Analistët serbë vlerësojnë se, nëse Kosova shpallë njëanshëm pavarësinë,
ajo do ta ketë një rrugë të ngadalshme deri të njohja ndërkombëtare, por paralajmërojnë se, Kosova është rast specifik dhe nuk do të kalojë nëpër mundimet që i kanë kaluar disa shtete të tjera - që e kanë shpallur në këtë mënyrë pavarësinë - ngase e ka mbështetjen e fuqive botërore.

Ish-diplomati serb, dhe bashkëpunëtori i Forumit për marrëdhënie ndërkombëtare, Dushan Llaziq, në një bisedë për gazetën Blic, ka thënë se, ”përkundër faktit që etnitetet separatiste kanë pasur vështirësi për ta fituar njohjen ndërkombëtare, Kosova është rast specifik dhe duket se do të jetë përjashtim”.

“Kosova, si pjesë e Evropës, më qëllim të integrimit evropian, mund ta ketë rrugën shumë më të shpejt të njohjes ndërkombëtare”, ka thënë Llaziq. Sipas fjalëve të tij, nuk duhet harruar se Kosova ka mbështetjen e fuqishme të SHBA-së dhe shumicës së shteteve të BE-së, gjë e cila në çdo rast mund të ndihmojë në njohjen ndërkombëtare të saj.

Për qytetarët e Kosovës, sipas tij, shpallja e njëanshme e pavarësisë megjithatë, do të sillte edhe disa probleme. “Shteti i Kosovës do t’i nxirrte dokumentet e tij, prej letërnjoftimeve deri të pasaportat, mirëpo me këto dokumente nuk do të mund të udhëtonin në shtetet që nuk i njohin ato - sikur është Serbia, Rusia dhe Kina - ndërsa është i mundshëm edhe kufizimi i qarkullimit edhe në shtetet e BE-së, që kundërshtojnë pavarësinë e njëanshme të Kosovës”, shton analisti serb.

Sidoqoftë, ai thekson faktin se, në Kosovë nuk do të kishte probleme të mëdha ekonomike, pasi që SHBA-të dhe shtetet e BE-së, që do ta njihnin pavarësinë e Kosovës, do ta drejtonin kapitalin e tyre dhe kreditë në Kosovë.

“Kosova fillimisht nuk do të mund të llogariste në kreditë e institucioneve ndërkombëtare, si FMN-ja dhe Banka Botërore, mirëpo sigurisht se aty do të derdhej kapital i konsiderueshëm amerikan”, thekson ndër të tjera Llaziq.

Edhe prof. dr. Vatrosllav Vekariq, kryetar i Qendrës për analizat e jashtme, thekson se, fati i pavarësive të vetë-proklamuara shpesh varet nga fuqitë e mëdha. Megjithatë ai shton se e drejta ndërkombëtare nuk i mbështet gjithaq aksionet e njëanshme të shpalljes së pavarësisë.

“Edhe në rast se SHBA-ja e pranon Kosovën - Kosova për një kohë të gjatë kohore nuk mund të llogaris në anëtarësimin e saj në OKB - pasi që për pranim në OKB nevojitet pajtimi i të gjithë anëtarëve të përhershëm të Këshillit të Sigurimit (pra edhe i Rusisë)”, ka thënë ai, duke renditur këtu edhe institucionet dhe mekanizmat të tjerë ndërkombëtarë, ku Kosova do të kishte vështirësi të pranohej.

Edhe Llaziq konsideron se pranimi i Kosovës në OKB, do të frenohej për një kohë nga Rusia dhe Kina, mirëpo ai thotë se me kalimin e kohës, kjo pengesë do të tejkalohej.

“Është e sigurt se Rusia për një kohë do të këmbëngulte në qëndrimin parimor, mirëpo me kalimin e kohës, më së largu brenda disa vjetësh, do të gjendej një zgjidhje e cila do të përbirohej edhe përmes Këshillit të Sigurimit të OKB-së, me ç’gjë Kosova do ta fitonte njohjen e plotë ndërkombëtare”, tha ai.



Paraqet:Sabri Selmani
Gjermani