“Kontributi i studentëve të huaj në ekonominë britanike e tejkalon shifrën e 3 miliardë sterlinave në vit, prandaj ky kontingjent meriton të ketë më shumë hapësirë për tu bërë një faktor i prosperitetit britanik”.

Qeveria britanike ka vendosur të hap edhe më dyert për njerëzit e diplomuar në territorin e saj. Që nga data 1 maj e këtij viti, të gjithë ata studentë të huaj që kanë marrë një diplomë ose që kanë fituar të drejtën e studimit në një institucion britanik, do të klasifikohen për të shtyrë vizën e tyre edhe për një vit tjetër së bashku me të drejtën e punësimit. Burime nga Departamenti i Edukimit bëjnë të ditur se kjo masë është marrë me qëllim që Britania e Madhe të vazhdojë të jetë si destinacioni kryesor për studentët nga e gjithë bota. Një skemë e tillë ka ekzistuar më parë vetëm për studentët e shkencave dhe inxhinierisë, por që tashmë shtrihet tek të gjitha degët e tjera.

Ministri i Arsimit të Lartë, Bill Rammell tha se vizat një-vjeçare për studentët e huaj do të kenë influencë pozitive edhe për vetë kompanitë britanike të cilat mund të përfitojnë nga njerëzit e kualifikuar në këtë vend. Kjo “ofertë” për studentët e huaj u bë si kundërpeshë pas rritjes së çmimit të vizave studentore nga 85 në 99 sterlina. Po ashtu edhe lejet e punësimit janë rritur këto ditë nga 85 në 200 sterlina për person në vit. Unioni i Studentëve e mirëpriti këtë vendim të qeverisë laburiste. Po ashtu, “Universities UK”, një organizëm që përfaqësohet nga zëvendës-rektorët e universiteteve të ndryshme, e mirëpriti vendimin e qeverisë për zgjatjen e vizave.

Më parë, ky organizëm ka shprehur rezerva për çështjen e shtrenjtimit të vizave të studimit. Megjithatë, një zëdhënës i “Universities UK” tha se masat e qeverisë nuk shkonin aq larg, pasi vende të tjera ishin në garën e tërheqjes së studentëve të huaj. Ministri për Imigracion, Liam Byrne përmendi edhe një fakt tjetër në këtë proces. “Kontributi i studentëve të huaj në ekonominë britanike e tejkalon shifrën e 3 miliardë sterlinave në vit, prandaj ky kontingjent meriton të ketë më shumë hapësirë për tu bërë një faktor i prosperitetit britanik”, tha ai.

Megjithatë, ai paralajmëroi se nuk duhej abuzuar me këtë të drejtë dhe se pas vitit të praktikës, studentët e huaj duhet të kthehen në vendet e tyre reciproke ose mund të aplikojnë në bazë të skemës së punëtorëve të specializuar nëse dëshirojnë të qëndrojnë në këtë vend për një kohë të gjatë. Sipas shifrave të Ministrisë së Brendshme (Home Office), vetëm gjatë vitit 2005, rreth 150 000 studentë të huaj që aplikuan për zgjatje të vizave u refuzuan.

__________________
Be aware of what u do in the past, because of the future consequences!