Dy piktorë të njohur shqiptarë nga dy qytete turistike; njëri nga Gjirokastra dhe tjetri nga Berati pikëtakohen në New York të Amerikës në një ekspozitë të përbashkët. Ka qenë pikërisht kuratorja Ana Matthiesen, e cila ka përzgjedhur 30-punime të dy piktorëve nga Shqipëria dhe i ka ekspozuar para artdashësve amerikanë. Këto punime, ndonëse krejt të ndryshme nga tematika dhe ideimi, rrinë shumë mirë dhe ndihmojnë njëra-tjetrën në këtë ekspozim të përbashkët. Kjo ekspozitë që është hapur nga data 1-12 nëntor, është parë nga shumë vizitorë, madje deri tani janë shitur dhe 6 piktura të tyre me një vlerë nga 3-9 mijë dollarë. Këta dy piktorë kanë hapur disa ekspozita në galeritë më prestigjioze të botës.Përpara një viti Arben Golemi ka hapur një ekspozitë të rëndësishme në Gjenevë, ku ka prezantuar rreth 70 punime të tij. Ka marrë pjesë edhe në një ekspozitë ndërkombëtare me rastn e 60-vjetorit të Kombeve të Bashkuara duke prezantuar Shqipërinë. Madje i ka i ka dhuruar Kombeve të Bashkuara një pikturë të tij, ku spikat një lloj alegorie me mënyrën tonë të jetësës, piktura titullohet “Spring”. Brenda muajit nëntor ka në plan të hap në Tiranë një galeri për të promovuar piktorët më të rëndësishëm shqiptarë. Arben Golemi ka lindur më 3 prill 1954 në Berat. Studimet e mesme i ka mbaruar në vitin 1969-1973 në vendlindje, në shkollën “Babë Dudë Karbunara”, ndërsa studimet e larta në 1973-1978 në Universitetin e Tiranës për arkitekturë. Në vitin 1986-1987 kryen një kurs pasuniversitar 1-vjeçar për kritikë arti pranë Akademisë së Arteve të Bukura. Është i martuar dhe ka një vajzë e një djalë.

Gazeta Sot

__________________
Nobody is perfect ...