Vertete per te ardhur keq. Episodet vendosen fatin e kesaj ndeshjeje, 2 gabime te pafalshme ne mbrojtje sollen humbjen ndoshta te pamerituar ndaj nje Ukraine jo edhe aq ne forme. Gjithsesi le te shpresojme per ndeshjet e ardhshme, vendi i dyte ne grup eshte ende i arritshem, megjithese kemi disa transferta te veshtira...

Renditja e Grupit 2
1. Ukraine, 6 ndeshje - 14 pike
2. Greqi, 5 ndeshje - 8 pike
3. Danimarke, 5 ndeshje - 6 pike
4. Turqi, 5 ndeshje - 6 pike
5. SHQIPERI, 5 ndeshje - 6 pike
6. Gjeorgji, 4 ndeshje - 5 pike
7. Kazakistan, 4 ndeshje - 0 pike.

*26.03.2005 - Turqi Vs. Shqiperi
30.03.2005 - Greqi Vs. Shqiperi

__________________
I LOVE INTER

me vjen keq per shqiperin , jam nje tifoz ultras dhe nuk kam mudesin te shikoj ndeshjet si me pare. por shikoj qe grupi jone shikohet me shume prestigj nga televizionet italiane me greqin, turqin, danimarken , ukrainen, por shqiperi spo ben nje figure te mire dhe po na deluzon perseri. forca shqiperia.

__________________
brus lee

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.

Dështon sërish Federata Shqiptare e Futbollit për të siguruar dhe për të luajtur një miqësore në datën e lirë të FIFA-as në muajin mars. Kjo, pasi Kosta Rika, e trumbetuar nga zyrtarët e FSHF-së, ka vendosur të luajë me Iranin dhe jo me kombëtaren tonë. Kësisoj, edhe kjo miqësore ka rezultuar një "ëndërr mashtruese", ashtu si edhe Bosnjë Hercegovina. Skuadra nga Amerika Qendrore ka gjetur një kundërshtar tjetër për miqësoren e 1 marsit, kur do të përballet me skuadrën e Iranit në Teheran, siç shkruhet edhe në faqen e FIFA s për ndeshjet miqësore. Pra, bie poshtë hipoteza e zbarkimit në Tiranë të një skuadre që është pjesëmarrëse në kampionatin botëror "Gjermania 2006". I pyetur për këtë problem, zëdhënësi i FSHF-së, Nurishmi u shpreh: "Ne nuk kemi informacion për një gjë të tillë. Nuk na ka ardhur akoma asnjë konfirmim nga federata e Kosta Rikës për këtë çështje. Gjithsesi, ne do të arrijmë të sigurojmë një miqësore për datën 1 mars. Jemi në kontakt edhe me vende të tjera."

Me një fjalë, vazhdon refuzimi i shumë kundërshtarëve, të cilëve u ka drejtuar ftesa FSHF-ja për të zhvilluar miqësore me kuqezinjtë tanë. Për momentin mbetet në lojë vetëm miqësorja me Gjeorgjinë, që thuhet se do të luhet në "Qemal Stafa" më 22 mars, ndërkohë që data e lirë zyrtare e FIFA-s për ndeshje të këtij lloji, 1 marsi, mbetet bosh për momentin për kombëtaren tonë. Sikurse dihet, kombëtarja e Shqipërisë e ka zhvilluar miqësoren e fundit më datën 17 gusht të vitit 2005, kundër Azerbajxhanit. Gjithsesi, gjetja e kundërshtarëve për ndeshje miqësore duhet shndërruar në objektiv primar për FSHF-në, sepse skuadra kombëtare ka nevojë të kolaudohet, pse jo edhe të rinovohet, para se të fillojnë ndeshjet eliminatore të Europianit 2008. Dhe nëse nuk sigurohen dot miqësoret, trajneri Brigel nuk ka rast tjetër për t'i vënë pikat mbi "i", ndërkohë që futbollistëve kuqezinj do t'u mungojë shumë praktika e lojës me njëri-tjetrin, çka mund të ndikojë negativisht në paraqitjet e tyre në fushatën kualifikuese të europianit të radhës, ku do të ndeshen me skuadra të forta si Holanda, Rumania, Bullgaria, Bosnja, Bjellorusia, shto këtu edhe modestët e Luksemburgut.

Ja rivalët e kombëtares B në Norçia
Më së fundi, organizatorët e "Norçia footboll winter cup" në Itali kanë përvijuar edhe kalendarin e ndeshjeve, që do të zhvillohen mes skuadrave pjesëmarrëse në këtë turne. Sa i takon kombëtares sonë B, e drejtuar nga Brigeli, kundërshtarët e saj janë katër skuadra: Universitatea e Krajovës, Politeknika, FC Uta Arad dhe Juventus Zyrih. Ndërkohë, të enjten, kombëtarja jonë B ka zhvilluar miqësoren e parë në këtë turne, kundër vendësve modestë të Norçias, ku ka fituar thellësisht 6-0. Sikurse dihet, të thirrurit e Brigelit në këtë turne gjenden në Norçia që në fund të muajit të kaluar dhe do të qëndrojnë atje deri nga 12 shkurti.

Futbollistët në dispozicion të trajnerit tonë të kombëtares, që marrin pjesë në turneun e Norçias, janë si më poshtë: Ilion Lika, Isli Hidi, Endri Vrapi, Erion Xhafa, Ardit Beqiri, Arjan Pisha, Elvis Sina, Igli Allmuça, Ervin Bulku, Elvis Kraja, Emiliano Veliaj, Gjergji Muzaka, Dorian Bylykbashi, Hamdi Salihi, Admir Teli, Rezart Dabulla, Klodian Duro, Genc Mehmeti, Henri Shiba.

Bogdani "ok", i bashkohet grupit
Erion Bogdani, sulmuesi shqiptar i Sienës, që luan në Serinë A, i është bashkuar dje grupit të skuadrës së tij në stërvitje. "Bomberi" kuqezi i Sienës është vënë nën urdhërat e teknikut De Kanio, pasi ka lënë pas problemet shëndetsore që shfaqi pas ndeshjes së fundit në Serinë A. Dhimbjet shqetësuese të mesit nuk e kanë shqetësuar më Bogdanin, kështu që mjekët e skuadrës italiane, ku aktivizohet, i kanë hapur atij "dritën jeshile" të përfshirjes në stërvitje me grupin. Trajneri De Kanio shpreson ta ketë në fushë sulmuesin tonë kuqezi në ndeshjen e radhës me Askolin, duke e konsideruar forcën kryesore në sulm, krahas Kiezës.

__________________
Try not to become a man of success but rather to become a man of value - Einstein Albert.

"Pasaporta" e Rudi Vatës
Emri: Rudi
Mbiemri: Vata
Datëlindja: 13.2.1969
Vendlindja: Shkodër
Gjendja civile: I martuar, me dy fëmijë
Gjatësia: 184 cm
Pesha: 80 kg
Ndeshje me kombëtaren: 59
Gola të shënuar me kombëtaren: 5
Ekipet që ka luajtur: Vllaznia, Dinamo, FC Much 74, Le Mans, Sëlltik, Apollon Limasol, Energie Cotbus, Lr Ahler, Tirana, Jakohoma.
Puna që bën: Menaxher i FIFA s
Endrra e tij: Të bëhet trajner i kombëtares së Shqipërisë.
Motoja e jetës: Puna, ajo që të sjell suksesin, qetësinë, sigurinë dhe sadisfaksionin.

E ka ndjekur me interes shortin për Euro 2008-ën. Edhe pse nga Skocia e largët, tejet e ftohtë në këto ditë dimri, zëri i tij është i ngrohtë. Rudi përmend saktësisht të gjithë kundërshtarët e grupit tonë. Një nga emrat më të mëdhej të futbollit tonë, Rudi Vata, shfaq edhe mendimin e vet për këtë short. Ai flet për secilin kundërshtar të kombëtares sonë. Por ish-kapiteni më "jetëgjatë" i kësaj kombëtareje flet më gjatë se kaq. Duke u prononcuar për zgjedhjet e ardhshme në FSHF, ai thotë se "futbollin duhet ta drejtojnë njerëzit e futbollit". Rudi Vata thotë se nuk do të kandidojë për president, shkak i së cilës janë arsyet familjare dhe personale, por thotë se do të kandidojë për një vend në KE-në e FSHF-së. Ai nuk e fsheh qëllimin e tij dhe thotë i bindur se së shpejti do të jetë ai trajner i kombëtares së Shqipërisë.
- Rudi, a jeni njohur me kundërshtarët e kombëtares sonë për Euro 2008-ën?
- Po, shortin e kam ndjekur drejtpërsëdrejti nëpërmjet mediave britanike me një emocion të veçantë. Hedhja e shortit është një moment që të mban gjithnjë në tension.

- Cili është mendimi juaj për të?
- Çfarë të them? Gjithçka mund të ndodhë në grupin tonë, ose thënë më qartë, të gjitha letrat janë në tavolinë. Mendoj se, përveç Holandës, ekipet e tjera do të luftojnë për të zënë një vend të dytë.
- A mund të flisni më konkretisht?
- Dua të them se Bullgaria e sotme nuk është ajo e Stojçkovit. Rumania e sotme nuk është ajo e Haxhit. As Sllovenia e sotme nuk është ajo e Zahoviçit, por edhe vetë Holanda e sotme nuk është ajo e Van Bastenit. Për sa i takon Bjellorusisë, them se është një ekip që nuk duhet nënvleftësuar. E kam ndjekur në një ndeshje me Skocinë dhe më ka pëlqyer. Ka disa kualitete që duhen respekuar. Për sa i takon Luksemburgut, ne kemi luajtur një herë me të në Luksemburg dhe kemi barazuar. Megjithatë, asnjë ekip nuk duhet mbivlerësuar apo nënvlerësuar. Sigurisht, Holanda është favorite në grupin tonë, por paraqitja e saj në europian varet shumë nga paraqitja e saj në botëror.

- Folët për të tjerët, po për ekipin tonë cili është mendimi juaj?
- Unë dua që ekipi ynë të dalë i pari. Por tjetër është dëshira dhe tjetër mundësia. Duhet pranuar se ekipi ynë nuk është ai që duhet të jetë.
- Flisni kështu ngaqë keni parasysh faktin se FSHF-ja është në prag të zgjedhjeve. Për çfarë e keni fjalën?
- Koha ka treguar se shumë duan të përfitojnë nga futbolli, qoftë duke thurur apo realizuar skenarë të ndryshëm. Nuk dua të zgjatem, sepse të gjithë e dimë se çfarë ka ngjarë me futbollistë të ndryshëm të kombëtares sonë, ku jo rrallë është vlerësuar miqësia dhe jo forma aktuale e futbollistit, gjë që ka rënduar gjendjen e kësaj kombëtareje. Kujtoni vetëm rastin Bogdani, për të mos thënë të tjerët. Unë nuk jam pjesë e këtyre skenarëve. Unë jam pjesë e punës për t'i dhënë futbollit atë çfarë i mungon. Dua t'i shërbej futbollit, sepse futbollit është jeta ime.

- A mund të argumentoni disa nga arsyet që ju kanë çuar në këtë konkluzion?
- Arsyet janë të shumta, por unë do të ndalem në disa prej tyre. Që futbolli nuk është në gjendjen që e duam, këtë e dinë të gjithë. Jemi ndoshta e vetmja federatë në botë që punojmë pa objektiva. Kjo do të thotë që drejtuesit e federatës dhe vetë presidenti ynë nuk e njohin realitetin. Flitet vetëm për arritje dhe asnjëherë për dobësi, ndërkohë që arritjet i kemi të pakta dhe mangësitë i kemi të shumta. Kur fitojmë themi se jemi më të mirët, ndërsa kur humbasim thuhet se kaq janë mundësitë. Kujtoni kur fituam me Greqinë. Atëherë u tha se do të shkojmë në botëror dhe, kur vazhduan të humbasin, thanë se kaq i kemi mundësitë. Shqipëria nuk afron mundësi të tjera, nuk kemi këtë e nuk kemi atë. Kësaj mendësie i ka shërbyer edhe mungesa e analizave. Më është dukur absurditet një mendim i zv.presidenti të federatës, Bujar Kasmi, i cili në një prononcim për mediat mundohej të justifikonte pikërisht mungesën e këtyre analizave me faktin që nuk qenka traditë. Kjo tregon se në federatë sundon mentaliteti i vjetër, ku të gjithë flasin me një zë, me atë të njëshit dhe të atij njëshi që nuk di asgjë nga futbolli. Kjo më duket tepër e çuditshme dhe tregon se komitetit i ka munguar opozita, ose guximi për të thënë mendimin ndryshe.

- Thuhet se Brigeli pret pikërisht zgjedhjet në federatë për të vendosur më pas nëse do të qëndrojë apo jo trajner i kombëtares së Shqipërisë. Cili është mendimi juaj?
- Nuk kam asnjë mendim tjetër përveç logjikës së drejtë. Brigeli duhet të ikë, sepse ai nuk i ka sjellë asgjë kombëtares sonë, nuk i ka sjellë asgjë futbollit tonë. Kishte 4 vjet kohë dhe nuk bëri asgjë. Gjatë kësaj kohe ai ka punuar vetëm për llogari të vet dhe aspak për Shqipërinë e kombëtaren tonë. E pra, atij iu dha shansi më shumë se asnjë trajneri tjetër për të punuar, por këtë nuk e bëri. Brigeli nuk ka bërë asnjë analizë, nuk ka bërë asnjë seminar, ku të kenë marrin pjesë specialistë shqiptarë. Nuk i ka mbledhur një herë ata të paktën për t'u kërkuar një mendim, duke shprehur qartë ndjenja mendjemadhësie. Ai i ka nënvleftësuar hapur ata. E pra, shumë prej tyre qëndrojnë shumë më lart se Brigeli. Specialistët shqiptarë ishin trajnerët tanë: të mirë, të dashur, korrektë. Ata kanë pa dyshim rolin e vet që ne arritëm të luanim me sukses në Europë. Kësaj aventure brigeliane i ka ndenjur gati një federatë, që ishte vënë nën pushtetin e Brigelit, gjë që nuk ndodh askund. Futbolli është i thjeshtë për t'u parë, por është shumë i vështirë për t'u luajtur dhe po aq i vështirë për t'u drejtuar.

- Pra, ju nuk jeni që Brigeli të jetë përsëri në krye të kombëtares sonë?
- Absolutisht jo. 4 vite ikën kot. Të ikin edhe 4 vite të tjera kot, nuk ia vlen më. Duke pasur Brigelin në krye, është krim. Ai mori një kombëtare të organizuar dhe na la një kombëtare të plakur, që vështirë se mund t'i ngjitë maloret e europianit. Bota ecën shpejt dhe, nëse nuk ecën edhe ti me këtë hap, mbetesh mbrapa, siç kemi mbetur. Më vjen keq kur lexoj ende ndonjë shkrim që flet për arritjet e kombëtares sonë e të Brigelit. Të gjitha këto janë një ngopje me lugë bosh. Këta që shkruajnë kështu duhet ta dinë se Greqia nuk ka fituar kurrë në Shqipëri. Kurse pa Brigelin, ne e kemi mundur më thellë Greqinë në Tiranë me Zhegën, madje e kemi mundur edhe në Athinë me Birçen. Unë nuk shoh, pra, ndonjë arritje. Në qoftë se mund të quhet arritje grumbullimi i 13 pikëve, ai është bërë i mundur se në grup kanë qenë 7 skuadra dhe, sa për dijeni, Gjeorgjinë e kemi pas lënë gjithmonë mbrapa, ndërsa Kazakistani ishte sa për numër. Pra, 6 pikët ndaj Kazakistanit nuk duhet t'i llogarisim te 13 pikët e Brigelit. Sigurisht që do të dëshiroja të kishte arritje kombëtarja jonë, por arritje do të ishte të lije mbrapa Turqinë, Greqinë, Danimarkën, apo ndonjë ekip tjetër.

- Keni thënë se nuk do të kandidoni për president të FSHF së. A është e vërtetë dhe, nëse po, përse nuk do të kandidoni?
- Po, kështu është. Nuk do të kandidoj për president të FSHF së. Për momentin kam disa arsye familjare dhe personale që më pengojnë realisht të kthehem në atdhe për t'iu përkushtuar tërësisht detyrës së presidentit. Por kjo nuk do të thotë se nuk mund ta bëj këtë punë. E bëj, madje e bëj shumë mirë. Nuk më mungon emri. Nuk më mungon njohja. Nuk më mungojnë gjuhët e huaja që di. Pesë gjuhë të huaja që flas (anglisht, frëngjisht, italisht, gjermanisht dhe serbo-kroatisht) nuk janë pak për një drejtues shteti, jo më për një drejtues federate futbolli.

Përveç kësaj, unë kam shumë miq në federatat e ndryshme dhe nuk më mungon vizioni perëndimor i drejtimit të punëve. Kam 15 vjet që luaj dhe jetoj jashtë vendit. Të gjitha këto do të më ndihmonin për ta kryer më mirë se ndonjë tjetër detyrën e presidentit të federatës. Do të më ndihmonte për të organizuar sa më shumë ndeshje miqësore për kombëtaren, që drejtuesit aktualë nuk po e bëjnë dot. Për ta bërë një gjë të tillë duhet punë, njohje e të gjitha ato që thashë më lart. Miqësorja nuk sigurohet, siç bëjnë sot, drejtuesit e federatës sonë, duke ia lënë gjithçka punës me fakse. Gjithçka planifikohet më parë. Federata duhet të ketë strategjitë e veta, sepse punët nuk bëhen sot për sot. Nisur nga kjo që thashë, besoj se kandidimi im për anëtar i komitetit ekzekutiv të federatës është plotësisht i justifikuar.

- A i qëndroni mendimit se një ditë do të bëheni trajner i kombëtares së Shqipërisë?
- Po. Qëllimi im është që në një kohë sa më të afërt të jem trajner i ekipit kombëtar. Sot për sot, kombëtarja jonë është çorganizuar nga drejtimi i papërgjegjshëm i trajnerit që kemi sot, i cili jo vetëm nuk e ndjek kampionatin shqiptar, nuk bën analiza e seminare, por përton të ndjekë edhe talentet shqiptare që janë jashtë Shqipërisë. Nën pushtetin e këtij njeriu të huaj ka rënë edhe federata jonë e futbollit. Puna me kombëtaren duhet filluar menjëherë. Duhen lënë kafetë e të tjera gjëra e të fillohet shpejt nga puna, koha nuk pret. Vetëm puna ta zbardh faqen. Por kjo gjë bëhet kur në krye të Federatës së Futbollit të vihen njerëzit e futbollit, që e duan dhe mendojnë vetëm për të. Shqipërisë nuk i kanë munguar kurrë njerëzit cilësorë të futbollit.

__________________
Try not to become a man of success but rather to become a man of value - Einstein Albert.

Kombëtarja jobë B, që ndodhet në Norçia prej datës 30 janar, ka zhvilluar dje ndeshjen e parë zyrtare në këtë turne. Përballë kuqezinjve tanë kanë qenë rumunët e Politeknikas, të cilët janë mundur pastër 3-0 nga të besuarit e Brigelit. Ndeshja është dominuar gjatë gjithë kohës nga kombëtarja jonë B, e cila e ka gjetur golin e avantazhit në minutën e 20-të, me anë të Dorian Bylykbashit. Ky i fundit ka kthyer në gol një faull për tanët. Nuk do të kalonte shumë, por në minutën e 30-të, pas një kombinimi të bukur mes kapitenit kuqezi, Klodian Duro dhe Bylykbashit, ky i fundit ta dyfishonte rezultatin. Pas këtij momenti, loja ashpërsohet disi, pasi rumunët e Politeknikas nuk pajtohen me rezultatin, duke i tejkaluar caqet e fait-play-it. Sidoqoftë, kuqezinjtë tanë kanë ditur të ruajnë gjakftohtësinë dhe ta trefishojnë rezultatin sërish me anë të Bylykbashit, në minutën e 70-të. Ndeshja është ndjekur nga një numër i konsiderueshëm shqiptarësh, që punojnë e jetojnë në Itali. Më shumë në sy ka rënë dyshja elbasanase, K.Duro-Bylykbashi, të cilët kanë zhvilluar një ndeshje mjaft cilësore.

Kombëtarja jonë B e ka filluar ndeshjen me këtë formacion: Lika, Pisha, E.Xhafa, Sina, Teli, Vrapi, Mehmeti, E.Bulku, K.Duro, Bylykbashi dhe Abilaliaj. Me fillimin e pjesës së dytë, Salihi ka zënë vendin e Abilaliajt dhe A.Beqiri vendin e Sinës, ndërkohë që në minutën e 85-të, Veliaj ka zëvendësuar autorin e 3 golave, Bylykbashin, ndërsa Dabulla ka zëvendësuar Vrapin. Ndeshja e radhës për kuqezinjtë tanë do të jetë më 8 shkurt, ndaj Juventus Zyrih. Kujtojmë se në grupin e kombëtares sonë B janë dy skuadrat rumune, FC Uta Arad dhe Politeknika, skuadra zvicerane, Juventus Zyrih, dhe skuadra spanjolle EFU Fuertas Ventura.

__________________
Try not to become a man of success but rather to become a man of value - Einstein Albert.

Kombëtarja B - Juventus Zyrih 2-0
Shënues: K.Duro 55, Salihi 76
Kombëtarja B: Hidi, Teli, E.Xhafa, Dabulla, Muzaka (Beqiri 46'), Mehmeti, E.Bulku (Sina 75'), K.Duro, Bylykbashi, Shiba (Salihi 46) Trajner: H.P.Brigel

Kuqezinjtë e kombëtares B e kanë fituar edhe ndeshjen e dytë në turneun e Norçias. Kundërshtarët e radhës për ta, dje, kanë qenë zviceranët e Juventusit të Zyrihut, të cilët nuk kanë qenë në gjendje të përballojnë vrullin e kuqezinjve tanë, që kanë arritur edhe fitoren e pastër 2-0, me gola të shënuar nga kapiteni Klodian Duro dhe sulmuesi Hamdi Salihi. Sipas informacioneve që ka redaksia, ndryshe nga ndeshja e parë ndaj rumunëve të Politeknikas, trajneri Brigel në ndeshjen ndaj zviceranëve të Juventusit paraqiti në fushën e lojës një formacion të ndryshëm. Kështu, në portë ai vendosi Hidin në vend të Likës, ndërsa Teli zëvendësoi Pishën, i cili po kalon një gjendje të lehtë gripale. Emra të rinj në 11-shin kuqezi të kësaj ndeshjeje ishin edhe Dabulla, Muzaka, Veliaj dhe Shiba. 45 minutat e para të këtij takimi, ndonëse kuqezinjtë krijuan disa raste, u mbyll pa gola.

Pjesa e dytë nisi krejt ndryshe për futbollistët tanë. Ngulmimi i tyre për të shënuar ishte më i madh. Kapiteni Klodian Duro merr në duar frenat e lojës dhe i krijon ekipit më tepër lirshmëri e frymëmarrje. Madje, ishte po Duro, i cili, pas një aksioni personal, në kufijtë e 16-20 metrave, përballë portës zvicerane, gjuan rreptë, topi përplaset në shtyllën pingule dhe përfundon në rrjetë. Goli i shënuar i jep ngjyra të tjera dhe më të bukura kësaj ndeshjeje, ku kuqezinjtë tanë ishin padronë të saj. Dhe si për koiçidencë, do të ishte një tjetër futbollist që luan në radhët e bardhebluve, golashënuesi Hamdi Salihi, që do të shënonte golin e dytë dhe do të fiksonte fitoren 2-0 të kuqezinjve tanë. Ai, pas një aksioni të bukur, ka dalë përballë portierin kundërshtar dhe pasi e ka dribluar atë, e ka shtyrë topin në portën e boshatisur.

Pas kësaj ndeshjeje, trajneri i kombëtares, Brigel, është shprehur mjaft i kënaqur me lojën e të përzgjedhurve të tij, të cilët në një kohë kaq të shkurtër ia kanë arritur të krijojnë grupin dhe të luajnë mjaft mirë taktikisht. Ndeshjen e tretë të turneut kuqezinjtë tanë do ta luajnë të premten, ku do të kenë përballë rumunët e Gazmetanit.
Pas këtij takimi, kuqezinjtë e kombëtares sonë B udhëheqin grupin me 6 pikë të grumbulluara në 2 ndeshje.

__________________
Try not to become a man of success but rather to become a man of value - Einstein Albert.

Do të jetë Lituania apo jo ekipi kundërshtar i kuqezinjve në miqësoren e 1 marsit? Në Federatën Shqiptare të Futbollit ende nuk janë të qartë nëse pikërisht Lituania do të jetë ekipi që do të zbresë në "Qemal Stafa" më 1 mars. Dje jemi interesuar nëse me të vërtetë kuqezinjtë pas shumë kohësh kanë gjetur një miqësore për 2006 ën. Gjithsesi, edhe dje, deri në orën 16.00, në Federatën Shqiptare të Futbollit nuk kishte mbërritur asnjë përgjigje nga ana lituaneze që të konfirmonte miqësoren mes Shqipërisë dhe Lituanisë më 1 mars. Këtë fakt e ka bërë të ditur zyrtarisht dje edhe zëdhënësi i shtypit i federatës, Lysien Nurishmi, që i pyetur pikërisht për këtë problem, nuk ka ditur të japë asnjë përgjigje. "Ashtu siç është publikuar edhe në shtyp, ne si federatë i kemi dërguar një faks federatës lituaneze për të konfirmuar miqësoren në fjalë.

Deri tani ata nuk na kanë sjellë asnjë përgjigje, ndonëse ndeshja mendohet se do të luhet në Tiranë," është shprehur dje Nurishmi. Ky i fundit ka shtuar se nuk di asnjë hollësi në lidhje me miqësoren e 1 marsit. Në fakt, pala lituaneze, në faqen elektronike të UEFA s pohon se më 1 mars kombëtarja e tyre do të zhvillojë një ndeshje miqësore në Tiranë, në stadiumin kombëtar "Qemal Stafa" kundër Shqipërisë. Sipas tyre, mbeten për t'u përcaktuar vetëm detajet e vogla të ndeshjes, pasi palët kanë rënë parimisht dakord. Ndërkohë, në FSHF, të gjithë ngrenë supet dhe nuk dinë të thonë nëse kjo miqësore do të zhvillohet. Madje ka nga ata që thonë se pikërisht është federata ajo që nuk e dëshiron këtë miqësore, sepse ajo zhvillohet pikërisht 2 ditë pas zgjedhjeve për president të federatës.

Në këto kushte, asnjë prej punonjësve dhe drejtuesve të këtij institucioni nuk do ta kishte mendjen tek miqësorja, por tek zgjedhjet. Gjithsesi, duke lënë pas edhe këtë hamendje sërish të shpon një tjetër fakt. Nga njëra anë, UEFA konfirmon një miqësore Shqipëri Lituani, ndërsa nga ana tjetër FIFA në faqen e saj elektronike pohon gjëra të tjera. Në fillim, FIFA konfirmon në faqen e saj se më 1 mars kuqezinjtë do të luajnë një miqësore me Bosnjën dhe më 22 mars një miqësore me Austrinë. Por në fakt deri tani të dyja këto skuadra nuk kanë pranuar të luajnë me kuqezinjtë dhe kanë zgjedhur kundërshtarë të tjerë. Edhe Kosta Rika ishte një tjetër skuadër që nuk pranoi të luante me Shqipërinë më 1 mars dhe në fund zgjodhi një fat tjetër. Aktualisht vetëm Gjeorgjia do të luajë me kuqezinjtë më 22 mars dhe kjo është miqësore e konfirmuar. Ndërkohë nëse konfirmohet Lituania për kuqezinjtë, lituanezët do të ishin kundërshtarët e parë për këtë vit në një miqësore.

__________________
Try not to become a man of success but rather to become a man of value - Einstein Albert.

Eshtë përfundimtare. Kombëtarja shqiptare, më 1 mars, do të ketë përballë në stadiumin kombëtar "Qemal Stafa" ekipin përfaqësues të Lituanisë. Lajmi është konfirmuar më në fund dje nga Federata Shqiptare e Futbollit. Kështu, sipas zëdhënësit për shtyp në FSHF mësohet se tashmë mund të konsiderohet zyrtare miqësorja mes Shqipërisë dhe Lituanisë. Kjo ndeshje do të luhet në stadiumin kombëtar "Qemal Stafa" më 1 mars. "Po, sot mund të themi përfundimisht se kombëtarja shqiptare do të luajë miqësoren e parë për vitin 2006 kundër Lituanisë. Kemi komunikuar me federatën lituaneze dhe përfundimisht kemi rënë dakord për këtë miqësore," është shprehur dje zëdhënësi i shtypit, Lysien Nurishmi.

Në bazë të informacioneve zyrtare në federatë, ende nuk është përcaktuar se në cilën orë do të zhvillohet takimi. I sigurt është fakti që ndeshja do të luhet në stadiumin kombëtar "Qemal Stafa". Skuadra lituaneze pritet që të vijë në Tiranë pikërisht më 27 shkurt, ditën që do të zhvillohet edhe asambleja zgjedhore e FSHF së.

Sipas informacioneve, ata do të akomodohen në hotelin "Sheraton". Ndërkohë, Lituania me të vërtetë mund të jetë një kundërshtar i mirë për kuqezinjtë, që në muajt e ardhshëm për eliminatoret për Euro 2008-ën do të përballen me Bjellorusinë, një tjetër skuadër e ngjashme me Lituaninë. Për skuadrën tonë, kjo është miqësorja e parë pas shumë kohësh pushim. Kujtojmë që kuqezinjtë në nëntorin e kaluar nuk arritën të zhvillonin asnjë miqësore. Ndërsa këta muaj kuqezinjtë kanë parë se si Austria, Bosnja, Kosta Rika i kanë thënë "jo" Shqipërisë për miqësore. Vetëm Gjeorgjia deri tani ka thënë "po" për një miqësore më 22 mars të këtij viti.

Bogdani, një muaj jashtë fushës
Futbollisti i kombëtares shqiptare Erion Bogdani nuk do të jetë i gatshëm për ekipin e Sienës për 30 ditët e ardhshme. "Bomberi" kuqezi është dëmtuar në ndeshjen e së mërkurës me Mesinën dhe ka dalë para kohe jashtë fushës së lojës. Dje janë zhvilluar vizitat mjekësore, të cilat kanë përcaktuar se Bogdani do t'i mungojë Sienës rreth 30 ditë. Këtë lajm e ka bërë të ditur dje shtypi italian, sipas të cilit Bogdani ka një tërheqje muskulare dhe për riaftësimin e saj duhen të paktën 30 ditë. Ndërkohë, presidenti i Sienës, De Luka, është shprehur se Bogdani është një humbje e madhe për ekipin e tij, që duket se i ka varur shpresat kryesisht tek sulmuesi i kuqezinjve, i cili vetëm në këtë sezon ka kaluar në Serinë A.

__________________
Try not to become a man of success but rather to become a man of value - Einstein Albert.

Shqipëria B Gaz Metan Media 1 0
Shënues: Kraja 20'
Shqipëria: Lika, Dabulla (Kote), Beqiri, Kraja, Sina, Allmuça, Bulku, Vrapi, Veliaj, Abilaliaj, Shiba. Trajner: H.P.Brigel

Kombëtarja B e Shqipërisë fiton edhe në ndeshjen e tretë në turneun e Norçias.
Kuqezinjtë, të cilët prej datës 31 janar ndodhen në Itali për të marrë pjesë në turneun e Norçias, dje kanë arritur fitoren e 3 të brenda 6 ditëve. Përballë dje lojtarët e kampionatit shqiptar, që aspirojnë një vend në kombëtare, kanë pasur skuadrën e kategorisë së dytë rumune, Gaz Metan Media, të cilën e kanë mundur me rezultatin e ngushtë 1 0. Golin për kuqezinjtë e ka shënuar në pjesën e parë mbrojtësi shkodran i Besës, Kraja, në minutën e 20 të, pas një rrëmuje në zonë, me kokë, duke arritur të shënojë golin e vetëm të takimit. Ndeshja në pjesën e parë ka qenë e mirë, ku Brigeli ka hedhur në fushën e lojës skuadrën më të mirë. Në pjesën e dytë, gjermani ka bërë shumë ndryshime, duke zëvendësuar të gjithë lojtarët. Gjithsesi, loja në 45-minutëshin e dytë nuk ka qenë e kënaqshme. Skuadra ka ndier lodhje, kjo edhe prej erës shumë të fortë që ka shoqëruar gjithë takimin. Në fund të 90-minutëshit, kuqezinjtë kanë mundur të fitojnë për herë të tretë në turneun e Norçias me rezultatin 1 0 kundrejt Gaz Metanit. Me fitoren e djeshme, kuqezinjtë largohen nga Norçia të pamposhtur si asnjëherë tjetër. Në dy ndeshjet e mëparshme, kuqezinjtë kanë fituar 3 0 me Politehnikën e Iashit dhe 2 0 me Juventusin e Zyrihut. Në tri takime, skuadra e Brigelit ka shënuar 6 gola dhe nuk ka pësuar asnjë. Kujtojmë që kjo e sivjetmja është paraqitja më e mirë e kuqezinjve në turneun e Norçias. Më parë, skuadra jonë kombëtare është mundur nga ekipe të dobëta të kampionatit rumun apo edhe hungarez.

Kombëtarja B kthehet sot në Tiranë
Kombëtarja B e Shqipërisë, e cila ndodhet në Itali për të marrë pjesë në turneun e Norçias, çuditërisht do të mbërrijë sot në Tiranë. Lajmi është bërë i ditur dje në federatë. Kështu, zyrtarisht, të gjithë gazetarëve në federatë, zëdhënësi i shtypit u ka thënë se kombëtarja B, që merr pjesë në turneun e Norçias, do të mbërrijë ditën e shtunë paradite, ndryshe nga ç'ishte parashikuar në fillim të turneut. "Nga kontaktet që kemi pasur këto ditë me drejtuesit e kombëtares në Norçia, mund të them se ekipi, ndryshe nga çfarë ishte parashikuar, do të jetë që sot në Tiranë.

Sipas informacioneve, kuqezinjtë do të jenë në Shqipëri që sot dhe jo të hënën, sepse në Norçia tashmë nuk ka ngelur asnjë ekip. Të gjitha skuadrat e tjera kanë ikur, ose do të ikin, kështu që ekipi kombëtar B nuk ka çfarë bën vetëm në Norçia. Në këto kushte, drejtuesit vendosën që ta kthejnë skuadrën në Tiranë, pasi nuk ka kuptim që të vazhdohet të qëndrohet deri të hënën në Norçia," është shprehur Nurishmi. Gjithsesi, fjalët e zëdhënësit të shtypit në FSHF janë shumë pak bindëse.

Vetëm drejtuesit e lartë të federatës e dinë përse kuqezinjtë kanë braktisur turneun e Norçias para kohe. Themi kështu sepse, pas disa kontakteve që kemi pasur ne si gazetë me futbollistët që janë në Norçia, është konfirmuar se vetëm kombëtarja B e Shqipërisë e ka braktisur turneun. Ekipet e tjera që marrin pjesë në këtë turne do të vazhdojnë deri më 14 shkurt ndeshjet me njëra tjetrën. Pra, nuk është e vërtetë që ekipet e tjera janë larguar nga Norçia. Por duket se ky turne për kuqezinjtë u bitis ashtu siç nisi, rrëmujë, duke konfirmuar edhe një herë se pjesëmarrja në Winter Cup ishte vetëm një kapriçio e kotë e FSHF së.

__________________
Try not to become a man of success but rather to become a man of value - Einstein Albert.