Jo vetëm pakësim i numrit të shtretërve spitalore, por edhe ulje e cilësisë së shërbimeve shëndetësore. Madje në vendin tonë numri i shtretërve spitalorë për banorë, është më i vogël se në të gjitha vendet e tjera të Evropës Lindore dhe Qendrore. Ky është fenomeni që ka shoqëruar shërbimet spitalore, vit pas viti, duke u bërë një krasitje drastike jo vetëm numrit të spitaleve, por edhe shtretërve. Doktori pranë Departamentit të Shëndetit Publik në Fakultetin e Mjekësisë, Ardian Hoxha, pohon se aktualisht kemi rreth 118 spitale më pak se në vitin 1992, e si pasojë edhe numri i shtretërve është pakësuar me mijëra. Megjithatë, sipas tij, akoma më problematike është fakti se cilësia e shërbimeve shëndetësore lë shumë për të dëshiruar, saqë edhe pacientët hezitojnë të shtrohen në spitalet tona.

Më pak spitale
Nëse dikur kishte spitale edhe në zonat rurale dhe larg qendrave kryesore të banuara, ato tashmë nuk ekzistojnë. Kështu, shumë banorëve iu duhet të rrugëtojnë me orë të tëra në kërkim të një spitali dhe alarmante bëhet situata kur gjendja e tyre shëndetësore është kritike, duke iu rrezikuar jeta seriozisht. Sipas Ardian Hoxhës, tani numërohen vetëm 42 spitale në gjithë vendin, nga 160 që kishte në vitin 1992. Por problemi nuk mbaron këtu, pasi paralelisht me uljen drastike të numrit të spitaleve, ka ardhur edhe tkurrja në maksimum e numrit të shtretërve. Kështu, në vitin 1992 numëroheshin rreth 14000 shtretër, ndërsa në ditët e sotme, sipas statistikave, ka rreth 10200 të tilla. "Numri i shtretërve spitalorë për banorë, është më i vogël se në të gjitha vendet e tjera të Evropës Lindore dhe Qendrore, duke përfshirë edhe vendet e ish-Bashkimit Sovjetik",- pohon Ardian Hoxha. Sipas tij, mbyllja e spitaleve në zonat rurale, erdhi për faktin se ato ishin të vegjël, të pajisura keq dhe me një cilësi jo të mirë shërbimi shëndetësor.

Më pak shtrime
Nuk jemi vendi që kemi më pak shtretër spitalorë për banorë, por edhe numri i shtrimeve është në shifra shumë të vogla, krahasuar me vendet e tjera. Nëse në Austri ka 27,2 shtrime për 100 mijë banorë, në vendin tonë numri i shtrimeve është afërsisht 8.0 shtrime për 100 mijë banorë. "Pavarësisht nga numri i vogël i shtretërve spitalorë, vendi ynë ka një përqindje të ulët të pranimeve në spital për banorë; rreth 8.0 shtrime për 100 mijë banorë, që u deklarua në vitin 1999",- thotë Hoxha, duke shtuar se një shifër e tillë është shuam herë më e vogël se vende të tilla, si Franca, Gjermania, Anglia apo Danimarka, që e kanë numrin e shtrimeve mbi 20 për 100 mijë banorë. Madje, edhe të dhënat e shfrytëzimit të shtretërve dhe të ditë-qëndrimeve në spitale, flasin për tregues jo të përshtatshëm krahasuar me vendet e tjera të Evropës Perëndimore. Madje ditë-qëndrimi i shkurtër në spital nga pacientët, ka ardhur gjithnjë në ulje, pasi mesatarisht është 7.1 ditë nga 12.7 ditë që ishte në vitin '91. Gjithashtu, të dhënat flasin për të njëjtin fenomen edhe për shfrytëzimin e shtretërve, pasi tani është rreth 51 për qind, nga 41 për qind që ishte në vitin '91.

118 spitale më pak, ka aktualisht në vendin tonë krahasuar me vitin 1992
42 spitale numëroheshin në gjithë vendin tonë, në vitin 2006
14000 shtretër kishte në spitalet e vendit tonë, në vitin 1992
10200 shtretër kishte në vendin tonë, në vitin 2000

__________________
The heaven's sound is composed inside your heart, listen to its beat to syncronize your life onto the angel's steps.