Barazimi 0-0 në miqësoren e mbrëmshme mes Shqipërisë dhe Gjeorgjisë duket se i ka lënë të kënaqura të dyja skuadrat, ashtu sikurse edhe trajnerët respektivë, që nuk e donin kurrsesi rezultatin negativ. Aq më tepër Brigeli, i cili donte të rregullonte sadopak imazhin e asaj humbjeje me Lituaninë në miqësoren paraardhëse. Në fakt, duket se 90-minutëshi i mbrëmshëm u ka shërbyer të dy trajnerëve për të eksperimentuar dhe provuar lojtarët e rinj, kandidatë për në kombëtare, pasi cilësia e lojës ka lënë për të dëshiruar. Madje, prania e paktë e tifozëve në stadiumin kombëtar "Qemal Stafa" tregonte qartë se kjo miqësore nuk kishte ndonjë interes kush e di se çfarë.

Sidoqoftë, duhet pranuar se kundërshtari ka qenë më lart se ne, sidomos në aspektin fizik, ku ka bërë dukshëm diferencën. Futbollistët gjeorgjianë kanë fituar pothuajse të gjitha dyluftimet e shpejtësisë me kuqezinjtë tanë, sidomos në mesfushë, dhe kanë qenë më kërkues për golin. Nga ana tjetër, kuqezinjtë janë treguar disi të mpirë, pa një organizim të qartë loje dhe me një mungesë koordinimi mes reparteve. Veçanërisht sulmi, me Bogdanin dhe Kastratin në pjesën e parë, e ka parë veten të izoluar nga pjesa tjetër e skuadrës, pasi mesfusha nuk i ka furnizuar si duhet me topa. Po ta marrësh në total ndeshjen e mbrëmshme, mund të thuash se ka rezultuar më shumë se një ndeshje miqësore, pasi dy portierët respektivë kanë qenë thuajse në rolin e spektatorit. Konkretisht, skuadra jonë kuqezi ka goditur katër herë në kuadratin e portierit mik, ndërsa miqtë janë kundërpërgjigjur diçka më shumë në portën e Likës. Çka tregon se loja është zhvilluar më shumë në mesfushë, ku binte në sy konfuzioni i lojtarëve dhe mungesa e orientimit drejt portave kundërshtare. Duhet theksuar se loja e futbollistëve gjeorgjianë ka qenë disi e ashpër, madje në disa raste edhe e rrezikshme ndaj kuqezinjve tanë. Për pasojë, ata janë ndëshkuar edhe më një karton të kuq nga gjyqtari i ndeshjes, Dondarini. Kjo, për sa i takon analizës së përgjithshme të miqësores së mbrëmshme, Shqipëri-Gjeorgji. Ndërsa, duke u futur më në detaje për lojën e skuadrës sonë kombëtare, duhet thënë që në fillim se la për të dëshiruar. Mbase kjo ka ardhur edhe si rezultat i praktikës së pakët të lojës së kuqezinjve që u aktivizuan mbrëmë, që pasqyrohej në moskoordinimin e duhur të reparteve të lojës, por edhe të emocioneve që fal fanella e rëndë e kombëtares te debutuesit.

Miqësorja e mbrëmshme, për sa u takon kandidatëve për një fanellë kuqezi në ndeshjet zyrtare, mund të themi se ka konfirmuar paraqitjen konstante të Endri Vrapit në mbrojtje. Admir Teli është dukur "i vogël" për rolin që i ishte ngarkuar. Eshtë evidentuar qartazi Debatik Curri në mesfushë, si një lojtar me personalitet dhe vizion, me aftësi mjaft të mira organizative dhe mbrojtëse. Kemi parë një Kastrat, që mbase nuk e tregoi dot veten në 45 minuta lojë. Të tjerët, që u aktivizuan në pjesën e dytë nga Brigeli, nuk i shpëtuan dot lojës konfuze dhe pa koncept të qartë të skuadrës në tërësi. Këtu nuk mund të bëhet ndonjë vlerësim të saktë për Ansi Agollin dhe Hamdi Salihin, të cilët çuditërisht u aktivizuan me mjaft vonesë nga Brigeli. Nëse i referohemi modulit të lojës, me të cilin u paraqit në miqësoren ndaj Gjeorgjisë kombëtarja jonë, duhet thënë se pamë dy skema loje. Pjesa e parë u luajt pastër me skemën 3-5-2, ku në qendër të mbrojtjes pozicionohej Teli, Vrapi nga e majta dhe Dallku nga e djathta. Në mesfushë, në qendër të saj, si zakonisht rolin e organizatorit e kryente Skela, ndërsa Lala atë të shkatërruesit. Në të majtë u aktivizua Haxhi, ndërsa në të djathtë Jupi. Sulmi kuqezi iu besua dyshes Bogdani-Kastrati në pjesën e parë. Me fillimin e pjesës së dytë, si rezultat edhe i zëvendësimeve të bëra, Brigeli ndërthuri modulin 4-4-2 në fazën mbrojtëse dhe 3-5-2 në fazën sulmuese. Tashmë vendin e organizatorit e ka marrë Klodian Duro, që zëvendësoi Skelën, ndërkohë që përkrah Bogdanit në sulm luan Kapllani.

Teli ia ka lënë vendin E.Xhafës, ndërsa Debatik Curri është zëvendësuar nga Ardit Beqiri. Gjithsesi, edhe këto zëvendësime, ashtu sikurse edhe futja e Agollit dhe e Salihit në fundin e ndeshjes, nuk kanë ndryshuar asgjë në lojën e kuqezinjve tanë, të cilët vuajnë shumë në dyluftimet në mesfushë me gjeorgjianët dhe në organizim. Ata e kanë mjaft të vështirë të dalin rrjedhshëm e qartë në sulm, pasi repartet e lojës vazhdojnë të jenë të shkëputura nga njëri-tjetri. Për pasojë, porta kundërshtare duket e paarritshme, me përjashtim të një goditjeje nga larg të Klodian Duros dhe një rasti të favorshëm për gol të Lalës, pas një goditjeje këndi. Nga ana e tyre, gjeorgjianët tregojnë këmbëngulje dhe freski fizike, duke bërë diferencën në këtë drejtim, edhe pse nuk e kanë vënë seriozisht në rrezik portën e Likës, i cili nuk pati rast të tregojë aftësitë e veta. Kështu, mbyllet në paqe kjo miqësore e kuqezinjve tanë, që synojnë rinovimin, edhe pse kandidatët për ta materializuar këtë gjë nuk duken të tillë, që t'i "shqyejnë" dyert e kombëtares, duke zëvendësuar të ashtuquajturit të vjetër. Gjithsesi, konstatimet më mirë se kushdo le t'i bëjë trajneri Brigel. Ajo e mbrëmshmja ishte një provë e kombëtares kuqezi në rinovim...

__________________
Try not to become a man of success but rather to become a man of value - Einstein Albert.

Shqipëri - Gjeorgji 0-0
Shqipëria: Lika, Teli (E.Xhafa 46'), Vrapi, Dallku, Haxhi (Agolli 75'), Curri (A.Beqiri 46'), Lala, Jupi, Skela (Duro 46'), Kastrati (Kapllani 46'), Bogdani (Salihi 82'). Trajner: H.P.Brigel.
Gjeorgjia: Lomaia, Magraxe, Gvinianixe, Shashiashvili, Eliava, Gogua, Kankava, Menteshashvili (Ganugrava 30'), Gigiaxe, Jakobia, Aladashvili (Saturixe 88'). Trajner: K.Topmëler.
Gjyqtarë: P.Dondarini, K. Kopeli, M. Rosi (Itali).
K.Verdhë: Gogua, Ganugrava.
K.Kuq: Gogua.
"Radiografia"
6'- Bogdani insiston në zonë pas pasimit të Skelës, por mbrojtja gjeorgjiane mbyll me shpejtësi aksionin.
13'- Kastrati shpërthen nga e majta, kroson në zonë për Bogdanin, i cili nuk arrin ta mbrojë topi, duke u dhënë mundësi gjeorgjianëve të mbyllin hapësirat.
16'- Vrapi dhe Lika nuk kuptohen mirë me njëri-tjetrin dhe u japin mundësi miqve të rrezikojnë.
19'- Gjeorgjianët provojnë të gjejnë portën me anë të një goditjeje dënimi, por zihen në pozicion jashtë loje.
21'- Dallku devijon goditjen e dënimit të ekzekutuar nga Gogua.
23'- Dy goditje të njëpasnjëshme këndi të gjeorgjianëve, në fund Lika pret i sigurt topin.
26'- Jupi pason për Bogdanin në hyrje të zonës së rreptësisë, por më parë sulmuesi shtatlartë zihet në pozicion jashtë loje.
35'- Sërish dy goditje të njëpasnjëshme të këndit nga ana e gjeorgjianëve dhe mbrojtja kuqezi është në gatishmëri për të larguar rrezikun.
39'- Bogdani dhe Lala kombinojnë bukur me njëri-tjetrin, por fitojnë vetëm një goditje këndi. Kroson Skela dhe pret pa problemeLomaia.
41'- Eliava fiton një goditje dënimi në të majtë të sulmit, ekzekuton Gogua, por Dallku largon me kokë. Vazhdon sulmi i gjeorgjianëve, Alatashvili i vetëm përballë Likës, gabon rëndë duke gjuajtur jashtë.
45'- Lala vonohet në gjuajtje në hyrje të zonës, duke i dhënë mundësi Shashiashvilit të largojë menjëherë rrezikun para portës.
48'- Erion Xhafa, i porsafutur, largon me shpejtësi një top që po i drejtohej Goguas, duke e mbyllur mirë aksionin e miqve.
56'- Jupi i jep një dorë edhe mbrojtjes, teksa i heq topin nga këmba Magraxes, i cili po bëhej gati të godiste portën.
60'- Duro kërkon Bogdanin në zonë, por sulmuesi i Sienës është një hap larg.
64'- Duro ekzekuton një goditje dënimi në të majtë të sulmit, mbrojtja gjeorgjiane mbulon ashpër Bogdanin, duke mos i dhënë mundësi ta godasë topin.
72'- Duro ekzekuton sërish një goditje dënimi nga 40 metra, portieri mik në vështirësi largon topin jashtë vijave. Kroson Duro nga goditje dënimi, pas një rrëmuje në zonë, Bogdani nuk shënjestron si duhet.
78'- Eliava gjuan drejt portës, pas një goditjeje dënimi, topi kalon afër portës së mbrojtur nga Lika.
84'- Duro kërkon portën nga 30 metra, pret në dy kohë Lomaia, duke u mbyllur edhe një mundësi kuqezinjve për të shënuar gol.
Flasin protagonistët kuqezinj

Ansi Agolli: Luajta shumë pak minuta, prandaj nuk mund të jap një vlerësim konkret. Repartet kanë nevojë për rifreskim, kështu që është mirë të zhvillohen sa më shumë ndeshje të tilla, ku të shihen shumë lojtarë.

Erion Bogdani: Ishte një miqësore dhe, më shumë se rezultati, kishte vlerë loja e të rinjve. Për këtë arsye, duke parë se futbollistët luajtën për herë të parë me njëri-tjetrin, nuk zhvilluam ndonjë lojë të bukur. Megjithatë, duhet vlerësuar pozitivisht.

Endri Vrapi: Ishte ndeshja ime e dytë me kombëtaren, por duhet ende kohë për të zënë një vend si titullar. Unë jam munduar të jap maksimumin, por vlerësimin më të saktë e jep trajneri. Shpresoj të grumbullohem përsëri me kombëtaren.

Bekim Kastrati: Kjo ishte ndeshja ime e parë me kombëtaren dhe dua të them se kam provuar një ndjenjë të mrekullueshme. Në fakt, dëshiroja fitoren në premierën time, por nuk ndodhi kështu. Shpresoj ta vazhdoj punën që kam nisur me klubin tim dhe me kombëtaren e Shqipërisë.

Ardit Beqiri: Gjeorgjia kishte ardhur për fitore në Tiranë, madje ata ishin tepër të motivuar pasi drejtoheshin nga një trajner gjerman. Për këtë arsye ata luajtën fort, madje duke e tepruar disi. Dëshira ime si çdo futbollist tjetër është të vazhdoj të jem pjesë e kombëtares edhe në të ardhmen.

Klodian Duro: Ishte një miqësore, e cila mendoj se i ka shërbyer deri diku ekipit tonë përfaqësues, pasi rezultati nuk ishte shumë i rëndësishëm. Gjithsesi, ne edhe mund ta kishim fituar ndeshjen. Sigurisht, ka vend për më mirë, por pozitive ishte hapësirat që iu krijuan elementëve të rinj.

Hamdi Salihi: U aktivizova shumë pak në fund dhe pata shumë pak mundësi të tregoja veten time. Megjithatë, jam i kënaqur që m'u dha si fillim mundësia të luaj me ekipin përfaqësues, sepse për çdo futbollist përfaqësimi me kombëtaren është një arritje e veçantë.

Redi Jupi: Shqipëria mund ta kishte fituar ndeshjen nëse do të kishte pasur pak më tepër fat, sepse në krahasim me kundërshtarin ne krijuam më shumë raste. Megjithatë, luanim me një kundërshtare si Gjeorgjia, kështu që loja ishte më e rëndësishme se rezultati në fund të fundit.

__________________
Try not to become a man of success but rather to become a man of value - Einstein Albert.

"Për herë të parë, kombëtarja luajti jo me formacionin e zakonshëm, sepse, siç e dini, donim të shihnim disa nga pretendentët për të luajtur në të ardhmen. Fitova shumë njohuri për sa u përket kandidatëve të rinj. Nuk mund t'i vlerësosh me një ndeshje të përzgjedhurit, pasi ata do të kenë shanse të tjera." Kështu e ka nisur konferencën për shtyp pas ndeshjes trajneri i kombëtares shqiptare, Hans Peter Brigel, i cili, ndryshe nga herët e tjera, ka ftuar kolegun e tij, njëkohësisht edhe mikun, trajnerin Klaus Topmëler, që të dilnin së bashku në konferencën për shtyp.

Të dy trajnerët gjermanë e kanë vënë theksin në terrenin e vështirë, çka ndikoi edhe në rezultat, duke mos shënuar dot nga fusha e keqe. Ndërsa për ekipin, Brigeli u shpreh: "Mbrojtja mund të them se ishte pjesë e kombëtares së parë, duke i zbatuar detyrat dhe duke mos bërë shumë gabime. Por dua të vë në dukje disa futbollistë që nuk ishin të stërvitur mirë në skuadrat ku militojnë. Më ka pëlqyer loja e Xhafës, Currit dhe e Dallkut. Vijës së sulmit nuk mund t'i vë shumë faj, sepse mesfusha u ndërrua gati e gjitha në pjesën e dytë dhe nuk mundi të harmonizohej ashtu si duhet. Ndikoi shumë terreni i keq i fushës, pasi gjendja ishte akoma më e mjerueshme se në ndeshjen me Lituaninë. Ekipi ynë luan me pasime të shkurtra, gjë që ky terren e pengoi shumë." Në lidhje me sulmuesin kosovar Bekim Kastrati, trajneri i kombëtares pohoi: "Kastrati luajti mirë. Ishte shansi i parë për të, të cilin e justifikoi. Jo vetëm ai, por të gjithë do të kenë shanse të tjera." Pyetjes së fundit mbi lojën e rëndë të gjeorgjianëve, trajneri gjerman i kuqezinjve iu përgjigj me diplomaci: "Vërtet ishte një ndeshje miqësore, por shumë të rinj kërkojnë të fitojnë formacionin, prandaj dhe luajnë fort. Kjo ishte edhe për kandidatët tanë. Mund të them se gjeorgjianët dhanë 100% të mundësive të tyre, ndërsa ne vetëm 80%."

Topmëler: Barazimi, rezultat i drejtë
Ndryshe nga kolegu dhe patrioti i tij gjerman Brigel, trajneri i Gjeorgjisë, Klaus Topmëler, u mor më shumë me rezultatin, të cilin e quajti të drejtë dhe të merituar për të dy ekipet. Por Topmëleri, ashtu si dhe Brigeli, theksuan fushën e keqe të "Qemal Stafës", që sipas tyre, ndikoi në lojë. "Terreni ishte shumë i rënduar dhe nuk arritëm të dilnim në lojën tonë. Mendoj se rezultati ishte i merituar dhe i drejtë për të dy ekipet për nga mënyra si luajtën skuadrat. Pata dy mbrojtës të rinj, të cilët e justifikuan plotësisht besimin tim. Testova shumë lojtarë dhe do të vazhdoj ta bëj këtë edhe në të ardhmen, pasi kjo nuk ishte Gjeorgjia më e mirë," - është shprehur ndër të tjera trajneri gjerman i kombëtares së Gjeorgjisë, Klaus Topmëler.

__________________
Try not to become a man of success but rather to become a man of value - Einstein Albert.

Gjatë një interviste të dhënë të hënën e kaluar, trajneri i kombëtares shqiptare, Hans Peter Brigel, ka dhënë mendimin e tij për botërorin e Gjermanisë, i cili do të nisë në qershor. Si një lojtar që dy herë ka provuar se çfarë është është finalja e botërorit, Brigeli ka folur gjatë për Gjermaninë e tij, objektivat që mund të arrijë ekipi i Klinsmanit dhe shumë gjëra të tjera që kanë të bëjnë me futbollin. "Po, e di që Brajtneri e ka sulmuar shumë ashpër Bekenbauerin këto ditë për punën e botërorit. Unë ju them që lufta do të ashpërsohet shumë deri në fillim të kampionatit botëror," është shprehur trajneri Brigel.

Gjermani, nga ana tjetër, ka pranuar që të japë mendimin e tij se cilat ekipe mund të jenë kandidate kryesore për të fituar kupën e botës. Sipas Brigelit, Brazili nuk është ekipi favorit për këtë botëror. "Brazilianët asnjëherë nuk e kanë fituar kupën e botës në Europë këto 50 vjet. Kështu, mendoj se edhe në këtë botëror do të jetë një ekip tjetër dhe jo Brazili," është shprehur Brigeli. Gjermani i kombëtares shqiptare gjithsesi është i mendimit se Gjermania nuk është në një gjendje të keqe, siç trumbetohet nga shtypi. Sipas tij, humbja katastrofike me Italinë ishte vetëm një episod që nuk do të ndikojë në finalet e botërorit. Për të tjerat Brigeli është i mendimit se Italia dhe Argjentina kanë disa probleme. Italianët janë të dobët në mbrojtje. "Mos i shihni këto ndeshje.

Gjermania do të shkojë deri në gjysmëfinale dhe për këtë të jeni të sigurt. Shikoni takimin Bajern Milan. Bavarezët e shkatërruan Milanin në ndeshjen e parë, por italianët në ndeshjen e dytë ishin në qiell. Kështu do të ndodhë edhe në botëror. Pra, gjithçka do të varet nga forma e ekipeve. Surpriza mendoj se do të jetë Ukraina, nëse luan mirë në mbrojtje, ashtu siç ka bërë në këto eliminatore. Po luajti në sulm, do të ketë shumë probleme. Për shembull, ndaj nesh Ukraina luajti në sulm dhe vuajti. Për të mëdhatë e tjera mund të them Argjentina dhe Italia nuk janë favorite. Italianët nuk kanë mbrojtje këtë vit. Holanda po, mund të jetë kampionia e botës, pasi ka një superskuadër," thotë Brigeli, që e di mirë se çfarë është një finale e kupës së botës.

__________________
Try not to become a man of success but rather to become a man of value - Einstein Albert.

Në Federatën Shqiptare të Futbollit dje nuk është organizuar vetëm shorti i gjyqtarëve. Një komision i përbërë prej disa anëtarësh, me në krye Kreshnik Agollin, Hito Hitajn dhe Medi Bushatin, kanë marrë në pyetje 5 kandidatë të rinj për të marrë titullin menaxher të FIFA s. Kështu, në bankën e provimit, dje kanë qenë emra të njohur të futbollit shqiptar. Në radhë të parë, ish lojtari i kombëtares shqiptare Altin Rraklli, që aktualisht luan në kampionatin tonë me ekipin e Besës. Alfred Bode, ish anëtari i komitetit ekzkutiv, që nuk fitoi në zgjedhjet e fundit dhe që, siç duket, qëllim ka pasur për të marrë licensën e menaxherit të FIFA s. Gjithashtu, tre kandidatët e tjerë ishin Sokol Haxhia, Vasil Toçi dhe Alfred Mane. Të pesë këta kandidatë për gati dy orë rresht kanë zhvilluar një provim, ku u janë përgjigjur pyetjeve që kanë qenë të mbyllura në 5 zarfe. Sipas shefit të sektorit të licensimeve, Kreshnik Agolli, që është përgjegjës për promovimin për menaxher të FIFA s, gjithçka ka shkuar në rregull. "Kanë qenë 5 kandidatë, të cilët kanë zhvilluar provimin në fjalë.

Ata ishin Sokol Haxhia, Alfred Mane, Altin Rraklli, Alfred Bode dhe Vasil Toçi. Të tërë e kanë zhvilluar provimin, por nuk do të thotë se mund të quhen menaxherë të FIFA s. Vetëm kur të vijnë përgjigjet atëherë do të shohim se cili e ka marrë licensën," është shprehur dje Agolli. Nga ana tjetër, duke parë me kujdes këtë dyndje të madhe për të marrë një licensë menaxheri, të lind natyrshëm pyetja: Po çfarë lojtarësh do të çojnë jashtë këta menaxherë? Nëse edhe kandidatët e fundit e marrin licensën, atëherë Shqipëria mund të ketë rreth 13 menaxherë të FIFA s, që ndoshta nuk kanë kë lojtar të çojnë jashtë vendit. Tregu ynë është shumë i varfër me lojtarë cilësorë, të cilët mund të luajnë në kampionatet e huaja. Madje kjo duket qartë nga lëvizjet që menaxherët e FIFA s kanë bërë gjatë viteve të fundit.

Pra, shihet dhe kuptohet mjaft mirë që një lumë licensash për menaxherë të FIFA s janë vetëm për të pasuruar CV në e personave që i mbajnë ato tituj. Futbollit ndoshta shumë pak i shërbejnë, pasi këta menaxherë prej shumë kohësh nuk kanë sjellë ndonjë risi të madhe në eksportin e lojtarëve shqiptarë jashtë vendit tonë.

Kuqezinjtë, miqësoret ende pa emër
Edhe pse ekipi kombëtar ka zhvilluar dy ndeshje miqësore gjatë muajit mars, nga ana e federatës po punohet që sërish kuqezinjtë të zhvillojnë një ndeshje miqësore. Të paktën kështu shprehet zëdhënësi i shtypit në federatë. Sipas këtij të fundit, federata jonë ka nisur një sërë ftesash për një ndeshje miqësore në javët në vazhdim. "Kemi nisur një sërë ftesash për miqësore. Deri tani nuk kemi asnjë përgjigje. Gjithsesi, ne vazhdojmë punën dhe shumë shpejt do të kemi një miqësore për ekipin tonë kombëtar," është shprehur zëdhënësi i shtypit. Pra, kombëtarja është në kërkim të kundërshtarëve për datën e lirë të majit. Në federatë nuk i kanë bërë të ditur emrat e kujt ekipeve ua kemi dërguar ftesat. Ndonjëherë kjo lloj mënyre fsheh edhe mosdërgimin fare të ftesave për ndeshje miqësore. Dy data të lira të UEFA s janë ato më 19 maj dhe më 16 gusht.

__________________
Try not to become a man of success but rather to become a man of value - Einstein Albert.

Çfarë nuk shkon me Ervin Skelën? Mesfushorit të kombëtares shqiptare i është dhënë një rol i ri nga trajneri i Kaizerslauternit, Volfgang Volf. Drejtuesi i skuadrës gjermane e vlerëson shumë figurën e Skelës si futbollist dhe ka gjetur për numrin "7" një rol të ri. "Skela është një lojtar me shumë vlera dhe ne duhet që këto vlera t'ia nxjerrim në pah," tha trajneri i Kaizerslauternit në konferencën për shtyp. Në të ardhmen do t'i jap edhe detyra mbrojtëse në mesin e fushës. Por ai do të jetë i vetmi në këtë repart, i cili do të ketë detyrën që të mbulojë veprimet mbrojtëse të skuadrës në mesin e fushës. Skela është autor i një goli përrallor me Borusia M'Gladbahun, mirëpo kaq nuk mjafton për Volfin, i cili kujton edhe sezonin e zhvilluar prej tij më 2003 2004, prandaj ai kërkon t'i ngarkojë shqiptarit detyra të tjera në ndihmë të skuadrës.

__________________
Try not to become a man of success but rather to become a man of value - Einstein Albert.

Trajneri i kombëtares shqiptare, Hans Peter Brigel, ka mbërritur në Tiranë, por nuk ka pranuar të flasë për mediat shqiptare. Gjermani ka mbërritur në Rinas rreth orës 12.30 dhe menjëherë është parë në shkallët e stadiumit "Selman Stërmasi" për të ndjekur derbin mes Tiranës dhe Dinamos. Së bashkun me trajnerin Brigel, i pranishëm në stadium ka qenë edhe avokati i tij personal, i cili gjithmonë udhëton drejt Shqipërisë sa herë që gjermani ka ndër mend të bisedojë për probleme kontraktuale. Edhe herën e parë kur ka ardhur në Shqipëri ka qenë i shoqëruar pikërisht nga avokati i tij. Gjithsesi, ardhja e trajnerit Brigel në stadium është ndjekur me interes nga media. Turmës së madhe të gazetarëve të interesuar për të takuar gjermanin, Brigeli i është përgjigjur shumë ftohtë. Ai është shprehur se nuk ka ndër mend që të flasë për median, duke zhgënjyer një turmë të madhe gazetarësh, të cilët ardhjen e gjermanit e kanë pasur në qendër të vëmendjes. Zyrtarisht është mësuar se trajneri Brigel do të flasë vetëm pas takimit me presidentin e FSHF së, Armand Duka.

Pra, gjermani u është shmangur komenteve, duke thënë se fjalën e tij do ta thotë pas takimit zyrtar me federatën. Menjëherë në fund të ndeshjes gjermani është larguar duke refuzuar të flasë sërish për median. Ndërkohë duket se shenjat për një rinovim të kontratës së gjermanit ekzistojnë prej kohësh. Jo vetëm kaq, por mbërritja e Brigelit në mënyrë të befasishme në Tiranë, i shoqëruar nga avokati, tregojnë edhe një herë se marrëveshja mes federatës dhe Brigelit është shumë afër.

Gjithsesi, edhe presidenti i federatës, Armand Duka, ka pohuar dje se gjithçka do të merret vesh vetëm pas takimit me trajnerin Brigel. Takimi do të zhvillohet sot, në orën 11.00, dhe me të gjitha gjasat ai do të jetë në Tiranë, ndonëse asnjë në federatë nuk mund të dijë me saktësi se në ç'vend do të takohen palët. Pra, duket se fati i Brigelit, nëse do të jetë më trajner i kombëtares shqiptare, do të vendoset këto 12 orë, edhe pse ka nga ata që thonë se tashmë gjërat kanë përfunduar dhe Brigeli edhe për eliminatoret e europianit do të jetë trajneri i kuqezinjve.

Fusha minifutbolli për fituesit e kampionatit dhe të kupës
Federata Shqiptare e Futbollit ka vendosur që fituesve të kampionatit dhe të Kupës së Shqipërisë t'u dhurojë nga dy fusha minifutbolli.

Ka qenë zëdhënësi i shtypit në federatë ai që e ka pohuar dje një fakt të tillë. Kështu, fituesit e dy kompeticioneve më të mëdha në Shqipëri do të përfitojnë dy fusha minifutbolli nga projekti i federatës për bashkitë e Shqipërisë.

__________________
Try not to become a man of success but rather to become a man of value - Einstein Albert.

Takimi mes drejtuesve të lartë të FSHF së dhe trajnerit të kombëtares, Hans Peter Brigel, i zhvilluar dje, nuk ka sjellë asgjë gjë të re për t'u shënuar, duke i lënë të hapura bisedimet në lidhje me kontratën mes palëve. Në orën 11.00 të ditës së djeshme, gjermani i kuqezinjve ka hyrë në FSHF i shoqëruar nga avokati i tij dhe përkthyesi shqiptar Ajet Xeka. Në zyrën e presidentit Armand Duka së bashku me njëshin e FSHF së kanë qenë edhe dy zëvendëspresidentët, Lutfi Nuri dhe Bujar Kasmi. Takimi ka nisur rreth orës 11.00 dhe ka përfunduar pas 2 orë e 30 minutash. Burime konfidenciale pranë takimit kanë informuar se gjithçka ka qenë miqësore dhe palët kanë parashtruar të gjitha mendimet e tyre në lidhje me rinovimin e kontratës. Ndërkohë, në ambientet e FSHF së, një turmë e madhe gazetarësh priste të rejat e takimit, që gjithsesi në fund të tij duket se nuk ka sjellë asgjë të re. Gjithçka është lënë e hapur dhe të dyja palët do të reflektojnë gjatë këtyre dy javëve për të vendosur përfundimisht se çfarë do të bëhet, nëse do të ketë rinovim apo jo të kontratës mes FSHF së dhe trajnerit Hans Peter Brigel. Të dyja palët, në intervistat pas takimit, kanë qenë të rezervuara.

Pala brigeliane ka qenë disi më e ngurtë ndaj gazetarëve. Brigeli është shprehur se vazhdon të mendojë për Shqipërinë, por ende nuk e di se çfarë do të ndodhë këto dy javë. Ndërkohë, presidenti i FSHF së, Armand Duka, ka pohuar se palët kanë diskutuar në lidhje me kontratën e re. FSHF, sipas Dukës, i ka ofruar gjermanit të njëjtat kushte si në kontratat e mëparshme. Nga ana tjetër, gjermani ka kërkuar rritje rroge si dhe disa kërkesa të ndryshme teknike. Palët kanë lënë gjithçka të hapur për ta diskutuar dhe vendosur në të ardhmen. Gjithsesi, duke lënë pas takimin zyrtar, mësohet se Brigeli ka kërkuar rreth 30 40 për qind rritje rroge. Gjithashtu, ai ka kërkuar edhe një rrogë për asistentët e tij, Ros dhe Bulinger. Nga ana tjetër, burime shumë konfidenciale pohojnë se gjermani kërkon një klauzolë që të largohet në momentin kur ai mendon, duke mos paguar asnjë dëmshpërblim. Por të gjitha këto janë vetëm lajme të pakonfirmuara plotësisht. Vetëm koha do të provojë nëse do të ketë apo jo marrëveshje mes palëve. Edhe nëse bëhet, kontrata mbetet për t'u zbardhur.

Brigel: Përgjigjja, pas dy javësh
Pas takimit, trajneri gjerman ka dhënë mendimin e tij për median. Brigeli ka pohuar se është diskutuar, por nuk është arritur aktualisht asgjë. "Nuk kam për të thënë shumë gjëra. Biseduam dy orë e gjysmë njëri me tjetrin si edhe para ndeshjes së fundit miqësore. Ramë dakord që dy javë të mendohemi. Do të vendosim në fillim të majit se çfarë do të bëhet. Nuk mund të them shumë gjëra hapur. Ndryshe do t'ju kishim ftuar juve në takim. Gjatë bisedës dolëm në konkluzionin se 3 vitet e kaluara ishin të suksesshme. E kam thënë edhe një herë se ne duam ta çojmë përpara futbollin tuaj. Nuk kam ardhur këtu për të bërë refuzime, sepse refuzimet mund t'i bëja në telefon," është shprehur në fund të takimit Hans Peter Brigel.

Duka: Synojmë një pikë të përbashkët
Presidenti i FSHF së, Armand Duka, ka folur më në detaje për takimin mes tij dhe gjermanit. Duka ka pohuar se trajneri gjerman ka bërë disa kërkesa specifike. Sipas Dukës, këto kërkesa do të diskutohen dhe më pas do t'i kthehet përgjigje trajnerit Hans Peter Brigel. "I kemi parashtruar kërkesat si dy palë në bisedime dhe pas kësaj është kërkuar një kohë dyjavore për të vazhduar negociatat dhe për të reflektuar nëse do të biem dakord apo jo për këto kushte. Federata ka kushte pothuajse të njëjta si në kontratën e parë, si në edicionin e kaluar. Trajneri ka disa kërkesa të vetat, të cilat do t'i shqyrtojmë në komitet, do të reflektojmë si ne dhe ai gjatë kësaj jave dhe do të vendosim përfundimisht. Ka kërkesa financiare teknike. Të realizieshme? Besoj se do të arrijmë në një pikë të përbashkët," ka përfunduar Duka.

__________________
Try not to become a man of success but rather to become a man of value - Einstein Albert.

Mbledhja e djeshme e komitetit ekzekutiv, veç problemeve të federatës, ka pasur në plan të parë çështjen e rinovimit të kontratës së trajnerit gjerman të kuqezinjve, Hans Peter Brigel. Presidenti i FSHF së, Armand Duka, si dhe dy zëvendësit e tij, Lutfi Nuri dhe Bujar Kasmi, i kanë referuar komitetit ekzekutiv të gjitha kërkesat e Brigelit një për një në takimin e së enjtes. Një burim shumë konfidencial brenda mbledhjes së djeshme të komitetit ekzekutiv ka bërë të ditur të gjitha detajet e takimit FSHF Brigel. I njëjti burim është shprehur se shifrat që trajneri Brigel kërkon janë marramendëse në krahasim me atë çfarë ka marrë më parë. Kështu mësohet se Brigeli dhe avokati i rij për rinovimin e kontratës me Shqipërinë dhe FSHF në kanë kërkuar 25.000 euro në muaj për 18 muaj punë. Në këtë kontratë kushtet janë të mëparshmet, pra Brigeli do të vijë në Shqipëri kur të ketë ndeshje ekipi kombëtar. Gjithashtu, në këtë shumë nuk përfshihen as dietat e premiot e ndryshme. Me një llogari të thjeshtë, për një vit e gjysmë gjermani kërkon 450.000 euro. Pra, shihet qartë se Brigeli e ka ngritur shumë pazarin në krahasim me kontratën e mëparshme, duke kërkur më tepër para.

Brigeli gjithashtu është shprehur në takim se nëse federata kërkon që ai të qëndrojë në Shqipëri të gjithë kohën, ai duhet të paguhet me 50.000 euro në muaj, çka do të thotë një çmenduri për financat e federatës, pasi kësaj të fundit i duhet të paguajë 900.000 euro. Gjithsesi, komiteti ka diskutuar gjatë në lidhje me këtë çështje. Të 11 anëtarët e komitetit kanë qenë të mendimit se negociatat duhet të vazhdojnë me trajnerin Hans Peter Brigel, derisa oferta e tij të vijë në parametrat e kërkuara nga pala shqiptare. Duket se me 25.000 euro federata nuk ka ndër ment që të firmosë me Brigelin, ndonëse ky i fundit është më i liri në qarkullim. Pra, shihet qartë se "telenovela" mes palëve do të vazhdojë deri në fillim të majit, kur palët mendojnë që të bëjnë edhe marrëveshjen ose ndarjen përfundimtare të tyre. Deri atëherë të presim, edhe pse për të dyja palët rruga hapet vetëm nga ngjyra jeshile, ajo e parave.

Bushati, grumbullim me ekipin U-21
Ditën e hënë dhe të martë, trajneri i ekipit U 21, Artan Bushati, do të zhvillojë një grumbullim me të gjithë lojtarët që aspirojnë për të veshur fanellën e këtij ekipi. Bushati pritet të testojë një pjesë të lojtarëve që mund të luajnë me 21 vjeçarët dhe që mund të jenë të vlefshëm për eliminatoret e shtatorit.
Ja lojtarët e thirrur: Olsi Bishani (Vllaznia), Parid Berdufi (Elbasani), Adis Seferi (AC Loanese Itali ), Andi Lila (Besa),
Erjon Dushku (Kastrioti), Emiljano Veliaj (Besa), Ledi Hyso (AEK Greqi), Gilman Lika (Vllaznia), Reztajld Agolli (Skënderbeu),
Bledar Hodo (Teuta), Denis Mema (Apolonia), Bledi Korra (Asteras Kabalas Greqi), Fajked Liçaj (Flamurtari), Alsid Tafili (Vllaznia), Rigers Hysko (Tomori), Julian Gërço (Apolonia), Aleksandër Guri (SV Geinoord), Oriad Abazaj (Shkumbini), Eleandro Pema (Dinamo), Elis Bakaj (Partizani), Ervis Fusha (Polisportiva Salabolognese Itali),
Besion Çeliku (Tirana), Bledion Guga (Flamurtari), Renato Arapi (Besa), Leonidha Kovaçi (AEK Greqi)

__________________
Try not to become a man of success but rather to become a man of value - Einstein Albert.

"Federata Shqiptare e Futbollit është në bisedime vetëm me Hans Peter Brigelin dhe asnjë tjetër kandidat për trajner të kombëtares." Kështu është shprehur dje presidenti i FSHF së, Armand Duka, në lidhje me bisedimet mes institucionit të futbollit dhe trajnerit aktual të kombëtares, Hans Peter Brigel. Njëshi i federatës, i kontaktuar nëpërmjet telefonit, ka hedhur poshtë gjithashtu të gjitha spekulimet e fundit në shtyp në lidhje me emra të ndryshëm trajnerësh që duket se kanë dalë në skenë këto kohët e fundit për stolin e kuqezinjve. "Për sa u përket bisedimeve për trajnerin e kombëtares, ato vazhdojnë vetëm me Hans Peter Brigelin. Ai mbetet objektivi dhe zgjedhja jonë e parë për ta drejtuar kombëtaren në eliminatoret e kampionatit europian të radhës. Veç atyre që kemi deklaruar pas takimit të përbashkët me Brigelin në FSHF nuk ka asgjë të re. Megjithatë, ne po diskutojmë përditë për këtë problem me Brigelin dhe me askënd tjetër. Siç e dini, para disa ditësh zhvilluam takimin me Brigelin në federatë, ku parashtruam kërkesat tona, ashtu siç bëri edhe trajneri aktual i kuqezinjve.

Personalisht edhe dje kam folur në telefon me trajnerin Brigel për këtë problem. Për momentin nuk mund të them ndonjë gjë konkrete në lidhje me bisedimet, pasi thjesht po negociojmë për problemet financiare të kontratës. Dihet që gjërat janë bllokuar tek problemet financiare dhe për këtë po vazhdojmë bisedimet, në përpjekje për të gjetur një emërues të përbashkët dhe për ta vijuar më tej bashkëpunimin me gjermanin," është shprehur presidenti i FSHF së, Armand Duka. Ky i fundit ka shtuar se çdo gjë do të vendoset këto dy javë, që është lënë si kohë mes palëve për të reflektuar mbi vendimet që do të merren përfundimisht. Madje njëshi i federatës është shprehur se institucioni i futbollit nuk do të diskutojë me asnjë trajner tjetër për postin e trajnerit të kombëtares, derisa gjërat të mbyllen me gjermanin. "Federata do t'u shkojë deri në fund bisedimeve me trajnerin Brigel. Për këtë nuk ka asnjë lloj dyshimi. Do të mbyllim këto bisedime dhe më pas do të flasim. Gjithashtu nuk e di se çfarë do të bëhet nëse trajneri Brigel nuk do të ulet në kërkesat e tij financiare. Për këtë nuk mund të them asgjë në këtë moment," ka pohuar Duka. Sipas tij, këto vendime merren në mënyrë kolegjiale me komitetin.

Ndërkohë, presidenti i federatës ka hedhur poshtë të gjithë zërat që flasin për alternativa dhe emra në stolin e kombëtares shqiptare si dhe për përfundimin e tratativave negativisht me Hans Peter Brigelin. "Asgjë e shkruar këto ditë nëpër media, se Brigeli po përgatit lamtumirën, se unë paskam kontaktuar me trajnerë të tjerë, apo se do t'i rikthehemi trajnerit shqiptar për kombëtaren, nuk është e vërtetë. Jua thashë edhe më sipër dhe po e përsëris që Brigeli mbetet zgjedhja jonë e parë dhe për momentin po negociojmë vetëm me atë. Pa i mbyllur hesapet me Brigelin, nuk kemi ndërmend të bisedojmë me kandidatë të tjerë. Dua të saktësoj në lidhje me fjalët që qarkullojnë lart e poshtë nëpër media se ato janë veçse imagjinata dhe në to nuk ka asgjë të vërtetë," ka komentuar Duka.

Pra, shihet qartë se Federata Shqiptare e Futbollit vazhdon të bisedojë vetëm me Brigelin. Për krerët e futbollit shqiptar zgjidhja e parë për trajner të kombëtares në vazhdim mbetet gjermani. Tashmë gjithçka varet nga kërkesa dhe oferta mes palëve brenda këtyre dy javëve bisedime. Të tjerat Duka i quajti imagjinata, pasi me të vërtetë komiteti ka zgjedhur rrugën e negociatave me gjermanin Hans Peter Brigel prej 3 vitesh trajner i kombëtares shqiptare.

__________________
Try not to become a man of success but rather to become a man of value - Einstein Albert.