Një grumbull çmimesh për këngëtarët kosovarë në festivalin e muzikës moderne në Tiranë

Kosovarët pushtojnë “Top Festin”

Grupi “Kthjellu” & Alban Skenderaj fituan çmimin kryesor dhe atë për këngën më të mirë pop&rok. Ndërkaq edhe pesë çmime të tjera iu takuan këngëtarëve nga Kosova. Nora Istrefi u shpërblye me Çmimin Digitalb, Malda Susuri u shpall artistja më e mirë e re, K-OS & DJ Blunt feat. Bardool u shpërblyen për këngën më të mirë hip-hop dhe R’n’B, kurse Blero mori çmimin për interpretuesin më të mirë

MANIK BEGOLLI

Asnjëherë më parë nuk ka ndodhur që këngëtarët nga Kosova të fitojnë më shumë çmime në një festival të Tiranës, si të dielën mbrëma në “Top Fest”. Juria e edicionit të tretë, të festivalit më prestigjioz shqiptar të muzikës moderne, nuk ka hezituar që ta shpërblejë një këngë hit në Kosovë, të titulluar “Hey”, pavarësisht tekstit “të papranueshëm” dhe të folmes ekstra prishtinase të përdorur në të. Mijëra vetë të mbledhur në Pallatin e Kongreseve kanë kënduar me djemtë simpatikë të grupit K-OS dhe me DJ Blunt vargjet “Hej, a e din që frajerin e ki gej, f’tyrën e ki llom, b… e ki OK”, një refren që para pak vjetësh as që do të imagjinohej se do të jehonte në Tiranë.
Gjashtë çmime nga njëmbëdhjetë, sa janë ndarë, janë fituar nga këngëtarë kosovarë. Çmimi kryesor dhe ai Best Pop/Rock i ka takuar këngës “Diçka”, një bashkëpunim i grupit kosovar “Kthjellu” dhe Alban Skenderajt. Një këngë hit, e cila dëgjohet shumë në Kosovë e Shqipëri. Që para natës finale, pothuajse ishte e ditur se kjo këngë do ta fitonte çmimin e madh, në vlerë prej 10 mijë eurosh, pasi që votimet paraprake e kishin renditur të parën.
Prizrenasja Malda Susuri është shpërblyer si artistja më e mirë e re, K-OS & DJ Blunt feat. Bardool për këngën më të mirë hip-hop dhe R’n’b, Blero (këngëtari nga Kosova që jeton në Suedi) është shpallur interpretuesi më i mirë, ndërkaq Nora Istrefi ka fituar Çmimin Digitalb.
Këngëtarët nga Maqedonia kanë fituar dy çmime – këngëtari më i mirë është shpallur Shpat Kasapit, kurse çmimi për këngëtaren më të mirë i ka takuar Altuna Sejdiut – Tunës, në duet me Jonida Maliqin. Ndërkaq, këngëtarëve nga Shqipëria iu kanë mbetur çmimi për këngën më të mirë alternative, i fituar nga 00 Genti, çmimi i internetit, që i ka takuar Stines dhe çmimi për këngën më të mirë, të cilin e ka fituar Soni.
Kosovarët kanë qenë të nominuar në të gjitha kategoritë. Disa nga ta, si Xuxi, grupi “Asgjë sikur dielli” dhe Arta Bajrami janë paraqitur me nga një këngë përshëndetëse para publikut. Gjithë spektakli ishte i organizuar në mënyrë shumë moderne – që nga skenografia, e deri te “look”-u i prezantuesve.

“Top Fest” nuk është Festivali i RTSH-së

Kompozitori Andin Randobrava thotë se përkundër faktit që këngëtarët kosovarë kanë fituar shumicën e çmimeve, në festivalet e Tiranës Kosovës i ndahen pak çmime. Sipas tij, në “Top Fest” nuk marrin pjesë këngëtarë shumë të njohur të Shqipërisë, por më shumë këngëtarë të rinj.
“Është diçka tjetër nëse këto çmime do të ndaheshin në një festival siç është ai i RTSH-së, e kjo pothuajse është e pamundur”, tha Randobrava për “Lajm”. Ai nuk e mohon faktin se në Tiranë po pëlqehet muzika moderne kosovare, por vlerëson se këngëtarët atje janë më të shkolluar sa i përket muzikës klasike.

lajm.info

__________________
Nobody is perfect ...