Reportazh i mediave italiane mbi mënyrën e re të shfrytëzimit të prostitutave shqiptare

Eriola, nusja shqiptare është paraqitur në bashki me fustanin e bardhë, ashtu siç e do zakoni. Salvatore, i fejuari i blerë në tregun e zi të martesave, është paraqitur me xhinse dhe bluze. Të mërzitur, madje asnjë buzëqeshje kortezie, në ankth për të mbyllur sa më shpejt ceremoninë, atë formalitet që do t‘i dorëzonte asaj statusin e shtetësisë italiane ndërsa atij dy mijë euro në dorë. Kryebashkiaku, Francesco Nuzzo, i zgjedhur në pranverë pas një periudhe të gjatë pune si prokuror në Breshia, ka dyshuar për qëllimet e çiftit. Ai ka verifikuar të gjitha shkresat por dëshira e mirë e çiftit për martesë nuk mund të vlerësohej. Në paraqitje ata ishin dy të fejuar normalë, si shumë çiftet e përziera që martohen në atë komunë të vogël të Italisë. Por kjo martesë ishte false, e organizuar nga një bandë mafiozësh shqiptarë që kontrollojnë tregun e prostitucionit në zonë. Për këtë arsye martesa nuk përfundoi me vendosjen e unazave në gisht por me vendosjen e prangave në kyçet e nuses, njërit prej dëshmitarëve dhe shkesit që do t’i garantonte vajzës nënshtetësinë italiane. Kjo nënshtetësi do t’ia rriste edhe më shumë “vlerën” e shitjes vajzës që më pas do të punonte si prostitutë. Ishin efektivat e policisë së qytezës së vogël ata që ndërprenë mëngjesin e dy ditëve më parë martesën shumë fitimprurëse. Ata kishin mësuar nga kryetari i bashkisë për martesën dhe shkuan që të verifikonin. Kështu ata ishin të pranishëm në ardhjen e korteut të vogël martesor: Nusja Eriola, 19 vjeç; dhëndri, një napolitan 43- vjeçar dhe shoferi i makinës, një shtetas shqiptar. Ndërkohë brenda në bashki po i prisnin mamaja e dhëndrit dhe dy dëshmitarë, Etleva Doku, 26 vjeçe që do të kishte rolin e përkthyeses dhe një plak napoletan i marrë nga rruga kundrejt pagesës. Policisë i mjaftoi vetëm koha për të bërë një verifikim të shkurtër dhe përpara se grupi të dilte nga bashkia u krye arrestimi. Menjëherë u sekuestrua regjistri i martesave dhe të gjithë personat e pranishëm u shoqëruan në polici. Aty u zbulua se Eriola ishte skeduar më parë si prostitutë dhe ishte përzënë nga Italia ndërsa shoferi Kujtim Buçpapaj ishte denoncuar më parë për shfrytëzim emigracioni klandestin. Për ta u pre menjëherë fletë- arresti së bashku me dy persona të tjerë të akuzuar për favorizim trafiku klandestinësh. ndërkohë në gjendje të lirë po procedohen penalisht “dhëndri” napoletan dhe nëna e tij. “Unë kisha dyshimet e mia por nuk mund të ndaloja martesën. Merita është e policisë që zbuloi gjithçka”, -tha pas ngjarjes kryebashkiaku Nuzzo.

__________________
Nobody is perfect ...