Euroliga, ndizet beteja për kualifikimin

Do të nisë sonte në mbrëmje java e 12-të e sezonit të rregullt të Euroligës dhe, ndërsa kanë mbetur vetëm 2 takime të tjera, disa ekipe kanë nisur tashmë të përqendrohen në 16-shen, që do të pasojë. Pas përfundimit të sezonit të rregullt, 16 ekipet që do të kualifikohen nga 3 grupet aktuale do të ndahen në 4 grupe, ku dhe do të dalin ekipet që do të luajnë në finalen 4-she. Ndërsa disa ekipe e kanë siguruar tashmë kualifikimin, të tjerë duhet të vënë në dispozicion të konkurrimit të gjitha energjitë. Përveç 5 ekipeve nga secili prej 3 grupeve, do të sigurojë kualifikimin edhe ekipi me bilancin më të mirë i renditur i gjashti. Zalgiris Kaunas në grupin B dhe Olimpiakosi në C janë ekipet që duken më afër këtij vendi të gjashtë, me nga 5 fitore dhe 6 humbje secila, por 2 takimet e fundit mund të përfshijnë në betejën për këtë vend edhe ekipe të tjera. Diferenca mes pikëve të shënuara dhe atyre të pësuara do të jetë faktori që do të merret parasysh në rast se ekipet janë në luftë për vendin e 16-të. Në Grupin A janë tri ekipe me bilancin 4 fitore e 7 humbje që synojnë këtë vend, Po Ortezi, Lotomatika Roma dhe Union Olimpija. Në grupin B, Zalgirisi lufton me Panathinaikosin për vendin e 5-të. Gjithsesi, ndeshjet e dy javëve të fundit mund të përmbysin gjithçka. Të mërkurën në mbrëmje, në Stamboll do të zhvillohet e vetmja ndeshje e vlefshme për grupin A. Ylkeri i Stambollit, që ka 6 fitore dhe 5 humbje, pret në fushën e vet Cibona Vip-in, që shënon 7 fitore dhe 4 humbje. Dy ekipet do të luftojnë mes tyre për vendin e 2-të në grup. Cibona, aktualisht e vetme pas kryesueses, Barcelonës, është matematikisht e kualifikuar. Ndërsa Ylkeri, që mban vendin e 3-të, do të kërkojë fitoren që të shmanget nga zona ku rreziku i moskualifikimit është ende i pranishëm. Në Grupin B, ndeshja më e rëndësishme e së mërkurës do të jeta ajo që do të zhvillohet në Bolonjë të Italisë, mes Skiperit dhe CSKA-së së Moskës. Skiperi, që ka 7 fitore dhe 4 humbje, me një fitore ndaj CSKA-së do t'i hapte vetes jo vetëm rrugën drejt kryesimit në grup, por edhe do të shpresonte për ta mbyllur sezonin e rregullt në vendin e parë, ose të dytë të renditjes së përgjithshme. Skiperi, që i shkaktoi humbjen e parë CSKA-së, duke e thyer në Moskë me 1 pikë epërsi, ka fituar 6 ndër 7 takimet e fundit dhe është ndër ekipet më mbresëlënëse të javëve të fundit. Milosh Vujaniç, me një mesatare prej 29.7 pikësh për ndeshje gjatë sezonit, është çelësi i suksesit të italianëve, ndërsa është dalluar edhe Matias Smodis. Në grupin C, kryesuesit e Efes Pilsenit do të udhëtojnë drejt Gjermanisë për t'u përballur me Albën e Berlinit. Efesi do të kërkojë fitoren për të garantuar kryesimin e grupit ndaj Pamesës, që renditet e dyta. Alba, që ka humbur 7 takimet e fundit ndaj turqve, zë vendin e fundit në grup, me 2 fitore dhe 9 humbje, dhe ka humbur shpresat për kualifikimin.

__________________
Njeriu lind per ta jetuar jeten, pastaj kerkon magjine e saj: dashurine, pasi e gjen... jeta stoliset me miresi... miresise i falesh dhe me engjellin tend keni nje zemer te perbashket. Te dua cmendurisht engjelli im.