Kamatëvonesat që rezultojnë për t'u paguar nga ana ndërmarrjeve dhe shoqërive me kapital tërësisht shtetëror, institucioneve shtetërore, buxhetore e jobuxhetore, ndërmarrjeve dhe shoqërive me kapital të përbashkët me shtetin, personave juridikë, fizikë e privatë dhe personave të vetëpunësuar në bujqësi, u falen kamatëvonesat e kontributeve të sigurimeve të detyrueshme, shoqërore dhe shëndetësore, të papaguara deri në datën e hyrjes në fuqi të këtij ligji, me kusht që detyrimet për kontributet të arkëtohen brenda datës 31.12.2007. Ky është projekt-ligji që qeveria ka miratuar gjatë ditës së djeshme dhe që pritet që të marrë edhe miratimin e Kuvendit, gjatë ditëve në vazhdim. Instituti i Sigurimeve Shoqërore dhe Shëndetësore, ka propozuar gjithashtu që kamatëvonesat e papaguara, falen edhe kur kontributet për Sigurimet e detyrueshme Shoqërore dhe Shëndetësore, janë paguar para hyrjes në fuqi të këtij ligji. Në nenin dy të këtij projekt-ligji, kërkohet që të pushohet ekzekutimi i vendimeve të gjykatave, që kanë marrë formë të prerë, deri në datën e hyrjes në fuqi të këtij ligji, për pjesën e kamatëvonesave të papaguara të kontributeve të Sigurimeve të detyrueshme Shoqërore dhe Shëndetësore, të cilat falen me këtë ligj. Ndërsa, përsa u përket të gjithë atyre që kanë paguar kamatëvonesat para hyrjes në fuqi të këtij ligji, nuk parashikohet ndonjë masë prapavepruese.

ISSH-ja, fal kamatëvonesat për të vetëpunësuarit në bujqësi
Për të gjithë fermerët e vetëpunësuar në bujqësi, do të falen gjobat për kontributet e papaguara. "Instituti i Sigurimeve Shoqërore (ISSH) i ka falur gjobat ose kamatëvonesat për kontributet e papaguara në skemën e sigurimeve shoqërore nga fermerët shqiptarë. Për një periudhë pothuajse për një vit, fermerët nuk i kanë paguar kontributet e caktuara të sigurimeve shoqërore, por përsëri skema aktuale e këtyre sigurimeve i lejon fermerët që t'i paguajnë këto kontribute aq sa janë, pa kamatëvonesë. Skema aktuale e sigurimeve shoqërore pranon të gjithë fermerët që s'kanë paguar edhe për një kohë më të gjatë kontribute të sigurimeve shoqërore. Dy arsyet kryesore të faljes së gjobave për fermerët janë: të ardhurat e pamjaftueshme të fermerëve për financimin e kontributeve, si dhe integrimin gjithnjë e më shumë të kësaj pjese të popullsisë në skemën e sigurimeve shoqërore.

Ndërmarrjet shtetërore, kriza financiare bllokon sigurimet
Një pjesë e mirë e ndërmarrjeve shtetërore, kanë si problem kryesor të tyrin, vështirësitë financiare në pagesën e sigurimeve shoqërore. Një fakt i tillë tashmë është i përsëritur në vite. Edhe në fund të vitit 2005 qeveria miratoi një projektligj me anë të të cilit falte kamatëvonesat për ndërmarrje të caktuara, siç ishte edhe ajo e Ujësjellës-Kanalizimeve. E njëjta situatë është përsëritur me faljen e kamatëvonesave, edhe në vitin 2004 dhe në 2003.

__________________
Try not to become a man of success but rather to become a man of value - Einstein Albert.