Disa kratere kaliks, disa enë të tjera prej qeramike dhe një furrë për pjekjen e qeramikës, ishin objektet për restaurim gjatë vitit 2002 në Laboratorin e Konservimit dhe Arkeometrisë pranë Institutit të Kulturës Popullore në Tiranë. Krahas tyre, një flamur zyrtar i kohës së princ Vidit, një aristokrat austriak, ish-kreu i shtetit shqiptar në vitin 1914, filloi të restaurohet gjatë muajit Nëntor në këtë laborator. Prof.As. Dr. Frederik Stamati, shef i këtij laboratori, i tha se, "ky flamur shumë i dëmtuar, mund të jetë i vetmi i periudhës kur në krye të shtetit shqiptar ishte princ Vidi, i cili ka mbërritur deri në ditët tona". -Tre kratere kaliks dhe historia e tyre Specialistët e Laboratorit të Konservimit dhe Arkeometrisë, i krijuar 45 vjet më parë, kryen gjatë 2002-shit, një sërë proçedurash për restaurimin e tre kratereve kaliks (enë prej qeramike) të zbuluar pranë Apollonisë, qytet antik në afërsi të Fierit. Sipas Frederik Stamatit, shef i Laboratorit të Konservimit, "njëri prej kratereve, i zbuluar në fshatin Avaleas, pranë Apollonisë, u restaurua për herë të dytë, pasi restaurimi i parë i tij vite më parë (jo nga Laboratori i Konservimit) rezultoi i dështuar. I zbuluar rastësisht në vitin 1973, ky krater i datuar në shek VI, ishte i copëtuar në 100 pjesë të vogla. Dy krateret e tjerë kaliks, më të vegjël se i pari, janë zbuluar në muajin Shkurt të vitit 2002 në fshatin Radostinë edhe ky në afërsi të Apollonisë, qytetit antik të themeluar si koloni greke në shek VI p.e.s. Për herë të fundit, në Laboratorin e Konservimit, ishin restauruar dy fragmente tekstili të shek VII dhe disa objekte të tjera prej qeramike. Krateri kaliks, është një enë prej qeramike, e cila shërbente në antikitet si një enë për përzjerjen e lëngjeve të ndryshme (kështu përkthehet edhe nga greqishtja). Mësohet se në vendin tonë, janë zbuluar deri më sot, vetëm 7 objekte të tilla, ndërkohë që historia e tyre është shumë e gjatë. Pas vdekjes së Patroklit në luftën me Trojën, miku i tij më i ngushtë Akili, organizoi për nder të tij disa Lojra Olimpike. Homeri shkruan tek 'Iliada', se "me këtë rast ai (Akili), caktoi edhe një çmim të V-të, i cili do të simbolizohej nga një kupë e lartë me dy vegje (mbajtëse)"... Ky ishte krateri kaliks. - Një flamur zyrtar drejt restaurimit... Një flamur zyrtar i kohës së princ Vidit, filloi të restaurohet gjatë vitit 2002, në Laboratorin e Konservimit dhe Arkeometrisë. Ky flamur shumë i dëmtuar, mund të jetë i vetmi i periudhës kur në krye të shtetit shqiptar ishte princ Vidi, i cili ka mbërritur deri në ditët tona". Në mes të shqiponjës me dy krerë, që shfaqet në flamurin me sfond të kuq, paraqitet një stemë (emblemë) perandorake. Stamati mendon se, "kjo stemë mund të jetë e princ Vidit", gjë që vërtetohet nga një shkrim i botuar në 11 Janar 1914 në "Përlindjen shqiptare", një revistë e kohës. Në të (revistën) shkruhet: "Nga kujdesjet më të para të Princit Vid, ka për të qënë për të ba (bërë) formën (stemën) e shtetit të ri. Këto armë (shenja), do të jenë Shqipja e Skënderbegut me dy krena (krerë), që do të kenë në parzëm (parzmore) armët e Princit Vid, që janë një pavon (pallua) që ka të pështjellun bishtin, në shtresën e florinjtë...". Në flamurin që pret të restaurohet, paraqitet në mes të emblemës së tij pikërisht një pallua, (i cili përmendet në shkrimin e mësipërm si shenjë e Princit Vid), në ngjyrë blu me sfond të verdhë. "Kush e ka përdorur?", ose "është vërtet i vetmi flamur i kësaj periudhe?", apo "është qëndisur në Austri (vendi i Vidit), në Shqipëri, apo diku tjetër?", janë pyetje që specialistët e Laboratorit të Konservimit nuk dinë ende t'u përgjigjen... "E vetmja gjë që dimë me siguri është se flamuri është përdorur, pasi në shumë pjesë të tij kemi gjetur arnime apo modifikime të ndryshme", shprehet Stamati. Ndërsa momentalisht, konservuesit kanë marrë masat që të ndalojnë dekompozimin nga kalbja të flamurit, e së shpejti ai do të restaurohet. Sipas Stamatit, nuk dihet kohëzgjatja e proçesit të restaurimit. Flamuri i është dorëzuar Akademisë së Shkencave, atëherë Instituti i Shkencave të Shqipërisë (ISHSH), në vitin 1946 (nuk dihet nga kush) dhe më vonë ka qënë pjesë e fondit të Institutit të Kulturës Popullore (IKP). -Restaurimi i një furre për pjekjen e qeramikës Gjatë këtij viti (2002) përfunduan proçedurat më kryesore të restaurimit të një furre për pjekjen e qeramikës, që i përket fundit të Epokës së Hekurit (shek. VI p.e.s.). Ajo është zbuluar rastësisht në fshatin Progër (Devoll). "Kjo furrë, ka një rëndësi të veçantë për njohjen e teknikave të ndërtimit të objekteve prej qeramike në atë kohë", tha Stamati. Përbërja e furrës, mund të tregojë nxehtësinë maksimale që mund të arrinte ajo, e në këtë mënyrë llojin e qeramikës që mund të prodhonte, pasi nxehtësia i jep ngjyrën fillestare dhe fortësinë objektit prej qeramike. Një furrë e ngjashme me atë që u restaurua në Laboratorin e Konservimit ndodhet e ekspozuar në një nga pavionet e Muzeut Arkeologjik të Durrësit, i përuruar në Mars të këtij viti. Bashkë me furrën në Laboratorin e Konservimit ka përfunduar restaurimi edhe i një grupi enësh prej qeramike, të zbuluara në qytetin antik të Apollonisë. Krahas saj, specialistët e Laboratorit të Konservimit dhe Arkeometrisë, përfunduan restaurimin e një grupi enësh prej qeramike dhe metali, të zbuluara para viteve '90-të, por edhe gjatë viteve të fundit, në qytetin antik të Apollonisë. - Laboratori 45 vjeçar... i Konservimit dhe Arkeometrisë: Eshtë krijuar në vitin 1957, me ndihmën e disa specialistëve nga Rusia që në ato kohë po kryenin gërmime arkeologjike në Apolloni. Laboratori i Konservimit dhe Arkeometrisë, i cili ndodhet në katin e poshtëm (pothuajse i nëndheshëm) të Qëndrës së Studimeve Gjeografike buzë Kalasë së Tiranës, është i vetmi i këtij lloji në Shqipëri. Ndonëse ekzistojnë edhe disa laboratorë të tjerë më të vegjël, që arkeologët i ngrejnë gjatë ekspeditave arkeologjike. Këto të fundit, janë shumë të vegjël, të kufizuar në objektet që restaurojnë dhe të përkohshëm. Në këtë laborator, janë restauruar edhe më parë flamuj zyrtarë, krahas objekteve të shumta arkeologjike, në fillim disa që i përkisnin periudhës së viteve '30-të e më vonë flamurin zyrtar të Bandës Kombëtare muzikore "Vatra". Laboratori është nën varësinë e Institutit të Kulturës Popullore, ndërsa prej kohësh, në Kryesinë e Akademisë së Shkencave, diskutohet mendimi që ky institucion të fitojë statusin e një organizmi të veçantë, nën varësinë direkte të kësaj akademie.