Kur qeveria laburiste shpalli programin pilot të riatdhesimit nëpërmjet shpërblimit (Pilot Enhance Returns Scheme), kritikët nxituan ta konsideronin atë si një zgjidhje politike të pashpresë. Sot, pesë muaj më vonë, përfaqësuesit e IOM (Organizata Ndërkombëtare e Migracionit) e vlerësojnë këtë program si ndër më të suksesshmit të ndërmarrë ndonjëherë nga qeveria britanike. Besim Ajeti, drejtor operativ pranë IOM dega Londër, thotë se në pesë muajt e fundit numri i kthimeve vullnetare është dyfishuar. Ai pëlqen të pëmendë shifrat e emigrantëve me origjinë nga Iraku. Sipas tij, nga 151 veta që janë kthyer në muajin janar, numri i tyre ka arritur në 284 në muajin prill. Në total, numri i të kthyerëve vullnetarë tashmë kap shifrën 600 në muaj. Shqiptarët duken se janë më skeptikët në këtë drejtim. Numri i kthimit të tyre ka rënë nga muaji në muaj ose ka qenë në shifra konstante. Zoti Ajeti e pranon se ka ende emigrantë që besojnë se IOM është organizatë qeveritare ose që bashkëpunon me Ministrinë e Brendëshme (Home Office). “Vështirësia është se ende ka konfuzion mes emigrantëve shqiptarë. Ka ende nga ata që mendojnë se IOM është pjesë e Ministrisë së Brendëshme. Por ne jemi përpjekur ta bëjmë të qartë se nuk jemi pjesë e asnjë organizmi qeveritar. Kemi patur probleme të tilla edhe me emigrantë pakistanezë që kanë kërkuar azil si afganë dhe që kanë frikë ta deklarojnë një gjë të tillë në zyrat tona. Po ashtu me shqiptarë që janë regjistruar si qytetarë të Kosovës. Shpesh na duhet shumë punë t`u mbushim mendjen njerëzve se garantojmë anonimitetitn deri në momentin e fundit kur personi pranon projektin e kthimit dhe vendos për një gjë të tillë”, thotë zoti Ajeti.

Projekti pilot
Në janar të këtij viti, Ministria e Brendëshme (Home Office) anonçoi projektin pilot “Skema e Riatdhesimit nëpërmjet Shpërblimit”, e njohur ndryshe me inicialet PERS (Pilot Enhanced Returns Scheme). E reja e këtij projekti ishte shuma prej 2000 stërlinash që i shtohej paketës prej 1000 stërlinash e cila aplikohej nga IOM që prej vitit 2002. E thënë ndryshe, çdo emigrant që dëshiron të kthehet vullnetarisht mund të përfitojë një shumë prej 3000 stërlinash dhe kjo nuk përfshin çmimin e biletës së kthimit, dokumentet përkatëse, transportin lokal të cilat gjithashtu mbulohen me fondet publike të menaxhuara nga IOM. Kushtet e përfitimit të kësaj shume financiare janë të thjeshta. Emigranti që dëshiron të kthehet diskuton paraprakisht me punëtorët e IOM dhe në bashkëpunim ndërtojnë një projekt riintegrimi brenda vlerës 3000 stërlina. Kjo mund të përfshijë një kurs specializimi në vendin e tij, mjete pune për të filluar një biznes, kafshë shtëpiake për blegtori ose program punësimi. Në këtë rast, punëdhënësi paguan gjysmën e rrogës dhe gjysma tjetër përballohet nga fondi i riintegrimit. 500 stërlina jepen para të thata në aeroport përpara nisjes për çdo individ, ndërsa 2500 të tjerat ndahen për projektin e riintegrimit. Zoti Ajeti sqaron se nëse dikush kërkon para të thata kjo mund të bëhet e mundur vetëm për shumën 1500 stërlina. “Në këtë rast, paratë jepen me këste përgjatë një periudhe prej 18 muajsh...Deri tani vetëm 18 veta kanë kërkuar para të thata”, sqaron zoti Ajeti. Për ata që nuk e kanë ende të qartë këtë skemë, koha po i tradhëton. Kanë mbetur vetëm tri javë nga fundi i këtij programi pilot të financuar nga qeveria britanike. Afati i fundit i aplikimit është 31 maji i këtij viti dhe kushti tjetër është largimi nga Anglia brenda datës 30 qershor. Kusht tjetër për përfitimin nga ky projekt është statusi i aplikuesit. Emigranti duhet të ketë aplikuar për azil në këtë shtet përpara datës 31 dhetor 2005.

IOM dhe kthimi vullnetar
Njihen tri rrugë legale për kthimin e atyre të cilët nuk e kanë patur fatin të legalizohen në këtë vend. IOM është vetëm njëra nga këto. Një tjetër rrugë është kthimi vullnetar me asistencën e ambasadës së vendit të origjinës. Në këtë rast, shpenzimet legale dhe të udhëtimit mbulohen nga vetë i interesuari. Një rrugë e tretë është kthimi me forcë nga autoritetet e emigracionit. Zoti Ajeti shprehet se -“Nuk na vjen fare mirë që shumë njerëz enden prej vitesh nëpër ekonominë e zezë për të siguruar jetesën në ilegalitet. Sigurisht që është fatkeqësi për faktin se ata paguhen shumë pak dhe nuk kanë asnjë lloj sigurimi, por njëkohësisht ne nuk i shtyjmë njerëzit të largohen. Një gjë të tillë nuk është në praktikën tonë. Por ka shumë veta të cilëve u ka ardhur në majë të hundës duke jetuar në ilegalitet dhe shpresat për legalizim u janë shuar. Në këtë rast, projekti i IOM është rrugë shumë më dinjitoze se sa të kthehesh me prangat e oficerëve të organeve të emigracionit”.

__________________
The heaven's sound is composed inside your heart, listen to its beat to syncronize your life onto the angel's steps.