim vlerat më të mira të futbollit shkodran. Ne i kemi të gjitha mundësitë për ta kaluar me sukses këtë sfidë të rëndësishme, pasi një fitore do të na afronte më shumë me kreun e klasifikimit",- thekson tekniku shkodran. Këtu zëvendëstrajneri i shkodranëve merr parashysh dhe zhvillimet e fundit në kapionatin tonë të futbollit, ku Tirana është rithyer në krye, pas humbjes së Teutës përballë Partizanit më “Qemal Stafa”. Ndërkohë që kuqeblutë vijnë pas një fitoreje të bujshme në ndeshjen miqësore të zhvilluar në SHBA me skuadrën shqiptare të Detroidit 3-1.

Zëvendëstrajneri kuqeblu u kujton të tijve që një ndeshje futbolli luhet 90 minuta

Rakiqi: Na iku fitorja nga duart

Vllaznia, të shtunën la dy pikë të tjera tepër të vlefshme në këtë kampionat. Ashtu si ndaj Teutës, dy javë më parë, edhe këtë herë, përballë portokallinjve, kuqeblutë kanë shpërdorur mjaft raste, duke u dhënë mundësi vendësve të barazojnë në të dyja rastet kur janë gjendur në epërsi të përkohshme. Kjo do të thotë se shkodranët janë 4 pikë më pak, në një kohë që me to Vllaznia duhej të ishte shumë pranë kreut, pa llogaritur këtu ndeshjen e prapambetur me Dinamon. Në "Ruzhdi Bizhuta", Vllaznia ka zhvilluar një ndeshje shumë të mirë dhe ndoshta, sikurse shprehen edhe vetë kuqeblutë, ishte mëkat që u larguan nga Elbasani pa i marrë tri pikët e mundshme. Por, me sa duket, futbollistët shkodranë harruan që një ndeshje futbolli luhet deri në vërshëllimën e fundit të gjyqtarit. Pikërisht te mosvlerësimi i këtij faktori, Esat Rakiqi, zëvendëstrajneri i këtij ekipi, gjen edhe arsyet kryesore të mosmarrjes së 3 pikëve me portokallinjtë. "Luajtëm mirë dhe duhej të kishim fituar. Zhvilluam një ndeshje të pëlqyeshme, nga e cila duhej të ishim larguar kryelartë, por futbollistët tanë duket se harruan që një ndeshje futbolli luhet 90 minuta. Me sa kuptova unë që nga stoli, edhe pse bëra çmos t'i mbaja në tonus deri në fund, ata e konsideruan punë të kryer fitoren me Elbasanin. Por pikërisht prej kësaj e pësuam dhe u ndëshkuam nga goli i barazimit në minutën e fundit të ndeshjes," - thotë Rakiqi, njeriu i stolit kuqeblu, i cili e drejtoi Vllazninë për të dytën herë radhazi, ngaqë Haxhiosmanoviçi ishte dënuar nga disiplina.
Një arsye tjetër, të cilën shkodranët e rendisin si shkak të barazimit me Elbasanin, është gjykimi i ndeshjes, që, sipas kuqebluve, ishte i njëanshëm. Rasti më fatal ka qenë pikërisht ai i golit të dytë të vendësve, shënuar në çastet e fundit të ndeshjes, që solli edhe barazimin. Sipas drejtuesve të Vllaznisë, ka qenë një aksion i nisur nga gjysmëfusha e tyre, pasi i është marrë një top Ahut me anë të një ndërhyrjeje të dukshme të gabuar, i cili është kthyer në gol. Megjithatë, gjyqtari i ndeshjes ka vazhduar lojën, çka solli edhe golin e barazimit të shënuar nga Stojku. Njëkohësisht, kuqeblutë ankohen edhe për 2 3 raste të tjera, sepse, sipas tyre, janë ndalur në mënyrë të padrejtë nga anësorët në kundërsulmet e tyre. Sidoqoftë, duke i konsideruar këto veprime si gabimet e radhës ndaj tyre, drejtuesit e Vllaznisë kanë vendosur të merren me veten e tyre, duke i hedhur sytë te sfida e radhës. Një gjë e tillë është e detyrueshme, aq më tepër që bëhet fjalë për një ballafaqim të vështirë me Tiranën kryesuese. Një fitore ndaj bardhebluve do të bënte të harroheshin keqardhjet e barazimeve me Teutën dhe Elbasanin. "Ta harrojmë Elbasanin. Tani duhet të fillojmë të mendojmë për Tiranën. Na pret një ndeshje e vështirë, në të cilën do të synojmë një gjë të vetme, fitoren. Vetëm kjo e fundit do t'i shlyente disi gabimet që kemi bërë në dy ndeshjet e fundit," - ka deklaruar Rakiqi.

Gjergj Kola ''Sporti Shqiptar''

ELBASANI - VLLAZNIA 2-2
Sinani 13' , Ablade 16' , Salihi 57' , Stojku 89'

Rezultatet tjera
Dinamo - Partizani 0-2
Tirana - Shkumbini 5-2
Flamurtari - Besa 1-0
Lushnja - Teuta 0-1

Renditja

1.Tirana 13 N 9 F 2 B 2 H 35-15 G 29 Pike
2.Teuta 13 8 4 1 20-9 28
3.Partizani 13 8 3 2 23-9 27
4.Dinamo 12 6 4 2 17-8 22
5.Vllaznia 12 5 2 5 19-19 17
6.Elbasani 13 3 5 5 17-14 14
7.Lushnja 13 4 3 6 10-19 14
8.Besa 13 3 3 6 9-20 12
9.Flamurtari 13 2 2 9 11-25 8
10.Shkumbini 13 1 3 9 7-29 6

Goleshenuesit
8 gola: Mukaj (Tirana)
7 gola: Qorri (Dinamo), Fortuzi (Tirana)
6 gola: Martini (Vllaznia), Abilio (Partizani), Stojku (Elbasani)
5 gola: Salihi (Vllaznia) Begeja (Teuta),

Elvin Beqiri bashkohet me Vllazninë

Futbollisti i spikatur i përfaqësueses sonë dhe aktualisht pjestar i skuadrës ukrainase të Metalug Donets, prej ditësh është vënë nën urdhërat e trajnerit, që e zbuloi talentin e tij, malazezi Dervish Haxhiosmanoviç. Ndonëse gjithkush do të kishte dëshiruar që mbrojtësi i talentuar të kontribuonte sërish për Vllazninë, një gjë e tillë është e pamundur për shkak të lidhjes kontraktuale me klubin ukrainas. Përfundimi i fazës së parë në kampionatin e këtij vendi ka sjellë edhe periudhën e gjatë të pushimeve të cilat Beqiri do t’i kalojë në qytetin e tij të lindjes. Kërkesës për t’u stërvitur me kuqeblutë i është dhënë një përgjigje pozitive. Emocionet dhe nostaligjitë trasmetohen qartësisht nga talenti i përfaqësueses sonë.Është i kënaqur me prezantimin e tij në fazën e parë në kampionatin ukrainas. Skuadra ku ai militon Metalurg Donets është renditur në vendin e katërt në kuotën e 26 pikë, dhjetë pikë e distancuar nga kryesuesit e Dinamos së Kievit dhe Shaktar Donets dhe vetëm katër pikë nga skuadra e vendit të tretë Dniepro, pozicion që shpreson të përmisohet në fazën e dytë, që do të nisë në muajin Mars. Megjithatë planet e objektivat e Beqirit nuk përfundojnë me këtë ekesperiencë

Mesfushori kuqeblu nuk është i kënaqur me trajtimin që po i bëjnë drejtuesit teknikë të Vllaznisë
Cungu: Trajnerët gabuan që më zëvendësuan

Zëvendësimi i mesfushorit të Vllaznisë, Armando Cungu, në ndeshjen e fundit me Elbasanin, ka sjellë reagimin e këtij të fundit. "Mendimi im është që nuk duhej të isha unë ai që duhej të zënvendësohej. Personalisht po luaja mirë dhe, nëse kundërshtari po dominonte në mesfushë, ky nuk ishte faji im. Vetë rreshtimi ynë në fushë u jepte mundësi portokallinjve të zotëronin më shumë terren në këtë sektor të fushës. Prandaj, për këtë, faji nuk duhej gjetur te Cungu. Jam larguar shumë i mërzitur nga fusha e lojës kur jam zëvendësuar dhe vazhdoj të jem i tillë, sepse më duket se po luhet me mua," - ka thënë shumë i mërzitur 30-vjeçari shkodran. Për të, largimi nga fusha e lojës në ndeshjen me portokallinjtë nuk ka asnjë shpjegim taktik, sepse në lojë është futur një mbrojtës, në një kohë që Vllaznia kishte shkuar për të fituar në Elbasan. "Në momentin kur stafi drejtues vendosi të më largonte nga fusha, në vendin tim hyri një mbrojtës, Zmijani. Unë nuk e kuptoj se përse u veprua kështu, kur të gjithë kishin deklaruar se do të hynim në këtë ndeshje për 3 pikë. Në momentin e zëvendësimit, rezultati ishte 1?1 dhe, në njëfarë mënyrë, Vllaznia po kërkonte ta mbronte barazimin. Të paktën me logjikë kështu i bie, sepse për të kërkuar fitoren duhej futur në lojë një mesfushor, ose sulmues. Pra, ajo që dua të theksoj unë është se, në zëvendësimin tim, trajnerët gabuan, prandaj jam edhe i mërzitur," - ka vijuar më tej organizatori i kuqebluve, Armando Cungu, në deklarimin e tij të djeshëm, ku ka zbuluar edhe gjëra të tjera, për sa i takon stafit drejtues të skuadrës. Sipas tij, drejtuesit teknikë të Vllaznisë kanë ndikuar ndoshta në atë që ai të mos japë rendimentin e duhur në rolin e organizatorit: "Kur thashë që më duket se po luhet me mua, për këtë u nisa nga disa arsye. Më kryesorja është ajo që, prej javësh, unë nuk po luaj në rolin tim të zakonshëm, atë të organizatorit. Trajneri më ngarkon me detyrën e markimit të lojtarëve kryesorë të ekipeve kundërshtare, çka ka sjellë vendosjen time para mbrojtësve, duke lënë boshllëk në organizimin e lojës. Edhe këtë rol e kam pranuar, ashtu siç pranova largimin nga fusha në Elbasan, pasi nuk e kam për detyrë të replikoj vendimet e trjanerit, edhe të padrejta qofshin ato. Por të tilla gjëra me kanë bërë të ndihem keq dhe, nëse do të zhvillohet analiza e ndeshjes së fundit me Elbasanin, natyrisht do të kërkoj arsyet e zëvendësimit tim. Megjithatë, cilatdo qofshin ato, sërish nuk bindem se duhej të zëvendësohesha pikërisht në këtë takim,"- e përfundon fjalën e tij Armando Cungu.

Salihi, shqetësimi i vetëm për kuqeblutë

Futbollisti i talentuar kuqeblu, Hamdi Salihi, është i vetmi problem për infermierinë e Vllaznisë. Një përplasje me një nga futbollistët elbasanas, të shunën e kaluar, i ka shkaktuar atij dhimbje në pjesën e djathtë të fytyrës. Për këtë qëllim, dje paradreke, autori i golit të dytë për Vllazninë në Elbasan, ka bërë radiografinë e pjesës së dëmtuar, i shoqëruar edhe nga mjeku i ekipit, Zyhdi Çoba. Në fund ka rezultuar se bëhet fjalë për një plasaritje të vogël të kockës në nofullën e djathtë, nga e cila vijnë edhe dhimbjet. Pikërisht për këtë qëllim, 19-vjeçari i talentuar, dje pasdreke ka zhvilluar stërvitje të diferencuar. Ai, sipas këshillave të mjekut, ka bërë vetëm vrapime të lehta rreth fushës së stërvitjes. Pavarësisht nga ky dëmtim, autori i 5 golave në këtë kampionat për Vllazninë pritet të jetë në fushë ditën e shtunë, në takimin e shumëpritur me Tiranën.

Java 14.

Tirana - Vllaznia 1-3

Java 15

Flamurtari - Vlaznia 1-2

Rezultatet tjera
Lushnja 0-1 Dinamo
Elbasani 1-1 Teuta
Tirana 1-0 Partizani
Besa 1-0 Shkumbini

Renditja

1 Tirana 15 N 11 F 2 B 2 H 39-16 35 Pike
2 Partizani 15 9 3 3 27 12 30
3 Teuta 15 8 5 2 24 14 29
4 Dinamo Tirana 14 8 4 2 22 11 28
5 Vllaznia 14 6 2 6 22 23 20
6 Lushnja 15 5 2 8 11 20 17
7 Elbasani 15 3 6 6 20 19 15
8 Besa 15 4 3 8 11 23 15
9 Shkumbini 15 2 3 10 9 31 9
10 Flamurtari 15 2 2 11 13 29 8

Flamurtari - Vllaznia 1-2

Ne Vlore, Vllaznia ishte e vendosur per te fituar dhe realizoi ne pjesen e pare nje gol shume te bukur me autor Martinin. Ky depertoi ne zone dhe mposhti portierin Dine me nje gjuajtje nga 15 metra, paksa diagonal. Serjani gezoi vendasit me barazimin pas 6-minutash, por talenti i ri, Hamdi Salihi ishte vendimtar per skuadren e Dervish Haxhiosmanovicit.

Salihi: Kombëtarja, në momentin e duhur

Lojtari i momentit për Vllazninë është pa dyshim Hamdi Salihi. Golat e tij janë të një klasi të veçantë dhe, për më tepër, shumë të rëndësishëm për skuadrën ku aktivizohet. Tashmë nuk ka asnjë dyshim që Salihi është bërë epiqendra e komenteve të shumë gazetarëve dhe specialistëve, aq sa të gjithë e shohin shumë shpejt në kombëtaren e Brigelit. Por Andushi, siç thërritet ndoshta me përkëdheli 19?vjeçari shkodran, kërkon të qëndrojë me këmbë në tokë. "Kombëtarja do të vijë në momentin e duhur," - thotë Salihi në një intervistë për "Sportin shqiptar".

Kuqeblutë kërkojnë me çdo kusht rezultatin pozitiv në ballafaqimin e nesërm me blutë kryeqytetas

Fushaj: Fitorja me Dinamon, thjesht detyrë

Tri pikët e marra në Vlorë e kanë rikthyer në njëfarë mënyre buzëqeshjen te kuqeblutë. Megjithatë, humbja me Tiranën nuk është harruar ende, ndonëse në prag është ndeshja me Dinamon. Pikërisht për këtë të fundit, Vllaznia është totalisht e interesuar, sepse kërkon me çdo kusht fitoren. Tripikëshi në ballafaqimin me Dinamon është një kusht që u është vënë kuqebluve nga presidenca e klubit. Këtë e bën të ditur për "Sportin shqiptar" edhe nr.2 i klubit, zv.presidenti i Vllaznisë, Valter Fushaj, kur thotë: "Takimi me Dinamon është vlerësuar maksimalisht nga ana jonë, prandaj fitoren e konsideroj detyrim për sportdashësit dhe për ne. Luajmë në Shkodër, para publikut tonë, prandaj duhet të mendojmë edhe për ata. Sportdashësit shkodranë nuk na e falin humbjen me Tiranën, prandaj, pas fitores në Vlorë, duhet t'i kënaqim me një tjetër ndaj dinamovitëve. Vllaznia vërtet humbi me Tiranën, por kjo nuk do të thotë se u gjunjëzua para kampionëve. Për mendimin tim, ajo humbje ishte më tepër aksidentale, ose ia dhuruam vetë kundërshtarit, sepse Tirana nuk dominoi në lojë. Për t'i larë apo harruar të gjitha këto, duhet të fitojmë medoemos ndaj Dinamos."
Të shtunën që kaloi, shkodranët fituan me Flamurtarin brenda në Vlorë, në një takim shumë të vështirë. "Takimi me Flamurtarin ishte shumë i vështirë për ne, ngaqë vlonjatët ishin mobilizuar në maksimum për të fituar. Dhe nëse kjo na buzëqeshi ne, e them me plot gojën se fituam vetëm prej lojës së shkëlqyer që zhvilloi portieri Ndoja. Ndonëse ishte takimi i parë i tij si titullar, Ndoja luajti shumë mirë. Madje po ju them se po të mos ishte ai në portë, në Vlorë nuk do të shkonim më larg se barazimi. Kjo ishte një provë e mirë edhe për të. Nëse vazhdon kështu, nuk kemi pse të kërkojmë portier tjetër në janar," - është shprehur Fushaj. Gjithsesi, pavarësisht suksesit të arritur në Vlorë, sytë e shkodranëve tashmë janë drejtuar te takimi i nesërm, përballë djemve të Demollarit. Për sa i takon formacionit shkodran, konfirmohet gatishmëria e Bokatolës për të luajtur, çka i shton edhe mundësitë e përzgjedhjes së trajnerit Haxhiosmanoviç për të ndërtuar formacionin e duhur. Ndërkohë, gjithnjë në lidhje me këtë takim, zv.presidenti Fushaj kërkon edhe mbështetjen e tifozerisë shkodrane: "Jam i bindur se në stadium do të ketë sërish shumë tifozë. I siguroj ata se kësaj here nuk kemi për t'i zhgënjyer."

Sinani: Jo gabimeve ndaj Dinamos

Takimi i prapambetur mes Vllaznisë dhe Dinamos, që do të luhet sot në stadiumin "Loro Boriçi" të qytetit të Shkodrës, ka një rëndësi të madhe për ekipin kuqeblu. Kapiteni i shkodranëve, Vioresin Sinani, thotë se "kjo ndeshje ka vlera të veçanta për ne, pasi na duhet patjetër fitorja. Na duhet të mos gabojmë me Dinamon, ashtu siç ndodhi me Tiranën". "Këtë ndeshje e kemi vlerësuar maksimalisht duke ditur se Dinamo është një ndër ekipet më të mira të vendit, thekson ai. Duke parë edhe ecurinë e ekipit dinamovit gjatë javëve të fundit, them se kjo skuadër është për t'u patur frikë. Por, edhe ne jemi në gjendje të mirë, pasi vijmë pas një fitoreje të rëndësishme të arritur të shtunën ndaj Flamurtarit. Unë jam i bindur se me formën e mirë që gëzon ekipi ynë, ne do ta fitojmë këtë sfidë që për ne do të thotë shumë". Sipas tij, një fitore e shkodranëve do t'i afronte ata më shumë me kreun e klasifikimit të kampionatit. "Në këtë ndeshje do të kemi disa mungesa, por që nuk do të ndikojnë në lojën tonë, pasi futbollistët e rinj që po aktivizohen po tregojnë një përgatitje mjaft të mirë në të gjitha aspektet e lojës, thekson kapiteni shkodran. Lojtarë të tille si, Ahu, Kraja, Belisha, Mashi, Salihi etj, po integrohen mjaft mirë me pjesën tjetër të ekipit, çka tregon se Vllaznia është një fidanishte e futbollistëve që po nderojnë ngjyrat e klubit kuqeblu". Në Federaten shqiptare të Futbollit (FSHF) u hodh dje shorti i gjyqtarit që do të drejtojë takimin e prapambetur të javës së 12-të të kampionatit kombëtar, grupi A1, mes Vllaznisë dhe Dinamos. Në bazë të shortit të hedhur, ky takim, që do të luhet sot në stadiumin "Loro Boriçi" të qytetit të Shkodrës, do të drejtohet nga A.Likja i kolegjumit të Lushnjës. Ndeshja e fazës së parë Dinamo-Vllaznia, e luajtur në stadiumin kombëtar "Qemal Stafa", është fituar nga Dinamo me rezultatin 3-0, me gola të shënuar nga Ziambo (2) dhe Rigels Qosa.

Vllaznia: Tifozë, ejani, nuk ju zhgënjejmë!

Stadiumi "Loro Boriçi" do të përcjellë sot një sfidë mjaft interesante, që do të ketë "aktorë" të saj Vllazninë vendëse dhe Dinamon e kryeqytetit. Dhjetë ditë pas atij takimi zhgënjyes me Tiranën, kuqeblutë rikthehen në "folenë" e tyre, për të synuar fitoren ndaj bluve, duke dashur të bëjnë kësisoj një lloj autokritike para sportdashësit shkodran. Në përballjen e sotme, me interes pritet të vërtetohen dy gjëra. E para ka të bëjë me vërtetimin e besnikërisë së tifozerisë shkodrane ndaj skuadrës së saj të zemrës dhe, e dyta, do të jepen prova se çfarë është në gjendje të bëjë formacioni kuqeblu. Vllaznisë nuk i lejohet më asnjë gabim tjetër, sepse javët e kampionatit po kalojnë. Për sa i takon mbështetjes që pritet t'i bëjë Vllaznisë tifozeria e saj, është e dukshme se ajo do të jetë e madhe. Me gjithë zhgënjimin që pësuan pas ndeshjes me Tiranën, sot parashikohet që në "Loro Boriçi" të ketë shumë njerëz, të cilët nuk dëshirojnë në asnjë mënyrë të largohen prej andej sërish të zhgënjyer. Këtë pikësynim, mbi të gjitha, duket se e ka vetë skuadra e drejtuar nga trajneri Dervish Haxhiosmanoviç. Ky i fundit, në çdo deklaratë të tij, nuk ka lënë pa e përmendur objektivin e Vllaznisë ndaj Dinamos, fitorja. "Kemi humbur krejt rastësisht me Tiranën dy javë më parë dhe nuk dëshirojmë aspak që kjo histori të përsëritet. Jemi të vendosur për ta fituar me çdo kusht këtë ndeshje, megjithëse e dimë që nuk do ta kemi të lehtë. Dinamoja është një ekip i vështirë për t'u mundur, por ne do të bëjmë çmos të marrim tripikëshin," - ka thënë malazezi.
Ndërkohë, Vllaznia, në takimin e sotëm, do të vuajë mungesën e disa lojtarëve të penalizuar me kartonë dhe të mbetur jashtë formacionit kuqeblu nga dëmtimet. Doçi është i dëmtuar në kavilje dhe mungesa e tij ka shkaktuar jo pak probleme për ndërtimin e formacionit. Mospasja e asnjë lojtari tjetër për ta vendosur në krahun e majtë të mbrojtjes e ka detyruar "Dedën" t'ia besojë këtë vend, me sa duket, të riut Edi Luka. Po ashtu, do të mungojnë edhe Zmijani me Dibrën, të penalizuar me kartonë, shto këtu edhe Cungun, që vuan javën e fundit të pezullimit, dhënë nga kryesia e klubit. Megjithatë, i gatshëm duket se do të jetë kongolezi Bokatola, i cili pritet të aktivizohet në qendër të mesfushës. Atmosfera në kampin shkodran duket shumë pozitive, ndërkohë që pas largimit të Krujës dhe nigerianit Olusegum, një tjetër futbollist ka ardhur për provë te kuqeblutë. Bëhet fjalë për një 20-vjeçar malazez me origjinë shqiptare, i cili pritet të testohet ditët e ardhshme te Vllaznia.