"My life" e Klinton, rekord shitjeje
Vëmendjes u përqendrua sesi i trajtoi ish-presidenti skandalet dhe gënjeshtrat, lidhur me Levinski.

NJU JORK - Botimi këtë javë i librit të zotit Klinton të kujton se presidenti i 42-të i Shtetet e Bashkuara mbetet një nga figurat më polarizuese në politikën amerikane. Simpatizantët e ish-presidentit Klinton dhe kundërshtarët e tij nuk i reshtën telefonatat në programe televizive, duke shprehur mendimet e tyre në favor dhe kundër tij.
Një pjesë e madhe e vëmendjes për librin, deri tani është përqendruar tek mënyra, sesi e ka trajtuar zoti Klinton skandalin dhe gënjeshtrat, lidhur me Monika Levinski. Bill Klinton foli për këtë çështje në intervistë, në programin 60-minutësh të CBS-it. “Gjithmonë do të më vijë keq për gabimin personal që bëra. Por unë do të jem gjithmonë krenar, që kur republikanët filluan procedurën për shkarkim, unë nuk dhashë dorëheqjen dhe nuk mendova asnjëherë ta bëj një gjë të tillë dhe luftova. Për mua, e gjithë beteja ishte një medalje nderi. Nuk e shoh si një njollë, sepse ishte e paligjshme”. Ekspertët politikë thonë se vëmendja që po rrethon zotin Klinton mund të jetë një thikë me dy presa për demokratët dhe kandidatin e tyre, senatorin Xhon Kerri. Ndërsa demokratët e vënë theksin tek arritjet ekonomike gjatë presidencës së zotit Klinton, republikanët nuk humbin rastin të flasin për skandalin që bëri që Bill Klintoni, të ishte presidenti i dytë për të cilin Dhoma e Përfaqësuesve votoi për shkarkim nga detyra. Por Senati vendosi që ai të vazhdonte mandatin. Zoti Klinton thotë se do që të bëjë fushatë në favor të zotit Kerry këtë vit dhe zoti Kerry duket shumë i gatshëm ta pranojë një gjë të tillë. “Unë e përshëndes librin e presidentit dhe prezantimin e librit nëpër librari. Besoj se do t’u sjell ndërmend amerikanëve vite shumë të mira, përsa i takon ekonomisë dhe drejtimeve politike që ne morëm”. Disa demokratë mendojnë se ish-nënpresidenti Al Gore gaboi para katër vjetësh, që nuk e angazhoi më shumë zotin Klinton në fushatën e tij. Ish-shefi i stafit të Shtëpisë së Bardhë, Leon Panetta, po e nxit senatorin Kerry të mos bëjë të njëjtin gabim. “Mendoj se ka njëfare nostalgjie për gjendjen ekonomike gjatë viteve të presidentit Klinton dhe për marrëdhëniet që kishim me botën në atë kohë. Këto janë të gjitha pluse dhe nuk mendoj se ka njeri më efektiv në fushatë, sesa presidenti Klinton”. Republikanët e pranojnë se Bill Klinton mund të jetë i jashtëzakonshëm në fushatë. Por, disa prej tyre thonë se prania shumë e dukshme e ish-presidentit në fushatën e zotit Kerry, do të kishte efektin e nxitjes së votuesve konservatorë për të marrë pjesë në votime dhe për të mbështetur presidentin Bush në nëntor. Aktivisti konservator Bei Buçanan foli në televizionin NBC. “Nuk ka diskutim që sa më shumë të shfaqet Bill Klintoni në televizion, duke folur për Monika Levinski dhe ato ditë skandaloze, aq më e favorshme do të jetë për presidentin Bush për të marrë votat e konservatorëve”. Por, kanë mbetur ende katër muaj para zgjedhjeve dhe shumë analistë besojnë se faktori Klinton do të ketë pak ndikim në zgjedhje që kanë mundësi të përqendrohen tek gjendja në Irak dhe tek ekonomia e brendshme.


"Uinston Çërçill" i Blake, libri më i kërkuar i javës

TIRANë - “Uniston Çërçill”, shkruar nga Robert Blake, është libri më i kërkuar në libraritë e kryeqytetit gjatë kësaj jave. Ky libër sjell histori, dokumente, fjalime dhe foto dhe momente nga jeta dhe veprimtari ushtarake të Çërçill. Në të pasqyrohet jetëshkrimi i atyre njerëzve që kanë luajtur një rol të madh dhe të rëndësishëm në histori, jetë e art. Ky kontribut ka ende ndikim të madh në kulturën bashkëkohore. Uinston Çërçill është pa dyshim, kryeministri më i njohur i Britanisë së Madhe. Ai jetoi ngjarjet më të mëdha të shekullit të 20-të; Luftën e Parë Botërore, Krizën e viteve 20, Luftën Boere, Luftën e Dytë Botërore, Zbarkimin në Normandi, Fitoren e Aleatëve, Fillimin e Luftës Atomike, Konferencën e Jaltës e deri te krisja në Bllokun e Komunizmit Lindor. I ndodhur në qendër të këtyre lëvizjeve, ai u bë dëshmitari dhe një nga njerëzit që ndikoi më shumë në politikën dhe fatet e botës deri në mesin e shekullit 20-të. Ky libër vjen për lexuesin i përkthyer nga Albana Kozeli dhe publikuar nga Shtëpia botuese “Naim Frashëri”.


"Dinastia e Mafias", libri më i kërkuar

Libri që është radhitur në krye të top listës, si libri më i kërkuar në libraraitë e kryeqytetit është romani historik “Dinastia e Mafias”. Shkëlqimi dhe rënia e familjes kriminaleGambino, është një libër i shkruar nga John H. Davis dhe radhitet si libri më i kërkuar në libraritë më kryesore të Tiranës gjatë javës që lamë pas. Libri është përkthyer nga Përparim Mulosmani dhe publikuar nga Shtëpia Botuese “Arbëria”. Ky libër është vlerësuar nga kritika, si “një histori fantastike lakmie, dhune, korrupsioni dhe tradhtie përgjatë gjithë një shekulli”. Eksperti i mafias, John H. Davis, përmes këtij romani tregon historinë e detajuar të familjes Gambino, që prej mbërritjes së saj në Shtetet e Bashkuara të Amerikës, si një familje e thjeshtë, deri në kthimin e saj në një prej familjeve më të pasura. E gjitha kjo arrihet vetëm përmes krimit dhe korrupsionit. Nëpër faqet e tij ndeshen personazhe realë, si Lucky Luciano, Frank Costello, Vito Genovese, Carlo Gambino, Paul Castellano dhe John Gotti, për të cilët vrasja dhe tradhtia janë biznes i përditshëm.



Dom Simon Filipaj, i vetmi që realizoi një ëndërr 2000 vjeçare

Është me interes të vihet në dukje, se dom Simon Filipaj krahas punës për ndërtimin e objekteve fetare, përkthimeve të teksteve biblike, që në fillim u mor në heshtje dhe fshehtazi (për shkak të drojës nga pushteti komunist) me mbledhjen, sistemimin dhe përpunimin e gurrës popullore, pra folklorin e pasur, përmbledhje, të cilat më pas ia dorëzoi institutit Albanologjik të Prishtinës. Vjeljes së materialeve folklorike iu përvesh në sajë të dëshirës së madhe dhe dashurisë që ushqeu për kulturën tonë popullore. Kështu, si i pari folklorist pas Luftës së Dytë Botërore i trevave shqiptare në Mal të Zi dhe më gjerë, arriti të shpëtojë nga zhdukja dhe harresa një grumbull të madh të këtij visari gojor të mbledhura më besnikëri, si: epika legjendare, balada, këngë dhe poezi popullore të zhvilluara në lirikë, këngë dashurie, vajtime, gjëmë, anekdota etj, duke i botuar ato që nga numri i parë i vjetarit “Gjurmime albanologjike - Folklor dhe etnologji”, Prishtinë, 1971, ’73, ’74, ’75, ’78, ’82 etj., si edhe nëpër vëllimet e posaçme folklorike që zuri të botojë instituti Albanologjik. Disa nga materialet, akoma sot gjenden të arkivuara në arkivin e këtij instituti.

Veprimtaria përkthyese
Filipaj për fillimin e përkthimeve, të cilat i përfundoi me sukses, e ndihmoi njohja e thellë e kulturës dhe gjuhës popullore me përmasa buzukiane, si dhe njohja e mirë e gjuhëve biblike. Për seriozitetin e punës së tij 40 vjeçare të bërë, na flet fakti se ai, përveç shqipes dhe kroatishtes, zotë-ronte mirë latinishten, greqishten e vjetër dhe italishten. Gjatë përkthimeve u shërbye edhe me hebreishten, kurse nga gjuhët e sotme në përkthime e ndihmonte mjaft, njohja edhe e gjuhës frënge. Përkthyesi, megjithëse ishte njohës i mirë i letërsisë dhe gjuhës shqipe, për shkak të rikompozimit të gjuhës shqipe dhe pamundësisë se kontaktimit më botën intelektuale shqiptare, e cila ishte e zhytur me ideo-logjinë ateiste, pati vështirësi jo të pakta, në tekstet në gjuhën semiti, por falë intelegjencës së tij të rrallë, me sukses ia doli në krye, duke i mbetur besnik formave të përkthimit dhe duke ruajtur veçoritë stilistike të Biblës. “Shqipja”, thoshte dom Simoni, “ka aftësinë ta japë terminologjinë vështrimplotë në përkthimin e Biblës, sikur kanë patur gjuhët klasike”. Sipas gjuhëtarëve të shquar shqiptarë, përkthyesi, duke e bërë përkthimin e librave të Besëlidhjes së vjetër nga “Nova vulgata” (përkthim i Biblës në latinisht nga shën Jeronimi, shek.IV) dhe librat e Besëlidhjës së re nga gjuha greqishte, me mjeshtri të madhe iu përgjigj në tërësi kërkesave gjuhësore e interpretuese të gjuhës së sotme shqipe.

Bibla e Shenjtë, kryevepra e dom Simonit
Nëpërmjet Biblës, e cila përmban fjalën e Zotit dhe është një libër i veçantë i mbarë botës, ne hyjmë ndër popujt e përparuar të botës së qytetëruar. Përkthimi dhe botimi i Biblës në tërësi si dhe i teksteve të tjera liturgjike, për çdo gjuhë, kohë dhe hapësirë, është ngjarje e dorës së parë fetaro-kulturore. Duke patur parasysh lidhjen e ngushtë të gjuhës, traditës dhe kulturës shqiptare më atë të Biblës, për ne shqiptarët, përkthimi i kësaj vepre të rrallë, ka një domethënie historike. Kështu, sa herë që përmenden viganët e ndritur të kulurës shqipatre: atë Pal Engjëlli, don Gjon Buzuku, papa Lekë Matrenga, imzot Pjeter Budi, imzot Frang Bardhi, imzot Pjetër Bogdani, imzot Grigori i Durrësit, Konstantin Kristoforidhi, imzot Fan Noli, atë Shtjefën Gjeçovi, atë Gjergj Fishta e shumë të tjerë, detyrimisht kujtohet edhe, modeli i priftit atdhetar, shqipëruesi i Biblës, dom Simon Filipaj, i cili ishte i vetmi që në botën shqiptare arriti të realizojë një ëndërr 2000 vjeçare të kombit tonë. Filipaj, rilindasi i fundit shqiptar me përkthimin e Biblës dhe librave të tjera liturgjike, hyn si i merituar në analet e kulturës shqiptare.

__________________
Ti Shqiperi me jep nder,
me jep emrin shqipetar,
zemren ti ma gatove,
plot me deshire dhe me zjarr!