Rakiqi: Lushnja, ndeshje qe s'duhej humbur nga Vllaznia

Ndeshja me Lushnjen nuk duhej humbur. Keshtu eshte shprehur zevendes trajneri i Vllaznise, Esat Rakiqi. "Me gjendjen e mire te skuadres dhe me kundershtarin qe kishim perpara, ne patjeter duhej te kishim marre nje rezultat pozitiv, - thote ai, - Ne pjesen e dyte kemi luajtur me mire se Lushnja duke krijuar disa raste te mira, por pa rezultat. Ne futboll duhet edhe pak fat". Sipas tij, ne kampin shkodran tani po mendohet per ndeshjen e rendesishme te javes se 10-te te kampionatit, ku Vllaznia do prese ne "Loro Borici" Partizanin. "Jemi te bindur se me punen e bere do arrijme nje rezultat pozitiv ndaj kryeqytetasve", - thote Rakiqi.

Malazezi i kuqebluve ka mbetur i pakënaqur nga humbja e skuadrës së tij me Lushnjën

Haxhiosmanoviç: Nuk e prisja këtë humbje

Vllaznia nuk duhej të humbiste kurrsesi ndaj Lushnjës. Ky është pak a shumë thelbi i deklarimit të trajnerit të saj, malazezit Dervish Haxhiosmanoviç, lidhur me ndeshjen e së shtunës së kaluar, ku skuadra e tij doli e humbur nga ballafaqimi me "lagunarët". Për të, duket se nuk kanë shumë rëndësi, në pamje të parë, shkaqet që çuan në këtë humbje, sesa fakti që Vllaznisë i duhej shumë ajo fitore. Sipas "Dedës", 3-pikëshi i lënë në Berat mund të ndikojë negativisht në ndeshjen e radhës, sepse ka të bëjë direkt me moralin e kuqebluve. Pra, nga sa kuptohet edhe në fjalët e malazezit, ky frenim nga Lushnja e ka prishur jo pak humorin e kuqebluve. E kjo, natyrisht, nuk është pozitive, aq më tepër që Vllaznia është në prag të një sfide shumë të rëndësishme me Partizanin. Duke iu rikthyer edhe njëherë ndeshjes të së shtunës së kaluar, me Lushnjën, malazezi i stolit shkodran thotë se nuk i ka ikur ende zemërimi për gjykimin e ndeshjes nga kryesori
Duraj. "Ndonëse kanë kaluar tri ditë nga ajo ndeshje, sërish vazhdoj të jem i mendimit se Vllaznia ka humbur sepse kështu deshi gjyqtari. Këtë gjë nuk e them për të shfajësuar veten, as lojtarët, por sepse kjo është më se e vërtetë. Një ndeshje futbolli aq është: dy penallti të padhëna, faulle të kota dhe, për pasojë, humbja vjen vetvetiu," ? ka thënë tërë zemërim malazezi.
Ky kontestim ndaj "bluzave të zeza", sipas tij, vjen edhe për faktin se Vllaznisë i bien në qafë shpeshherë. Madje, edhe kur ajo luan në Shkodër. Prandaj shton: "Unë habitem me dëshirën që kanë gjyqtarët për t'i rënë në qafë kësaj skuadre. Shpeshherë jam çuditur nga një fakt: gjyqtarët, edhe brenda në Shkodër, bëjnë gabime të rënda, gjoja me idenë e kompensimit. Gjyqtari e ka për detyrë të gjykojë drejt një ndeshje futbolli dhe jo të hyjë në fushë me paramendim për të favorizur njërën apo tjetrën skuadër." Pra, sikurse duket qartë, humbja e Beratit e ka prishur disi humorin e njeriut të stolit shkodran. Vetë Haxhiosmanoviçi, që prej javës së kaluar, e kishte shpallur objektivin e skuadrës së tij për dy ndeshjet e radhës. Në ndeshjet me Shkumbinin dhe Lushnjën, "Deda" kishte premtuar 6 pikë, por tashmë ky premtim është arritur përgjysmë. "Vërtet kisha premtuar dy fitore në këto dy ndeshje, sepse i kishim mundësitë. Nëse do t'ia arrinim këtij synimi, skuadra do të shkonte me mendësi tjetër në ndeshjen ndaj Partizanit. Duhet pranuar që atmosfera në kampin tonë nuk është aq entuziaste, sa ç'ishte javën e kaluar. Megjithatë, do të bëjmë maksimumin për ta përgatitur ashtu si duhet skuadrën për këtë ndeshje," ? ka thënë në fund të fjalës së tij trajneri i Vllaznisë, Dervish Haxhiosmanoviç.

"Deda": Disiplina? S'më intereson fare

Trajneri i Vlaznisë, Haxhiosmanoviç, nuk ka treguar asnjë lloj interesi rreth deklarimit të drejtuesve të FSHF për kalimin e çështjes së tij në komisionin e disiplinës. Reagimi i malazezit ndaj gjyqtarit të takimit Lushnja-Vllaznia është konsideruar i ashpër nga drejtuesit e sektorit të garave, të cilët kanë bërë të ditur se këtë çështje do t'ia kalojnë për shqyrtim disiplinorit, duke hedhur kështu poshtë edhe pretendimet e palës shkodrane për gjykimin e dobët nga gjyqtarit Duraj. I pyetur në lidhje me deklarimin e një dite më parë të shefit të garave në FSHF, zotit Hito Hitaj, se çështja e tij do të shqyrtohet në komisionin e disiplinës, trajneri i Vllaznisë, Dervish Haxhiosmanoviç, është përgjigjur: "Unë te disiplina? As më intereson fare një gjë e tillë. Të vendosin çfarë të duan, sepse s'kanë çfarë të na bëjnë më tepër. Dënimin kryesor na e dhanë me humbjen e ndeshjes nga ana e gjyqtarit. Tashmë gjërat e tjera nuk vlejnë, sepse më të rëndësishme se gjithçka tjetër ishin pikët." Në këtë mënyrë, duket se ka kaluar pa ndonjë reagim të veçantë të trajnerit të Vllanzisë pretendimi i FSHF-së se ai ka bërë ndonjë veprim të pahijshëm ndaj gjyqtarëve, pas ndeshjes të së shtunës së kaluar në Berat.

Kapiteni ndez sfidën kryesore të kësaj jave të "Loro Boriçit", duke u hedhur "dorashkën" të kuqve

Sinani: Partizan, humbjen prite në Shkodër!

Kapiteni i skuadrës shkodrane, Vioresin Sinani, ka shumë besim se Partizani, këtë javë, do ta regjistrojë humbjen e parë të këtij kampionati pikërisht Shkodër. Ballafaqimi i të kuqve kryeqytetas me Vllazninë po pritet me interes të madh nga të gjithë sportdashësit shkodranë, po ashtu edhe nga vetë futbollistët kuqeblu. "Një ndeshje e tillë të motivon vetvetiu," - thotë sulmuesi kryesor i shkodranëve, Sinani. Ai është autor i tre golave dhe i shumë shtyllave të goditura në këtë kampionat. Por, për momentin, atij nuk i interesojnë shifrat. "Për momentin, e rëndësishme për ne mbetet mbyllja me sukses e ndeshjes me Partizanin," - shprehet Sinani në një intervistë për "Sportin shqiptar":
- Viori, më duket se e harruat tashmë humbjen me Lushnjën, apo jo?
- Normalisht që e kemi harruar, pasi jemi në kampionat dhe duhet të mendojmë për ndeshjen e radhës. Aq më tepër që kjo e radhës, me Partizanin, është shumë e rëndësishme. Humbja me Lushnjën tani nuk kthehet më, megjithëse ato tri pikë të lëna do të ishin shumë të rëndësishme për ne.
- Përballja me një skuadër si Partizani, a ju motivon më tepër këtë radhë?
- Kjo as që diskutohet. Në pamje të parë, çdo ndeshje ka vlerën e tri pikëve, por kjo e radhës, ndaj të kuqve, natyrisht ka edhe të veçantat e saj. Në ndeshje të tilla, vetvetiu je më i motivuar për të dhënë maksimumin në fushë.
- Besoj e dini që Partizani nuk e ka provuar ende shijen e humbjes në këtë kampionat...
- Po, e di. Pikërisht, edhe ky fakt është një arsye më tepër për Vllazninë që t'i shkaktojë humbjen e parë këtij ekipi. Shpresat janë të mëdha që një gjë e tillë të ndodhë pikërisht në "Loro Boriçi". Besoj se do t'ia arrijmë.
- A mendoni se Vllaznia ka forca për ta përballuar një ekip të kompletuar me lojtarë cilësorë, siç është Partizani?
- Po t'u referohesh kualiteteteve të të dy ekipeve, vërtet mund të jemi pak më poshtë se Partizani, mirëpo në anën tonë është më e madhe ambicia për të treguar sesa vlejmë në të vërtetë. Me ne do të jenë edhe tifozët e shumtë shkodranë, që pritet të mbushin "Loro Boriçin" ditën e shtunë. Për të gjitha këto, besoj se do të jemi dinjitozë dhe fitimtarë në këtë ndeshje.
- Kundër jush, këtë herë do të luajë edhe Klodian Duro me Bejzaden, që tifozeria shkodrane do të donte t'i kishte të veshur kuqeblu. Ju, personalisht, a i trembeni këtij "dueti" tashmë të kuq?
- Si Duro, ashtu edhe Bejzade, janë vërtet lojtarë të mirë, por kjo nuk përbën asnjë lloj ndrojtjeje apo stepjeje për ne. Pastaj, Partizani, në tërësi, ka lojtarë të mirë në gjirin e tij. Kjo do të thotë se pikësynimi ynë nuk do të jetë vetëm bllokimi i këtyre dy lojtarëve, sepse mund të na krijojnë probleme edhe të tjerët.
- Së fundi, a e konsideroni tepër të rëndësishme sfidën me të kuqtë, për sa i takon ecurisë së mëtejshme të Vllaznisë në këtë kampionat?
- Them se po. Një fitore në këtë takim do të na ndihmonte shumë për të ardhmen, aq më tepër që na pret një short i vështirë në javët e ardhshme. Megjithatë, ne do të bëjmë të gjitha përpjekjet për të marrë maksimumin në to.

Gjergj Kola ''Sporti Shqiptar''


KUQEBLUTE ne aksion

Imazhe te Ngjitura

vllaznia-partizani0-0,brakini-kaci.jpg (39.7 KB, 46 vezhgime)

Nigeriani Akhigbe, sot fjala e fundit

Ndeshja e sotme e kontrollit për kuqeblutë ka shumë gjasa t'i japë viston e qëndrimit ose jo te Vllaznia nigerianit Mondai Akhigbe. Ditët e fundit, ai ka bindur se mund të jetë i vlefshëm për Vllazninë. Mbi të gjitha, në këtë vendim duket se është arritur pas ndeshjes së kontrollit të së martës, ku sulmuesi 21-vjeçar ka spikatur me lojën e tij. Një gjë e tillë nuk mund të thuhet për nigerianin tjetër, mbrojtësin Kinglei. Vlerësimet për të kanë qenë negative dhe duket se ai do të niset shpejt për andej nga ka ardhur. Vëmendja e drejtuesve të Vllanzisë është përqendruar te sulmuesi shtatlartë Akhigbe.

Imazhe te Ngjitura

vllaznia_shkodar.gif (2.7 KB, 51 vezhgime)

Tifozeria shkodrane pritet të rikthehet e shumtë në shkallët e "Loro Boriçit"

Vllaznia: Tifozët, çelësi drejt fitores

Vllaznia duket se është "e dënuar" të fitojë sot ndaj Partizanit. Opinioni sportdashës shkodran, por edhe presidenca e klubit kuqeblu, presin të marrin vetëm tripikëshin ndaj të kuqve, pa marrë parasysh as vlerat reale të kontigjenteve të dy ekipeve, pa vënë në balancë as milionat e lekëve që presidentët Xhani e Çela kanë harxhuar për merkaton. Kuqeblutë duhet të tregojnë sot më të mirën e futbollit shkodran, si për të thënë se Vllaznia mbetet Vllazni gjithnjë. Ndërkohë, vetë futbollistët e ndiejnë peshën e këtij takimi, për të cilin u është vënë kusht fitorja. Ata e kanë "të ndaluar" të humbasin sot në "Loro Boriçi", nisur edhe nga gjoba që i pret. Sipas rregullores së nxjerrë nga drejtuesit e klubit, një humbje në Shkodër ndëshkohet në shifrat nga 200 mijë deri 350 mijë lekë të vjetra, për çdo futbollist. Megjithatë, presidenca e klubit, për këtë takim ka bërë një përjashtim: ka vënë në dispozicion të futbollistëve një premio të lartë në rast fitoreje. Për sa u takon përgatitjeve për ndeshjen, gjithçka duket në rregull. Dje pasdite, në orën 14.30, ekipi ka zhvilluar stërvitjen e fundit, ndërsa më pas është grumbulluar në hotelin "Meteor", ku do të qëndrojë deri dy orë para fillimit të takimit me të kuqtë kryeqytetas. Trajneri Haxhiosmanoviç duket se e ka lënë prapa humbjen me Lushnjën dhe, ndryshe nga shenjat e pesimizmit që shprehu ditët e para të javës, dje është dukur më i qetë. Ndeshjen me Partizanin, malazezi e konsideron plotësisht të kalueshme, megjithëse, po të ishte në dorën e tij, nuk do të donte të kishte sot përballë Klodian Duron. Këtë lojtar ai e njeh mjaft mirë që nga koha kur e ka stërvitur te Vllaznia. I vetmi shqetësim për malazezin, për sa i takon formacionit, është mungesa e Zmijanit, që nuk ka mundur të riaftësohet dot. Mjeku Çoba është shprehur dje se ai nuk është në gjendje të luajë, prandaj mungesa e tij është e sigurt. Interesimi për takimin e sotëm duket i lartë. Për rrjedhojë, sipas gjasave, për herë të parë në këtë sezon, tribunat e "Loro Boriçit" pritet të mbajnë mbi supe një numër të madh shikuesish. Pikërisht ky faktor, sipas zëvendëspresidentit të Vllaznisë, Valter Fushaj, pritet të luajë një rol përcaktues në rezultatin e këtij takimi. "Duke pasur edhe mbështetjen e tifozerisë sonë të zjarrtë, mendoj se për ekipin gjërat do të lehtësohen," - ka thënë ai në prag të kësaj sfide të rëndësishme.

Vllaznia-Partizani, duel "ish-ësh"

Përballja mes dy ekipeve me emër të madh në futbollin shqiptar, Vllaznisë dhe Partizanit, do të jetë njëkohësisht edhe përballje "ish-ësh". Në të dy kampet ka lojtarë që kanë luajtur në radhët e kundërshtarëve të sotëm e, për rrjedhojë, dueli me ish-skuadrat e tyre përbën një sfidë të bukur. Te Vllaznia luajnë dy futbollistë, që më parë kanë provuar ta veshin fanellën e kuqe, pikërisht portieri Grima dhe Zmijani. I pari ka luajtur për Partizanin kur ky ekip ndodhej në kategorinë e dytë, ndërsa Zmijani kontribuoi me sukses te të kuqtë dy sezone më parë. Pak më ndryshe qëndron puna e "ish-ëve" të Vllaznisë, që militojnë tani te të kuqtë. Dy prej tyre, Klodian Duro dhe Skerdi Bejzade, edhe sot konsiderohen "beniaminë" të tifozerisë shkodrane. Për të parin ruan respekt të veçantë edhe vetë trajneri Haxhiosmanoviç. Madje ai ka edhe meritën e tij në atë "shpërthim" të elbasanasit, në kohën kur luante për kuqeblutë. Nga ana tjetër, Bejzade adhurohet ende në Shkodër. Një sezon e gjysmë aktivizim me Vllazninë i kanë mjaftuar të bëjë për vete shumë sportdashës të këtij qyteti, aq sa edhe sot, në pjesën e jashtme të tribunës qendrore të stadiumit "Loro Boriçi", është i shkruar emri i tij. Dashuria mbase është reciproke, por shkodranët janë të veçantë. Ata nuk i harrojnë kollaj njerëzit që punojnë dhe sakrifikojnë për t'i lartësuar emrin këtij qyteti. Një tjetër ish-futbollist i Vllaznisë është elbasanasi Dorian Bylykbashi, edhe ky me shumë adhurues në qytetin verior.

Gjergj Kola ''Sporti Shqiptar''

Imazhe te Ngjitura

vllaznia-partizani0-0,%20arberidhenallbani.jpg (36.3 KB, 40 vezhgime)

VLLAZNIA mund Partizanin 2 - 1 ne ''Loro Borici'' me golat e MARTINIT.

Kuqeblutë fitojnë 2-1 ndaj të kuqve dhe tani pretendojnë për titull

Vllaznia-Martini, "binomi" që ndali Partizanin

Vllaznia e ka përmbushur premtimin e saj para tifozerisë kuqeblu, teksa ka arritur të ndalë Partizanin. Humbja e paralajmëruar për këta të fundit, edhe përmes shtypit, nga ana e kapitenit Sinani, është arritur, duke i detyruar specialistët dhe analistët e ndryshëm të futbollit shqiptar që t'i shohin me një sy tjetër shkodranët. Loja nisi e bukur. Që në minutat e para janë të kuqtë që kërkojnë të vendosin autoritetin e tyre në fushë. Duro dhe Bejzade përpiqen herë pas here, individualisht, që të ngacmojnë portën shkodrane, por nuk kanë sukses. Abilio dhe Muzka janë plotësisht "në hije", duke mos arritur të shfaqin asgjë përballë kuqebluve të vendosur. Me kalimin e minutave në lojë do të dalë në pah një emër, Vioresin Sinani. Kapiteni shkodran duket se është në ditën e tij më të mirë dhe merr përsipër gjithçka. Por rezultatin do ta zhbllokonte "maniaku" i portave kundërshtare, Edi Martini. Ky gol do t'u jepte zemër futbollistëve të Vllaznisë, të cilët e kuptuan se Partizani nuk ishte i pathyeshëm.

Dervish Haxhiosmanoviç, trajner i Vllaznisë:
"Ishte një fitore e merituar, e para që arrijmë ndaj njërës prej 4 skuadrave pretendente. Kjo fitore tregoi edhe njëherë se mund të luajmë si të barabartë me ta, megjithëse nuk keni parë ende atë Vllazni që pretendoj. Te goli i Partizanit kemi kontestimet tona. Megjithatë, rëndësi ka që ai nuk ndikoi në fatin e këtij takimi."

Agron Çela, president i Vllaznisë:
"Kam pas shumë besim se do të fitonim dhe ia arritëm. Jam i kënaqur pa masë për këtë fitore, e cila u arrit falë shpirtit të lartë të garës që treguan të gjithë djemtë. Ky trepikësh konfirmon edhe njëherë tjetër se jemi në rrugë të mbarë."

Të veçanta
- Rëndësia e takimit të djeshëm u duk qartë edhe te numri i madh i tifozëve të pranishëm në shkallët e "Loro Boriçit", rreth 8000 të tillë.
- Në tribunën anësore kanë qenë të pranishëm edhe një grup prej rreth 100 tifozësh të Partizanit. Tensioni në stadium u rrit pas një gjesti të shëmtuar që një prej tifozëve të kuq bëri ndaj atyre vendës. Vetëm ndërhyrja e policisë shmangu ndonjë incident që mund të krijohej.
- Janë duartrokitur gjatë dje në Shkodër ish-futbollistët e Vllanzisë, Duro dhe Bejzade. Ky i fundit, pas një zënke me Xhahysën e ktheu stadiumin kundër tij, megjithëse respekti për të në qytetin verior vazhdon të jetë i madh.
- 5 milionë lekë të vjetra është shpërblimi që presidenca e Vllaznisë ka akorduar për ekipin për arritjen e kësaj fitoreje.

Imazhe te Ngjitura

albvllaznia.gif (3.2 KB, 89 vezhgime)

Sulmuesi i njohur shkodran vlerëson paraqitjen e skuadrës së tij ndaj Partizanit

Martini: Golat, vajzës dhe Shkodrës pa drita

Njeriu i fitores kuqeblu ndaj Partizanit është pa as më të voglin diskutim sulmuesi i njohur shkodran, Edi Martini. Autori i 2 golave ndaj të kuqve ka shfaqur edhe një herë tjetër vlerat e tij prej një nuhatësi të shkëlqyer të portave kundërshtare. Ndonëse në planet e tij nuk ka ndonjë objektiv për të synuar kreun e golashënuesit më të mirë të kampionatit, tani Martini ka arritur në kuotën e 6 golave. Pra, është shndërruar në njeriun-gol të Vllaznisë. Gjithsesi, sikurse e pranon edhe vetë, ai nuk është në formën më të mirë sportive, por ama vazhdon të mbetet mjaft i rëndësishëm për kuqeblutë. E veçanta e ndeshjes ndaj të kuqve është dedikimi i dy golave të Martinit: "Golat që shënova ndaj Partizanit ia dedikoj në radhë të parë vajzës, që vetëm dy ditë më parë mbushi 1 vjeç, dhe tifozëve tanë të mrekullueshëm, pra Shkodrës sime pa drita," ka thënë Martini. Një dedikim i veçantë ky nga futbollisti-baba, por edhe nga qytetari që vuan, ashtu si të gjithë bashkëqytetarët e tij, fenomenin e errësirës. Duke iu rikthyer ndeshjes të së shtunës me Partizanin, Martini ka dhënë disa nga arsyet që e çuan Vllazninë drejt triumfit: "Ishim mobilizuar të gjithë për ta fituar këtë ndeshje. Fatmirësisht, ia dolëm mbanë, falë shpirtit të sakrificës së të gjithë lojtarëve dhe mbështetjes së madhe të tifozerisë sonë të mrekullueshme," shprehet goleadori shkodran. Goli i parë i shënuar prej tij në pjesën e parë i ka dhënë sigurinë e duhur ekipit shkodran. Mbi të gjitha, ka rritur besimin që Partizani nuk ishte skuadër e pamposhtur, pavarësisht nga "fryrja" mediatike që i është bërë këtij ekipi. Po kështu, edhe goli i dytë i Martinit ka ardhur në momentin më deciziv të takimit, dy minuta pasi të kuqtë kishin barazuar. Madje ky gol ka vërtetuar edhe njëherë se Martini, edhe po të mos jetë në formën e duhur, ia vlen të mbahet në fushë. Prej minutash të tëra, të gjithë të pranishmit në "Loro Boriçi" kanë qenë të mendimit se numri 10 i kuqebluve duhej zëvendësuar me kohë. Por ia ka vlejtur të qëndronte aty në qilimin e blertë. Për të, golat nuk kanë aq shumë rëndësi sesa fitorja. "Ta festojmë të gjithë së bashku këtë fitore, sepse ishte shumë e rëndësishme për ne. Por vetëm për pak kohë, sepse duhet të fillojmë të mendojmë për ndeshjen me Teutën," - gjykon Martini, autori i dy golave ndaj Partizanit.

Gjergj KOLA ''Sporti Shqiptar''

EDI MARTINI

Numri 1 i klubit shkodran përgëzon futbollistët kuqeblu për suksesin ndaj të kuqve

Çela: Pa përjashtim, të gjithë të mrekullueshëm

Presidenti i Vllaznisë, Agron Çela, ka qenë njeriu më optimist i kuqebluve për arritjen e një rezultati pozitiv, në prag të ndeshjes me Partizanin. Në çdo moment që i është dhënë mundësia të deklarohet për rezultatin e këtij takimi, njeriu i presidencës shkodrane ka shprehur besimin e tij të plotë për suksesin e skuadrës që sponsorizon. Fitorja e arritur më pas në fushën e lojës i ka dhuruar një gëzim të pamatë. Ndoshta më të madhin gëzim, që kur ai është zgjedhur president i klubit "Vllaznia". I pyetur se ku e kishte mbështetur gjithë atë besim, që Vllaznia do të arrinte ta ndalte Partizanin, Çela është përgjigjur: "Te djemtë, pasi unë gjithnjë kam besuar tek ata. Që nga dita e parë që jam në krye të kësaj skuadre, kam qenë i mendimit se ky kontigjent lojtarësh mund të bëjë shumë gjëra të bukura. Kisha besim që Vllaznia do të dilte nga ajo situatë jo e këndshme, që e shoqëroi në fillim të kampionatit. Pas kësaj fitoreje, mendoj se u vërtetua plotësisht fakti që kjo skuadër mund të ecë shumë përpara." Për presidentin Çela, faktor kryesor që solli fitoren e skuadrës së tij ishte shpirti i lartë i garës së lojtarëve të tij. "Vllaznia e fitoi ndeshjen me Partizanin sepse u tregua vetëmohuese dhe e vendosur në arritjen e synimit që i kishim vënë vetes. Lojtarët tanë treguan shpirt të lartë gare. Nuk mund të veçoj asnjërin prej tyre, sepse të gjithë ishin të mrekullueshëm. Ishin aty ku duhej të ishin, në vendin e duhur, në momentin e duhur, prandaj erdhi fitorja," ka shtuar njeriu i presidencës shkodrane. Në të vërtetë, Vllaznia ka triumfuar ndaj të kuqve, por një pjesë e konsiderueshme e suksesit i takon edhe presidencës së klubit. Njerëzit e biznesit që janë vënë në krye të klubit shkodran vazhdojnë t'i qëndrojnë afër ekipit. Presidenti Çela e konsideron triumfin ndaj Partizanit një fitore të madhe dhe hapin e duhur drejt sukseseve të tjera. "Kjo ndaj Partizanit ishte një fitore e madhe, një fitore në të cilën ka pjesën e tij të konsiderueshme edhe publiku fantastik shkodran. Unë, që kur jam ulur në këtë detyrë, kam deklaruar se Vllaznia do të jetë në treshen e ekipeve më të mira. Edhe tani i përmbahem kësaj thënieje," thotë në fund të deklaratës së tij për "Sportin shqiptar" presidenti i Vllaznisë, Agron Çela.

Gjergj KOLA ''Sporti Shqiptar''

Partizani, fitorja që vlen 5 milionë

Fitorja e së shtunës ndaj Partizanit, përveç vlerës së tri pikëve dhe kënaqësisë që solli në kampin shkodran, ka vlejtur edhe në një aspekt tjetër për futbollistët e Vllaznisë, pikërisht në mbushjen e xhepave të tyre. Presidenca e klubit ka akorduar për këtë fitore një shpërblim prej 5 milionë lekësh të vjetra për të gjithë ekipin. Një gjë e tillë konfirmohet nga zëvendëspresidenti i klubit, Valter Fushaj, i cili e konsideron plotësisht të merituar këtë shpërblim nga skuadra. Ky shpërblim, kësisoj, është i pari që futbollistët kuqeblu përfitojnë për një fitore në Shkodër. Sipas rregullores së hartuar nga drejtuesit e klubit, vetëm humbja nuk lejohet në "Loro Boriçi". Po të ndodhë kjo, për kuqeblutë janë parashikuar edhe gjobat. Megjithatë, drejtuesit e klubit kanë saktësuar se do të ketë shpërblime edhe nëse Vllaznia fiton ndaj rivaleve të saj pretendente.

Kapiteni shkodran i ka vënë synim vetes të shpallet golashënuesi më i mirë i Vllaznisë në vite

Sinani: Dua të hyj në histori

Goleadori i njohur shkodran, Vioresin Sinani, kërkon të hyjë në historinë e Vllaznisë si shënuesi më i mirë i saj në vite. Për momentin, ai sapo ka arritur kuotën e 100 golave të shënuar me fanellën kuqeblu, çka do të thotë se ka hedhur një hap të konsiderueshëm drejt këtij objektivi. Por më e bukura është që kjo shifër ka ardhur në një moment të mirë për lojtarin në fjalë. Fitorja që Vllaznia arriti të shtunën ndaj Partizanit, vërtet ka mbajtur emrin e Edi Martinit, sepse ai i ka shënuar dy golat, por kapiteni Sinani ka qenë iniciatori i tyre. Numri 9 i kuqebluve ka zhvilluar ndeshjen e tij më të mirë të këtij sezoni. Sportdashësit shkodranë kishin kohë që nuk e kishin parë kapitenin e tyre në këtë formë e, për pasojë, e kanë duartrokitur gjatë. Por, më parë se të flasë për veten e tij, Viori ka dëshirë të thotë diçka për faktorët që çuan në arritjen e asaj fitoreje shumë të bukur të së shtunës që kaloi: "Ne fituam, sepse luajtëm me më tepër shpirt në fushë, qemë më këmbëngulës sesa kundërshtari dhe, ajo që është më e rëndësishme, vrapuam më shumë se ai," ? ka thënë për "Sportin shqiptar" kapiteni i Vllaznisë, Vioresin Sinani. Sulmuesi 26-vjeçar i kuqebluve ishte i pari që e hodhi "dorashkën" e sfidës në adresë të futbollistëve të Partizanit. Qysh në mesjavën e kaluar, ai i paralajmëroi të kuqtë se në Shkodër i priste vetëm humbja. Një deklaratë e tillë, prej shumëkujt u konsiderua e nxituar, duke parë diferencën e kualiteteve mes dy ekipeve. Por, pavarësisht nga kjo, pavarësisht nga tri mungesat që kishin në formacion kuqeblutë, ata arritën t'ia dalin mbanë dhe të triumfojnë. "Të gjithë kishim shumë besim se mund ta ndalnim Partizanin. Këtij besimi duhet t'i shtosh edhe vendosmërinë dhe egon tonë, që e paraqitëm në fushë. I kishim vënë synim vetes për të fituar me çdo kusht dhe ia arritëm," ? shton më tej kapiteni i Vllaznisë. Të shtunën e kaluar, Sinani ka qenë lojtari më problematik për mbrojtjen e Partizanit, duke krijuar mjaft hapësira për Martinin dhe lojtarët e tjerë të Vllaznisë. Megjithatë, Sinanit nuk i vjen keq që golat nuk mbajnë firmën e tij: "Nëse nuk shënova, kjo nuk përbën asnjë problem për mua. Shënoi Martini dhe fituam, kjo ka rëndësi. E rëndësishme është që Vllaznia fitoi."
Sinani, në të vërtetë, duket që nuk është bërë aspak pishman që nuk e tundi rrjetën kundërshtare këtë herë, por tek ai duket qartë dëshira për të hyrë në historinë e klubit "Vllaznia" si golashënuesi më i mirë i saj në vite. Nga statistikat e dala, rezulton se Vioresin Sinani sapo ka arritur shifrën e 100 golave të shënuar në ndeshjet zyrtare, me fanellën e Vllaznisë. Një gjë të tillë e dëshiron edhe vetë ai. Kjo duket qartë edhe në fjalët që dalin nga goja e tij: "Nuk kam pse ta fsheh dëshirën time për të hyrë në historinë e kësaj skuadre si shënuesi më i mirë i saj në vite. E di që jam shumë afër realizimit të kësaj ëndrre dhe shpresoj ta arrij sa më parë."

Pasaporta e Vioresin Sinanit:
Datëlindja: 04.11.1977
Vendlindja: Shkodër
Gola në kamionatin shqiptar: 72
Gola në Kupën e Shqipërisë: 26
Gola në Kupat e Evropës: 2
Gola gjithsej: 100

Kapiteni, ditëlindja e gjen të skualifikuar

Vioresin Sinani, pikërisht sot mbush 26 vjeç. Kapiteni shkodran, këtë përvjetor të tij duket se nuk e ka pritur me shumë entuziazëm, për sa i takon anës sportive. Kjo, pasi pikërisht në momentin kur po kalonte formën më të mirë, i duhet të pushojë. Kartoni i tretë i verdhë që mori të shtunën ndaj të kuqve të Partizanit ia ka bërë të pamundur aktivizimin në Durrës, përballë Teutës vendëse. Një mungesë kjo shumë e rëndësishme për kuqeblutë, pasi dihet tashmë pesha që ky lojtar ka te Vllaznia. Megjithatë, Sinani sot duket se do ta harrojë për momentin gjithçka, për të festuar përvjetorin e tij të 26?të të lindjes. Kuqeblutë, në këtë mënyrë, do të kenë mundësinë që, përpara ndeshjes së kontrollit, të urojnë kapitenin e tyre për ditëlindjen. Vetë Sinani e pret atë në një moment të gëzuar, teksa ka mundur të arrijë në shifrën e 100 golave të shënuar në ndeshjet zyrtare me Vllazninë, duke vënë kështu kandidaturën e tij për të parin vend të kësaj renditjeje interesante. Me këtë rast, edhe redaksia e gazetës "Sporti shqiptar" e uron për këtë ditë të shënuar dhe i uron fat dhe suksese në jetë e kudo.

Gjergj Kola ''Sporti Shqiptar''