Kampionati i Kosoves : Java 10.

Prishtina theu traditën, mposhti Vëllaznimin

Javën e 10-të të Kampionatit të Kosovës në futboll e karakterizuan 19 gola të shënuar, 6 fitore të skuadrave vendase e një barazim, si dhe madje 7 kartona të kuq. Ballafaqimi më interesant, ashtu siç pritej, u zhvillua në kryeqytet ndërmjet rivalëve të vjetër, Prishtinës dhe Vëllaznimit. Rreth 2.000 adhurues të pranishëm në këtë duel patën rast të shohin një lojë cilësore, por të cilën e zbehu loja tepër e tensionuar në të dyja palët, si dhe sjelljet e tifozeve, sidomos atyre gjakovar pas perfundimit te ndeshjes.

Futbollistët e Prishtinës arritën ta thejnë traditën e viteve të fundit, duke e mposhtur Vëllaznimin, me rezultat 3:1, ndonëse deri te kjo fitore arritën me mjaft mund. Prishtinasit kaluan në epërsi në minutën e 10-të nëpërmjet Besnik Kollarit, i cili ishte i saktë nga penalltia. Pas shënimit të këtij goli nervoziteteti në radhët e gjakovarëve u shtua. Si pasojë e një loje të tillë, në minutën e 13-të, për shkak të një ndërhyrje të ashpër ndaj Emrës, gjyqtari Malazog Hoxha, ndëshkoi me karton të kuq, Kreshnik Vulën dhe në këtë mënyrë, që nga kjo minutë, mysafirët luajtën me një lojtar më pak. Një gjë të këtillë mjaft mirë e shfrytëzuan prishtinasit, të cilët vetëm pas katër minutash, e shtuan epërsinë në 2:0, nëpërmjet Sheremet Isufit, i cili përfitoi nga një gabim i udhëtuesve. Pas kësaj epërsie prishtinasit menduan se çdo gjë përfundoi në këtë takim dhe paksa u tërhoqën në lojë. Megjithatë gjakovarët edhe pse me një lojtar më pak nuk u dorëzuan lehtë. Kështu në minutën e 34-të, Efendia e ngushtoi epërsinë në 2:1, duke e bërë ndeshjen dramatike deri në fund. Mirëpo të gjitha dilemave rreth fituesit të këtij takimi u dha fund, lojtari i ri i Prishtinës, Labinot Demolli, i cili në minutën e 77-të vuri rezultatin përfundimtar 3:1. Duhet theksuar se me kartona të kuq në finish të ndeshjes u ndëshkuan edhe Admir Pruthi dhe Besnik Kollari. Një përballje mjaft interesante dhe me përplot gola u zhvillua në Mitrovicë, ku Trepça’89 realizoi fitore bindëse në duel me Kosovën e Prishtinës, 4:1. Serinë e golave për “xehetarët” e hapi Sejd Onbashi, në minutën e 14-të, ndërsa atë e vazhduan Liridon Misini (28’), Elvis Osmani (56’) dhe Enver Jashari (68’), derisa golin e nderit për prishtinasit e realizoi Kushtrim Munishi (90’). Me këtë fitore “xehetarët” janë ngjitur në pozitën e tretë të renditjes, ndërkohë që përcjellësja më e afërt e Prishtinës, mbetet Besa e Pejës. Pejanët në kuadër të kësaj jave realizuan fitore të vështirë ndaj skuadrës së fundit në renditje, Gjilanit, me golin e Haxhi Zekës, në minutën e 42-të nga penalltia. Me të njëjtin rezultat fitore ka realizuar edhe Getoari në duel me Ferizajin, me golin e shënuar nga Sylejman Shala. Ndërkaq Flamurtari si duket nuk po arrin asesi të dalë nga kriza që e ka kapluar. Kësaj radhe “kuqezinjtë” e kryeqytetit u mposhtën në Vushtrri, ndaj Kosovës, me golin e Besim Ademit, në minutën e 78-të. Duhet theksuar se skuadra vushtrriase në këtë takim u paraqit me tre lojtarë të rinj të ardhur nga Teuta e Durrësit. Ndërkohë një lojë e pëlqyeshme për adhurues ishte ajo në Gjilan, ku kampionia në fuqi, Drita realizoi fitore të mundimshme ndaj Drenicës, me rezultat 3:2. Golashënues i trefishtë në këtë takim për gjilanasit ishte, kush tjetër veçse, Selman Berisha, kurse për Drenicën golat u shënuan nga Durmishi (autogol) dhe Kiçina.

Rezultatet

Prishtina-Vëllaznimi 3:1
Trepça’89-Kosova 4:1
Getoari-Ferizaji 1:0
Besa-Gjilani 1:0
Drita-Drenica 3:2
Kosova (V)-Flamurtari 1:0
Besiana-KEK-u 1:1

TABELA

1.Prishtina 10 7 2 1 17:6 23
2.Besa 10 6 2 2 21:12 20
3.Trepça’89 10 6 0 4 16:14 18
4.Drita 10 4 4 2 18:13 16
5.Drenica 10 5 1 4 15:10 16
6.Getoari 10 5 1 4 12:7 16
7.KEK-u 10 3 5 2 24:11 14
8.Vëllaznimi 10 4 2 4 10:17 14
9.Kosova (V) 10 4 1 5 12:17 13
10.Ferizaji 10 2 6 2 9:9 12
11.Kosova 10 3 1 6 10:18 10
12.Besiana 10 2 3 5 6:12 9
13.Flamurtari 10 2 2 6 11:16 8
14.Gjilani 10 1 2 7 5:24 5

Në javën e 11-të, më 1 e 2 nëntor, takohen: Ferizaji-Kosova (V), Drenica-Getoari, Kosova -Drita, Vëllaznimi-Trepça’89, KEK-u – Prishtina

Blerim HALIMI www.futbolli.com

Imazhe te Ngjitura

20031027140537305_1.jpg (13.0 KB, 171 vezhgime)