ANONIMITET

U linda në hije,
u rrita në hije,
larg nga dritat e prozhektorët,
më thanë:
"s'ke intuitë për të marrë timonin
ama, paske shpatulla për të shtyrë motorrët".
Më thanë të kyç gojën e të jem e duruar
se mbetet shpesh pa gjë
ai që lyp shumë...
e...teksa bindem prozhektorët fiksohen
larg meje
e larg njerëzve si unë.

BRILANT

Fol e shkëlqe më pak
që të të ndjej më shumë
këtij kontakti direkt,
më garanto
me të qenurit pranë
e mos më trëmb me të qenurit perfekt.

SHOPING

Të gjitha i desha të reja
dhe kështu i prita të më vinë
kur memorjen e shpirtit martova
me amnezinë.

Dhe i vura në listë një nga një
me kërkesat e modës së fundit
mos u trembni,
paguaj në dorë
siç e lypin ligjet e konsumit.

"Më jep nja dy miq të mirë
dhe një zemër paketoma me nge,
s'ka rëndësi e madhe a e vogël
rëndësi ka të jetë e re.

Ka rëndësi të mos më përhumbet
e të mos flerë kur unë jam aty,
për të tjerat - paguaj në dorë
për të tjerat - marr rrezikun në sy."


BEHU PREJ COKOLLATE

Në këtë kohë kur gjithçka ndryshoi
ndrysho dhe ti
qytet i dtyrimeve të pafund,
të jesh gjumëprishës
t'jesh dëshirashkelës
s'është më në modë askund.

Njëherë të vetme prej çokollate bëhu
qytet i detyrimeve në nevojë,
të mos na sillesh më i gurtë mes dhëmbësh
po të na shkrihesh në gojë...

LEKUNDJE

Tokë e premtuar
pse më dukesh e largët
teksa eci mbi ty,
itenerarin e kësaj rruge e zgjodha me zemër
me zemër
e jo me sy.

E premtuar njëmijë herë para meje
dhe e mbajtur me fytyrë dhe me erz,
pse në duart e mia sot
je çakmak që nuk ndez?!!!!!......

MPIRJE

Vij nga tokat e lodhura
ku dielli bën hije,
ku nderi është kaq pervers
sa të rrëzon në gjunjë,
ku bëhet be e rreme në emër të zotit,
ku askushët bëjnë bujë.

Në emër të barazisë na barazuan
për një gjumë më të mirë
më të qetë,
ashtu të barazuar rrëshqitëm
në boshtin e minuseve lehtë - lehtë...

Si ta marr veten...
më kanë kafshuar
në kohë, në nerva,në sy
prej qumshtit utopik e përvëluar
shihni!....
kosit po i fry...

FUND PA FUND

Shi imoral preteksesh
për ta zgjatur dhe një orë
dhe një muaj më shumë,
i plusuar ideve të sajuara
që ndjellin gjumë.

Idesh patetike
që ftojnë, që ndezin
që më çudisin e më lënë pa mënd,
kushtu funksionoka i dashur mekanizmi
i imponimit tënd.

STEPJE

Nuk konvertohem
sa herë frekuentoj
e s'flas me bindje
për gjëra që si njoh mirë,
ngaqë vi prej gjëndjesh të vështira
zë besë vështirë.

E di
jam në rrugë të gabuar
po ti për mua mbylle njërin sy,
s'është i qëllimtë
por zakon i mbetur,
ky chek - point për ty.