Parajsa Shqiptare Forum - Shikoni Postime te vecuara

Jonisa · #1 17-05-2006, 16:41

Flori, harrakati që do të bëhet baba

Pa treguar se është i famshëm, di të dëshmojë se është i gjithanshëm. Florian Mumajesi tregon pak dhe zbulon shumë. Një dashuri që është gati ta shpjerë drejt martesës. Lidhja me “Këngën Magjike” dhe pasioni për muzikën. Koha në NRG dhe disa gjëra të tjera të pazbuluara më parë. Në të tjera dimensione, por me rrënjë akoma shumë të forta në muzikë.

Klaudeta Skënderasi

Me siguri që “Kënga Magjike” do t’i ketë bërë vërtet magji Florit. Nuk ka munguar në asnjë edicion të saj dhe duket se kjo skenë ka qenë një kumbarë e fatit të mirë të tij. Prej saj ka dalë shpesh me trofe dhe pikërisht më i fundit u kurorëzua jo më larg se para pak javësh, çmimi i tretë. E ai ndjehet mirë atje, në atë festival që e ka vlerësuar gjithmonë ndryshe artistikisht. Ka debutuar, ka krijuar dhe është ndjerë artist, krahas emrave që dikur i ka parë edhe ai si të tjerët, vetëm përmes ekranit. Tani, në një hap me ta konkurron, merr prej tyre edhe vlerësime. Dhe kjo nuk është pak. Mes shumë dashurive të tjera, skena magjike është një dashuri më vete për Florin dhe duket se i ka falur jo pak, që kur çmendi të rinjtë nën emrin “The Dreams”, dhe më pas kur pushtoi skenën i vetëm.

Nuk është nga ata që kënaqet më pak. E pohon edhe vetë. Tani i intereson vetëm e vetëm të mësojë dhe duket ka mësuar shumë, por ka akoma rrugë. Ka nuhatur erën e suksesit dhe ka zbuluar marifetin për të qenë i pëlqyer. Shshshsh.... se është sekret! Flori nuk jep receta suksesi, por ama e thotë troç. “Nuk ma ndjen fare!” Duket se kur nuk ta ndjen nuk të dalka keq. Ai është dëshmitar për këtë. Nuk e vret mendjen se ka një kamera përpara dhe një publik që e vëzhgon përmes ekranit. Nuk di t’i vërë fre gojës, flet ç’i vjen nëpër mend, qesh sa i do qejfi dhe nuk njeh kufij, nuk ka as tabu. Dhe është i sukseshëm, por jo i famshëm. Po ta pyesësh për këtë, ta pret shkurt “Jo, nuk jam i famshëm” Çdo ditë “prodhon” bashkë me Andi DJ orë të tëra transmetimi që mund të quhen edhe thjesht me emrin “ndryshe”. Një formulë televizive e ngjizur falë një takimi të rastësishëm me Andi DJ, që në fakt ai dikur e konsideronte një rival, por si të vetmin që, ashtu si Flori, bënte muzikë të bukur. Po pastaj mjaftoi rreth një orë e ca bisedë dhe u bë... Në NRG Flori vjen si (të mos i themi prezantues se e ka vdekje!) lançues i një emisoni për të rinj, që ka për sfond muzikë të ritmeve dance dhe house, që dikur ai nuk i ka preferuar, pastaj e gjeti veten edhe atje. Të mos flasim për rrëmujat që shkakton në studio. Mirë që Andi Dj është pak më i përmbajtur, ndryshe do të kishte rrezik që t’i vinte flakën studios, pikërisht asaj studioje ku zbuloi të tjera dimensione të vetes. Ka provuar të prezantojë dhe ia ka dalë më së miri, ka guxuar të bëjë humor dhe ia ka arritur, pa folur pastaj për muzikën, aty po që është në tokë të fortë. E nuk i ka dalë fare për keq me këto eksperimentet. Fundja kjo është një nga mënyrat më të mira për të qenë i pranishëm në treg, për të tërhequr audiencë, për të fituar ekranin dhe siguruar anën ekonomike. Më shumë se kaq? Po sigurisht. Sepse ka të tjera pasione. Përtej të qenit këngëtar, nën thonj ka edhe dhuntinë e të bërit muzikë. Dhe këngën nga krijimi Flori nuk i ndan dot, ndoshta nuk gjen arsye dhe as dëshirë për ta bërë. I do të dyja po njësoj dhe iu jep të dyjave shumë nga vetja. Por nuk di ta thotë ndryshimin mes tyre, ndoshta nuk ka ndryshim, sepse tek ai vijnë të dyja natyrshëm, dashuria për këngën dhe dhuntia për muzikën. “Kur të tjerët këndojnë muzikën time, ndjehem njësoj sikur të këndoja vetë”.

E nëse të gjithëve iu ka dhënë atë përshypjen e djalit të dhënë pas të gjithave në përgjithësi dhe pas asgjëje në veçanti, që s’ia ndjen për asgjë, që herë duket i hallakatur dhe pastaj nën kostumin e skenës ndërron pamje, kjo është e vërtetë, por jo plotësisht. Sepse po ta ngacmosh pak më tutje, e ka edhe ai atë pikën e dobët dhe të çudit teksa e dëgjon të flasë për atë që vlerëson tek ...ajo. Ia ndjen që çke me të Florit për dikë, sepse kur i bën atë pyetjen klasike “A ke të dashur”, ai të përgjigjet menjëherë “Kam një dashuri”, pastaj mendohet pak dhe provon ta marrë në tel. Ku i dihet. Ajo mund të ketë ndryshuar mendje dhe atij i ikën deklarata kot. Ja që edhe në një intervistë Flori e ka të pamundur të mos bëjë humor. “Po, kam të dashur”, të thotë pastaj i vendosur. Dhe çfarë vlerëson tek ajo? “Të jetë e sinqertë, inteligjente, e bukur...hahahaha. Më tërheq mënyra se si më dëgjon kur unë flas, sesi argumenton çdo gjë që them, çdo pjesë të karakterit të saj dhe të gjitha ato gjërat e vogla që ndoshta mund të duken pa vlerë. Më tërheqin gabimet që bën herë pas herë, deri edhe aroma e flokut. Vajzat që e kanë në plan të bëjnë ndonjë tentativë bëjnë mirë ta fshijnë nga mendja. Flori duket kokë e këmbë i dashuruar. Madje edhe do të martohet. Që të kuptohemi. Sigurisht që nuk ka plane të afërta për martesë, është akoma shumë i ri, por nuk i bën bisht pyetjes se ç’mendon për martesën, si gjithë shumica mashkullore që e shohin si fenomen jashtëtokësor, madje ka menduar edhe detajet. “Do ta provoj një ditë me një njeri që të dijë ta jetojë çdo ditë ndryshe. Do bëj edhe një bebe. Dhe dua që ta ketë hundën si timen, sepse e kam të bukur”.

E ndërsa flet, e ka të pamundur të dalë nga natyra e tij e lëvizshme dhe impulsive. Nuk rri dot në një vend dhe ndoshta shumicës prej jush i ka dhënë përshtypjen e djalit shkatarraq. Por një ide e tillë të sfumohet në çast, po të hedhësh një sy të shpejtë në studion e tij në NRG. Gjithçka e rregullt, madje edhe e bukur, sepse aty nuk mungojnë dekorimet që nga fotot, pellushët, mbajtëset e CD-ve dhe pa lënë mënjanë trofetë e fituara në “Kënga Magjike” të ruajtura me fanatizëm. Aty kalon pjesën më të madhe të ditës. Nëse ka pak kohë të lirë, do të jetë patjetër “online” në MSN, duke biseduar me miqtë e tij dhe nëse nuk është aty, një kafe aty rreth e rrotull ose edhe më larg. Një pjesë e kohës së lirë i shijon shumë kur e kalon në gjumë, kurse fundjavave nuk është “online” në asnjë qoshe të Tiranës. Shumë shpesh del jashtë shtetit. Është mësuar me këto ritme dhe duket se për momentin nuk ka në plan t’i ndryshojë. Ndoshta do të bënte një jetë ndryshe po të mos ishte ai, Flori që di të këndojë, të bëjë muzikë dhe të flasë pa pushim para kamerës. Nëse nuk do të ishte i tillë, as ai vetë nuk di të thotë se çfarë do ishte. “Po të mos dija të këndoja, do të isha producent, po të mos isha producent, mund të isha gjithçka tjetër. Unë kam provuar të jem edhe tapicier vite më parë”.

Për momentin gjithçka e ka të lidhur me muzikën. Dhe ndoshta në të ardhmen do të jetë i lidhur me emra të rinj të muzikës. Një ditë do të menaxhoj talente të reja dhe….do të jem një baba I mirë…..”. Si duket e paska seriozisht këtë punën e martesës.