“EPOKA E RE” në familjen e Zahir Pajazitit

KOSOVA NUK KA GJENERALA PËR BURGJE - ATA I DUHEN USHTRISË


“Ishalla hatri fëmijëve dhe gjakut të dëshmorëve na ndihmon Zoti, se boll keq i kemi punët. Jemi çuar peshë dhe po tutna po bëhet edhe ndonjë kiamet”, thotë baca Qerim, i cili e konsideron humbje të madhe për Kosovën shkuarjen e Rugovës dhe të Dacit në Vjenë në mënyrën se si e bënë tërë këtë.


Burim Etemaj


Me rastin e dyzet e një vjetorit të lindjes së dëshmorit të kombit Zahir Pajaziti, “Epoka e re” ka vizituar familjen e tij në Orllan të Besianës.

Një foto e madhe e Zahirit në uniformë të UÇK-së afër fotos së Skënderbeut, të shoqëruara nga flamuri kombëtar, qëndrojnë të varura në murin e odës, ku na presin me dashamirësi Qerim dhe Ejup Pajaziti, babai dhe i vëllai i Zahirit.

Në fillim të bisedës Baca Qerim tregon se familja e tij vizitohet shpesh nga shokët e Zahirit si dhe nga disa prej krerëve të institucioneve kosovare, ndërsa që disa prej tyre, thotë ai, as që ka dëshirë ta vizitojnë.

“Ende më kujtohen fjalët e Zahirit, kur më thoshte: “Babë, pak po i duket Rugovës se po na ndjekë policia e ushtria e serbe, por po e kërkon edhe INTERPOL-in e po na fyen duke na quajtur dorë e zgjatur e Serbisë, terroristë etj.,”, kujton fjalët e Zahirit, baca Qerim.

Pas një pauze të shkurtër, plaku i urtë Qerim Pajaziti fillon të flas për atë që i djeg më së shumti- për të ardhmen e Kosovës.

“Ndryshe kemi menduar e ndryshe na doli…i ligu i paska gjithmonë borxh të fortit, por, sado të ligë me qenë, kur të jemi të bashkuar- ndryshe është, por te ne është e kundërta; jemi pikë e pesë, bre axhë”, thotë me gjysmë zëri ai.


Këtu o burra hala po punon Serbia me këta të huajt e besa edhe me do burra të “mirë” shqiptarë


Babai i Zahirit thotë se këta të huajt po na prekun ku na dhëmb më së shumti, duke aluduar kështu qartas në burgosjen e çlirimtarëve, ish-pjesëtarëve të UÇK-së apo tani të TMK-së. Sipas tij, ushtria, për atë që di diçka, është e para, e tek pastaj vijnë institucionet e tjera.

“Këtu o burra hala po punon Serbia me këta të huajt e besa edhe me do burra të “mirë” shqiptarë”, thotë baca Qerim, duke përmendur arrestimin e komandant Remit me shokë, pastaj arrestimet e shumë ushtarëve tjerë të UÇK-së, të cilat, thotë ai, nuk janë aspak në të mirë të Kosovës.

Në koncertin e organizuar të shtunën në sallën “1 Tetori” në Prishtinë, për nder të ditëlindjes së dyzet e një të Zahirit, kur është lexuar letra, të cilën e kishin shkruar nga burgu shokët e Zahirit, baca Qerim thotë se e ka lagur gjoksin me lot.

“Lot kam derdhur, por nuk jam ligështuar. Për ish-ushtarët e UÇK-së duhet të mburremi të gjithë”.

Për njerëzit që ju prijnë institucioneve kosovare, baca Qerim thotë se ata sillen e pështillen, por përgjegjësi nuk kanë. Sipas tij, udhëheqësit e institucioneve kosovare nuk kanë asgjë në dorë, edhe pse, shton ai, me ua dëgjuar fjalët-të gjithë thonë se po punojnë, “por ndryshe po flasin e krejt ndryshe po punojnë”.

Baca Qerim shpreh habinë edhe se si liderët tanë i kanë formuar me dhjetëra parti politike e secili po ia grah qysh po don vetë. Ai përmend SHBA-në, që është një shtet aq i fuqishëm dhe i ka vetëm dy parti, ndërkaq, thotë ai, këtu te ne liderët tanë si t’i tubojnë 100 vetë shkojnë e formojnë parti.

“Ishalla hatri fëmijëve dhe gjakut të dëshmorëve na ndihmon Zoti, se boll keq i kemi punët. Jemi quar peshë dhe po tutna po bëhet edhe ndonjë kiamet”, thotë baca Qerim, i cili e konsideron humbje të madhe për Kosovën shkuarjen e Rugovës dhe të Dacit në Vjenë.

Ai kujton fjalët e mëdha të Dacit, i cili para takimit të Vjenës deklaronte: “O do të shkojmë të gjithë në Vjenë, o s’do të shkojmë hiç”. “Të ju them të drejtën, ia pata n’xan për begeni Dacit, por sikur harroj se çka tha e u quan dy tarakat (Rugova e Daci) e shkuan në Vjenë, ndërkaq këta liderët tjerë mbeten kurrkund…nuk mbahet shtëpia me bishta, se le më shteti”, shprehet baca Qerim.

Sipas tij, Rugova e Daci, para se të shkojnë në Vjenë, është dashur ta pyesin Kuvendin e Kosovës, e jo ta marrin atë rrugë ashtu siç e morën, si “njëshi” dhe “dyshi”, të cilët në anën tjetër, pas takimit deklaruan se nuk ua kanë dhënë dorën shkive.


Daci po shetë mend, po i përmend dekoratat që ia ka dhënë Tita- po thotë se i din të gjitha…


“Nuk ka po takohem e nuk po i japim dorën. Trimi edhe armikut ia jep dorën, por kur të është nevoja ia jep edhe plumin”, pohon baca Qerim.

Daci, thotë më tutje baca Qerim, po shetë mend e po i përmend dekoratat që ia ka dhënë Tita, ai po thotë se i dinë të gjitha…

“Veq allahu nalt i dinë të gjitha, por ai që është i prisht zbulohet vetë, s’ka nevojë me e zbulu kurrkush”, thotë babai i Zahirit.

Ndërkaq, Ejupi, i vëllai i Zahirit, mendon se më së miri ka qenë që në Vjenë të mos shkonte hiç askush, sepse, thotë ai, para se me ia filluar bisedimeve me palën serbe, Serbia është dashur t’i plotësonte disa kushte.

Gjatë bisedës baca Qerim përmend edhe incidentin e ushtarëve francezë me familjen e Komandantit Legjendar të UÇK-së, Adem Jashari, për të cilin thotë se është tmerruar kur ka dëgjuar. Ushtarët francezë, thotë ai, e kanë pasur për qëllim me ia shkel dinjitetin familjes Jashari, e kjo gjë nuk duhet të tolerohet.

Edhe për arrestimin disaorësh të Komandantit të TMK-së, gjenerallejtënant Agim Çekut, nga autoritetet sllovene, baca Qerim thotë se i ka ardhur keq dhe se fill të nesërmen, posa ka ardhur Çeku në Kosovë, ka shkuar dhe e ka takuar.

“Fatmirin e burgosen në Slloveni. Tash Çekun. Nuk duhet me u çudit në sllovenë, sepse sllavë janë edhe sllovenët, e prej sllavëve nuk pritet gjë e mirë për popullin shqiptarë”, thotë ai, duke shtuar se Kosova nuk ka gjenerala për burgje, por ata i duhen ushtrisë, në të cilën i kemi sytë të gjithë.

Përkundër të gjitha këtyre, baca Qerimi shpreh optimizimin se një ditë Kosova do të jetë e pavarur, e dëshiruan këtë apo jo të huajt.

“Kosova një ditë do të jetë e pavarur, edhepse ndoshta unë nuk do ta pres atë ditë. Populli shqiptar më nuk duron ta sundojë as Serbia e as këta të huajt. Nëse don Evropa e bota për të pasur rahati, duhet më ia dhanë Kosovës pavarsinë”, thotë babai i Zahir Pajazitit.

__________________
The heaven's sound is composed inside your heart, listen to its beat to syncronize your life onto the angel's steps.